Mukanda Wami Wavihande Vyamumbimbiliya

UNO himukanda wavihande vyamuchano. Vihande kana vavifumisa muMbimbiliya, mukanda waulemu chikuma mukaye. Vihande kana navikulweza vyakaye kano kufuma vene hashimbu Kalunga aputukile kutanga vyuma swi nakulikumbi lyalelo. Navilumbununa nawa navyuma ashika Kalunga kukalinga kulutwe.

Mukanda uno naukulweza vyuma vyatwama muMbimbiliya. Uli nakuhanjika havatu vamuMbimbiliya navyuma valingile. Weji kutulweza nawa lutalililo lwalunene luze Kalunga ahana kuvatu jenyi lwakukatwama haya myaka yosena mupalachise hano hamavu.

Mukanda uno uli navihande 116. Vanavikungejeka muvihanda 8. Lifwo lyakuputukila kuchihanda hichihanda linavuluka mukavatu vyuma vili muchihanda kana. Vihande vanavinoneka mujila yakuvinungasana kweseka nalwola vyasolokele kushikulu. Echi chinahase kukukafwa wijive lwola vyasolokele hakuvyesekesa kuvikwavo vyasolokele kushikulu.

Vihande kana vanavilumbununa mumazu amashi. Enu vanyike vavandende vavavulu munahase kulitangilavyo enu vavene. Enu visemi mwatela kwijiva nge vana venu vavapulululu navakevwanga kuwaha kuvatangilanga vihande vino kakavulu. Mukanda uno uli navyuma navivwisa kuwaha vanyike navakulwane.

Kusongo yachihande hichihande vanahakeko visoneka vyaMbimbiliya vyakwinyikilako kaha. Mwatela mutange mazu osena aMbimbiliya aze anakuhanjika havihande kana.