Yosefwe Vanamuhake muKamenga
Chihande 22
Yosefwe Vanamuhake muKamenga
YOSEFWE ali namyaka yakusemuka 17 halwola vanakumutwala kuEjipitu. Kuze hikumulanjisa kuli Potefwale. Potefwale azata kuli Fwalo, mwangana waEjipitu.
Yosefwe hikuzata chikuma milimo yakaka yenyi, Potefwale. Jino Yosefwe hakukola, Potefwale hikumulingisa kupwa mukulwane muka-kulama zuvo yenyi yosena. Nyi mwomwo ika ali mukamenga? Mwomwo yapwevo lyaPotefwale.
Yosefwe hanakolo jino nakupwa lunga wamwaza chikuma, shikaho pwevo lyaPotefwale mwasaka alisavale nenyi. Oloze Yosefwe nejiva nge chakuhenga kaha himwakana. Pwevo lyaPotefwale hikupihilila. Omu neza lunga lyenyi, himwalyonga ngwenyi: ‘Yosefwe mutu wamupi asakanga alisavale nayami!’ Potefwale himwetava mazu apuwenyi, nakupihilila naYosefwe. Shikaho namumbilila mukamenga.
Nakushimbula chiku, mukulwane wakamenga mwamona Yosefwe kupwa mutu wamwaza. Kaha hikumulingisa kupwa mukulwane wavafunge. Likumbi limwe Fwalo mwapihilila navatu jenyi vavali muka-kuhana lupasa namuka-kwocha jimbolo, nakuvambila mukamenga. Ufuku umwe vosena navalota vilota vyakulipwila, oloze kwijiva muvinalumbunukila chiku. Lichako Yosefwe ngwenyi: ‘Ngulwezenu vilota vyenu.’ Omu vanamulweze, Yosefwe mungolo jaKalunga, himwalumbununa vilota vyavo.
Yosefwe mwamba kuli muka-kuhana lupasa ngwenyi: ‘Shimbu kanda muhite makumbi atatu navakufumisa mukamenga, nakupwa cheka muka-kuhana lupasa lwaFwalo.’ Kaha Yosefwe nawa ngwenyi: ‘Omu naulovoka, mulweze Fwalo vyayami, nakunguhanjikilako vangufumise muno.’ Oloze kuli muka-kwocha jimbolo, Yosefwe ngwenyi: ‘Shimbu kanda muhite makumbi atatu Fwalo mwavatula mutwe wove.’
Mumakumbi atatu vyuma hinavisoloka ngana mwambanga Yosefwe. Fwalo hikuvatula mutwe wamuka-kwocha jimbolo. Oloze muka-kuhana lupasa, hikumufumisa mukamenga nakuzachila cheka mwangana. Oloze muka-kuhana lupasa navulyama vyaYosefwe! Kumulweza Fwalo vyaYosefwe chiku, ngocho Yosefwe hikusala mukamenga.