Kwitava Chize Etavila Kalunga
Kapetulu 15
Kwitava Chize Etavila Kalunga
Uno mauka akwitava osena eji kwivwisanga Kalunga kuwaha nyi?
Uno natuhasa kwijiva ngachilihi kwitava chamuchano?
Veya vapwa vaka-kulemesa Kalunga vamuchano hano hamavu makumbi ano?
1. Vyuma muka natunganyala nge natulemesa Kalunga mujila yakwoloka?
YEHOVA KALUNGA atuzakama chikuma kaha asaka tunganyale hakututwaminyina kuli ikiye. Kachi nge natumulemesanga mujila yakwoloka, kaha natupwa vakuwahilila nakukehesako ukalu mukuyoya chetu. Kaha mwatukisula nawa nakutukafwa. (Isaya 48:17) Kuli chikupu mauka akwitava amavulu aze alivuluka ngwawo anangula muchano hali Kalunga. Olozenyi vyuma vanangula hali Kalunga, omu apwa navyuma asaka kuli etu vyapwa vyakulihandununa chikuma.
2. Natuhasa kulinangula ngachilihi jila yakwoloka yakulemeselamo Yehova, kaha chakutalilaho muka nachitukafwa kwivwishisa chuma kanechi?
2 Uno nauhasa kwijiva ngachilihi ngwove eyi yikiko jila yakwoloka yakulemeselamo Yehova? Kawatela kulinangula nakwesekesa vyuma vanangula mumauka akwitava osenako. Oloze watela kulinangula kaha vyuma vize chikupu yanangula Mbimbiliya hakwitava chamuchano. Chakutalilaho: Mumafuchi amavulu vatu vamwe vali nakuzachisanga jimbongo jamalengeso. Uno naulinga ngachilihi nge vanakuhane mulimo wakukwatanga jimbongo kana mangana vahone kujizachisa? Kutala mufwila chakavanga utachikize kala jimbongo jamalengeso tahi? Nduma. Nachiwaha nge mupwa nalwola lwakwijiva kanawa jimbongo jize jamwenemwene. Hakwijiva kanawa omu japwa jimbongo jamwenemwene, nachipwa jino chachashi kwijiva najize jamalengeso. Chochimwe nawa, nge natulinangula mwakwijivila kwitava chamuchano, kaha tunahase kutachikiza namauka akwitava chamakuli.
3. Kweseka namazu aYesu, vyuma muka twatela kulinga numba Kalunga atwitavile?
3 Chapwa chachilemu kulemesa Yehova mujila yize etavila. Vatu vavavulu vafwelela ngwavo mauka akwitava osena eji kwivwisanga Kalunga kuwaha, oloze Mbimbiliya kayanangula ngochoko. Numba vene kuhanjika kaha hakanwa ngwetu twapwa tuvaka-Kulishitu kachapwa chakutamoko. Yesu ambile ngwenyi: “Ava navangwamba ngwavo, Ove Mwata, Ove Mwata, keshi vakivo vosena navakengila muwangana wameluko, kuvangou kaha eji kulinganga mwaya muchima waTata ali mwilu.” Shikaho, twatela kulinangula nakulinga vyuma vize asaka Kalunga kuli etu numba atwitavile. Yesu avulukile vaze veji kuhonanga kulinga mwaya muchima waKalunga ngwenyi “vaka-kuzata mwaupapwoki.” (Mateu 7:21-23) Ngana mwajimbongo jamalengeso, kwitava chamakuli kachatwama nanganyoko. Kaha kwitava kana nawa chapwa chaponde chikupu.
4. Mazu aYesu akuvuluka jijila jivali alumbununa ika, kaha jijila kana jeji kutwalanga kulihi?
4 Yehova alongesa jila yakukafwilamo vatu vosena hamavu vakahase kuyoya haya myaka yosena. Oloze twatela kulemesa Kalunga mujila yakwoloka nakuyoyanga mujila yize etavila, numbanyi tukayoye haya myaka yosena muPalachise. Chaluvinda, vatu vavavulu kavasaka kulinga ngochoko. Evi vikiko vyalingishile Yesu ambenga ngwenyi: “Ingililenu kuchikolo chachindende, mwomwo chikolo chinatoho, najila yinahweke, eyi yakuya kukunonga, kaha vaze veji kwingilangamo vanapu vavavulu. Mwomwo chikolo chachindende najila nawa yakupalakana, eyi yakuya kukuyoya, kahava navayiwana vanapu vavandende kaha.” (Mateu 7:13, 14) Kwitava chamuchano cheji kutwalanga kukuyoya chahaya myaka yosena. Oloze kwitava chamakuli cheji kutwalanga kukunonga. Yehova kasaka mutu naumwe kukanongako, ngocho nahane lwola vatu valinangule vyaIkiye. (WaPetulu 2, 3:9) Ngachize, jila tweji kulemeselangamo Kalunga yinahase kututwala kukuyoya chipwe kukufwa.
MWAKWIJIVILA KWITAVA CHAMUCHANO
5. Uno natuhasa kwijiva ngachilihi vaze vatwama mukwitava chamuchano?
5 Uno mutu mwahasa kuwana ngachilihi ‘jila yakuya kukuyoya’? Yesu ambile ngwenyi, kwitava chamuchano navakachimwena kuchiyoyelo chavatu vatwamamo. Ambile ngwenyi: “Kumihako yavo kukiko vene namuvatachikijila kanawa.” Kaha atwalileho ngwenyi: “Mitondo yamwenemwene yosena yeji kwimanga mihako yamwaza.” (Mateu 7:16, 17) Echi chalumbununa nge vatu vaze vatwama mukwitava chamuchano navakavejivila kuvyuma vafwelela nakuvilinga vyavo. Numba tuhu vaka-kulemesa Kalunga vamuchano kavakupuka mwosenako kaha nawa vakwechi tutenga, oloze mwalizavu vafwila kulinga mwaya muchima waKalunga. Tuchikekese jino vyuma 6 vize vyasolola vaze vatwama mukwitava chamuchano.
6, 7. Vangamba jaKalunga vamona ngachilihi Mbimbiliya, kaha Yesu asolwele ngachilihi chakutalilaho?
6 Vangamba jaKalunga vanangula vyuma vyakufuma muMbimbiliya. Mbimbiliya ivene yamba ngwayo: “Mazu-vasonekosena vawahwima kuli Kalunga, kaha anawahila kunangula, nakuhuhumuna, nakwolola, nakulongesa kana chili mukwoloka, mangana mutu waKalunga akazuke vyosena, akapwe kuluwa mwosena kuvilinga vyamwenemwene vyosena.” (WaChimoteu 2, 3:16, 17) Kaposetolo Paulu asonekelele vakwavo vaka-Kulishitu ngwenyi: “Haze mwatambwile mazu amujimbu kana mwevwile kuli etu, akiko mazu aKalunga, kamwawetavilile nge himazu avatuko, oloze nganomwapwa vene, akiko mazu aKalunga.” (Wavaka-Tesolonyika 1, 2:13) Ngachize, vyuma vafwelela nakulinga vaze vatwama mukwitava chamuchano kavyafuma muvishinganyeka chipwe muvisemwa vyavatuko. Oloze vyapwa vyamuMazu aKalunga vahwima, Mbimbiliya.
7 Yesu Kulishitu asolwele chakutalilaho chamwaza hakunangula vyuma vyamuMazu aKalunga. Yesu hakulomba kuli Ise wamwilu ambile ngwenyi: “Mazu ove akiko vene muchano.” (Yowano 17:17) Yesu afwelelele muMazu aKalunga kaha vyuma vyosena anangwilenga vyafuminenga muVisoneka. Yesu kakavulu ambilenga ngwenyi: “Vasoneka ngwavo.” (Mateu 4:4, 7, 10) Kufumaho himwavuluka jino mazu atwama muvisoneka. Navatu jaKalunga makumbi ano nawa kavanangula vishinganyeka vyavoko. Vafwelela ngwavo Mbimbiliya hiMazu aKalunga, ngocho veji kunangulanga kaha vyuma yahanjika.
8. Vyuma muka vyatwama mukulemesa Yehova?
8 Vaze vatwama mukwitava chamuchano valemesa kaha Yehova nakuvilika lijina lyenyi. Yesu ambile ngwenyi: “Mulemesenga Yehova Kalunga kove, muzachilenga Ikiye kaha.” (Mateu 4:10) Ngachize, vangamba jaKalunga veji kulemesanga kaha Yehova uka wenyi. Hakulemesa Kalunga mujila kaneyi veji kulwezanga nawa vatu vejive lijina lyaKalunga wamuchano, nomu apwa. Samu 83:18 yamba ngwayo: “Vakatachikize ngwavo, Ove ukwechi lijina lyove yove Yehova, uka wove uMuka-kulitulaho helu lyamavu hosena.” Yesu asolwele chakutalilaho hakukafwa vatu vejive Kalunga, omu alombele ngwenyi: “Lijina lyove ngunalisolola lyehi kuli vatu ava wanguhanyine vamuli vaka-mavu.” (Yowano 17:6) Ngocho, namakumbi ano nawa vaka-kulemesa Kalunga vamuchano veji kunangulanga vatu lijina lyaKalunga, navyuma ajina, navilinga vyenyi nawa.
9, 10. Mujijila muka vaka-Kulishitu vamuchano veji kusololanga zangi kuli vakwavo?
9 Vatu jaKalunga veji kusololanga zangi yamwenemwene kuli umwe namukwavo. Yesu ambile ngwenyi: “Hakiko vene navakatachikijila vatu vosena ngwavo, enu mwapwa mutumbaji twami, kachi nge muli nakulizanga navakwenu.” (Yowano 13:35) Vaka-Kulishitu vakulivanga valizangilenga navakwavo mujila kaneyi. Zangi yaukalunga kayeshi kulitala hamiyachi chipwe havikova, chipwe hamafuchiko, oloze yeji kuwanyisanga vatu muwanawakwavo wamuchano. (Wavaka-Kolose 3:14) Vatu vamukwitava chamakuli kavazanga vandumbwavo mujila kaneyiko. Tunejiva ngachilihi ngocho? Veji kulijihanga mwavo-mwavo mwomwo yakulihandununa mumafuchi chipwe muvisemwa. Vaka-Kulishitu vamuchano kaveshi kujiha vandumbwavo vaka-Kulishitu chipwe vatu vekako. Mbimbiliya yamba ngwayo: “Hakiko vene huvasolokela vana vaKalunga navana valiyavolo. Wose azeneka kulinga mwakwoloka keshi wakuli Kalungako, chipwe uze azeneka kuzanga ndumbwenyi. . . . Tulizangenunga navakwetu, keshi nge Kenako, uze apwile wakuli uze wamupi, ajihile songo yenyi.”—WaYowano 1, 3:10-12; 4:20, 21.
10 Zangi yamwenemwene nawa kayakumina kaha hakuhona kujiha vatuko. Vaka-Kulishitu vamuchano veji kuzachisanga lwola lwavo, nangolo javo, navyuma vyavo mangana valikafwe navakwavo nakulikolezeza. (WavaHepeleu 10:24, 25) Veji kulikafwanga navakwavo mulwola lwalukalu nakuzakamanga vakwavo namuchima wamwenemwene. Veji kukavangizanga punga yamuMbimbiliya ‘yakulinganga mwamwenemwene kuli vosena.’—Wavaka-Ngalesha 6:10.
11. Mwomwo ika chapwila chachilemu kwitavila ngwetu Kalunga mwakalwila vatu kuhichila muli Yesu Kulishitu?
11 Vaka-Kulishitu vamuchano vetavila ngwavo Kalunga eji kulwila vatu kuhichila muli Yesu Kulishitu. Mbimbiliya yamba ngwayo: “Ulwilo kaweshi muli weka naumweko, kaha nawa hano hamavu kaheshi lijina lyeka vanahane muli vatu vatulwile nalyoko.” (Vilinga 4:12) Nganomu twamwene muKapetulu 5, Yesu ahanyine kuyoya chenyi mwandando yakusokola vatu vakwononoka. (Mateu 20:28) Kalunga asakula nawa Yesu kupwa hiMwangana waWangana wamwilu uze naukayula hamavu hosena. Kalunga asaka twononokenga Yesu nakukavangiza kunangula chenyi numbanyi tukayoye haya myaka yosena. Evi vikiko vyalingisa Mbimbiliya kwamba ngwayo: “Ou mwamwitavila MwanaKalunga ali nakuyoya chahaya myaka yosena, oloze ou mwalikanga kuli MwanaKalunga keshi kukamona kuyoyako.”—Yowano 3:36.
12. Kuhona kupwa vamuli vaka-mavu chalumbununa ika?
12 Vaka-kulemesa Kalunga vamuchano kavapwa vamuli vaka-mavuko. Omu Yesu vamwimikile kumeso aPilatu mwangana wavaLoma, ambile ngwenyi: “Wangana wami kaweshi wakuli vaka-mavuko.” (Yowano 18:36) Vaka-kukavangiza Yesu vamuchano vapwa vamuWangana wamwilu, ngocho kavazana muvihande vyalifuchi nachiyulo mukala lifuchi vatwamako. Kavazana muvikokojola vyalifuchiko. Oloze vaka-kulemesa Yehova kavakanyisa vakwavo kupwa muliuka chipwe muchihela chaupolitiki, chipwe kuvwotako. Numba tuhu vaka-kulemesa Kalunga vamuchano kavazana muvihande vyalifuchi nachiyuloko, oloze veji kwononokanga kujishimbi jalifuchi. Mwomwo ika? Mwomwo Mazu aKalunga avalweza ‘valuukenga kuli vaze vali nangolo jakuyula’ mufulumende. (Wavaka-Loma 13:1) Oloze nge fulumende nayisaka valinge vyuma vimwe vize vyalimbalaka navyuma asaka Kalunga, kaha vaka-kulemesa Kalunga vamuchano veji kukavangizanga vaposetolo vaze vambile ngwavo: “Chatela kwononokanga kuli Kalunga, vatu vasale munyima.”—Vilinga 5:29; Mako 12:17.
13. Vaka-kukavangiza Yesu vamuchano veji kumonanga ngachilihi Wangana waKalunga, ngocho vyuma muka veji kulinganga?
13 Vaka-kumukavangiza Yesu vamuchano veji kwambululanga ngwavo Wangana waKalunga ukiko kaha wahana lutalililo kuvatu. Yesu ahanjikile chimweza ngwenyi: “Kahou mujimbu kana wamwaza wawangana navakawambulula kumafuchi osena nakupwa unjiho kuli vaka-mafuchi osena, numbanyi kukuma chamyaka yino chikeze.” (Mateu 24:14) Muchishishisa chakufwelelesa vatu ngwavo chiyulo chavatu chikiko nachikumisa ukalu wavo, vaka-kukavangiza Yesu Kulishitu vamuchano veji kuvilikanga Wangana waKalunga wamwilu ngwavo ukiko kaha naukakumisa ukalu wavatu. (Samu 146:3) Yesu atulwezele tulombenga fulumende yamwenemwene yizenga, hakwamba ngwenyi: “Wangana wove wize. Mwaya muchima wove vakalingemo hamavu nganomu veji kulingilangamo mwilu.” (Mateu 6:10) Mazu aKalunga ahanjikile chimweza ngwawo ou Wangana wamwilu “naukachikachika mawanganosenawa [aliko] nakuwakumisa, kaha ukiko naukelilanga haya myaka yosena.”—Ndanyele 2:44.
14. Liuka muka lyakwitava wamona ngwove likiko lyeji kulinganga vyuma vyasakiwa kuli vaka-kulemesa Kalunga vamuchano?
14 Lihulise ove lyavene havyumevi tunalinangula ngwove: ‘Uno liuka muka lyakwitava lyanangula vyuma vyamuMbimbiliya nakuvilika lijina lyaYehova? Liuka muka lyeji kusololanga zangi yaukalunga, nakwitavila muli Yesu, nakuhona kupwa vamuli vaka-mavu, nakuvilika nawa ngwavo Wangana waKalunga ukiko kaha naukakumisa ukalu wavatu? Hamauka osena akwitava ahamavu, liuka muka lyeji kulinganga vyuma kanevi?’ Unjiho wosena wasolola hatoma nge liuka kana shina lyaVinjiho jaYehova.—Isaya 43:10-12.
UNO NAULINGA MUKA?
15. Uno vyuma muka Kalunga asaka kuli etu muchishishisa chakwijiva kwitavila kaha ngwetu kwatwama?
15 Kwivwisa Kalunga kuwaha kachakumina kaha hakwitavila muli Ikiyeko. Mbimbiliya yamba ngwayo navandemone vetavila ngwavo Kalunga kwatwama. (WaYakova 2:19) Oloze ava vandemone kavalinga mwaya muchima waKalungako, ngocho Kalunga kavevwila kuwahako. Shikaho, hakusaka Kalunga atwitavile, twatela kufwelela ngwetu kwatwama nakulinga nawa vyuma asaka. Twatela nawa kwecha kwitava chamakuli nakukavangiza kwitava chamuchano.
16. Vyuma muka twatela kulinga kutalisa kukwazana mukwitava chamakuli?
16 Kaposetolo Paulu asolwele ngwenyi katwatela kwazana mukwitava chamakuliko. Asonekele ngwenyi: “Yehova nambe ngwenyi, Lovokenu muli vakivo, lihandununenumo, kanda mukwata kuchuma chachipi chimweko, kahAmi nangumitambula.” (Wavaka-Kolinde 2, 6:17; Isaya 52:11) Ngocho, vaka-Kulishitu vamuchano veji kulihendanga kukala vyuma vize vyapandama kukwitava chamakuli.
17, 18. Uno “Mbavilone Wamunene” apwa iya kaha nawa mwomwo ika mutu atela ‘kulovokamo washiwashi muli ikiye’?
17 Mbimbiliya yasolola ngwayo kwitava chamakuli chosena chatwama muli “Mbavilone Wamunene.” * (Kusoloka 17:5) Lijina kaneli lyatwanuna nganda yaMbavilone yakushikulu, muze mwaputukilile kwitava chamakuli hanyima yaLivaji lyamumakumbi aNowa. Kunangula chachivulu navyuma vanakulinga vatu mukwitava chamakuli makumbi ano vyafumine muMbavilone kana ize. Chakutalilaho, vaka-Mbavilone valemeselenga tulunga vatatu. Namakumbi ano nawa, kunangula chaTulunga vatatu chichili lika hikunangula chachilemu chikuma mumauka akwitava amavulu. Oloze Mbimbiliya yanangula hatoma ngwayo kwatwama Kalunga wamuchano umwe kaha, Ikiye Yehova, kaha Yesu Kulishitu apwa Mwanenyi. (Yowano 17:3) Vaka-Mbavilone nawa vetavilile ngwavo vatu vakwechi mwono uze kawafwako, uze vayekeleselenga mukakahya. Namakumbi ano nawa, mauka akwitava amavulu anangula vyashipilitu chipwe mwono wakuzeneka kufwa uze vanahase kuyekelesa mukakahya kahelo.
18 Hakuwana nge kwitava chavaka-Mbavilone yakushikulu chatanjile kumavu kwosena, naMbavilone Yayinene yoholyapwa nayikiye nawa tunahase kuyivuluka ngwetu wangana wakaye wakwitava chamakuli. Kalunga ambile ngwenyi ou wangana wakaye wakwitava chamakuli navakaunongesa mukukasumuna. (Kusoloka 18:8) Unamono jino ovyo nachipwila chachilemu kuli ove kufuma muMbavilone Yayinene, ngwetu? Yehova Kalunga nasake ove ‘ulovokemo muli Mbavilone Yayinene’ washiwashi shimbu kuchili lwola.—Kusoloka 18:4.
19. Vyuma muka naunganyala hakuzachila Yehova?
19 Vatu vamwe navalitwamina kulikata nayove mwomwo unafumu mukwitava chamakuli. Oloze kuzachila Yehova hamwe navatu jenyi nachikunganyalisa muvyuma vyavivulu kuhambakana vize mujimbalisa. Naupwa navandumbwove vavavulu vakushipilitu, ngana muze chapwile kuli tumbaji twaYesu vakulivanga vaze vasele vyuma vyeka nakukavangiza Yesu. Naupwa mutanga yayinene yamukaye kosena yavaka-Kulishitu vamuchano vaze vakuzanga chikuma. Kaha nawa naupwa nalutalililo lwakukayoya haya myaka yosena “kumyaka nayikezaho.” (Mako 10:28-30) Pamo hakuhita chalwola, vaze vakujinjile mwomwo yavyuma wafwelela navakamona vyuma yanangula Mbimbiliya nakukapwa navakivo nawa vaka-kulemesa Yehova.
20. Vaze vatwama mukwitava chamuchano vali nakutalilila vyuma muka kulutwe?
20 Mbimbiliya yanangula ngwayo kalinwomu Kalunga anongese kaye kano kakuhuka nakushishisaho lifuchi lyalihya lyakwoloka lize navakayula kuWangana wenyi. (WaPetulu 2, 3:9, 13) Lifuchi kana nalikapwa lyamwaza chiyovo! Kaha mulifuchi lize lyalihya lyakwoloka, namukapwanga kaha kwitava chimwe chamuchano. Kutala kacheshi kupwa chamanganako kuli ove kwalumuka nakulikata navaka-kulemesa Yehova vamuchano halwola vene luno nyi?
[Kwinyikila chamwishi]
^ par. 17 Tala Vihande Vyakuhakilako hamafwo 219-20 umone ovyo Mbavilone Yayinene yemanyinako wangana wakaye wakwitava chamakuli.
VYUMA YANANGULA MBIMBILIYA
▪ Kwatwama kaha kwitava chimwe chamuchano.—Mateu 7:13, 14.
▪ Kwitava chamuchano vachijivila kuvyuma chanangula.—Mateu 7:16, 17.
▪ Vinjiho jaYehova veji kulemesanga Kalunga mujila yize etavila.—Isaya 43:10.
[Vihula vyaChilongesa]
[Lipwata/Muvwimbimbi halifwo 147]
VAZE VEJI KULEMESANGA KALUNGA WAMUCHANO
▪ vanangula vyuma vyamuMbimbiliya
▪ veji kulemesanga kaha Yehova nakuvilika lijina lyenyi
▪ valizanga umwe namukwavo
▪ vetavila ngwavo Kalunga mwakalwila vatu kuhichila muli Yesu
▪ kavapwa vamuli vaka-mavuko
▪ veji kwambululanga ngwavo Wangana waKalunga ukiko kaha naukakumisa ukalu wavatu
[Muvwimbimbi halifwo 150]
Hakuzachila Yehova hamwe navatu jenyi, naunganyala vyuma vyavivulu kuhambakana vize mujimbalisa
