Lijina lyaKalunga—Mwakulizachishila, Nomu Lyalumbunukila

UNO mazu ahali Samu 83:18 vawasoneka ngachilihi muMbimbiliya yove? Mbimbiliya yaNew World Translation of the Holy Scriptures yasoneka vesi kaneyi ngwayo: “Mangana vakatachikize ngwavo, Ove ukwechi lijina lyove yove Yehova Uka wove uMuka-kulitulaho helu lyamavu hosena.” NajiMbimbiliya jikwavo jalumuna vesi kaneyi mujila yoyimwe. Oloze mujiMbimbiliya jeka jajivulu, lijina Yehova valifumisamo nakushishisamo jivulukiso jakufwana nge “Mwata” chipwe “waMyaka Yosena.” Uno lijina muka vatela kuzachisa muvesi kaneyi? Kutala vatela kuzachisa vulukiso kaha tahi, nyi lijina lyakuvuluka ngwavo, Yehova?

Vesi kaneyi yahanjika halijina. Mulilimi lyachiHepeleu vasonekele Mbimbiliya, vazachishile lijina lyakulipwila havesi kaneyi. Muvasona vachiHepeleu, lijina kaneli valisoneka ngwavo יהוה (YHWH). Oloze muLuvale, lijina kana valisoneka ngwavo “Yehova.” Uno eli lijina lyatwama muvesi yimwe kaha yamuMbimbiliya nyi? Nduma. Mukusoneka chakulivanga chaVisoneka vyachiHepeleu, lijina kana lyasolokamo kafwe mapapa 7,000!

Uno lijina lyaKalunga lyalema ngachilihi? Achitale hakulomba chakutalilaho chize alombele Yesu Kulishitu. Kulomba kana chaputuka ngana: “Ove Setu uli mwilu, vajilile lijina lyove.” (Mateu 6:9) Omu hahichile makumbi, Yesu alombele kuli Kalunga ngwenyi: “Ove Tata, tohwesa lijina lyove.” Kaha Kalunga ahanjikile kufuma mwilu ngwenyi: “Lijina lyami ngwalitohwesa lyehi, kaha nangulitohwesa cheka nawa.” (Yowano 12:28) Enga, lijina lyaKalunga lyapwa lyalilemu chikuma. Uno mwomwo ika vaka-kwalumuna Mbimbiliya vamwe vahonene kusoneka lijina kaneli muMbimbiliya nakwijiva kulishishisa najivulukiso kaha?

Chasoloka nge kwatwama vyuma vivali vyalingisa ngocho. Chatete, vatu vavavulu vamba ngwavo lijina kana kavatela kulizachisako mwomwo vatu makumbi ano kavejiva omwo valivulukilenga hakavangako. MuchiHepeleu chakushikulu kavazachishilenga vasopelo vavivumoko. Shikaho, kakweshi mutu makumbi ano nahase kwijiva kanawako omu vatu vamuMbimbiliya vavulukilenga lijina  lyaYHWH. Uno chuma kanechi chatela kutuhonesa kuzachisa lijina lyaKalunga tahi? Mumyaka vasonekele Mbimbiliya, lijina lyaYesu pamo valivulukilenga ngwavo Yeshua chipwe Yehoshua, mwomwo naumwe ejiva kanawa wauchi. Oloze vatu mukaye kosena makumbi ano, veji kuzachisanga lijina lyaYesu mujijila jakulisezaseza, kweseka nomu veji kuhanjikilanga mulilimi lyavo. Kaveshi kukana kuzachisa eli lijina, mwomwo yakuhona kwijiva omu valivulukilenga mulikulukaji lyamyaka lyakulivangako. Chakutalilaho, nge nauya kulifuchi lyeka, naukawana pamo lijina lyove veji kulivulukanga mweka mulilimi lyeka. Ngachize, kuzeneka kwijiva muvavulukilenga lijina lyaKalunga kushikulu kachatela kutuhonesa kulizachisako.

Chuma chamuchivali chalingisa vaka-kwalumuna Mbimbiliya vahone kusoneka lijina lyaKalunga shina chisemwa chavaYuleya. VaYuleya vavavulu vetavila ngwavo chapwa chijila kuvuluka lijina lyaKalunga. Vishinganyeka kanevi vyapendamina halushimbi lwamuMbimbiliya vazachisa mwakuhenga luze lwakwamba ngwavo: “Kanda mukavuluka lijina lyaYehova Kalunga kenu hamakuliko, mwomwo Yehova keshi kukasambisou mwavuluka lijina lyenyi hamakuliko.”—Kulovoka 20:7.

Olu lushimbi lwakanyisa kuzachisa lijina lyaKalunga mujila yakuhenga. Uno kutala lwakanyisa kuzachisa lijina lyenyi namujila yakalemesa nyi? Nduma. Vaka-kusoneka Mbimbiliya yachiHepeleu (“Tesetamende Yamwaka”) vosena vapwile vatu vakushishika vaze vakavangijilenga Jishimbi jize Kalunga ahanyine vaIsalele vakushikulu. Oloze vazachishilenga chikuma lijina lyaKalunga. Chakutalilaho, lijina kana valisonekelenga mumyaso yize vembilenga kumazavu avaka-kulemesa Kalunga. Yehova Kalunga alwezele navaka-kumulemesa vamusanyikenga halijina lyenyi, kaha vaze vakushishika vononokele. (Yowele 2:32; Vilinga 2:21) Ngocho, vaka-Kulishitu makumbi ano veji kuzachisanga chikuma lijina lyaKalunga, ngana muze alingilenga Yesu.—Yowano 17:26.

Vaka-kwalumuna Mbimbiliya veji kuvulumunanga mulonga waunene hakushishisa lijina lyaKalunga najivulukiso. Veji kusololanga Kalunga nge atwama kwakusuku chipwe nge katwamakoko, okunyi Mbimbiliya yeji kukolezezanga vatu vapwenga ‘napunga naYehova.’ (Samu 25:14) Achishinganyeke sepa lyove uze wejiva chikuma. Uno muhasa kupandama ngachilihi kuli ikiye nge kawatachikiza lijina lyenyiko? Chochimwe nawa, nge vatu kavejiva lijina lyaKalunga, Yehovako, kaha navahasa ngachilihi kupandama kuli ikiye? Kaha nawa nge vatu kaveshi kuzachisa lijina lyaKalungako, kaha kaveshi kuhasa  kwijiva nomu lyalumbunukilako. Uno lijina lyaKalunga lyalumbununa ika?

Kalunga ivene alumbunwine lijina lyenyi kuli ngamba yenyi wakushishika Mose. Omu Mose ahulishile Kalunga lijina lyenyi, Yehova amukumbulwile ngwenyi: “Ngwapwa mungwapwa.” (Kulovoka 3:14) Mbimbiliya yaRotherham yalumuna mazu kana awa ngwayo: “Nangupwa kala mweshomwo ngunasake.” Ngachize, Yehova nahase kupwa kala mweshomwo nasake mangana atesemo vyuma ajina.

Uno vyuma muka naulinga nge muhasa kupwa kala mweshomwo musaka? Uno vyuma muka mulingila masepa jove? Kachi nge sepa lyove umwe mwaviza chikuma, kaha unahase kupwa undotolo mangana umuke. Kaha nawa nge sepa lyove mukwavo mwahona jimbongo, kaha unahase kupwa najimbongo mangana umukafwe. Ove kaweshi kuhasa chikupu kupwa mwosenomuko. Kaha nayetu tuvosena vene katweshi kuhasako. Oloze omu naulinangula Mbimbiliya naulikomokela chikuma hakumona omu Yehova eji kupwanga kala mwoshomwo muli nakusakiwa mangana atesemo vyuma ajina. Kaha eji kwivwanga kuwaha kuzachisa ngolo jenyi mangana akafwe vatu vaze vamuzanga. (Mijimbu 2, 16:9) Vaze vahona kutachikiza lijina lyaYehova kavejiva vilinga kanevi vyamwaza nganako.

Enga, lijina lyaYehova lyatela kupwamo muMbimbiliya. Kwijiva mulyalumbunukila nakulizachisa kanawa hakumulemesa nachitulingisa tupandame chikuma kuli Setu wamwilu, Yehova. *

[Kwinyikila chamwishi]

[Muvwimbimbi halifwo 195]

Lijina lyaKalunga muvasona vachiHepeleu