Chihande 110

Chimoteu—Mutu Wamuhya Akafwile Paulu

MUKWEZE unakumona hano nakaposetolo Paulu ikiye Chimoteu. Chimoteu navausoko wenyi vatwama muLusutala. Naye ikiye Yunese, kakayenyi ikiye Lowise.

Uno ungeji waPaulu wakuya kuLusutala ukiko wamuchitatu. Hanahichi kafwe mwaka umwe, kufuma haze Paulu naMbalanape vejile nakwambulula haungeji watete. Jino Paulu nakinduluka cheka nasepa lyenyi Shilase.

Unejiva ovyo Paulu anakulweza Chimoteu tahi? Anakumuhulisa ngwenyi: ‘Musaka utambuke nayami naShilase nyi? Tunahase kukuzachisa mumulimo wakwambulwila vatu vakumafuchi akwakusuku.’

Chimoteu ngwenyi: ‘Eyo, nangusaka nguyenga.’ Nakushimbula chiku Chimoteu himwaseza vausoko wenyi nakutambuka jino naPaulu naShilase. Oloze shimbu kanda tulinangule vyaungeji wavo, tuwanenu vinapunga nakusoloka kuli Paulu. Hanahichi jino myaka kafwe 17 kufuma haze Yesu alisolwele kuli ikiye hajila yakuya kuNdamashiku.

Anuka, Paulu ejile kuNdamashiku nakuyanjisa tumbaji twaYesu, oloze jino hanalumuka lyehi kambaji kenyi! Kutwala muze vaka-kole vamwe hikutonda vamujihe Paulu mwomwo mujimbu waYesu anakwambulula kavausakileko. Oloze tumbaji navamukafwa Paulu aseunuke. Hinavamuzezula mumutonga nakumusulwila kusali yakembwe yalimbo.

Paulu hikuya jino kuAndeyoka nakwambulwilako. Kuno kukiko vaka-kukavangiza Yesu vaputukile kuvavuluka ngwavo vaka-Kulishitu. Jino vaPaulu naMbalanape hikuvatuma kufuma kuAndeyoka nakuya nakwambulula kumafuchi akwakusuku. Hinavaheta nakuLusutala kwimbo lyaChimoteu.

Jino Paulu nakinduluka cheka kuLusutala haungeji wenyi wamuchivali, hanyima yamwaka umwe. Unatachikiza kunavaya, omu Chimoteu mwaya naPaulu naShilase nyi? Tala hamapu, mangana tulilongeseko vihela vimwe.

Chatete, navaya kuIkonyume yili mukamwihi, kaha nakulimbo lyamuchivali lyaAndeyoka. Kufumaho hikukanduka kuTolowa, kaha swi nakuFwilipi, Tesolonyika naMbeleya. Wayimono oho ili Atene hamapu nyi? Paulu hikwambulwilamo. Kufumaho hinavatwama nakwambulula mwaka umwe nachimbwa chamwaka muKolinde. Kukuminyina hikutula chindende muEfwesu. Jino navahiluka nawato kuKesaliya, nakukanduka kuAndeyoka, kuze atwama Paulu.

Ngocho Chimoteu natambuka makulukaji ajimayilo nakukafwa Paulu kwambulula “mujimbu wamwaza” nakutunga vikungulwilo vyavaka-Kulishitu vyavivulu. Omwo mukakola, kutala mukapwa ngamba yaKalunga wakushishika chiwenya Chimoteu nyi?

Vilinga 9:19-30; 11:19-26; tupetulu 13 swi naku 17; 18:1-22.

[Mapu]

(Hakusaka mumone mazu akwala kanawa, talenu mumukanda)

Loma [Rome]

Melita [Malta]

Tesolonyika [Thessalonica]

Mbeleya [Beroea]

Kolinde [Corinth]

Fwilipi [Phillipi]

Atene [Athens]

Kelete [Crete]

Tolowa [Troas]

Efwesu [Ephesus]

Miletu [Miletus]

Kolose [Colossae]

Andeyoka [Antioch]

Ikonyume [Iconium]

Lusutala [Lystra]

Andeyoka [Antioch]

Kupulusu [Cyprus]

Ndamashiku [Damascus]

Kesaliya [Caesarea]

Yopa [Joppa]

Yelusalema [Jerusalem]

KALUNGALWIJI WAMUNENE (MEDITERRANEAN)