Chihande 87

Kanyike Yesu muTembele

ACHITALE kanyike anakuhanjika kuli ava vakulwane jamalunga. Vakivo valongeshi mutembele yaKalunga muYelusalema. Ou kanyike ikiye Yesu. Hanavungunukako chindende. Ali jino namyaka 12.

Valongeshi vanalikomokela hakumona Yesu natachikiza vyuma vyavivulu vyakuvuluka Kalunga navize vasoneka muMbimbiliya. Nyi mwomwo ika vaYosefwe naMaliya kaveshi hanoko? Vali kulihi? Tuwanenu chalingishile.

Hamwaka hamwaka Yosefwe kuvanga anehe tanga yenyi kuYelusalema kuchiwanyino chachilemu chaPaseka. Ungeji wakufuma kuNazaleta nakuya kuYelusalema wausuku. Wakwihi apita minyau, kaha masuhwa nawa yauchi. Myaka yize kavapwile navyoko. Vatu vavavulu vapwile vaka-kutambuka namahinji, kaha tunda yakuya kuYelusalema yakutambuka makumbi atatu.

Jino Yosefwe hali lyehi natanga yayinene. Shikaho kuli lyehi vandumbwaYesu vavanyike vatela kulama. Chamwaza, uno mwaka Yosefwe naMaliya vali haungeji wausuku wakukinduluka navana vavo kwimbo kuNazaleta. Vanakushinganyeka nge Yesu ali nakwiza muchendo chavakwavo. Oloze hakutambuka likumbi lyamuundu, Yesu kumumona pimbi. Hikumutalatalila kuli vausoko wavo nakuli vaze valiji navo, oloze kapwile navoko! Kaha hikukinduluka kuYelusalema nakutondelako.

Jino hinavamuwana Yesu ali kuno navalongeshi. Anakuvevwilila nakuvahula vihula. Kaha vatu vosena vanalikomokela hamangana ali nawo Yesu. Jino Maliya ngwenyi: ‘Ove mwanami, ikaze unatulingila ngana? Ami naiso twapwanga nakulinyenga nakukutondatonda kwakukuwana.’

Yesu ngwenyi: ‘Ikaze munangutondela? Kamwatachikijileko tahi nge chatela kuli ami kupwa muzuvo yaTata?’

Eyo, Yesu asaka kupwa kuze nahase kulilongesa vyaKalunga. Uno keshi mukiko nayetu twatela kwivwako nyi? Kwimbo kuNazaleta, hachalumingo hichalumingo Yesu kuvanga ayenga kukukunguluka. Hakuhakako chikuma muchima, alinangwile vyuma vyavivulu vyamuMbimbiliya. Tupwenu chiwenya Yesu nakukavangiza mwalingilenga.

Luka 2:41-52; Mateu 13:53-56.