Kapetulu 7

Lutalililo Watela Kupwa Nalwo haVatu Wazanga Vaze Vafwa

Twejiva ngachilihi ngwetu nakukapwa kusanguka?

Vyuma muka vyasolola nge Yehova afwila kukasangula vafu?

Veya navakasanguka?

1-3. Muka-kole muka eji kutuhangasananga, kaha mwomwo ika kukekesa vyuma yanangula Mbimbiliya nachitwivwisa kuwaha?

ACHISHINGANYEKE vali nakukuhangasana kuli muka-kole. Ou muka-kole kana wangolo chikuma kaha nawa wajimbushi kukuhambakana yove. Kaha wejiva vene ngwove apwa chilyanyi mwomwo unamumono omu najihinga masepa jove vamwe. Numba ulaha tuhu ngachilihi, oloze hanga chapandama lika kwakamwihi. Kutwala muze jino mumona ngwove kwove ngu. Oloze kukasumuka mutu weka we. Ou mutu kana wajingolo chikuma kuhambakana namuka-kole wove, kaha himwakulweza ngwenyi mwakukafwako. Chikupu vene mwivwa nakumuchima hwo!

² Nayove vali nakukuhangasana kuli muka-kole wamuyachou. Keshi yove kaha vali nakuhangasanako oloze nayetu tuvosena. Mukapetulu nafumuho twalinangulanga nge Mbimbiliya yavuluka kufwa kupwa muka-kole. Kakweshi mutu mwahasa kuchina chipwe kuhonesa kufwako. Tunamononga omu muka-kole kanou najihinga vausoko wetu. Oloze Yehova akwechi ngolo chikuma kuhambakana kufwa. Apwa hiMuka-kutuyovola uze nalisolola lyehi nge nahase kuhonesa ou muka-kole. Kaha ashika nawa ngwenyi mwakanongesa ou muka-kole, kufwa, haya myaka yosena. Mbimbiliya yanangula ngwayo: “Muka-kole wakukotokela  uze navakenyeka chikiko kufwa.” (Wavaka-Kolinde 1, 15:26) Mujimbu kanou wamwaza chiyovo!

³ Tuchishimutwile chindende omu tweji kwivwanga nge mutu twejiva nafu. Echi nachitukafwa twivwishise lushiko luze nalutwivwisa kuwaha. Yehova ashika ngwenyi vafu navakayoya cheka. (Isaya 26:19) Navakavakindulwisa cheka kukuyoya. Elu lukiko chikupu lutalililo lwakusanguka.

NGE MUTU WAZANGA NAFU

4. (a) Mwomwo ika natwambila ngwetu muchima asolwele Yesu hakufwa chamutu azangile wasolola muchima atwama nawo Yehova? (b) Usepa muka wakulipwila apwile nawo Yesu?

⁴ Wafwisaho lyehi mutu wazanga chikuma nyi? Echi cheji kutwivwisanga kukola kumuchima nakutunehela ushona nakutulingisa tuhone kwijiva mwakulingila. Halwola lwangana, twatela kutanganga Mazu aKalunga mangana atuvendejeke. (Wavaka-Kolinde 2, 1:3, 4) Mbimbiliya yeji kutukafwanga twivwishise omu Yehova naYesu veji kwivwanga nge mutu nafu. Yesu, uze alifwana naIse, ejivile omwo vatu veji kwivwanga nge vanafwisa. (Yowano 14:9) Omu Yesu apwile muYelusalema, atambukililenga Lazalu navandumbwenyi vaMaliya naMalita vaze vatwaminenga mumbaka yaMbetane. Ngocho valizangile chikuma. Mbimbiliya yamba ngwayo: “Yesu azangilenga Malita nasongo yenyi naLazalu.” (Yowano 11:5) Oloze Lazalu afwile nganomu twalinangulanga mukapetulu nafumuho.

5, 6. (a) Uno Yesu alingile ngachilihi omu apwile hamwe navausoko namasepa vaLazalu vaze vapwile nakulishona? (b) Mwomwo ika kulishona chaYesu cheji kutukolezezanga?

⁵ Uno Yesu evwile ngachilihi omu afwile sepa lyenyi? Mujimbu watulweza ngwawo Yesu naikiye nawa alinyengele hohamwe navausoko namasepa vaLazalu. Jino omu avamwene, evwile ushona chikuma. “Alishishimwine mushipilitu yenyi nakulinyenga.” Kaha mujimbu wamba ngwawo, “Yesu alilile.” (Yowano 11:33, 35) Uno kulishona chaYesu chasolwele nge kapwile nalutalililoko nyi? Nduma. Yesu ejivile vene ngwenyi linwaha kusoloke chuma chimwe chakukomwesa chiyovo. (Yowano 11:3, 4) Chipwe ngocho, evwile kukola kumuchima naushona watwama hakufwisa.

 ⁶ Kulishona chaYesu cheji kutukolezezanga. Cheji kutunangulanga nge Yesu naIse Yehova vahunga kufwa. Oloze Yehova Kalunga nahase kuhonesa muka-kole kanou. Tutale jino vyuma alingile Yesu mungolo jaKalunga.

“OVE LAZALU, LOVOKAMO!”

7, 8. Mwomwo ika vatu kavashinganyekele ngwavo Lazalu nahase kuyoya chekako, oloze Yesu alingile vyuma muka?

⁷ Lazalu vamufunjile muwina wakusendeleka, kaha Yesu alwezele vatu vafumiseko lilolwa lize vambanjikileko. Oloze Malita akanyine ngwenyi pamo mujimba waLazalu unaputuka lyehi kupola mwomwo hahichile makumbi awana kufuma hakufwa chenyi. (Yowano 11:39) Vatu kavashinganyekele ngwavo Lazalu nahase kuyoya chekako.

⁸ Vafumishile lize lilolwa kaha Yesu atambakanyine nalizu lyakukanguka ngwenyi: “Ove Lazalu, lovokamo!” Uno vyuma muka vyasolokele? “Uze apwile mufu alovokelemo.” (Yowano 11:43, 44) Achishinganyeke ocho kuwaha vevwile vatu vaze vapwileko! VandumbwaLazalu, navausoko wenyi, namasepa jenyi, navenyembo jenyi vejivile chikupu ngwavo Lazalu nafu. Oloze vamumwene cheka nawa lunga kanou vazangile chikuma ali navo hamwe walambwe. Chuma kana chavakomwesele chiyovo! Chamuchano vene vatu vavavulu vawahililile nakulipakata nenyi mukasamba. Kufwa vachifungulwile chikupu!

9, 10. (a) Uno Yesu asolwele ngachilihi uze amuhanyine ngolo jakusangula Lazalu? (b) Nganyo yimwe muka yatwama hakutanga mijimbu yakusanguka vasoneka muMbimbiliya?

⁹ Yesu kahanjikile ngwenyi alingile chuma kanechi chakukomwesa mungolo jenyiko. Oloze mumazu alombele shimbu kanda asangule Lazalu asolwele chikupu nge Yehova ikiye alingishile numba Lazalu asanguke. (Yowano 11:41, 42) Yehova kazachishile ngolo jenyi mujila kaneyi hali Lazalu kahako. Mujimbu wakusanguka chaLazalu watwama hamijimbu 9 yakusangula vafu yize vasoneka muMazu aKalunga. * Ngocho, chapwa  chamwaza kutanganga mijimbu kaneyi nakulinangulayo kanawa. Eyi mijimbu yatunangula nge Kalunga keshi kusakulako, mwomwo havatu asangwile hapwile vanyike navakulwane, malunga namapwevo, vaIsalele navaze kavapwile vaIsaleleko. Mijimbu kana yasolola nge vatu vawahililile chikuma. Chakutalilaho, omu Yesu asangwile kanyike wapwevo, visemi jenyi “vafwile chishima chachinene.” (Mako 5:42) Enga, Yehova avevwishile kuwaha kaha kuwahilila kana kavachivulyamineko.

¹⁰ Vatu vaze asangwile Yesu vafwile cheka. Uno echi chili nakulumbununa nge Yesu alishinyishile tuhu kusangula vatu tahi? Nduma. Mijimbu kaneyi yamuMbimbiliya yatulumbunwina muchano waulemu havafu kaha nawa yatuhana lutalililo.

VYUMA NATULINANGULA HAMIJIMBU YAVAZE VASANGWILE

11. Uno mujimbu wakusanguka chaLazalu wakundwiza ngachilihi mazu vasoneka hali Muka-kwambulula 9:5?

¹¹ Mbimbiliya yanangula ngwayo vafu “kavatachikiza chumako.” Kaveshi vavatonyi nakuyolela kuchihela chekako. Kaha mujimbu waLazalu wakundwiza mazu kana awa. Uno Lazalu hakusanguka alwezele vatu vyuma vyamwaza vyatwama mwilu nyi? Kutala avevwishile woma hakuvalweza mijimbu yayipi yakuwema mukakahya kahelo nyi? Nduma. Mbimbiliya kayasolola nge Lazalu ahanjikile mijimbu kaneyiko. Lazalu ‘katachikijile chumako’ hamakumbi osena awana apwile mufu. (Muka-kwambulula 9:5) Omu afwile Lazalu, chapwile nge asavalile kaha tulo.—Yowano 11:11.

12. Mwomwo ika natwitavila ngwetu chikupu vene Lazalu asangukile?

¹² Mujimbu waLazalu watunangula nawa nge kusanguka chavafu kachapwa hichishimo kahako oloze nachikapwako chikupu. Vatu valimwenenene nameso avo kapu omu Yesu asangwile Lazalu. Navatwamina vamukwitava vaze vahungile Yesu kavahamikile chumechiko. Oloze vambile ngwavo: “Natulinga muka? Mwomwo mutu kana [Yesu] ali nakulinga vinjikizo vyavivulu?” (Yowano 11:47) Vatu vavavulu vayile nakumona Lazalu uze vasangwile. Ngocho vatu vavavulu vafwelelele muli Yesu. Kaha vetavilile  chikupu ngwavo Yesu vamutumine kuli Kalunga hakumona vyuma vyalingiwile hali Lazalu. Ou wapwile hiunjiho waunene, ngachize walingishile vatwamina vamwe vavaYuleya vakukakama michima vafunyine kujiha Yesu naLazalu.—Yowano 11:53; 12:9-11.

13. Vyuma muka navitulingisa twitavile ngwetu chikupu vene Yehova mwakasangula vafu?

¹³ Kutala nachipwa chakuhenga kwitavila ngwetu kusanguka nachikapwako nyi? Nduma, Yesu anangwile ngwenyi likumbi limwe “vosena vaze vali muvimbumbe” navakasanguka. (Yowano 5:28) Yehova ikiye Tengi wakuyoya chosena. Ngachize kacheshi kupwa chachikalu kwitavila ngwetu nahase kukatenga cheka kuyoyako. Oloze Yehova mwakalinga ngocho kweseka nomu mwaya vishinganyeka vyenyi. Uno Kalunga mwakanuka navatu jetu twazanga vaze vafwa nyi? Mumelu mwatwama vatanganyika vavavulu, oloze Kalunga eji kuvalava vosena halijina. (Isaya 40:26) Ngocho, Yehova Kalunga nahase kwanuka navatu jetu twazanga vaze vafwa, nakuhasa kuvakindulwisa cheka kukuyoya.

14, 15. Vyuma muka vyasolola nge Yehova afwila kukasangula vafu nge muze ambile Yopa?

¹⁴ Mbimbiliya yanangula ngwayo Yehova afwila kukasangula vafu. Vyuma muka navitulingisa twitavile ngwetu mwakalinga chuma kana? Mutu wakushishika Yopa ahulishile ngwenyi: “Kachi nge mutu mwafwa, mwakayoya cheka numba?” Yopa ahanjikile vyakutwama muchimbumbe nakuvandamina palanga nakulwola luze Kalunga mwakamwanuka. Ambile kuli Yehova ngwenyi: “Kachi unangusanyika, kahami kachi ngunakwitavila, kachi unafwila tengeso yamavoko ove.”—Yopa 14:13-15.

¹⁵ Achishinganyeke hachuma kanechi! Chikupu vene Yehova afwila kukasangula vafu. Kutala katweshi kwivwa kuwaha hakwijiva ngwetu Yehova afwila kukalinga ngochoko nyi? Jino ngachilihi vyakusanguka chize chili nakwiza kulutwe? Veya navakasanguka, kaha navakasangukila kulihi?

“VOSENA VAZE VALI MUVIMBUMBE”

16. Lifuchi lyakufwana ngachilihi navakatwama vatu vaze navakasanguka?

¹⁶ Mijimbu yamuMbimbiliya yavatu vasangwile yatunangula  vyavivulu kutalisa kukusanguka chize nachikapwa kulutwe. Vatu vaze vasangwile hano hamavu valiwanyine cheka navausoko wavo. Nakusanguka chakulutwe nawa mukiko munachikapwa, olozenyi mujila yeka yakukupuka. MuKapetulu 3, twalinangwile nge Kalunga ajina kukalingisa mavu osena kupwa palachise. Shikaho vafu kaveshi kukasangukila mulifuchi lyakuzala najijita, nauhwanga, nakukolako. Navakatwama hano hamavu haya myaka yosena mukuunda nakuwahilila.

17. Vatu muka navakasanguka?

¹⁷ Uno veya navakasanguka? Yesu ambile ngwenyi ‘vosena vaze vali muvimbumbe navakevwa lizu lyenyi nakulovokamo.’ (Yowano 5:28, 29) Kaha nawa mukanda waKusoloka 20:13 wamba ngwawo: “Kalungalwiji avechele vafu vaze vapwilemo, nakufwa naHetese nawa vyavechele vafu vaze vapwile muvikiko.” “Hetese” yemanyinako fuka yavatu vosena. (Tala Vihande Vyakuhakilako hamafwo 212-13.) Fuka kana nayikasala yamupolongwa. Vihita vyavatu vosena vaze vatwamamo navakayoya cheka. Kaposetolo Paulu ambile ngwenyi: “Nakukapwa kusanguka chavafu, nachavaka-kwoloka nachavaka-kuhenga.” (Vilinga 24:15) Uno echi chalumbununa ika?

18. Veya vatwama hali “vaka-kwoloka” vaze navakasanguka, kaha lutalililo kanelu lunahase kukukafwa ngachilihi?

¹⁸ Halizavu ‘lyavaka-kwoloka’ hatwama navatu vavavulu vaze tweji kutanganga muMbimbiliya vaze vayoyele shimbu kanda Yesu ezenga hano hamavu. Vatu vamwe shina Nowa, Apalahama, Sala, Mose, Lute, Eseta, navakwavo veka vavavulu. Kaha mukanda WavaHepeleu kapetulu 11, washimutwila hamalunga namapwevo vamwe ava vakushishika. Hali “vaka-kwoloka” kana nahakapwa navangamba jaYehova vaze vanakufwanga makumbi ano. Lutalililo lwakusanguka lunahase kutukafwa tuzeneke kwivwa woma wakufwa.—WavaHepeleu 2:15.

19. Veya vapwa “vaka-kuhenga,” kaha Yehova mwakavahana lwola muka lwamwaza?

¹⁹ Uno ngachilihi kuli vaze vosena vazenekele kulemesa Yehova chipwe kumuzachila mwomwo yakuhona kumwijiva? Awa mayongomena ‘avaka-kuhenga’ kaveshi kukawavulyamako.  Ava vatu kana navakivo nawa navakasanguka nakukavahana lwola lwakulinangula vyaKalunga wamuchano nakumuzachila. Mumyaka likombakaji, vafu navakasanguka nakukalinunga hamwe navatu vakushishika vahamavu nakuzachila Yehova. Lwola kana nalukapwa lwamwaza chiyovo. Mbimbiliya yavuluka tando kaneyi ngwayo Likumbi Lyakusopesa. *

20. Ngehena chuma muka, kaha veya veji kuyangamo?

²⁰ Uno chalumbununa nge vafu vosena navakasanguka tahi? Nduma. Mbimbiliya yamba ngwayo vafu vamwe vali “muNgehena.” (Luka 12:5) Lizu Ngehena lyafuma kuchihela chize chapwile kuweluka waYelusalema yakushikulu kuze vamwangililenga swali. Oku kukiko vochelelenga swali navivimbi. Vivimbi vambililengamo shina vaze vamwenenga kuli vaYuleya nge kavatelemo kuvafunda nakukasangukako. Ngocho, Ngehena hichihela chize chemanyinako kunonga chahaya myaka yosena. Numba tuhu Yesu mwakapwa namulimo wakusopesa vatu vavatonyi navafu, oloze Yehova ikiye Muka-kusopesa wamakumishilo. (Vilinga 10:42) Yehova keshi kukasangula vaze amona kupwa vaka-kuhuka, vaze kavasaka kwalumukako.

KUSANGUKILA MWILU

21, 22. (a) Uno kwatwama kusanguka muka chikwavo? (b) Iya apwile watete kusangwila kukuyoya chakushipilitu?

²¹ Mbimbiliya yavuluka nawa kusanguka chikwavo chize chakusanguka nakukayoyela mwilu mwamutu wakushipilitu. Yesu Kulishitu ikiye kaha vavulukila kusanguka kanechi vasoneka muMbimbiliya.

²² Omu vatu vajihile Yesu, Yehova ketavishile Mwanenyi wakushishika kupwa lika muchimbumbeko. (Samu 16:10; Vilinga 13:34, 35) Kalunga asangwile Yesu, oloze keshi namujimba wautuko. Kaposetolo Petulu alumbunwine ngwenyi, Kulishitu “vamujihile vene muchisemwa chahamavu, oloze vamuyoyesele mushipilitu.” (WaPetulu 1, 3:18) Echi chapwile hichuma  chakukomwesa. Yesu ayoyele cheka kupwa mutu wangolo wakushipilitu. (Wavaka-Kolinde 1, 15:3-6) Yesu ikiye apwile watete kusanguka mujila kaneyi yaupahu. (Yowano 3:13) Oloze kusanguka kana kachakuminyinyine hali ikiye kahako.

23, 24. Veya vatunga “utanga [waYesu] wamikoko waundende,” kaha vapwa vangahi?

²³ Yesu hakwijiva ngwenyi kalinwomu akinduluke mwilu, alwezele vaka-kumukavangiza ngwenyi mwakaya ‘nakuvalongesela chihela.’ (Yowano 14:2) Yesu avulukile vaze navakaya mwilu ngwenyi “utanga [wenyi] wamikoko waundende.” (Luka 12:32) Uno vatu vangahi navakapwa mulizavu kaneli lyalindende lyavaka-Kulishitu vakushishika? Kweseka namukanda waKusoloka 14:1, kaposetolo Yowano ambile ngwenyi: “Ngwatalile, kaha Mwanamukoko [Yesu Kulishitu] ngwamumwene nemana hapili Zeyone. Hamwe naIkiye hapwile vatu chihita chimwe natununu tuwana namakombakaji awana, vapwile nalijina lyenyi nalijina lyaIse lyakusoneka kujiholo javo.”

²⁴ Ava vaka-Kulishitu vakuheta ku 144,000, haze hatwama navaposetolo jaYesu vakushishika, veji kusangukilanga kukuyoya chamwilu. Uno veji kusangukanga lwola muka? Kaposetolo Paulu asonekele ngwenyi navakasanguka halwola lwakupwako chaKulishitu. (Wavaka-Kolinde 1, 15:23) MuKapetulu 9 naukalinangula nge tuli nakuyoyela jino mulwola kanelu. Ngocho vasalaho hali vaze 144,000 vaze vali nakufwanga mumakumbi ano veji kusangukila kukuyoya chamwilu hahaze vene navafwa. (Wavaka-Kolinde 1, 15:51-55) Oloze vatu vamuchivulu vatwama nalutalililo lwakukavasangula kulutwe nakukatwama muPalachise hano hamavu.

25. Vyuma muka natushimutwila mukapetulu nakavangizaho?

²⁵ Enga, Yehova mwakafungulula muka-kole wetu kufwa, kaha keshi kukapwako chekako haya myaka yosena! (Isaya 25:8) Oloze unahase kuhulisa ngwove, ‘Uno vaze navakasangukila mwilu navakaya nakulingamo ika?’ Vatu kana navakatunga fulumende yamwaza yaWangana mwilu. Natulinangula vyavivulu hafulumende kaneyi mukapetulu nakavangizaho.

[Kwinyikila chamwishi]

 VYUMA YANANGULA MBIMBILIYA

▪ Mijimbu yamuMbimbiliya yavatu vasangwile yatuhana lutalililo lwamwaza. —Yowano 11:39-44.

▪ Yehova afwila kukasangula vafu. —Yopa 14:13-15.

▪ Vosena vaze vali muvimbumbe navakasanguka.—Yowano 5:28, 29.

[Vihula vyaChilongesa]

 [[Muvwimbimbi halifwo 69]

Elija asangwile mwanatuliwe.—Vamyangana 1, 17:17-24

[[Muvwimbimbi halifwo 69]

Kaposetolo Petulu asangwile muka-Kulishitu wapwevo Ndokase.—Vilinga 9:36-42

[[Muvwimbimbi halifwo 69]

Kusanguka chaLazalu chevwishile vatu kuwaha.—Yowano 11:38-44

[[Muvwimbimbi halifwo 75]

MuPalachise, vafu navakasanguka nakukapwa hamwe navausoko wavo