Likumbi lyaKusopesa—Lyapwa Lika?

UNO weji kushinganyekanga ngwove Likumbi lyaKusopesa lyapwa ngachilihi? Vatu vavavulu vashinganyeka ngwavo vatu navakemana kulitanda lyaKalunga nakuvasopesa. Kaha navakasopesa mutu himutu. Vamwe navakavahana kuyoya chamupalachise yamwilu, kaha veka navakavayekelesa mukakahya. Oloze Mbimbiliya yahanjika vyuma vyeka vize navikasoloka halwola kanelu. Mazu aKalunga asolola lwola kana kupwa hilwola lwakutalilila vyuma vyamwaza.

Kaposetolo Yowano alumbunwine hali Kusoloka 20:11, 12 omu nalikapwa Likumbi lyaKusopesa, ngwenyi: “Ngwamwene litanda lyawangana lyalinene litoma, naUze atwamineho, namavu namelu vyachinyine kumeso enyi, kaha kavaviwanyinyine cheka kumako. Kaha ngwavamwene vafu, navava vavanene navava vavandende, vanemana kulutwe lwalize litanda lyawangana. Kaha avungulwile mikanda, avungulwile namukanda weka nawa, ukiko mukanda wakuyoya. Kaha vafu vavasopesele havyuma vize vasoneka hayize mikanda, nge kutesa navilinga vyavo.” Uno Muka-kusopesa vanavuluka hano ikiye iya?

Yehova Kalunga ikiye Muka-kusopesa vatu wamunene. Oloze mulimo wakusopesa auhana kuli mutu weka. Kweseka namukanda waVilinga 17:31, kaposetolo Paulu ambile ngwenyi Kalunga “nasakula lyehi likumbi, halikiko mwakavasopesa vaka-mavu  mwakwoloka, muli lunga uze atongola lyehi.” Ou Muka-kusopesa vatongola ikiye Yesu Kulishitu uze vasangwile. (Yowano 5:22) Uno Likumbi lyaKusopesa nalikaputuka mwaka uka? Kaha nalikambata myaka yingahi?

Mukanda waKusoloka wasolola nge Likumbi lyaKusopesa nalikaputuka hanyima yajita yaAlamangetone, omu tulingilo twaSatana navakatufumisa hamavu. * (Kusoloka 16:14, 16; 19:19–20:3) Hanyima yaAlamangetone, Satana navandemone jenyi navakavambila muwina hamyaka likombakaji. Halwola kana luze, vatu 144,000 navakapwa vaka-kuyula kaha navakayula mwilu ‘mwavamyangana naKulishitu hamwe hamyaka likombakaji.’ (Kusoloka 14:1-3; 20:1-4; Wavaka-Loma 8:17) Likumbi lyaKusopesa kalyeshi kapwa likumbi lyajola 24 kahako, oloze nalikapwa lyamyaka likombakaji.

Mumyaka yize likombakaji, Yesu Kulishitu “mwakasopesa vavatonyi navafu.” (WaChimoteu 2, 4:1) “Vavatonyi” navakapwa “liyongomena lyalinene” lyavatu vaze navakayovoka haAlamangetone. (Kusoloka 7:9-17) Kaposetolo Yowano amwene nawa “vafu . . . vanemana kulutwe lwalitanda” lyakusopela. Ngana muze ashikile Yesu, “vaze vali muvimbumbe navakevwa lizu [lyaKulishitu], navakalovokamo” halwola lwakusanguka. (Yowano 5:28, 29; Vilinga 24:15) Uno navakavasopesela vyuma muka?

Kweseka navyuma amwene kaposetolo Yowano, ‘vavungulwile mikanda’ kaha “vafu vavasopesele havyuma vize vasoneka hayize mikanda, nge kutesa navilinga vyavo.” Uno mumikanda kana vasonekamo vyuma valingile vatu kunyima nyi? Nduma, vatu kaveshi kukavasopesa havyuma valingile shimbu kanda vafwengako. Twejiva ngachilihi ngocho? Mbimbiliya yamba ngwayo: “Ou nafu lyehi nasambe lyehi kushili.” (Wavaka-Loma 6:7) Ngocho vaze navakasanguka navakapwa valambwe, vakuhona shili. Mikanda yize yakuvunga nayikemanyinako vyuma vyeka mwakasaka Kalunga kuli vatu. Vatu vaze navakayovoka haAlamangetone navaze navakasanguka vatela kukononoka jishimbi jaYehova, kuhakilako najishimbi jeka mwakahakako mumyaka yize likombakaji, numbanyi vakayoye haya myaka yosena. Ngocho, vatu navakavasopesa havyuma navakalinga mumyaka yize yaLikumbi lyaKusopesa.

 Likumbi lyaKusopesa nalikalingisa vatu vavavulu vakalinangule vyuma asaka Kalunga nakuvikavangiza. Echi chalumbununa nge nakukapwa mulimo waunene wakunangula vatu. Eyo, ‘vaka-kutwama hakaye navakalinangulanga kwoloka.’ (Isaya 26:9) Oloze, keshi vatu vosena navakasaka kukavangiza mwaya muchima waKalungako. Isaya 26:10 ngwenyi: “Chipwe navatetela muka-kuhuka, oloze keshi kulinangula kwolokako. Mulifuchi lyakundondeka mwahengesangamo, keshi kukamona kukumba chaYehovako.” Ava vaka-kuhuka navakavanongesa mumyaka yize yaLikumbi lyaKusopesa chakuhona kukasanguka cheka.—Isaya 65:20.

Kusongo yaLikumbi lyaKusopesa, vatu vaze navakayovoka ‘navakayoya cheka’ nakukapwa jino vakukupuka mwosena. (Kusoloka 20:5) Ngocho, Likumbi lyaKusopesa nalikalingisa vatu vakapwe vakukupuka mwosena, ngana muze vatelele kupwa hakavanga. (Wavaka-Kolinde 1, 15:24-28) Kaha nakukapwa jino kweseka chamakumishilo. Satana navakamukasununa nakukamwitavisa akahungumwise cheka vatu. (Kusoloka 20:3, 7-10) Ngocho, vaze navakamukana Satana navakalivwisa kuwaha omu nalukatesamo lushiko lwamuMbimbiliya lwakwamba ngwavo: “Vaka-kwoloka navakaswana lifuchi, navakatwamangamo haya myaka yosena.” (Samu 37:29) Enga, Likumbi lyaKusopesa nalikakisula vatu vakushishika!

[Footnote]