Chihande 66

Yezevele—Lisano Wamupi

OMU nafu Mwangana Yelovowame, myangana vosena vanakuswana hawangana wamiyachi yavaIsalele 10 vavapi lika. Mwangana Ahave ikiye wamupi chikuma. Unejiva vinalingisa tahi? Chuma chachinene shina puwenyi Yezevele, lisano wakuhuka.

Yezevele kapwa pwevo wakaIsaleleko. Himwanamwangana wakuShitone. Alemesa kalunga wamakuli Mbale, nakulingisa Ahave navaIsalele vavavulu kulemesa Mbale. Yezevele kamuzanga Yehovako kaha najihi vapolofweto jenyi vavavulu. Vakwavo vanakuswama kumena kuchina kuvajiha. Yezevele nge chuma nachisake, nahase numba kujiha mwenyacho mangana achitambule.

Likumbi limwe Mwangana Ahave nasulakana. Jino Yezevele ngwenyi: ‘Ika unasulakana lelo?’

Ahave ngwenyi: ‘Mwomwo yamazu nangukumbulula Navote. Ngwambanga kulanda wande wenyi wamivinyo. Oloze kate kunguhanawo.’

Yezevele ngwenyi: ‘Ukalu wauchiho. Mana tuhu nangukutambwilawo.’

Jino Yezevele mwasonekela mikanda vilolo vamunganda atwama Navote. Ngwenyi: ‘Mbatenu malunga vatuvihu mangana vavuluke ngwavo Navote nangula Kalunga naMwangana. Kaha mutwalenu Navote kuweluka wanganda, mumwase malolwa afwenga.’

Omu Yezevele nevu ngwavo Navote nafu, hikwamba kuli Ahave ngwenyi: ‘Yako uhete wande wamivinyo.’ Uno kawetavile ngwove Yezevele vatela kumuzangamisa hakulinga chuma chachipi kanechiko nyi?

Kufumaho, Yehova mwatuma Yehu akamuzangamise. Yezevele hakwivwa ngwavo Yehu anakwiza, hikulikwita ulombo hameso nakuliwahisa kanawa. Oloze omu neza Yehu, mwamona Yezevele munjanena, nakuvilika kumalunga vapwile muzuvo yamwangana ngwenyi: ‘Mumbilenu hamavu!’ Malunga navetava, nge muze uli nakumona hamuvwimbimbi. Hikumumbila hamavu, nakufwa. Echi chikiko kukuma chalisano wakuhuka Yezevele.

Vamyangana 1, 16:29-33; 18:1-4; 21:1-16; Vamyangana 2, 9:30-37.