Chihande 62

Ukalu Muzuvo yaNdavichi

OMU naputuka Ndavichi kuyula muYelusalema, Yehova himwakafwa maswalale jenyi kuhasa jijita jajivulu. Yehova ashikile kuhana lifuchi lyaKanane kuli vaIsalele. Mungolo jaYehova, lifuchi lyosena vavashikile hilyavo jino.

Ndavichi mwangana wamwaza. Azanga Yehova. Shikaho chuma chatete kulinga hakukumisa kutambula Yelusalema shina kunehamo chikasha chalushiko lwaYehova. Kaha nasake atunge natembele yakuchihakamo.

Jinomu Ndavichi nakolo, himwalimbeja chikuma. Ndavichi atachikiza ngwenyi chakuhenga kumbata chuma chamutu weka. Oloze chingoloshi chimwe, omu ali helu lyazuvo yenyi yawangana, hakutala mwishi, himwamona pwevo wamwaza chikuma. Ikiye Mbate-sheva, kaha lunga lyenyi Uliya, hiliswalale lyaikiye.

Ndavichi namusake chikuma Mbate-sheva ngocho nasake vamunehe muzuvo yenyi yawangana. Lunga lyenyi ali kujita. Ndavichi hikulinga nenyi ujila, kufumaho pwevo mwejiva ngwenyi nemita lijimo. Ndavichi hakulizakamina chikuma, mwatuma mazu kuli mwata wamaswalale jenyi, Yowave, ngwenyi amuhake Uliya kulutwe kujita mangana afwenga. Omu nafu Uliya, Ndavichi hikumbata Mbate-sheva.

Yehova napihilila naNdavichi. Ngocho mwamutumina ngamba yenyi Natane ayenga amulweze shili nalingi. Talomu Natane anakuhanjikila Ndavichi. Ndavichi himwalinyenga hachuma nalingi, kaha Yehova kumujiha chiku. Oloze Yehova ngwenyi: ‘Hakulinga shili, mukapwa naukalu waunene muzuvo yove.’ Kahowo ukalu kana apwile nawo Ndavichi!

Chatete, mwanaMbate-sheva mwafwa. Kaha mwanaNdavichi watwatwa walunga, Amanone, hikupika songo yenyi wapwevo Tamale kuze apwile kwauka wenyi, nakusavala nenyi. MwanaNdavichi, Avasalome mwapihilila nakujiha Amanone. Kaha nawa, Avasalome mwalingisa michima yavatu vavavulu kumusaka ikiye, nakulipwisa yavene mwangana. Kutwala muze, Ndavichi himwahasa ize jita mwomwo Avasalome vanamujihi. Eyo, Ndavichi ali muukalu waunene.

Mupindangano yoseneyi, Mbate-sheva mwasema mwana walunga Solomone. Oku Ndavichi kwaushinakaji namisongo, mwanenyi Atonyiya hikusaka kulipwisa yavene mwangana. Jino Ndavichi hikutuma kapilishitu Zatoke ahake maji kumutwe waSolomone kusolola nge ikiye mwapwa mwangana. Nakushimbula chiku Ndavichi hikufwa namyaka 70. Ayulile myaka 40, kaha Solomone napu jino mwangana wavaIsalele.

Samwele 2, 11:1-27; 12:1-18; Vamyangana 1, 1:1-48.