Chihande 104

Yesu Mwaya Cheka Mwilu

OMU hanahichi makumbi, Yesu mwalisolola kakavulu kuli vaka-kumukavangiza. Lwola lumwe navamumona kutumbaji kafwe 500. Hakulisolola kuli vakivo, unejiva vyuma Yesu mwavalweza? Wangana waKalunga. Yehova atumine Yesu hamavu nakunangula vyaWangana. Ngocho mwanakulinga lika numba vene nahanyima yakusanguka.

Unanuka muwapwa Wangana waKalunga? Eyo, Wangana hifulumende chikupu yaKalunga mwilu, kaha Yesu Ikiye vasakwile kuli Kalunga, nakumupwisa mwangana. Ngana mutunalinangula, Yesu asolwele mumwakapwa mwangana wamwaza hakulisa vatu, hakuhindula vaka-kuviza, nakusangula vafu!

Hano hamavu nahakapwa ngachilihi omu Yesu mwakayulanga mwamwangana mwilu hamyaka likombakaji? Eyo, kaye kosena navakakalingisa kupwa palachise yamwaza. Kakweshi kukapwa cheka jitako, chipwe uhwanga, chipwe kukola, numba vene kufwako. Tunatachikiza ngwetu ou himuchano mwomwo Kalunga atengele mavu kupwa palachise yakutwamamo vatu. Shikaho hakuputuka atengele milemba yaEtene. Kaha Yesu mwakazata vyosena vize amba Kalunga ngwenyi vipweko.

Lwola lwaYesu lwakuya mwilu jino lunahete. Yesu napunga nakulisolola kutumbaji twenyi hamakumbi 40. Jino vanejiva chikupu ngwavo wamutonyi cheka. Oloze shimbu kanda avaseze tumbaji twenyi, mwavalweza ngwenyi: ‘Kanda mukafuma muYelusalemako kuvanga munatambula shipilitu wajila.’ Shipilitu wajila yikiko ngolo jaKalunga jize jeji kuzatanga, chiwenya peho yeji kuhuhwanga, yakukafwa vaka-kumukavangiza kulinga mwaya muchima waKalunga. Kaha nawa, Yesu ngwenyi: ‘Namukangwambulula mbwe nakusongosongo yamavu.’

Omu Yesu nakumisa kuhanjika ngocho, hinakusoloka chuma chakukomwesa. Hikuzezuka nakuya mwilu, nge muze unakumona hano. Kaha livwi hinalimufwika, kaha tumbaji twenyi kumumona nawa chiku. Yesu nayi mwilu nakuputuka jino kuyula vaka-kumukavangiza vahano hamavu.

Wavaka-Kolinde 1, 15:3-8; Kusoloka 21:3, 4; Vilinga 1:1-11.