Kapetulu 19

Lilaminenga muZangi yaKalunga

Kuzanga Kalunga chalumbununa ika?

Uno natuhasa kulilamina ngachilihi muzangi yaKalunga?

Yehova mwakakisula ngachilihi vaze valilamina muzangi yenyi?

1, 2. Uno kulihi natuhasa kuwana uchinyino makumbi ano?

ACHISHINGANYEKE uli nakutambuka mujila oku kuli nakuhuhwa nyamanganda. Nakwilu kwosena jino wi. Miveso namikalateta hinayiputuka kuvuma, kaha navula yayinene hinayiza. Nauzangwisako oku uli nakutondatonda kwakuswama. Kaha hinaumona jino chisakila kukulo yajila. Muchisakila kana mwamwaza kaha nawa mwaumu. Nauwahilila chikupu kuswama muchisakila kana!

² Tuli nakuyoyela mulwola lwalukalu lwakufwana nge nyamanganda. Vyuma mukaye vili nakupihilako lika. Oloze kuli chisakila chamwaza, muma mwakuswama muze natuhasa kupwa vakukingiwa kuponde. Chisakila kana chikiko chika? Mbimbiliya yanangula ngwayo: “Nanguvuluka Yehova ngwami, Ikiye uchinyino wami, Ikiye mwami mwakukola, Ikiye Kalunga kami, muli Ikiye mukiko ngunafwelela.”—Samu 91:2.

3. Natuhasa kulingisa ngachilihi Yehova kupwa uchinyino wetu?

³ Achishinganyeke chuma kana! Yehova Samatanga, Mwata wakutenga chosena nahase kupwa  uchinyino wetu. Nahase kutulama, mwomwo akwechi ngolo kuhambakana vyuma vyosena vize navisaka kutwenyeka. Numba tuhu navatulemeka, oloze Yehova nahase kutuwahisa cheka. Jino natuhasa kulingisa ngachilihi Yehova kupwa uchinyino wetu? Twatela kumufwelela chikupu. Kaha nawa Mazu aKalunga atukolezeza ngwawo: “Lilaminenunga muzangi yaKalunga.” (WaYuta 21) Enga, twatela kulilaminanga muzangi yaKalunga, kulumbununa nge twatela kulinunganga lika hamwe muzangi naSetu wamwilu. Echi chikiko chatela kutulingisa tufwelele chikupu ngwetu hiuchinyino wetu. Uno natuhasa kulinunga nenyi ngachilihi?

IJIVA NAKWAKULA KUZANGI YAKALUNGA

4, 5. Mujijila jimwe muka Yehova nasolwelamo zangi kuli etu?

⁴ Hakusaka tulilamine muzangi yaKalunga, twatela kwijiva omu Yehova nasolola zangi yenyi hali etu. Achishinganyeke vyuma vimwe unalinangula muMbimbiliya kuzachisa mukanda uno. Yehova hakupwa Tengi, atuhana mavu kupwa limbo lyetu lyamwaza. Nalizalisa navyakulya, nameya, namitondo, natunyama, navihela vyamwaza. Kalunga atulweza lijina lyenyi navilinga vyenyi mwomwo ikiye MwenyaMbimbiliya. Kaha nawa Mazu enyi atulweza ngwawo atumine Mwanenyi umwe kaha lyamunwe, Yesu, kwiza hano hamavu, nakumwitavisa ayande nakutufwila. (Yowano 3:16) Wana kana walumbununa ika kuli etu? Watuhana lutalililo lwamwaza lwakulutwe.

⁵ Lutalililo lwetu lwakulutwe nawa lwapendamina hachuma cheka chize Kalunga nalingi. Yehova nazamisa fulumende yamwilu, Wangana wauMeshiya. Wangana kana kalinwomu ufumiseko kuyanda chosena nakulingisa mavu kupwa palachise. Achishinganyeke hachuma kana! Natukatwama mukuunda mupalachise nakuwahilila haya myaka yosena. (Samu 37:29) Oloze noholyapwa, Kalunga natuhane jindongi jakutukafwa mwakuyoyela mujila yamwaza. Natwitavisa nawa tulombenga kuli ikiye mangana tulivwasanenga nenyi lwola lwosena. Eji hijijila jimwe jajindende kaha jize Yehova nasolwelamo zangi yenyi kuvatu vosena, nakuli yove.

6. Uno nauhasa kwakula ngachilihi kuzangi ize nasolola Yehova?

⁶ Chihula chachilemu watela kukekesa shina echi: Uno nangwakula ngachilihi kuzangi yaYehova? Vatu vavavulu vanahase  kwamba ngwavo, “ Ngwatela nayami kuzanga Yehova.” Uno mukiko weji kushinganyekanga nayove nyi? Yesu ambile ngwenyi elu hilushimbi lwakuhambakana jishimbi josena, hakwamba ngwenyi: “Muzangenga Yehova Kalunga kove namuchima wove wosena, namwono wove wosena, namanganove osena.” (Mateu 22:37) Chikupu vene, uli navyuma vyavivulu vyatela kukulingisa uzangenga Yehova Kalunga. Uno kushinganyeka kaha ngwove ukwechi zangi kana chikiko kuzanga Yehova namuchima wove wosena, namwono wove, namanganove osena tahi?

7. Uno kuzanga Kalunga chakumina kaha hakumushinganyeka tahi, nyi kwatwama vyuma vyeka? Lumbununa.

⁷ Nganomu valumbununa muMbimbiliya, katwatela kushinganyeka kaha ngwetu twamuzanga Kalungako. Numba tuhu kushinganyeka hazangi yaYehova chapwa chachilemu, oloze chuma kana chapwa kaha hikuputuka chazangi yamwenemwene. Mitondo yakwima mihako yeji kufumanga kumikoswa yize navatumba. Jino kutala unahase kusuuluka nge navejiva kukuhana kaha mukoswa wanganavene omu musaka kachi ulyenga muhako uvene nyi? Nduma! Chochimwe nawa, kushinganyeka kuzanga Yehova Kalunga chapwa maputukilo kaha. Mbimbiliya yanangula ngwayo: “Echi chikiko vene kumuzanga Kalunga, kulamanga jishimbi jenyi. Kaha jishimbi jenyi kajeshi jajikaluko.” (WaYowano 1, 5:3) Zangi yakuzanga Kalunga yatela kwima mihako numbanyi yipwenga yamuchano. Vatela kuyisolola kuvilinga.—Mateu 7:16-20.

8, 9. Natuhasa ngachilihi kusolola nge twamuzanga Kalunga nakumusakwilila?

⁸ Tweji kusololanga ngwetu twamuzanga Kalunga hakulama jishimbi jenyi nakujikavangizanga. Kulinga ngocho kachapwa chachikalu chikumako. Jishimbi jaYehova kajapwa jajikaluko mwomwo vajitunga jitukafwe tupwenga nachiyoyelo chamwaza chakuwahilila nakusuuluka. (Isaya 48:17, 18) Kukavangiza jishimbi jaYehova nachisolola nge twamuzanga Setu wamwilu nakumusakwilila havyuma vyosena vize atulingila. Chaluvinda hakuwana  nge vatu vavandende kaha mukaye makumbi ano vakivo veji kulinganga ngocho. Katwasaka kupwa namuchima kanako, nganomu chapwile kuli vatu vamwe vapwileko omu Yesu apwile hano hamavu. Yesu okile vaka-mbumba likumi, oloze umwe kaha ikiye akindulukile kuli Yesu nakumusakwilila. (Luka 17:12-17) Chikupu vene, natusaka kupwa ngana mwamutu uze asakwililile, keshi ngana mwavaze 9 vahonene kusakwililako!

⁹ Uno jishimbi muka jaYehova twatela kulama? Tunashimutwila hajishimbi jajivulu mumukanda uno, oloze tuhituluke kaha jajindende. Kulama jishimbi jaKalunga nachitukafwa tulilamine muzangi yenyi.

PANDAMANGA CHIKUMA KULI YEHOVA

10. Lumbununa ovyo chapwila chachilemu kutwalaho lika kulinangula vyaYehova Kalunga?

¹⁰ Kulinangula vyaYehova hichuma chachilemu nachikulingisa upandame chikuma kuli ikiye. Echi hichuma chize kawatela kwecha kulingangako. Nge uli haweluka naufuku nakwota kakahya mwomwo kuli chishika chikuma, kutala unahase kwechelela kakahya kalijimine tuhu nyi? Nduma. Naulikwachisa kusambiza  jikunyi mangana kaze kakahya kahone kujima. Kuyoya chove chinahase kupendamina hakulama kaze kakahya. Nganomu jikunyi jeji kukwachisanga kakahya, ‘nakutachikiza Kalunga’ nawa cheji kulingisanga zangi yetu yakuzanga Yehova kupwa yakukola.—Vishimo 2:1-5.

11. Uno kunangula chaYesu chakwachile ngachilihi hali vaka-kumukavangiza?

¹¹ Yesu asakile vaka-kumukavangiza valame zangi yavo yakuzanga Yehova naMazu Enyi amuchano kupwa yakukola kaha nawa yizuma. Hanyima yakusanguka, Yesu anangwile tumbaji twenyi vavali, upolofweto umwe wamuVisoneka vyachiHepeleu uze wateselemo muli ikiye. Uno vevwile ngachilihi hamazu ahanjikile? Vavene vejile nakwamba ngwavo: “Twapwanga nakwivwa hyangu kumichima yetu nomu apwanga nakuhanjika netu mujila, nomu apwanga nakutulumbunwina Mazu-vasoneka.”—Luka 24:32.

12, 13. (a) Havatu vavavulu makumbi ano, vyuma muka vinasoloka kuzangi yavo yakuzanga Kalunga naMbimbiliya? (b) Jino natuhasa kukinga ngachilihi zangi yetu kuhona kuhola?

¹² Uno muchima wove wawahililile chikuma nakupwa natwima yakumuzanga Kalunga halikumbi lyatete walinangwile vyuma yanangula Mbimbiliya nyi? Mukiko vene. Navatu vavavulu vanevunga vene ngocho. Chuma chachikalu jino shina kulama zangi kana nakuyilingisa yikule. Katweshi nakusaka kukavangiza tato yamukaye kanoko. Yesu ambile chimweza ngwenyi: “Zangi yavatu vavavulu hinayikahola.” (Mateu 24:12) Uno nauhasa kukinga ngachilihi zangi yove yakuzanga Yehova namuchano wamuMbimbiliya yihone kuhola?

¹³ Twalaho lika kulinangula vyaYehova Kalunga naYesu Kulishitu. (Yowano 17:3) Shinganyeka nakuhunanana chikuma havyuma uli nakulinangula muMazu aKalunga, nakulihulisa ngwove: ‘Uno echi chuma kana chili nakungunangula ika hali Yehova Kalunga? Mujijila jeka muka chili nakungukafwila mangana ngumuzange namuchima wami wosena, namanganami osena, namwono wami wosena?’ (WaChimoteu 1, 4:15) Kushinganyeka chikuma havyuma mujila kaneyi nachikukafwa umuzange chikuma Yehova.

14. Uno kulomba nachitukafwa ngachilihi kulama zangi yetu twazanga Yehova?

¹⁴ Kulomba shimbu yosena nawa chinahase kulama zangi  yove yakuzanga Yehova kupwa lika yakukola. (Wavaka-Tesolonyika 1, 5:17) Twalinangwile muKapetulu 17 mumukanda uno nge kulomba hiwana waulemu vatuhana kuli Kalunga. Nganomu usepa wavatu weji kukolanga hakushimutwilanga kanawa lwola lwosena, mukiko nawa nausepa wetu naYehova naupwa lika wakuzama mbe nge natulombanga kuli ikiye lwola lwosena. Ngachize, kulomba chetu kachatela kupwa chakwijiva kuhituluka kaha muvyuma vyovimwe vyakuhona nomu vyalumbunukilako. Twatela kuhanjika kuli Yehova nganomu mwana mwahanjika naise uze azanga. Oloze twatela kuhanjika kanawa nakavumbi, nakulinyisa kaha nakuhanjika chakufuma kumuchima wetu. (Samu 62:8) Enga, chilongesa chaMbimbiliya chaha uka nakulomba chakufuma kumuchima, vyapwa vyavilemu mukulemesa Kalunga, kaha vinahase nawa kutukafwa tulilaminenga muzangi yaKalunga.

WAHILILA HAKULEMESA CHOVE KALUNGA

15, 16. Mwomwo ika twatela kumwena mulimo wakwambulula Wangana kupwa hikutokwa kaha nawa hiluheto?

¹⁵ Chilongesa chaMbimbiliya chaha uka nakulomba hivyuma vize tunahase kulingila kupenge. Tuchikekese jino milimo yamukwitava yize twatela kulinganga hasanga: kulwezako vakwetu vyuma twafwelela. Uno unazanaho lyehi muchano umwe wamuMbimbiliya navakwenu nyi? Nge mukiko, kaha unalivwisa kuwaha chikupu. (Luka 1:74) Nge natwazana navakwetu muchano tunalinangula hali Yehova Kalunga, kaha tuli nakuzata mulimo waulemu uze vahana vaka-Kulishitu vamuchano vosena, wakwambulula mujimbu wamwaza waWangana waKalunga.—Mateu 24:14; 28:19, 20.

¹⁶ Kaposetolo Paulu amwene mulimo wenyi kupwa waulemu, nakuuvuluka ngwenyi hiluheto. (Wavaka-Kolinde 2, 4:7) Kuhanjika navatu mujimbu waYehova Kalunga navyuma ajina himulimo wamwaza uze watela kulinga. Wapwa himulimo vatuhana kuli Mwata wamwenemwene, uze nawa ukwechi nganyo yayinene. Hakwazana mumulimo kanou, uli nakukafwa vatu vamichima yamwaza vapandame kuli Setu wamwilu nakupwa mujila yakuvatwala kukuyoya chahaya myaka yosena. Mulimo kana weji kusuulwisanga chiyovo! Kaha nawa kwambulula vyaYehova naMazu  enyi nachikulingisa upwenga nalufwelelo chikuma nakuzamisa zangi yove yakumuzanga ikiye. Yehova mwamona nawa milimo uli nakuzata kupwa yayilemu chikuma. (WavaHepeleu 6:10) Kwazana chikuma mumulimo kanou nachikukafwa ulilamine muzangi yaKalunga.—Wavaka-Kolinde 1, 15:58.

17. Mwomwo ika mulimo wavaka-Kulishitu unapwila wakapachapacha makumbi ano?

 ¹⁷ Twatela kwijiva ngwetu mulimo wakwambulula Wangana himulimo twatela kuzata mukapachapacha. Mbimbiliya ngwayo: “Ambulula mazu, shishikilako.” (WaChimoteu 2, 4:2) Mwomwo ika kulinga ngocho chili nakusakiwa chikuma makumbi ano? Mazu aKalunga atulweza ngwawo: “Likumbi lyaYehova lyalinene lili hakamwihi. Lili hakamwihi, lili nakulyanguhwisa chikuma.” (Zefwanyiya 1:14) Enga, kalinwomu Yehova anongese tulingilo twavyuma twamyaka yino twosena. Shikaho, vatu vatela kuvahuhumuna. Vatela kwijiva ngwavo luno hilwola vatela kusakula Yehova kupwa Mwata wavo. Kukuma “kacheshi kukakuminyinako.”—Hambakuke 2:3.

18. Mwomwo ika twatela kulemesela Yehova hamwe navaka-Kulishitu vamuchano?

¹⁸ Yehova ali nakusaka tumulemesele hamwe navaka-Kulishitu vamuchano. Evi vikiko Mazu enyi ambila ngwawo: “Tulyanukenunga navakwetu, mangana tulisangumwine kuzangi nakuvilinga vyamwaza. Kanda tukaseza kulikungulula chetu, nganomu veji kulinganga vamweko, oloze tulivendejekenunga navakwetu, nakuhambakanamo mwomwo munamono ngwenu, likumbi lize lili nakupandama kwakamwihi.” (WavaHepeleu 10:24, 25) Hakulikungulula navakwetu vaka-kwitava hakukunguluka chavaka-Kulishitu, tweji kupwanga nalwola lwamwaza lwakwalisa nakulemesa Kalunga ketu wazangi. Kaha nawa tweji kulitunganga nakulivendejeka navakwetu.

19. Natuhasa kuzamisa ngachilihi zangi yetu muchikungulwilo chavaka-Kulishitu?

¹⁹ Tweji kukolesanga zangi yetu nausepa wetu muchikungulwilo hakupwanga hamwe navakwetu vaka-kulemesa Yehova. Twatela chikupu kupwanga nakutala havilinga vyamwaza vyavandumbwetu, nganomu eji kulinganga Yehova kuli etu. Kanda mufwelela ngwove vakwenu vaka-kwitava vapwa vakukupuka mwosenako. Ijiva ngwove tuvosena tuchili nakuzovoloka kushipilitu, kaha tweji kulimbenjanga nawa. (Wavaka-Kolose 3:13) Fwila kuwana mwakuzamishila usepa wove navaze vazanga chikuma Yehova, kaha nauzovoloka kushipilitu. Enga, kulemesela hamwe Yehova navandumbwove vakushipilitu nachikukafwa ulilamine muzangi  yaKalunga. Uno Yehova eji kuhana ngachilihi fweto kuli vaze veji kumulemesanga nakashishi nakulilamina muzangi yenyi?

FWILA KUPWA ‘NAKUYOYA CHAMWENEMWENE’

20, 21. Uno “kuyoya chamwenemwene” chikiko chika, kaha mwomwo ika chapwila hilutalililo lwamwaza?

²⁰ Yehova eji kuhananga vangamba jenyi vakushishika kuyoya. Jino kuyoya kana chamuyachi uka? Uno uli chikupu nakuyoya oholyapwa nyi? Etu vavavulu tunahase kwamba vene ngwetu eyo, mwomwo tuli nakuhwima, nakulya, nakunwa. Enga, tuli nakuyoya vene. Kaha halwola lumwe lwakuwahilila, tunahase nakwamba ngwetu, “Echi hikuyoya chikupu!” Oloze Mbimbiliya yamba ngwayo kakweshi mutu makumbi ano ali chikupu nakuyoya mujila yamwazako.

²¹ Mazu aKalunga atulweza “[tu]kwateko kukuyoya kanechi chinapu kuyoya chamwenemwene.” (WaChimoteu 1, 6:19) Mazu kana asolola nge “kuyoya chamwenemwene” hichuma chize natukatambula kulutwe. Enga, omu natukapwa vakukupuka mwosena, natukayoya kanawa mulifuchi, ngana muze Kalunga ajinyine hakavanga. Omu natukapwa vakulikangula nakukatwama mukuunda nakuwahilila mupalachise hano hamavu, natukahasa kulivwisa jino “kuyoya chamwenemwene,” chipwe ngwetu kuyoya chahaya myaka yosena. (WaChimoteu 1, 6:12) Elu hilutalililo lwamwaza chikupu!

22. Uno nauhasa kukwata ngachilihi “kukuyoya kanechi chinapu kuyoya chamwenemwene”?

²² Uno tunahase kukwatako ngachilihi “kukuyoya kanechi chinapu kuyoya chamwenemwene”? Paulu akolezezele vaka-Kulishitu muchihande chochimwe ngwenyi “valingenga mwamwenemwene, valilunjikilenga luheto lwavilinga vyamwaza.” (WaChimoteu 1, 6:18) Enga, twatela kumana kukavangiza vyuma tuli nakulinangulanga muMbimbiliya. Uno Paulu apwile nakulumbununa ngwenyi “kuyoya chamwenemwene” chapwa hifweto vatela kutufweta mwomwo yakulinga vilinga vyamwaza nyi? Nduma, mwomwo kuyoya kana natukachitambula ‘hawana walikoji’ lyaKalunga. (Wavaka-Loma 5:15) Oloze Yehova asaka kukahana wana kana kuli vaze veji kumuzachilanga nakashishi. Ali nakusaka kukakumona uli ‘nakuyoya chamwenemwene.’ Ngocho vaze veji  kulilaminanga muzangi yaKalunga vakivo navakapwa nakuyoya kanechi chakuwahilila nakuunda, haya myaka yosena.

23. Mwomwo ika chapwila chachilemu kulilamina muzangi yaKalunga?

²³ Tuvosena mutu himutu twatela kulihulisa ngwetu, ‘Uno nguli nakulemesa Kalunga mujila yize alongesa ivene muMbimbiliya nyi?’ Kachi nge hakumbi hakumbi natumona ngwetu tuli chikupu nakulemesa Kalunga mujila kaneyi, kaha tuli nakulinga kanawa. Kaha natufwelela chikupu ngwetu Yehova hiuchinyino wetu. Mwalamanga kanawa vatu jenyi vakushishika mumakumbi ano amakalu amumyaka yino yakusongo. Yehova mwakatwingisa nawa mulifuchi lyalihya lyaupahu lize linapandama. Ocho kuwaha kana natukevwa hakukapwanga mulifuchi kana! Kaha natukawahilila nawa chikuma hakwijiva ngwetu twasakwile vyuma vyamwaza mumakumbi ano akusongo. Kachi nge nausakula vyuma kanevi oholyapwa, kaha naukapwa ‘nakuyoya chamwenemwene’ haya myaka yosena, kuyoya chize asakile Yehova Kalunga hakavanga!

VYUMA YANANGULA MBIMBILIYA

▪ Tweji kusololanga chikupu ngwetu twazanga Kalunga hakulamanga jishimbi jenyi nakujikavangiza.—WaYowano 1, 5:3.

▪ Kulinangula Mazu aKalunga, nakulomba kuli Yehova namuchima wosena, nakunangula vatu vyaIkiye, nakumulemesanga hakukunguluka chavaka-Kulishitu navitukafwa tulilamine muzangi yaKalunga.—Mateu 24:14; 28:19, 20; Yowano 17:3; Wavaka-Tesolonyika 1, 5:17; WavaHepeleu 10:24, 25.

▪ Vaze navalilamina muzangi yaKalunga vali nalutalililo lwakukalivwisa kuwaha “kuyoya chamwenemwene.”—WaChimoteu 1, 6:12, 19; WaYuta 21.

[Vihula vyaChilongesa]

[Muvwimbimbi halifwo 184]

Uno naulingisa Yehova kupwa uchinyino wove mumyaka yino yayikalu nyi?

[Muvwimbimbi halifwo 187]

Ngana mwakakahya, zangi yove yakuzanga Yehova yasaka kuyisambiza numbanyi yitwaleho lika

[Muvwimbimbi halifwo 190]

Yehova ali nakusaka ukalivwise kuwaha “kuyoya chamwenemwene.” Kutala naukapwa nakuyoya kana nyi?