Chihande 91

Yesu Mwanangula haPili

TALA Yesu ou natwame aha. Anakunangula vatu vosenava hapili yamuNgalileya. Vaze vanamuhate chikuma tumbaji twenyi. Nasakulaho 12 vapwenga vaposetolo jenyi. Vaposetolo hitumbaji twaYesu vakulipwila. Unavejiva majinavo tahi?

Hali Shimona Petulu nandumbwenyi Andelei. Hali naYakova naYowano, vakivo nawa vamujimo limwe. Kaposetolo weka nawa ikiye Yakova, mukwavo ikiye Shimona nawa. Vaposetolo vavali majinavo vakivo vaYuta. Umwe ikiye Yuta Isakalyote, kaha Yuta mukwavo vamuluka ngwavo Tateu. Kaha kuli Fwilipu naNatanyele (ikiye cheka Mbala-Tolomeu), naMateu naTomase.

Hakufuma kuSamaliya, Yesu aputukile chatete kwambulula ngwenyi: ‘Wangana wamwilu unapandama.’ Uze wangana unautachikiza tahi? Yapwa fulumende chikupu yaKalunga. Yesu ikiye mwangana wayo. Mwakayulanga mwilu nakuneha kuunda hano hamavu. Wangana waKalunga naukalingisa kaye kosena kupwa palachise yamwaza.

Hano Yesu anakunangula vatu vyawangana. Anakulumbununa ngwenyi: ‘Enu lombenunga ngwenu. Ove Setu uli mwilu, vavumbike lijina lyove. Wangana wove wize. Ukalinge mwaya muchima wove hano hamavu nganomu walingamo mwilu.’ Vatu vavavulu vachivuluka ngwavo ‘Kulomba chaMwata.’ Veka ngwavo ‘Ove Setu.’ Unahase kuchitotojola kulomba chosenechi nyi?

Yesu anakulongesa nawa vatu mwakutwamina navakwavo. Ngwenyi: ‘Linga kuvakwenu vyuma musaka vakwenu vakulingilyove.’ Uno kawasaka vakwenu kukutala nalikojiko nyi? Shikaho, Yesu anakwamba ngwenyi twatela kutala vakwetu nalikoji. Kutala kacheshi kukawahako mupalachise omu vatu vosena navakalinganga ngocho nyi?

Mateu tupetulu 5 swi naku 7; 10:1-4.