Kanyike Wapwevo Mwakafwa Chindume chaLunga
Chihande 69
Kanyike Wapwevo Mwakafwa Chindume chaLunga
UNEJIVA vyuma ali nakuhanjika ou kanyike wapwevo tahi? Anakulweza pwevo vyakapolofweto kaYehova, Elisha, navyuma vyamwaza vanakumukafwa kuli Yehova. Ou pwevo kamwijiva Yehovako mwomwo keshi kaIsaleleko. Tuchitalenu jino chinamunehe ou kanyike wapwevo muzuvo you pwevo.
Ou pwevo apwa muka-Sulya. Lunga lyenyi ikiye Namane, kapitau kamaswalale javaSulya. VaSulya vakwachile uno kanyike wapwevo wakaIsalele, nakumuneha kuli pwevo lyaNamane apwenga ngamba yenyi.
Namane aviza musongo waupi wambumba. Musongo kana unahase kulingisa nyama yamutu kuzemuka. Omu mukiko uze kanyike ali nakulweza pwelyaNamane ngwenyi: ‘Nge kaka yami apwanga kuli kapolofweto kaYehova uze ali kuIsalele, kachi namuhindula kumbumba yenyi.’ Jino mazu kana anahete nakuli lunga lyou pwevo.
Namane anakusaka chikuma kumuka; ngocho hikuya kuIsalele. Hakuheta kuze, hikuya kuzuvo yaElisha. Elisha mwatuma ngamba yenyi nakulweza Namane ayenga nakusana muKalwiji Yotau katanu nakavali. Namane napihilila ngwenyi: ‘Kumana natulwiji valikwimbo vanawahe kuhambakana vano vali muIsalele!’ Namane hakukumisa kuhanjika, kaha hikufundumuka.
Oloze ngamba yenyi umwe ngwenyi: ‘Ove Mwata, nge kapolofweto akulwezanga kulinga chuma chachinene kachi unachilingi. Nyi muhonena ika kusana, nge omu nambe?’ Namane mwetava mwanambe ngamba yenyi nakuya nakujiminyina muKalwiji Yotau katanu nakavali. Omu nalingi ngocho, nyama yenyi yalumukile cheka yangu kaha yamwaza!
Namane nawahilila chikuma. Mwakinduluka kuli Elisha ngwenyi: ‘Ngunatachikiza jino ngwami, kumavu kwosena kakweshi Kalungako, kuvanga muli vaIsalele kaha. Shikaho achitambule wana kuli ami.’ Oloze Elisha ngwenyi: ‘Nduma, kangweshi kuutambulako.’ Elisha natachikiza ngwenyi chakuhenga kutambula wana, mwomwo Yehova ikiye namuku Namane. Oloze ngamba yaElisha, Ngehaze nasake autambule ikiye.
Omu mukiko mwalinga Ngehaze. Omu nayi Namane, Ngehaze hikumukava lumbushi. Ngehaze jino ngwenyi: ‘Elisha nangutumu ngwenyi anakusaka umuhane wana wove umwe akahane masepa jenyi vaneza oholili.’ Oloze, makulyenyi. Jino Namane nawa kejivile nge awa makuliko; kaha hikumuhana Ngehaze vikumba vimwe.
Ngehaze hakukinduluka kwimbo, Elisha nejiva vyuma nalingi. Yehova namulweze. Jino mwamwamba ngwenyi: ‘Hakulinga chuma kana chachipi, mbumba yaNamane nayiza halyove.’ Nashimbu pimbi, kaha yinamukwate!
Vyuma vika natulinangula kulyechi? Chatete, shina ngwetu twatela kupwa nge uze kanyike wapwevo nakuhanjikanga vyaYehova. Nachikapwa changanyo chikuma. Chamuchivali, kanda natulivwimbanga nge mwalingile Namane hakavangako, oloze twatela kwivwilila vangamba jaKalunga. Chamuchitatu, kanda natulinganga makuli ngana mwalingile Ngehazeko. Kutala katweshi kulinangula vyavivulu hakutanganga Mbimbiliyako nyi?