Chihande 24

Yosefwe Mwaveseka Vandumbwenyi

YOSEFWE mwasaka ejive nge vayayenyi 10 vachili lika valwiso nakuhona kutetela. Ngocho himwavamba ngwenyi: ‘Enu muvandoji. Muneza nakutala haze hazeyela lifuchi lyetu.’

Vakivo ngwavo: ‘Nduma. Tuvatu vakushishika. Tuvana valunga umwe. Twapwile 12. Oloze ndumbwetu umwe katwamakoko, kaha kasulasongo ali kwimbo nasetu.’

Yosefwe mwalyonga nge ketavilileko. Hikuhaka Shimeyone mukamenga, nakusuula vakwavo vambate kulya nakuya kwimbo. Avalwezele nawa ngwenyi: ‘Hakwiza cheka, kuvanga mukanehe kasulasongo kenu.’

Omu vanahiluka kwimbo kuKanane, hikumulweza sevo Yakova vyosena vize vyasolokanga. Yakova mwalinyenga. Hikulila ngwenyi: ‘Yosefwe atoka, kaha Shimeyone nawa wauchi. Kangweshi kumihana mwanami wakasulasongo Mbenjamineko.’ Oloze omu kulya chinaputuka kumana, Yakova hikuvetavisa vambate Mbenjamine kuEjipitu vakeze nakulya chikwavo.

Jino Yosefwe mwamona vandumbwenyi vali nakwiza. Nawahilila hakumona songo yenyi Mbenjamine. Enga, vakivo kavejivileko nge mutu kanou wamulemu ikiye Yosefwe. Yosefwe mwaveseka cheka nawa vaze vayayenyi 10.

Hikulweza vangamba jenyi vavasulishile masaka avo navyakulya. Jino hikuhaka lupasa lwenyi lwapalata musaka yaMbenjamine, chakuzeneka vakivo kutachikiza. Omu vanatambuka katunda kakandende, Yosefwe hikuvatumina vangamba jenyi. Hakuvawana, vangamba vavambile ngwavo: ‘Mwomwo ika munevila lupasa lwapalata lwamwata?’

Vakivo ngwavo: ‘Katwevile lupasa lwenyiko. Weshowo namuwana nalupasa kana, afwenga.’

Ngocho vangamba hikusanda mumasaka osena, nakuwana lupasa musaka yaMbenjamine, nge muunamono hano. Vangamba ngwavo: ‘Enu muvosena yenu tuhu, oloze Mbenjamine mwaya nayetu.’ Vayayenyi 10 navalinga ngachilihi jino?

Vosena hikukinduluka naMbenjamine kuzuvo yaYosefwe. Yosefwe hikuvamba ngwenyi: ‘Enu vosena yenunga tuhu kwimbo, oloze Mbenjamine mwasala kuno apwenga ndungo yami.’

Yuta jino mwakulako ngwenyi: ‘Nge nanguya kwimbo chakuhona kanyike, tata mwakafwa mwomwo amuzanga chikuma. Shikaho mwane, ami ngusale ngupwenga ndungo yenu, oloze mwechenu kanyike ayenga kwimbo.’

Yosefwe himwamona ngwenyi vayayenyi vanalumuka. Kaveshi valwiso nakuhona kutetelako. Tutalenu jino mumwalinga Yosefwe.

Kuputuka 42:9-38; 43:1-34; 44:1-34.