Chihande 90

Napwevo WakaSamaliya haLishima

YESU anakuhwima halishima lyamuSamaliya. Tumbaji twenyi vanayi mwimbo nakulanda kulya. Pwevo anakuhanjika naYesu neza aswite meya. Mwamwamba ngwenyi: ‘Nguhaneko meya ngunwenga.’

Chuma kana chinakomwesa pwevo chiyovo. Unatachikiza vinamukomwesa? Mwomwo Yesu kaYuleya, ikiye apwa kaSamaliya. Kaha vaYuleya vavavulu kavasaka vaSamaliyako. Kaveshi numba kuvahanjikisako! Oloze Yesu azanga miyachi yavatu vosena. Jino ngwenyi: ‘Nge watachikizanga mutu anakukulomba meya, kachi ove unamulombo ikiye kaha kachi nakuhane meya akuyoya.’

Uze pwevo ngwenyi: ‘Ove mwata, kaweshi namunyanguluko, kaha lishima nawa lyalisuku chikuma. Nyi meya akuyoya muwawana kulihi?

Yesu ngwenyi: ‘Nge munwa meya amulishima lino mukevwa cheka lipwila. Oloze meya nanguhana mutu keshi kukevwa cheka lipwilako haya myaka yosena.’

Mwanapwevo ngwenyi: ‘Ove mwata, nguhane owo meya kana! Mangana kuchina nangwivwa cheka lipwila. Kaha nguhonenga kwiza kuno nakuswita meya.’

Mwanapwevo nashinganyeka nge Yesu anakuvuluka meya ameya-meya. Oloze anakuhanjika vyamuchano waKalunga nawangana wenyi. Ou muchano uli nge meya akuyoya. Unahase kuhana mutu kuyoya chahaya myaka yosena.

Yesu mwalweza uze pwevo ngwenyi: ‘Yako, ukasanyike lunga lyove wize cheka kuno.’

Uze pwevo ngwenyi: ‘Ami kangwatwama nalungako.’

Yesu ngwenyi: ‘Unakumbulula mwakwoloka. Oloze vakumbachile kuli malunga vatanu, kaha lunga uli nenyi makumbi ano keshi lunga lyove wakukumbatako.’

Pwevo nalikomokela, mwomwo vyosena nahanjika vyamuchano. Uno Yesu natachikiza ngachilihi vyuma vyosenevi? Eyo, mwomwo Yesu ikiye Mutu Walushiko vatumine kuli Kalunga, kaha Kalunga ikiye namuhane mujimbu kana. Halwola luno tumbaji twaYesu hivanahiluka jino, kaha vanalikomokela hakumumona anakushimutwila napwevo wakaSamaliya.

Vyuma vika natulinangulaho? Chasoloka nge Yesu apwa kanawa kuvatu vamiyachi yosena. Mutwatela kupwa nayetu. Kanda natushinganyeka ngwetu vatu vamwe vavapi hakupwa vamuyachi wekako. Yesu anakusaka vatu vosena kutachikiza muchano uka-kutwaminyina kukuyoya chahaya myaka yosena. Nayetu nawa twatela kukafwa vatu valinangule muchano.

Yowano 4:5-43; 17:3.