Chihande 106

Navavasokola Mukamenga

ACHITALE kangelo nasokolola lipito lyakamenga. Malunga vanakulovoka hivaposetolo jaYesu. Tuwanenu vyavalingishile numba vavahake mukamenga.

Hanashimbula kaha chindende kufuma haze tumbaji twaYesu vavahingunwinyine shipilitu wajila. Kaha chino chikiko nachisoloka: Petulu naYowano vanakuya kutembele muYelusalema nachingoloshi. Hakuheta kuze, kuwana kuchikolo, kuli mutu apwa chitonji kufuma kukusemuka chenyi. Vatu veji kumunehanga kuno hakumbi hakumbi mangana alombe mali kuli vaze vanakwingila mutembele. Hakumona Petulu naYowano, himwavalomba vamuhaneko tumwe. Vaposetolo navalinga ngachilihi?

Navemana ndundulu nakumutalou mutu wakuhutwa. Petulu ngwenyi: ‘Mali kangweshi nawoko, oloze nangukuhana ocho nguli nacho. Mulijina lyaYesu, tambuka!’ Petulu himwakwata lunga kulivoko lyenyi lyachilyo, kaha mwemana nakuputuka kutambuka. Vatu hakuchimona, hikulikomokela nakwivwa kuwaha hachuma kanechi chakukomwesa.

Petulu ngwenyi: ‘Chuma chino chakukomwesa, tunachilingi mungolo jaKalunga, uze asangwile Yesu kuvafu.’ Shimbu vanakuhanjika naYowano, vatwamina jamukwitava we-e. Vanapihilila mwomwo Petulu naYowano vali nakwambulila vatu kusanguka chaYesu. Ngocho hikuvakwata nakuvambila mukamenga.

Lichako vatwamina vamukwitava hikutwama punga yayinene. Hikusanyika vaPetulu naYowano hamwe kaha namutu vahindulanga. Vatwamina vamukwitava ngwavo: ‘Chuma kana chakukomwesa enu munachilingi nangolo jeya?’

Petulu ngwenyi nangolo jaKalunga, uze asangwile Yesu kufuma kuvafu. Vapilishitu vanahono mwakulingulwila chuma kanechi chamwaza chinasoloka chikupu. Shikaho hikuvakanda vaposetolo ngwavo kanda vakahanjika cheka vyaYesuko, kaha hikuvecha.

Mukuhita chamakumbi, vaposetolo chivambulula mujimbu waYesu nakuhindula vaka-kuviza. Teyenu yavyuma kana hinayitanda. Kaha navatu vamumembo ahata kuYelusalema hikuneha vatu javo vaka-kuviza vavoke kuli vaposetolo. Jino vatwamina vamukwitava lwiso lunavawane, ngocho hikukwata vaposetolo nakuvambila mukamenga. Oloze kushimbulamo nawa chiku.

Kuheta ufuku kangelo kaKalunga himwasokolola lipito lyakamenga, nge muze unakumona hano. Kangelo ngwenyi: ‘Yenu mukemane mutembele, kaha twalenuho nakwambulila vatu.’ Lichako nachimene, vatwamina vamukwitava hakutuma vatu vakanehe vaposetolo mukamenga, kuwana vanayi. Jino hinavavawana vali nakunangula mutembele kaha hikuvaneha kuzango yaSunendeline.

Vatwamina vamukwitava ngwavo: ‘Twamikandanga chikuma nge kanda mukahanjika cheka vyaYesuko. Oloze munazalisa lyehi muYelusalema mwosena nakunangula chenu.’ Jino vaposetolo ngwavo: ‘Chatela etu kwononoka kuli Kalunga vatu vasale munyima.’ Kaha vatwalileho lika nakunangula “mujimbu wamwaza.” Unwechi kacheshi chakutalilaho chamwaza kuli etuko nyi?

Vilinga tupetulu 3 swi naku 5.