Yesu Mwasemukila muMulaka
Chihande 85
Yesu Mwasemukila muMulaka
UNAMWIJIVA ou kemba tahi? Eyo, ikiye Yesu. Kalinwomu nasemuka mumulaka. Mumulaka mukiko valamina vimuna. Maliya nasavalika Yesu muze mwakulila vimuna, muze veji kuhakanga kulya chavimbulu navimuna veka. Jino mwomwo ika vaMaliya naYosefwe vali mumwe natunyama? Echi keshi chihela chakusapulukilako, nyi mweka?
Nduma, keshi mukikoko. Oloze achino chikiko chinavanehe kuno: Muka-kuyula wavaLoma, Kesale Angusutu, atungile lushimbi lwaluhya nge mutu himutu atela kuya kwimbo asemukilile nakulisonekesa mumukanda. Kaha, Yosefwe asemukila kuno kuMbetelema. Oloze ikiye naMaliya hakuheta kuze, kuwana mazuvo akusavala osena akuzala to. Shikaho vezanga muno natunyama. Kaha likumbi vene lino Maliya himwasema Yesu! Jino nge omu wamono, ali kaha kanawa.
Wavamono tufunga vanakwiza nakutala Yesu ngwetu? Vapwanga kuchipapa ufuku nakulama mikoko javo, kaha kuze vapwanga kwosena kwapwanga kumunyika. Apwanga kangelo! Tufunga vevwanga woma chikuma. Oloze kangelo ngwenyi: ‘Kanda mwivwa womako! Nangumyambulila mujimbu wamwaza. Lelo, muMbetelema, Mwata Kulishitu, nasemuka. Mwakalwila vatu! Namumuwana vanamujingila mulihina, vanamusavalika muze mwakulila vimuna.’ Kukasumuka vangelo vavavulu vaneza nakuputuka kwalisa Kalunga. Kufumaha vene, ava tufunga hikuya lumbushi nakutonda Yesu, kaha vanamuwane.
Unatachikiza chinamulingisa Yesu kupwa wakulipwila tahi? Unamwijiva chikupu mutu kana? Anuka, muchihande chatete chamukanda uno twavulukile vyaMwanaKalunga watwatwa. Ou Mwana azachilenga naYehova hakutenga melu namavu navyuma vikwavo. Chamwaza, ou ikiye Yesu!
Eyo, Yehova ambachile kuyoya chaMwanenyi mwilu nakuchihaka muli Maliya. Hoho vene kemba aputukile kukola mujimo ngana muveji kukolanga vakemba vakwavo mumajimo amanevo. Oloze kemba kana hiMwanaKalunga. Kutwala muze Yesu asemukile muno mumulaka kuMbetelema. Unamono jino ocho vanawahilila vangelo hakulweza vatu ngwavo Yesu nasemuka ngwetu?