VAKA-KULISHITU vavalweza valingenga chilika chaKwanuka Kufwa chaKulishitu. Chilika kanechi vachivuluka nawa ngwavo ‘kulya chaMwata chachingoloshi.’ (Wavaka-Kolinde 1, 11:20) Chuma muka chalingisa chilika kana kupwa chachilemu? Shimbu muka vatela kuchilinga kaha nawa mujila muka?

Yesu Kulishitu alingile chilika kanechi haufuku waPaseka yavaYuleya mu 33 C.E. Paseka yapwile hichilika valingilenga kamwe kaha mumwaka halikumbi lyakusokesa 14 mukakweji wavaYuleya waNyisane. Hakusaka kuwana likumbi lyaNyisane 14, vaYuleya vavandaminyinenga lwola vavuluka muundele ngwavo spring equinox mungonde yachivatuko chavula. Eli hilikumbi lize kweji kupwanga jola 12 jamusana najola 12 jaufuku. Kakweji watete kumweka kufuma halikumbi kaneli ikiye apwile kuputuka chakakweji waNyisane. Paseka vayilingilenga hanyima yamakumbi 14 hakulauka chalikumbi.

Yesu alingile chilika chaPaseka navaposetolo jenyi, kaha hikufumisamo Yuta Isakalyote, nakulinga jino Kulya chaMwata chaChingoloshi.  Kulya kanechi chashishile muPaseka yavaYuleya, ngocho vatela kuchilinganga kaha kamwe mumwaka.

Mujimbu Wamwaza waMateu wambulula ngwawo: “Yesu anonele mbolo, ayiwahishile, ayipuzwile, avahanyineyo tumbaji twenyi, avambile ngwenyi, Tambulenu, lyenu, ou mujimba wami. Anonele lupasa nawa, asakwililile, avahanyinelwo ngwenyi, Nwenumo muvosena, mwomwo awa akiko manyingami akushikechi chachihya, akuhichisa hali vavavulu, akuneha kuvakonekela milonga yashili.”—Mateu 26:26-28.

Vatu vavavulu vashinganyeka ngwavo Yesu alumwine mbolo nakupwa mujimba wenyi uvene nakwalumuna nawa vinyo kupwa himanyingenyi avene. Oloze Yesu apwile lika namujimba wenyi wosena omu ahanyine eyi mbolo. Uno vaposetolo jaYesu vapwile nakulya mujimba wenyi nakunwa manyingenyi tahi? Nduma, mwomwo kulya nyama yamutu nakunwa manyinga amutu chapwa ulyanyi, kaha nawa chalimbalaka najishimbi jaKalunga. (Kuputuka 9:3, 4; VyavaLevi 17:10) Yesu ambile hali Luka 22:20, ngwenyi: “Lupaselu lunapu kushikechi chachihya chamumanyingami, awa vene akuhichisa hali enu.” Uno luze vene lupasa lukiko lwapwile ‘kushika chachihya’ tahi? Chuma kana kacheshi kuhasa kulingiwako, mwomwo lushiko lwapwa chivwasano, keshi nge hichuma chakumona namesoko.

Shikaho, mbolo navinyo vyapwa hivifwanyisa kaha. Mbolo yeji kwimanyinako mujimba waKulishitu wakukupuka mwosena. Yesu azachishile mbolo yize yasalileho hakulya Paseka. Mbolo kana vayochele chakuhona kuhakamo chimbalwila. (Kulovoka 12:8) Mbimbiliya yazachisa chimbalwila kwimanyinako shili chipwe kupola. Ngocho, mbolo yemanyinako mujimba waYesu wakukupuka mwosena uze ahanyine kupwa wana. Mujimba kana kawapwile nashiliko.—Mateu 16:11, 12; Wavaka-Kolinde 1, 5:6, 7; WaPetulu 1, 2:22; WaYowano 1, 2:1, 2.

Vinyo vichila vyeji kwimanyinako manyinga aYesu. Manyinga kana akiko alingisa lushiko lwaluhya kupwa lwalulemu. Yesu ambile ngwenyi amwangile manyingenyi mangana ‘anehe kukonekela milonga yashili.’ Ngocho, vatu vanahase kupwa vatoma kumeso aKalunga nakwingila mulushiko lwaluhya naYehova. (WavaHepeleu 9:14; 10:16, 17) Lushiko chipwe ngwetu chivwasano kanechi, chalingisa vaka-Kulishitu vakushishika 144,000 vahase kuya mwilu. Navakazatanga mwavamyangana navapilishitu mwilu nakukatokwesa vatu vosena.—Kuputuka 22:18; Yelemiya 31:31-33; WaPetulu 1, 2:9; Kusoloka 5:9, 10; 14:1-3.

 Uno veya vatela kulya kuvifwanyisa kanevi vyahaKwanuka Kufwa chaMwata? Vaze vatwama mulushiko lwaluhya, vatwama nalutalililo lwakuya mwilu vakivo kaha vatela kulya mbolo nakunwa vinyo. Shipilitu yajila yaKalunga yeji kuvalwezanga ngwayo vanavasakula vakapwe vamyangana mwilu. (Wavaka-Loma 8:16) Ava vatwama nawa namulushiko lwaWangana naYesu.—Luka 22:29.

Uno ngachilihi vaze vakwechi lutalililo lwakukayoyela hamavu muPalachise haya myaka yosena? Ava veji kwononokanga lushimbi lwaYesu nakupwa kuchilika chaKulya chaMwata chaChingoloshi, oloze kaveshi kulya vifwanyisa kanako. Vinjiho jaYehova veji kulinganga echi chilika chaKulya chaMwata chaChingoloshi kamwe mumwaka hakulauka chalikumbi haNyisane 14. Numba tuhu vatu vavandende kaha mukaye kosena vakivo vaka-kuya mwilu, oloze chilika kana chapwa chachilemu kuli vaka-Kulishitu vosena. Cheji kulingisanga vatu vosena vashinganyeke hazangi yayinene vasolwele kuli Yehova Kalunga naYesu Kulishitu.—Yowano 3:16.