Chihande 88

Yowano Mwambapachisa Yesu

TALA katela anakuwila hamutwe wamutu. Ou mutu ikiye Yesu. Ali jino namyaka kafwe 30. Ou mutu ali nenyi ikiye Yowano. Tunalinangulaho lyehi vyuma vimwe vyaikiye. Unakwanuka omu Maliya ayile nakumeneka kausoko kenyi Elizaveta, numba kemba alyungunune mujimo lyaElizaveta ngwetu? Uze kemba wamujimo apwile Yowano. Jino chuma chika vanakulinga vaYowano naYesu hano?

Yowana nafumu hakumujimika Yesu mumeya aKalwiji Yotau. Mutu veji kumumbapachisa ngana. Chakulivanga, navamujimika mumeya, kaha hikumututulamo. Yowano hakujimikanga vatu, vamuvuluka ngwavo Yowano Muka-kumbapachisa. Jino mwomwo ika Yowano namumbapachisa Yesu?

Chamwaza, Yowano nalingi ngocho mwomwo Yesu namulweze amumbapachise. Yowano ambapachisa vatu navasaka kulikonekela vilinga vyavipi vanapunga nakulinga. Uno Yesu alingaho lyehi chuma chachipi chize atela kulikonekela tahi? Nduma, Yesu kanda lyehi, mwomwo hiMwanaKalunga wakufuma mwilu. Kumana amulombele Yowano amumbapachise hachuma cheka. Tuchiwanenu ocho chuma kana.

Shimbu kanda Yesu ezenga kuli Yowano, apwile muka-kusongo. Muka-kusonga apwa mutu muka-kupata vyuma vyamitondo, vyakufwana nge jimesa navitwamo vyakulisezaseza. Lunga lyaMaliya, Yosefwe apwile muka-kusonga, kaha mulimo kana amulongeselewo naYesu. Oloze Yehova katumine Mwanenyi hamavu kwiza nakupwa muka-kusongako. Ali namulimo waulemu atela kuzata, kaha lwola lunahete mangana Yesu aputuke kuuzata. Shikaho hakusaka kusolola ngwenyi neza jino nakuzata mwaya muchima waIse, Yesu hikusanyika Yowano amumbapachise. Uno Kalunga nevu kuwaha hachuma kana tahi?

Eyo, nawahilila, mwomwo Yesu hakufuma mumeya, mwilu namufuma lizu ngwalyo: ‘Ou you Mwanami, ngweji kwivwilanga kuwaha.’ Kaha cheka, mwilu kwijiva nge munasokoloka, kahou katela hikwiza nakuwila hali Yesu. Oloze keshi katela iveneko. Anakusoloka kaha nge ikiye. Yino chikupu hishipilitu wajila yaKalunga.

Jino Yesu ali navyavivulu vyakushinganyeka, shikaho hikuya nakutwama kwauka wenyi makumbi 40. Kuze Satana mweza kuli ikiye. Satana himwamweseka Yesu mapapa katatu mangana ahokole jishimbi jaKalunga. Oloze Yesu kate kulinga ngocho.

Kufumaho, Yesu mwakinduluka nakuwana vatu vakulivanga kupwa vaka-kumukavangiza, chipwe ngwetu tumbaji. Majinavo vamwe vakivo vaAndelei, Petulu (ikiye cheka Shimona), Fwilipu naNatanyele (ikiye cheka Mbala-Tolomeu). Yesu navano tumbaji twenyi vavahya hikuya kulimbo lyaNgalileya. MuNgalileya vatulilile mwimbo lyaNatanyele, muKana. Kuze jino Yesu himwaya kuchilika chakumbachisa pwevo, nakulinga chuma chakukomwesa chatete. Unachitachikiza tahi? Mwalumuna meya nakupwa vinyo.

Mateu 3:13-17; 4:1-11; 13:55; Mako 6:3; Yowano 1:29-51; 2:1-12.