Chihande 100

Yesu muMilemba

HAKUFUMA muzuvo yahelu, Yesu navaposetolo jenyi hikuya kumilemba yaNgetesemane. Kakavulu kukiko vanapunga nakwiza. Yesu jino mwavalweza nge vatwaleho nakutona nakulomba. Kaha himwaswenya chindende kulutwe, nakulimbila chameso hamavu nakulomba.

Kaha Yesu hikuhiluka kuli vaposetolo jenyi. Washinganyeka ngwove vali nakulinga ika? Vali mutulo! Yesu navalweze mapapa katatu nge vatela kutona, oloze shimbu hishimbu mweza kuwana vali mutulo. ‘Mwomwo ika munakuya mutulo halwola lwangana?’ Yesu himwavamba hakwiza chenyi chamakumishilo. Ngwenyi: ‘Lwola lunahete lyehi lwakunguhana kumavoko avaka-kole jami.’

Halwola vene elu hikwivwa naliwuya lyavatu. Tala! Vatu vanakwiza najipoko jamikwale najimbwechi! Vanambate namimunyi yivamunyikile munavaya. Hakuheta hakamwihi, umwe hikuhanduka haliyongomena nakwiza kuli Yesu. Himwamusweswenya, nge muuli nakumona hano. Ou lunga ikiye Yuta Isakalyote! Mwomwo yika anakusweswenya Yesu?

Yesu mwamwihula ngwenyi: ‘Yuta, unakungusolola hakungusweswenya nyi?’ Eyo, kusweswenya hichinjikizo. Chikiko chakulweza malunga vapwile naYuta nge ou ikiye Yesu, mutu vanakutonda. Shikaho vaka-kole jaYesu hikulupuka nakumukwata. Oloze Petulu keshi kwechelela Yesu vamukwate chakuhona kuzungako. Hikusomona poko yenyi yamukwale ambatanga nakuveta lunga namuhate. Poko yamukwale hinayihusa mutwe walunga kana nakuvatula kaha litwitwi lyakuchilyo. Oloze Yesu hikukwata kulitwitwi lyayou lunga nakulyuka.

Yesu mwalweza Petulu ngwenyi: ‘Someka cheka poko yove muchindalo. Kawashinganyekele ngwove ngunahase kulembelela Tata angutumine mayongomena avangelo veze nakungulwilako tahi?’ Eyo, nahase! Oloze Yesu kate kulomba Kalunga amutumine vangelo, mwomwo nejiva ngwenyi lwola lunahete lyehi lwakumukwata kuli vaka-kole jenyi. Ngocho etavile vamumbate tuhu. Tutalenu kanawa vyuma navisoloka kuli Yesu jino.

Mateu 26:36-56; Luka 22:39-53; Yowano 18:1-12.