Chihande 19

Yakova Ali naTanga Yayinene

ACHITALE hatanga kaneyi yayinene. Ava hivana vaYakova vamalunga 12. Kaha apwilenga navana vamapwevo nawa. Wejivako majina avana vamwe tahi? Tulinangulenuho amwe.

Leya asemene Luvene, Shimeyone, Levi naYuta. Lakele ahombele hakumona ikiye mwana pimbi. Shikaho ambachile ngamba yenyi wapwevo, Mbiliha, nakumuhana kuli Yakova, kaha Mbiliha asemene vana vavali vamalunga vaNdane naNafwatale. Leya nayikiye ahanyine ndungo yenyi wapwevo Zelepa, kuli Yakova, kaha Zelepa asemene Ngate naAshele. Kaha Leya asemene vana vakwavo vavali vamalunga, Isakale naZevulune.

Lakele asemene jino mwana. Amulukile lijina ngwenyi Yosefwe. Kanda numba tulilongese vyavivulu vyaYosefwe, mwomwo apwile jino himutu wamulemu. Ava vakivo vana 11 vaze Yakova asemene shimbu atwaminenga naise yaLakele, Lavane.

Yakova apwile nawa navana vamapwevo, oloze Mbimbiliya yavulukako lijina lyaumwe kaha. Lijina lyenyi Njina.

Yakova asakile jino kufuma kuli Lavane nakukinduluka kuKanane. Akungulwile tanga yenyi yayinene, namikoko navangombe jenyi, kaha nakutambuka ungeji wausuku.

Omu Yakova natanga yenyi vatwamine chachindende muKanane, Lakele asemene nawa mwana walunga. Amusemenene muungeji. Lakele evwile misongo yayinene, kaha afwilile hakusapuluka. Oloze uze kemba walunga ayoyele. Yakova amulukile ngwenyi Mbenjamine.

Tunakusaka twanuke majina avana vaYakova vamalunga vosena 12 mwomwo vaka-lifuchi lyaIsalele vosena vafumine muli vakivo. Natuwana, majina amiyachi 12 yaIsalele yafuma kumajina avana vaYakova vamalunga 10 navana vaYosefwe vamalunga vavali. Isaka atwamine myaka yayivulu kufuma hakusemuka chavana vosenava, kaha atela evwilenga kuwaha hakupwa navazukulu jenyi vavavulu. Oloze tutalenu vyasolokele kuli muzukulwenyi wapwevo Njina.

Kuputuka 29:32-35; 30:1-26; 35:16-19; 37:35.