Chihande 83

Kembwe yaYelusalema

ACHITALE mulimo uli hano. VaIsalele vali nakutunga jikembwe jaYelusalema. Mwangana Nevukataneza hakwenyeka Yelusalema hamyaka 152 kunyima, apuzwile jikembwe nakwocha vikolo vyanganda. Hakavanga, vaIsalele hakukinduluka kwimbo kufuma kuMbavilone, kavatungulwile cheka jikembweko.

Unashinganyeka ngwove vatu vanakwivwa ngachilihi hakutwama muno myaka yoseneyi chakuhona jikembwe kunganda? Kavalivwile vakukingiwako. Vaka-kole javo kachi vengilile nakuvalukuka. Oloze lunga Nehemiya ali jino nakukafwa vatu vatunge cheka jikembwe. Unamwijiva Nehemiya tahi?

Nehemiya apwa kaIsalele uze atwama munganda yaShushane, muze mwatwama vaMolotekai naEseta. Nehemiya azachilenga muzuvo yamwangana, ngocho pamo alikachile chikuma naMolotekai naLisano Eseta. Oloze Mbimbiliya kayahanjika nge Nehemiya azachililenga lunga lyaEseta, Mwangana Ahasweluko. Azachililile mwangana ashishileho, Mwangana Alatakaseleke.

Anuka, Alatakaseleke ikiye mwangana wamwaza uze ahanyine Ezela jimbongo jakutwala kuYelusalema jakuwahishisa tembele yaYehova. Oloze Ezela katungulwile jikembwe janganda jakupuzukako. Tutalenu omu chapwile numba Nehemiya alinge mulimo kana.

Jino hanahichi lyehi myaka 13 kufuma haze Alatakaseleke ahanyine Ezela jimbongo jakuwahishisa tembele. Nehemiya ikiye jino mukulwane wavaka-kuhana lupasa kuli Mwangana Alatakaseleke. Echi chinakulumbununa nge ikiye muka-kuhana mwangana vinyo, nakulama mwangana kuvatu vanahase pamo kumunwisa ulembe. Ou mulimo waulemu chikupu.

Jino, likumbi limwe ndumbwaNehemiya, Hananyi namalunga veka kufuma kulifuchi lyaIsalele hinaveza nakumeneka Nehemiya. Hikumulweza ukalu vanakumona vaIsalele, nomu jikembwe jaYelusalema jichili jakupuzwojoka. Nehemiya himwanyengetela chikuma nakulomba kuli Yehova havyuma kana.

Likumbi limwe mwangana namono Nehemiya nahombo, kaha himwamwihula ngwenyi: ‘Mwomwo ika unakusoloka wakulinyenga?’ Nehemiya ngwenyi, mwomwo Yelusalema kayeshi kanawako kaha jikembwe hanga jili jakupuzuka. Mwangana ngwenyi: ‘Kaha nausaka ika?’

Nehemiya ngwenyi: ‘Achingutume kuYelusalema mangana ngukatungulule jikembwe.’ Mwangana Alatakaseleke wamwaza chikuma. Ngwenyi Nehemiya nahase tuhu kuya, kaha hikumukafwako nakutonda mitondo yakutungisa. Nehemiya hakuheta kuYelusalema, hikulweza vatu vyanasake kulinga. Vatu hinavawahilila ngwavo: ‘Tuputukenu kutunga.’

Vaka-kole javaIsalele hakumona kembwe yaputuka kwimana, hikwamba ngwavo: ‘Natuyako nakuvajihajiha, nakuhonesa mulimo wakutunga.’ Jino Nehemiya hakwivwako, mwahana ava vaka-kuzata jipoko jamikwale namakunga. Kaha ngwenyi: ‘Kanda mwivwa woma wavaka-kole jetuko. Lwilenu vandumbwenu navana venu namapwevo najizuvo jenu.’

Vatu vanahamuka. Vanalizange navitwa vyavo ufuku namusana, oku chivatunga. Shikaho mumakumbi 52 kaha, jikembwe ngungulu. Vatu jino vali vakukingiwa mukachi kanganda. Nehemiya naEzela hikunangula vatu jishimbi jaKalunga, vatu vanawahilila.

Oloze vyuma kavyeshi nge muze vyapwile shimbu kanda vaIsalele vavatwale muufunge kuMbaviloneko. Vatu vanakuvayula kuli mwangana waPeleja kaha vatela kumuzachila. Oloze Yehova navashiki kuvatumina mwangana wamuhya, kaha mwangana kana ikiye mwakaneha kuunda kuvatu. Mwangana muka venyou? Mwakaneha ngachilihi kuunda hano hamavu? Kafwe myaka 450 yinahichi, chakuhona kulinangula vyachihande kana. Jino hinakusemuka mwana wamulemu. Oloze echi hichihande cheka nawa.

Nehemiya tupetulu 1 swi naku 6.