Chihande 6

Mwana Wamwaza, naMwana Wamupi

ACHITALE jino vaKena naAvele. Himashina jamalunga jino. Kena hinjimi. Himuka-kulima kulya chamanona namihako namafwo akulya.

Avele apwile jino hikafunga kamikoko. Asakilenga kulela vana vamikoko. Kutwala muze mikoko kana vakulile, kaha Avele apwile jino nakufunga utanga wamikoko waunene.

Likumbi limwe Kena naAvele vahanyine wana kuli Kalunga. Kena anehele vyakulya alimine. Kaha Avele anehele mukoko uze azangile chikuma. Yehova evwilile kuwaha Avele nawana wenyi. Oloze kamwivwililile kuwaha Kena nawana wenyiko. Unatachikiza chuma chalingishile ngocho?

Keshi nge wana waAvele ukiko wapwile wamwaza chikuma kuzomboka waKenako. Oloze mwomwo Avele apwile mutu wamwaza. Azangile Yehova nandumbwenyi nawa. Oloze Kena apwile wamupi; kazangile ndumbwenyiko.

Shikaho Kalunga amulwezele Kena nge alumune muchima wenyi. Oloze Kena kalingile ngochoko. Apihililile chikuma mwomwo Kalunga azangile chikuma Avele. Shikaho Kena ambile kuli Avele ngwenyi: ‘Twatuyenga muchipapa.’ (New World Translation) Omu vapwile kuze kwauka wavo, Kena avetele songo yenyi Avele. Amuvetele chikuma nakumujiha. Kutala Kena kalingile chuma chaukenyako nyi?

Numba tuhu Avele afwile, oloze Kalunga hanga apwile nakumwanuka lika. Avele apwile mutu wamwaza, kaha Yehova keshi kuvulyama vatu vanganako. Shikaho likumbi limwe Yehova Kalunga mwakamusangula Avele. Halwola kana olwo jino Avele keshi kukafwa chekako. Mwakatwamanga hano hamavu haya myaka yosena. Uno kacheshi kukawaha kukejiva vatu vakufwana nge Aveleko nyi?

Kalunga kasaka vatu vakufwana nge Kenako. Shikangaho omu Kena ajihile songo yenyi, Kalunga amuzangamishile hakumuhanga nakumufumisa kutanga yenyi yosena. Omu Kena atutukile nakuya nakutwama kweka, ambachile songo yenyi umwe wapwevo, nakukamutenga jino muka-mahyenyi.

Kutwala muze Kena namuka-mahyenyi vaputukile kusema vana. Vana vakwavo vaAlama naEve vamalunga navava vamapwevo valimbachile, kaha navakivo vasemene vana. Ngocho vatu vavulile jino hano hamavu. Tulinangulenuho vamwe.

Kuputuka 4:2-26; WaYowano 1, 3:11, 12; Yowano 11:25.