Chihanda 1

Kufuma kuKutenga chaVyuma Swi NakuLivaji

Uno melu namavu vyafuma kulihi? Nyi likumbi, kakweji navatanganyika, navyuma vyavivulu vyahano hamavu vyejile ngachilihi? Mbimbiliya yakumbulula mwamuchano hakwamba ngwayo vyosenevi vavitengele kuli Kalunga. Shikaho mukanda wetu unaputuka navihande vyaMbimbiliya vyakuvuluka muvatengele vyuma.

Tweji kulinangula nge vatu alivangile Kalunga kutenga, vapwile vatu vakushipilitu chiwenya ikiye. Vapwile vangelo. Mavu vawatengelele vatu nge yetu. Kalunga atengele lunga napwevo valukile ngwavo Alama naEve nakuvahaka mumilemba yamwaza. Oloze kavononokele Kalungako, ngocho vajimbalishile lisesa vavahanyine lyakukatwama haya myaka yosena.

Kufuma hakutenga Alama swi nakuLivaji lyalinene, hahichile myaka 1,656. Mutando kaneyi mwapwilenga vatu vavapi vavavulu. Mwilu, mwapwile vatu vakushipilitu vakuhona kumona nameso, vaSatana navangelo jenyi vavapi. Hano hamavu, hapwile Kena navatu vakwavo vavapi, namalunga veka vapwile nge vikishikishi. Oloze hamavu hapwile navatu vamwaza nawa—Avele, Enoke naNowa. Vatu tunavuluka navyuma vyalingiwile natuvitanga muChihanda CHATETE.