Chihande 109

Petulu Mwaya Kuli Kolonelyu

UZE nemana haze Petulu, kaha vaze vali kunyima yenyi vakivo masepa jenyi. Jino mwomwo ika nafukamina ou kuli Petulu? Uno atela kulinga ngana nyi? Unamwijiva tahi?

Ou lunga ikiye Kolonelyu. Ikiye kapitau kamaswalale javaLoma. Kolonelyu kamwijiva Petuluko, oloze vamulwezanga kumwingisa muzuvo yenyi. Tuwanenu muchapwile.

Vaka-kumukavangiza Yesu vakulivanga vapwile vaYuleya, oloze Kolonelyu keshi kaYuleyako. Oloze azanga Kalunga, kaha eji kumulombanga, nakulingila vatu vyuma vyavivulu nalikoji. Chamwaza, likumbi limwe nachingoloshi, kuli ikiye hinakusoloka kangelo nakumulweza ngwenyi: ‘Kalunga nakwivwila kuwaha, kaha mwakumbulula kulomba chove. Tuma malunga vakasake lunga umwe vavuluka ngwavo Petulu. Atwama kuYopa muzuvo yaShimona, kwakamwihi nakalungalwiji.’

Chamwaza, kufumaha vene Kolonelyu hikutuma malunga nakutonda Petulu. Lichako, hakuheta kwakamwihi naYopa, Petulu ali helu lyazuvo yaShimona. Shimbu ali helu Kalunga mwalingisa Petulu kushinganyeka nge namono mwilu muli nakuzezumuka lihina lyalinene. Mulihina muli tunyama vamiyachi yosena. Kweseka namwaya jishimbi jaKalunga, tunyama kana vapwile chijila kuvalya, oloze lizu ngwalyo: ‘Ove Petulu, katuka. Jihako ulyenga.’

Petulu ngwenyi: ‘Nduma! Kanda ngulye lyehi chuma chachipi.’ Oloze lizu nalyamba kuli Petulu ngwalyo: ‘Evi natomesa lyehi Kalunga kanda uvivuluka nawa ngwove vyachijilako.’ Echi hinachisoloka katatu. Shimbu Petulu anakutatasana munalumbunukila chuma kana, malunga atumanga Kolonelyu hiwasha kuzuvo nakuhulisa nge Petulu kwali.

Petulu mwasuluka nakwamba ngwenyi: ‘Yami vene muli nakusaka. Munejila ika?’ Omu malunga kana vanamulumbunwina ngwavo kangelo alwezanga Kolonelyu asanyike Petulu kuzuvo yenyi, ngocho Petulu himwetava nakuya navo. Kaha lichako Petulu namasepa jenyi hikuya nakumona Kolonelyu muKesaliya.

Kolonelyu nakungulula vausoko namasepa jenyi. Petulu hakulitula, Kolonelyu mwamusesa. Hikulimbila hamavu nakulifukula kumahinji aPetulu, nge muuli nakumona. Oloze Petulu ngwenyi: ‘Katuka tuhu, nayami nawa ngumutu kaha.’ Eyo, Mbimbiliya yasolola nge chakuhenga kulifukula kumutu. Twatela kulifukula kuli Yehova uka wenyi kaha.

Petulu himwambulila vaze vanakunguluka. Petulu ngwenyi: ‘Ngunamono ngwami Kalunga eji kwitavila vatu vosena navasaka kumuzachila.’ Shimbu Petulu anakuhanjika, Kalunga hikutuma shipilitu yenyi wajila, kaha vatu vanaputuka kuhanjika malimi eka. Echi hinachikomowesa tumbaji vauYuleya vaze vejile naPetulu, mwomwo vashinganyekele nge Kalunga azanga kaha vaYuleya. Ngocho echi chinavanangula nge Kalunga kamona muyachi umwe wavatu kupwa waulemu kuhambakana muyachi ukwavoko. Unwechi kacheshi chuma chamwaza twatela twanukengako nyi?

Vilinga 10:1-48; 11:1-18; Kusoloka 19:10.