Navatatamina muYelusalema
Chihande 105
Navatatamina muYelusalema
VATU ava vakivo vaka-kumukavangiza Yesu. Vanamwononoka nakutwama muYelusalema. Shimbu vanakutatamina mumwe, lushindo hinaluzalisa zuvo yosena. Kwijiva nge kuhuhwa chapeho yangolo chikuma. Kaha jino malimi akufwana nge tumilangi twakakahya hinatusoloka hamutwe wakambaji hikambaji. Unatumono tumilangi twakakahya tuli hali mutu himutu ngwetu? Chinakulumbununa ika?
Hichuma chakukomwesa! Yesu ali cheka mwilu naIse, kaha ali nakuhingununa shipilitu wajila yaKalunga hali vaka-kumukavangiza. Unejiva ovyo shipilitu mwavalingisa valinge? Vosena hinavaputuka kuhanjika mumalimi eka.
Vatu vavavulu muYelusalema hinavevwa lushindo nge kuhuhwa chapeho yangolo chikuma, kaha hikuunga vamone vinakulingiwa. Vatu vamwe vanafumu kumafuchi eka, vaze vaneza kuchiwanyino chaPendekoseta yavaIsalele. Chuma kana omwo chavakomwesele ava vangeji! Vanakuvevwa tumbaji navahanjika mumalimi avo vyuma vyamwaza nalingi Kalunga.
Vangeji ngwavo: ‘Vatu vosenava vakuNgalileya. Nyi ngachilihi, vali nakuhanjika mumalimi eka akumafuchi twafuma?’
Petulu himwemana nakuvalumbunwina. Mwavalweza vatu nalizu lyakukanguka muvamujihile Yesu numba vamusangule kuli Yehova. Petulu ngwenyi: ‘Jino Yesu ali mwilu natwame kulivoko lyachilyo lyaKalunga. Nahingununa shipilitu wajila yize ashikile. Shikaho munamono nakwivwa vyuma vyakukomwesa vino.’
Petulu hakuhanjika vyumevi, vatu hinavalinyenga havyuma vamulingile Yesu. Navehula ngwavo: ‘Natulinga ika?’ Petulu ngwenyi: ‘Alumukenu vamimbapachise.’ Shikaho halikumbi vene eli hinavapapachisa vatu kafwe 3,000 nakupwa jino vaka-kumukavangiza Yesu.
Pamo Nauzanga Nawa
YESU—IKIYE JILA, IKIYE MUCHANO, IKIYE KUYOYA
Vatu Vavavulu Vamwene Yesu Shimbu Kanda Pendekoseta
Kufuma halwola vamusangwile nakuheta halwola ayile mwilu, Yesu ahanjikilenga kuli tumbaji twenyi mapapa kakavulu vyuma navakatambula namujila navakavizachishilamo.