Iya Apwa Mikayele, uze Kangelo Wakulitulaho?

MUTU wakushipilitu uze vavuluka ngwavo Mikayele kavamuvuluka chikuma muMbimbiliyako. Oloze kala lwola navamuvuluka, kuvanga ali nakulinga vyuma vimwe. Mumukanda waNdanyele, Mikayele vamuvuluka ngwavo ali nakulwa jita navangelo vakuhuka; mumukanda waYuta vamusolola ali nakulihamika naSatana; kaha mumukanda waKusoloka, ali nakulwa jita naLiyavolo navandemone jenyi. Mikayele hakuhakwila wata waYehova nakulwa navaka-kole jaKalunga, eji kuzata kweseka nomu lyalumbunukila lijina lyenyi—“Iya Apwa Nge Kalunga?” Uno Mikayele ikiyeya?

Vatu vamwe vakwechi majina amavulu. Chakutalilaho, kakuluka Yakova vamuvuluka nawa ngwavo Isalele, kaha kaposetolo Petulu vamuvuluka ngwavo Shimona. (Kuputuka 49:1, 2; Mateu 10:2) Chochimwe nawa, Mbimbiliya yamba ngwayo Mikayele hilijina likwavo vavulukilenga Yesu Kulishitu shimbu kanda ezenga hano hamavu, nomu nawa ahilukile mwilu. Tukekese Visoneka tumone omu vyasolola chishina kanechi.

Kangelo Wakulitulaho. Mazu aKalunga azachisa mazu akwamba ngwavo Mikayele “uze kangelo wakulitulaho.” (WaYuta 9) Mikayele vanamuvuluka ngwavo hikangelo wakulitulaho. Echi chili nakulumbununa nge kwatwama kangelo umwe kaha wamuyachou. Enga, mazu akwamba ngwavo ‘kangelo wakulitulaho’ asoloka muMbimbiliya kwinyikila kukangelo umwe kaha, keshi kutungelo vavavuluko. Kaha Yesu vamuvuluka nawa ngwavo atwama muchihela chakangelo wakulitulaho. Mukanda Wavaka-Tesolonyika 1, 4:16 wahanjika kutalisa kuli Mwata Yesu Kulishitu uze vasangwile  ngwawo: “Ivene Mwata mwakafuma mwilu namutambi, nalizu lyakangelo wakulitulaho.” Ngocho lizu lyaYesu valivuluka kupwa lyakangelo wakulitulaho. Shikaho, chisoneka kanechi chasolola nge Yesu Ivene ikiye Mikayele, kangelo wakulitulaho.

Twamina wavaka-Jita. Mbimbiliya yahanjika ngwayo ‘Mikayele navangelo jenyi valwile jita nayauze chazangombe . . . navangelo jenyi.’ (Kusoloka 12:7) Shikaho, Mikayele ikiye Twamina yavangelo vakushishika vaze vaka-kulwa jita. Mukanda waKusoloka walumbununa Yesu nawa kupwa Twamina yavangelo vakushishika vaka-kulwa jita. (Kusoloka 19:14-16) Kaha kaposetolo Paulu azachisa mazu akwamba ngwenyi “Mwata Yesu” “navangelo jenyi vangolo.” (Wavaka-Tesolonyika 2, 1:7; Mateu 16:27; 24:31; WaPetulu 1, 3:22) Shikaho, Mbimbiliya yavuluka Mikayele kupwa “navangelo jenyi” nakuvuluka nawa Yesu ngwayo atwama “navangelo jenyi.” (Mateu 13:41) Hakuwana nge Mazu aKalunga asolola ngwawo kakwatwama mazavu avali avaka-jita avangelo vakushishika, kulumbununa nge lizavu limwe vatwaminyina kuli Mikayele kaha likwavo kuli Yesuko, ngocho chapwa chakutamo kukukulula ngwetu Mikayele ikiye vene Yesu Kulishitu mumilimo yenyi yamwilu. *

[Kwinyikila chamwishi]