• MWAKA ASEMUKILE: 1963

• MULIFUCHI ASEMUKILA: BRITAIN

• CHIYOYELO CHENYI CHAKUNYIMA: AZACHILENGA MILIMO YAKUTAMBULA JIMBONGO JAJIVULU

MUJIMBU WAKUYOYA CHAMI:

Ngwasemukilile mumbaka yaCroydon kusulo yaLondon. Twasemuka vana 9 kaha ami yami wamuchi 6. Visemi jami vasemukilile halitungu lyaCaribbean mu St. Vincent. Kaha mama ayilenga muchachi yaMethodist. Kangwasakilenga kulinangula vyaKalungako, numba tuhu ngwafwililile kupwa nachinyingi chavyuma vyavivulu. Kaha omu twasokelenga shikola, kakavulu ngwayilenga kuchijiva nakutanga mikanda yize ngwambachilenga muzuvo yakulamina mikanda yahashikola.

Omu mwahichile myaka kufuma halwola ngwakumishile shikola, ngwafwililile kukafwa vatu vaze vazenekele wakuvakafwa. Ngocho ngwaputukile kukafwa vatu vaze kavapwile najizuvoko navaze vapwile vitonji kumujimba namuwongo. Kaha ngwayile hayunivesiti nakulinangula vyasayasi mangana ngutachikize kanawa mwakuvakafwila. Omu ngwakumishile kulinangula, vanguhakilenga havihela vyavinene kumilimo kaha nawa ngwayoyelenga chiyoyelo chauhando. Hakuwana nge ngwazachilenga mulimo wakuhehwojola nakukafwa vatu mwakukumishila ukalu wavo, ngocho ngwazachishilenga kaha kopyuta naInternet. Ngwayilenga mumafuchi eka havyalumingo vyavivulu, kaha ngwasavalilenga mujizuvo jamwaza jakufwetela, nakuya nakumona vihela vyamwaza chikuma, nakuya kuvihela vyakunyukila mujimba. Ngwamwene ngwami ngwayoyelenga kanawa. Chipwe ngocho, ngwakafwilenga lika vatu vaze vazenekele wakuvakafwa.

OMU MBIMBILIYA YALUMWINE KUYOYA CHAMI:

Ngwalihulishilenga hamyaka yayivulu ngwami: “Mwomwo ika tweji kuyoyelanga?” Oloze kangwahehwojwelenga muMbimbiliya mangana nguwane omwo vakumbulwila chihula kanako. Kuheta mu 1999, songo yami Margaret uze alumukile nakupwa Chinjiho chaYehova, angutambukilile nasepa lyenyi waChinjiho uze angusolwelele chisambo. Nakushimbula chiku, ngwetavilile kulinangula Mbimbiliya nou sepa lyasongo yami. Oloze kangwazovolokelenga washiko mwomwo yamilimo yami nachiyoyelo chami.

Kuheta mungonde yanonga mu 2002, ngwalukilile kusulo yalifuchi lyaEngland. Kaha ngwayile cheka kuyunivesiti nakutanga mangana ngutambule ndingili mumulimo wakuhehwojola. Ngwalingile ngocho mwomwo ngwafwililile kupwa ngundotolo. Halwola kana ngwayilenga chikuma kuZuvo yaWangana nakukunguluka namwanami walunga. Numba tuhu ngwazangile kulinangula chikuma hayunivesiti, oloze vyuma ngwalinangwilenga muMbimbiliya vyangukafwile ngutachikize ovyo vatu veji kuyanjilanga nomwo ukalu kana naukakuma. Ngwashinganyekele hamazu atwama hali Mateu 6:24 akwamba ngwavo, ‘Kakweshi mutu mwahasa kuzachila vamyata vavaliko.’ Atela kusakulaho umwe uze mwazachila, Kalunga chipwe luheto. Ngwamwene jino ngwami, ngwatela kusakula vyuma vize nanguhaka kulutwe mukuyoya chami.

Kunyima ngwayilenga mapapa kakavulu kuchilongesa chaMbimbiliya chahazuvo chaVinjiho jaYehova, kuze twakalinangwilenga mukanda wakwamba ngwavo, Uno Kwatwama Samatanga Akuzakama Nyi? * Shikaho ngwakunyukile ngwami, Tengi yetu Yehova ikiye atwama nangolo jakukumisa ukalu wosena vali nakumona vatu. Oloze hayunivesiti vangunangwilenga ngwavo kufwelela muli Tengi kacheshi kutukafwa tutachikize ovyo tweji kuyoyelangako. Kunangula kana changwivwishile kupihya kumuchima. Ngocho, omu mwahichile tukweji vavali, ngwafumine hayunivesiti nakuputuka jino kulinga vyuma vize navingupandamisa chikuma kuli Kalunga.

Chisoneka chamuMbimbiliya chize changukafwile ngwalumune chiyoyelo chami shina chaVishimo 3:5, 6, chize chamba ngwacho: “Mufwelelenga Yehova namuchima wove wosena, kanda naupendamina hakunangakana choveko. Mwanukenga muvyuma vyosena naulinganga, kaha mwasungamisanga jijila jove.” Kulinangula hali Kalunga ketu wazangi changunganyalishile chikuma, kuhambakana kupwa naluheto nakuya fuma mwomwo yakuzata mulimo waundotolo. Kulinangula chikuma havyuma vyamwaza mwakalinga Yehova hano hamavu navyuma alingile Yesu hakuhana kuyoya chenyi hali etu, vyangulingishile ngusakule kuzachila chikuma Tengi yetu. Kuheta muApril 2003 vangumbapachishile, kaha kufumaho ngwaputukile kwashiwisako chiyoyelo chami.

OMU NGUNANGANYALA:

Ngunapu jino ngusepa lyaYehova wamwenemwene. Kaha ngwapwa nguwakuwahilila chikuma nakupwa wakuunda mwomwo yakutachikiza Yehova. Kaha nawa ngwapwa nguwakuwahilila chikuma mwomwo yakulikata navakwetu vaka-kulemesa Kalunga vamuchano.

Vyuma ngweji kulinangulanga muMbimbiliya nakukukunguluka chetu vyeji kungusuulwisanga chikuma. Kaha nawa ngweji kwivwanga kuwaha kulwezako vakwetu vyuma ngwafwelela. Mulimo wami unapu jino wakukafwa vatu hakuvambulila vyuma vize navivakafwa vapwenga vakuwahilila oholyapwa, nakutalilila kukayoya kanawa mukaye kakahya. Ngunazatenga mulimo washimbu yosena kufuma vene muJune 2008, kaha ngwapwa wakuwahilila chikuma nakusuuluka navyuma nguli navyo kuhambakana muze ngwapwile hakavanga. Chikupu vene ngunatachikiza jino ovyo tweji kuyoyelanga, ngocho ngweji kumusakwililanga chikuma Yehova.

• MWAKA ASEMUKILE: 1973

• MULIFUCHI ASEMUKILA: AUSTRIA

• CHIYOYELO CHENYI CHAKUNYIMA: AZANYINENGA MUKUHEMA CHALIZANGAMINA

MUJIMBU WAKUYOYA CHAMI:

Ngwakolelele mumbaka yayindende yaBraunau muAustria. Mungalila kana mwapwile luheto kaha nawa kamwapwilenga uhwanga chikumako. Kaha hakuwana nge tanga yetu yayilenga muchachi yaKatolika, ngocho nayami mukiko ngwayilenga.

Kwapwile chuma chimwe chize chasolokele mukuyoya chami chize changukolele chikuma kumuchima. Likumbi limwe mu 1984 omu ngwapwile namyaka 11, ngwapwile nakuhema ngunja nasepa lyami uze ngwazangile chikuma. Oloze halikumbi vene lize namusana afwile muponde yahamukwakwa. Kufwa chenyi changukolele chikuma kumuchima. Kufuma vene halwola kana, ngwashinganyekelenga havyuma vyeji kusolokanga kumutu nge nafu.

Omu ngwechele shikola, ngwaputukile kuzata mulimo wakuhaka kakahya kakezi nakuwahisa vyuma vyazata nakakahya kana. Numba tuhu ngwazanyinenga chikuma mukuhema chalizangamina nakulipechela jimbongo jajivulu, oloze kangwapwile naukalu wakuhona jimbongoko. Kaha nawa ngwazanyinenga chikuma mukuhema chachivulu nakwivwililanga kumyaso yakulisezaseza. Ngwalivwishilenga kuwaha kuya kuvihela vyakuhemena vyavivulu nakuvilika vyakulisezaseza. Numba tuhu ngwazanyinenga chikuma muviseke nakulinga vyuma vyavipi, oloze kangwapwile wakuwahililako.

OMU MBIMBILIYA YALUMWINE KUYOYA CHAMI:

Likumbi limwe mu 1995, Chinjiho chaYehova wakashinakaji ejile hembo nakungwambulila. Kaha anguhanyine mukanda uze wasolwele omwo Mbimbiliya yakukumbulula chihula chakwamba ngwavo, Vyuma muka vyeji kusolokanga kumutu nge nafu? Hakuwana nge nguchapwile nakushinganyeka hakufwa chasepa lyami, ngocho ngwambachile mukanda kana. Kangwatangile kaha kapetulu uze apwile nakuhanjika hakufwako, oloze ngwatangile mukanda wosena.

Vyuma ngwatangile mumukanda kana vyakumbulwile vihula ngwapwile navyo kutalisa kukufwa. Chipwe ngocho ngwalinangwile vyavivulu. Hakuwana nge kufuma vene kuunyike ngwayilenga muchachi yaKatolika, ngocho lufwelelo lwami lwapendaminyine chikuma hali Yesu. Oloze kulinangula chikuma Mbimbiliya changukafwile ngutunge usepa wakukola naIse yaYesu, Yehova Kalunga. Ngwawahililile chikuma hakutachikiza ngwami Yehova atuzakama, kaha nawa asaka tumutachikize. (Mateu 7:7-11) Ngwalinangwile ngwami Yehova nahase kwivwa kuwaha chipwe kupihya havyuma navisoloka, kaha nawa eji kutesangamo vyuma eji kuhanjikanga. Echi changulingishile ngufwile kulinangula upolofweto wamuMbimbiliya, nakukekesa nawa omwo naukatesamo. Vyuma ngwawanyine vyangulingishile ngufwelele chikuma Kalunga.

Ngwatachikijile jino ngwami, Vinjiho jaYehova vakiko kaha vasaka kukafwa vatu vevwishise kanawa vyuma vyatwama muMbimbiliya. Ngwatangilenga visoneka vize vyapwile mumikanda yaVinjiho kuzachisa Mbimbiliya yakuKatolika. Kuhehwojola kanawa changulingishile ngukunyuke ngwami ngunawane muchano.

Omu ngwapwile nakulinangula Mbimbiliya ngwatachikijile jino ngwami Yehova asaka ngukavangizenga jindongi jenyi. Kutanga mukanda Wavaka-Efwesu 4:22-24, changukafwile ngumone ngwami ngwatelele ‘kuzula mutu wamwaka wakuya mwaya twamiso yamwaka, nakuvwala mutu wamuhya uze vatengele kweseka nomu mwaya muchima waKalunga.’ Ngocho ngwambilile vilinga vyavipi ngwapwile navyo. Kaha ngwechele nawa kuhema chalizangamina mwomwo cheji kulingisanga mutu afwile chikuma luheto nakupwa nachipululu. (Wavaka-Kolinde 1, 6:9, 10) Ngwamwene ngwami hakusaka ngutesemo chuma kana, ngwatelele kwecha kulikata namasepa vamwaka nakuputuka kulikata namasepa vavahya vaze vakavangijilenga jindongi jamuMbimbiliya.

Kuhanjika muchano, kachapwile chachashi kulinga vyuma kanako. Chipwe ngocho, ngwaputukile kupwanga kukukunguluka naVinjiho jaYehova haZuvo yaWangana nakutunga masepa vavahya muchikungulwilo. Kaha nawa ngwatwalileho lika kulinangula Mbimbiliya hauka wami. Vyuma kana evi vyangukafwile ngusakulenga kanawa myaso ngwatela kwivwilila, nakwalumunako vyuma ngwalitomenene mukuyoya, nakuputuka kuvwala nakulilenga mujila yamwaza. Kaha kuheta mu 1995, vangumbapachishile nakupwa Chinjiho chaYehova.

OMU NGUNANGANYALA:

Ngweji kumonanga jino jimbongo naluheto mujila yamwaza. Hakavanga ngwapihilililenga washi, oloze oholyapwa ngweji kuundanga chikuma muchima. Kaha nawa kangwalizakamina chikuma havyuma vyakulutweko.

Ngwawahilila chikuma kupwa hamukana wavatu vamukaye kosena vaze veji kuzachilanga Yehova. Kaha ngweji kumonanga omwo vatu vamwe vahamukana kana veji kutwalangaho lika kuzachila Yehova nakashishi chamokomoko naukalu. Ngwawahilila chikuma hakuwana nge ngweji kuzachisanga lwola lwami nangolo jami hakulemesa Yehova nakulingila vatu vyuma vyamwaza, keshi kulisuulwisa ami iveneko.

• MWAKA ASEMUKILE: 1963

• MULIFUCHI ASEMUKILA: ENGLAND

• CHIYOYELO CHENYI CHAKUNYIMA: KASUULUKILENGA MUKUYOYA CHENYIKO

MUJIMBU WAKUYOYA CHAMI: Ngwasemukilile muEngland, kahomu ngwapwile namyaka yakusemuka 7 tanga yetu yalukilile muAustralia. Twapwile nakutwama munganda yaGold Coast muQueensland muze mwapwilenga nakwiza vatu vaka-kuya jitowa. Numba tuhu tanga yetu kayapwile naluhetoko, oloze twapwilenga navyuma vize twasakiwilenga.

Twayoyelenga kanawa, oloze kangwapwile wakusuulukako. Kaha kangwatachikijile ovyo tweji kuyoyelangako. Tata apwile chitakwa, kaha nawa ayanjishilenga mama ngocho kangwamuzangile chikumako. Hahichile lwola numba ngutachikize vyuma ahichilemo tata omu apwile liswalale muMalaya (yize vanakuvuluka jino ngwavo Malaysia), ngocho omu ngwavitachikijile, ngwejivile jino ovyo alingililenga vyuma kana.

Omu ngwapwile kwakamwihi nakukumisa shikola, ngwaputukile kunwa chikuma wala. Kahomu ngwapwile namyaka yakusemuka 16, ngwengilile mulimo wauswalale. Ngwaputukile kunwa maundu akupendesa nakunwa chikuma makanya. Kaha nawa ngwapwile nguchitakwa chikuma. Hakavanga ngwanwinenga wala kusongo yavyalumingo, oloze kutwala muze ngwanwinenga jino hakumbi hakumbi.

Kahomu ngwapwile namyaka yamuji 20, ngwaputukile kuhuhwasana numba nge Kalunga kwatwama. Ngwalihulishilenga ngwami, ‘kachi nge Kalunga kwatwama chikupu, kaha mwomwo ika etavishila vatu vayande nakufwa?’ Ngwasonekele nakashimutwiji kaze kapwile namazu akuhana mulonga Kalunga mwomwo yavilinga vyavipi vinalisale muno mukaye.

Kaha omu ngwahetesele myaka 23, ngwechele mulimo wauswalale. Kufumaho ngwazachilenga milimo yakulisezaseza nakuya nakuzachila kulifuchi lyeka hamwaka umwe, oloze kangwasuulukile mukuyoya chamiko. Kakwapwile chuma chize ngwalitomenene kulinga chipwe kutesamo mukuyoya chamiko. Kakwapwile chuma chize changusuulwishilengako. Kufwila kupwa nazuvo, nakupwa hamilimo yamwaza chipwe kunguhaka hachihela chachinene, vyapwile vyuma vyamavokovoko kuli yami. Chuma changusuulwishilenga shina kunwa wala nakwivwilila kumyaso.

Ngunakwanuka lwola lumwe luze ngwasakile kutachikiza ovyo tweji kuyoyelanga. Omu ngwapwile muPoland, ngwayile nakutala chilombo chakulamina vafunge chaAuschwitz. Kunyima ngwatangile mijimbu yapwile nakuhanjika omwo vafunge vamuchilombo kana vayanjilenga. Oloze omu ngwamwene kuvula chavafunge vamuchilombo kana, ngwalishonene chikuma. Omu ngwapwile nakujinguluka chilombo kana oku nguli nakulila, ngwalihulishile ngwami, ‘mwomwo ika vatu vali nakuyanjishila vakwavo vatu ngana?’

OMU MBIMBILIYA YALUMWINE KUYOYA CHAMI:

Kuheta mu 1993 omu ngwakindulukile muAustralia, ngwaputukile kutanga Mbimbiliya mangana nguwane mwakukumbulwila vihula ngwapwile navyo. Omu mwahichile makumbi amandende, Vinjiho jaYehova vavali vangutambukilile kaha vangulwezele ngukapwe navo kukukunguluka changalila chize chapwililile muchivaza chakuhemena chamwakamwihi. Ngocho ngwetavilile.

Mwahichile kaha makumbi amandende kufuma haze ngwapwile muchivaza kana nakutala ngunja, oloze kukunguluka kana chapwile chakulipwila. Vinjiho jaYehova vapwile nakavumbi kuhakilako vene navana vavo, kaha nawa vavwalile kanawa. Kaha vyuma ngwamwene halwola lwakunoka vyangukomowesele. Halwola kana Vinjiho jaYehova vapwile nakulya, oloze omu vakindulukile muvitwamo vyavo, kavasele majilo numba amwe haze vapwile nakulilako. Kaha chachinenenyi vatu kana vasuulukile navyuma vapwile navyo kaha nawa vapwile vakuunda, evi hivyuma vize ngwapwile nakusaka. Kangweshi nakwanuka chihande numba chimwe havihande vahanjikile halikumbi kanako, oloze vilinga vyavo vyamwaza vasolwele vyangukwachile kumuchima.

Halikumbi kana nachingoloshi, ngwanukile musonyami walunga uze atangilenga Mbimbiliya nakulinangula vyuma vyamumauka akulisezaseza. Kunyima angulweze ngwenyi, Yesu ambile ngwenyi tunahase kutachikijila kwitava chamuchano kumihako yacho. (Mateu 7:15-20) Ngocho ngwajinyine kuwana vyuma vyalingisa Vinjiho valihandununeko navakwavo. Elu lukiko lwapwile lwola lwami lwatete kupwa nalufwelelo nalutalililo.

Chalumingo chakavangijileho, Vinjiho vavali vaze vangusanyikile kukukunguluka changalila vangutambukilile cheka. Kaha vanguhulishile numba nge nangusaka kulinangulanga Mbimbiliya, ngocho ngwetavilile. Kufumaho ngwaputukile kuyanga navo nakukukunguluka.

Omu ngwatwalileho lika kulinangula Mbimbiliya, ngwaputukile jino kumona Kalunga mujila yamwaza. Ngwatachikijile jino ngwami Kalunga keshi ikiye eji kulingisanga vatu valinge vyuma vyavipi chipwe kulingisa vatu vayandeko, oloze eji kwivwinga kupihya kachi nge mwamona vatu vali nakulinga vyuma vyavipi. (Kuputuka 6:6; Samu 78:40, 41) Ngocho ngwafwililile kuzata nangolo mangana nguhone kwivwisa Yehova kupihya kumuchimako, oloze ngumwivwisenga kuwaha kumuchima. (Vishimo 27:11) Kaha ngwechele kunwa chikuma wala, namakanya nakwecha kulinga vilinga vyeka vyavipi. Kuheta muMarch 1994 vangumbapachishile nakupwa Chinjiho chaYehova.

OMU NGUNANGANYALA:

Oholyapwa ngwapwa nguwakuwahilila nakusuuluka navyuma nguli navyo. Kaha kangwashinganyeka ngwami kunwa wala chinahase kukumisa ukalu wamiko. Oloze ngweji kumbilanga kulizakamina chami hali Yehova.—Samu 55:22.

Ngunatwame jino muulo hamyaka 10. Ngwambata pwevo wamwaza uze apwa Chinjiho chaYehova, lijina lyenyi ikiye Karen. Atwama namwanenyi wapwevo wamwaza, lijina lyenyi ikiye Nella. Kaha tuvosena tuvatatu tweji kuzachilanga hamwe mumulimo wavaka-Kulishitu wakukafwa vatu vatachikize kanawa Kalunga. Chikupu vene, ngwapwa jino wakusuuluka mukuyoya chami.