Kapetulu 5

Ndando Yakusokola—hiWana Waulemu Atuhana Kalunga

Ndando yakusokola yapwa yika?

Uno vatuhanyineyo ngachilihi?

Kaha nayikunganyalisa ngachilihi?

Nausolola ngachilihi ngwove wasakwilila handando kaneyi?

1, 2. (a) Vyuma muka vyeji kulingisanga kala wana mutambula kupwa waulemu? (b) Mwomwo ika natwambila ngwetu ndando yakusokola hiwana waulemu chikuma uze wahambakana hamawana osena unahase kutambula?

WANA muka waulemu chikuma watambulaho lyehi mukuyoya chove? Wana kawatela kupwa nandando yayinene chikuma numbanyi upwenga waulemuko. Kulema chawana kavatela kuchimwena hajimbongo najifwika hawana kanako. Oloze weji kupwanga waulemu nge naukwivwisa kuwaha nakukukafwa mukuyoya chove.

² Hamawana osena musaka kukatambula mukuyoya chove, hali umwe kaha uze wapwa wakulipwila. Ou hiwana uze Kalunga ahana vatu. Yehova natuhane vyuma vyavivulu, oloze wana waulemu chikuma atuhana shina ndando yakusokola yaMwanenyi Yesu Kulishitu. (Mateu 20:28) Mukapetulu uno natulinangula nge ndando yakusokola yapwa hiwana waulemu chikuma uze muhasa kutambula mwomwo naukukafwa nakukulingisa kupwa uwakuwahilila. Ndando yakusokola alongesa Yehova hijila yimwe yayinene yize yasolola nge akuzanga.

NDANDO YAKUSOKOLA YAPWA YIKA?

3. Ndando yakusokola yapwa yika, kaha vyuma muka twatela kwijiva numbanyi tumone ovyo wana kanou wapwila waulemu?

³ Ndando yakusokola yapwa chikupu hijila yize Yehova  azachisa asokole vatu chipwe ngwetu avalwile kufuma kushili nakufwa. (Wavaka-Efwesu 1:7) Twatela kushinganyeka havyuma vyasolokele mumilemba yaEtene numbanyi twivwishise mwalumbunukila chihande kanechi chamuMbimbiliya. Nge natwijiva vyuma ajimbalishile Alama hakuvulumuna mulonga washili, kaha natwivwishisa ovyo ndando yakusokola yapwila wana waulemu.

4. Kuyoya chakukupuka mwosena apwile nacho Alama chatelele kupwa ngachilihi?

⁴ Yehova hakutenga Alama amuhanyine chuma chamwaza chiyovo, chikiko vene kuyoya chakukupuka mwosena. Achitale omu chatelele kupwa kuyoya chaAlama. Hakumutenga namujimba navishinganyeka vyakukupuka mwosena, katelele kuviza, chipwe kushinakajiwa, chipwe kufwako. Alama apwile nawa nausoko wamwaza naYehova hakupwa himutu wakukupuka mwosena. Mbimbiliya yamba ngwayo apwile ‘mwanaKalunga.’ (Luka 3:38) Ngocho Alama alivwishilenga kuwaha usoko wamwaza naYehova Kalunga, nganomu valizanga vamwana naise. Yehova ahanjikilenga nayou mwanenyi wahamavu, nakumuhana milimo yamwaza yakumusuulwisa nakumulweza ejive vyuma atelele kulinga.—Kuputuka 1:28-30; 2:16, 17.

5. Mbimbiliya yatalikisa mulihi hakwamba ngwayo Alama vamutengele “wakutambula kuli Kalunga”?

⁵ Alama vamutangile “wakutambula kuli Kalunga.” (Kuputuka 1:27) Echi kachalumbununa nge Alama apwile namujimba ngana waKalungako. MuKapetulu 1 mumukanda vene uno twalinangwilemo nge Yehova apwa shipilitu kaha kavamumonako. (Yowano 4:24) Ngocho Yehova katwama namujimba wanyama namanyingako. Alama hakumutenga wakutambula kuli Kalunga chalumbunwine nge vamutangile kupwa navilinga ngana vize vyaKalunga vyakufwana nge zangi, namangana, nachiyulo nangolo. Alama alifwanyine naIse mujila ikwavo nawa yayilemu yakupwa nangolo jakulisakwila vyakulinga. Kapwile nge likina lize lyeji kuzatanga kaha milimo yize valitomenako. Oloze alisakwililenga ivene vyakulinga, nakuhandununa kuwaha nakupihya. Nge Alama ononokele  Kalunga kachi ayoyele haya myaka yosena muPalachise hamavu.

6. Omu Alama alikangile kuli Kalunga, vyuma muka ajimbalishile kaha chuma kana chakwata ngachilihi hali vana venyi?

⁶ Alama ajimbalishile chuma chimwe chandando yayinene chikuma omu alikangile kuli Kalunga nakumwangula ngwavo mwakafwa. Shili yenyi yatokeselemo kuyoya chenyi chakukupuka mwosena navyuma vyeka vyamwaza. (Kuputuka 3:17-19) Chaluvinda, Alama kajimbalishile kuyoya chamwaza chayivene kahako, oloze nachize chavana venyi nawa. Mazu aKalunga amba ngwawo: “Nge muze yejile shili hano hamavu hali mutu umwe [Alama], nakufwa nawa chalondolokele hashili, kaha ngocho kufwa chinahete kuli vatu vosena, mwomwo vosena vavulumwine.” (Wavaka-Loma 5:12) Enga, tuvosena twatambula shili yaAlama. Shikaho Mbimbiliya yamba ngwayo Alama ‘alilanjishile’ ivene navana venyi hamwe muundungo washili nakufwa. (Wavaka-Loma 7:14) VaAlama naEve kavapwile nalutalililoko mwomwo vachisakwile mumichima yavo kulikanga kuli Kalunga. Nyi ngachilihi vana vavo, hamwe kaha nayetu?

7, 8. Ndando yakusokola yatwama naulumbunwiso muka uvali?

⁷ Yehova awahishile jila yakuyowelamo vatu kuhichila mundando yakusokola. Uno ndando yakusokola yapwa ika? Ndando yakusokola yalumbunukila muvali. Chatete, ndando yakusokola yapwa ndando navafweta hakusaka kusokola chipwe kukindulwisa chuma. Tunahase kuyesekesa kundando navafweta mangana vasokole funge. Chamuchivali, ndando yakusokola yapwa ndando yize nayifwika handando yavyuma vimwe. Ndando kana yalifwana nandando yize navafweta yifwike havyuma vinalyenyeka. Chakutalilaho, nge mutu nanehesa ponde, kaha atela kufweta jimbongo jize najilita nandando yavyuma vize nenyekesa.

⁸ Uno navahasa ngachilihi kufwika chuma chachinene ngana ajimbalishile Alama chize chakwata hali etu tuvosena nakuhasa kutusokola muundungo washili nakufwa? Tushimutwile jino handando yakusokola yize ahanyine Yehova, nomwo yinahase kukunganyalisa.

 JILA AZACHISHILE YEHOVA HAKUTUHANA NDANDO YAKUSOKOLA

9. Ndando yakusokola muka yasakiwile?

⁹ Hakuwana nge kuyoya chakukupuka mwosena chikiko chajimbalile, kakwapwile mutu wakuhona kukupuka mwosena ahashile kukindulwisa kuyoya kanako. (Samu 49:7, 8) Chuma chasakiwile shina ndando yize yatelemo kusokola kuyoya chize chajimbalile. Echi chalita nalushimbi lwakukupuka lwatwama muMazu aKalunga, luze lwamba ngwalwo: “Mukalinga mwono namwono ndwa.” (Lushimbi lwamuchivali 19:21) Jino chuma muka chatelele kufwika hakuyoya chakukupuka mwosena, chipwe ngwetu mwono uze ajimbalishile Alama? Vatelele kushishisamo kuyoya chakukupuka mwosena chize chapwile nandando yakuteseka hamwe.—WaChimoteu 1, 2:6.

10. Yehova awahishile ngachilihi vyandando yakusokola?

¹⁰ Yehova awahishile ngachilihi vyandando yakusokola? Yehova atumine mwanenyi umwe wakushipilitu wakukupuka mwosena kwiza hano hamavu. Oloze katumine kala mwanenyi wakushipilituko. Atumine uze azanga chikuma, Mwanenyi umwe kaha lyamunwe. (WaYowano 1, 4:9, 10) Ou Mwanenyi alisuwile nakwiza hano hamavu. (Wavaka-Fwilipi 2:7) Nganomu twalinangulanga mukapetulu nafumuho mumukanda uno, Yehova alingile chuma chakukomwesa hakunungulwila kuyoya chaMwanenyi mujimo lyaMaliya. Yesu asemukile mwamutu wakukupuka mwosena kuhichila mushipilitu yajila yaKalunga ngocho kapwile nashiliko.—Luka 1:35.

11. Uno mutu umwe ahasa ngachilihi kupwa ndando yakusokola vatu vavavulu?

¹¹ Uno mutu umwe kaha ahasa ngachilihi kupwa ndando yakusokola vatu vavavulu chikuma? Natwakula kuchihulechi hakwihula ngwetu, uno vatu vavavulu veza nakupwa ngachilihi vaka-shili? Anuka ngwove Alama hakuvulumuna mulonga washili, ajimbalishile kuyoya chenyi chakukupuka mwosena. Ngocho katambwishile vana venyi kuyoya chakukupuka mwosenako, oloze avatambwishile shili nakufwa. Yesu uze vavuluka  muMbimbiliya ngwavo “Alama wakukumisa” apwile nakuyoya chakukupuka mwosena, shikaho kapwile nashiliko. (Wavaka-Kolinde 1, 15:45) Yesu ashishile muchihela chaAlama mangana atulwile. Kaha afwetele ndando yashili yaAlama hakwecha kuyoya chenyi chakukupuka mwosena nakwononokela Kalunga palanga nakusongo. Ngocho Yesu alingishile vana vaAlama vapwenga nalutalililo.—Wavaka-Loma 5:19; Wavaka-Kolinde 1, 15:21, 22.

12. Kuyanda chaYesu chasolwele vyuma muka?

¹² Mbimbiliya yalumbununa luyando amwene Yesu shimbu kanda afwenga. Yesu vamulipwile vikote, nakumujiha mwamupi hakumupapalila hachitondo. (Yowano 19:1, 16-18, 30; Vihande Vyakuhakilako hamafwo 204-6) Mwomwo ika chapwilile chakutamo kuli Yesu kuhita muluyando kanolu? Mukapetulu ali kulutwe mumukanda uno natukalinangula ngwetu Satana amba ngwenyi vangamba jaYehova kaveshi kuhasa kutwalaho lika kupwa vakushishika nge vali muvyesekoko. Oloze Yesu hakutwalaho lika kupwa wakushishika muvyeseko asolwele nge Satana apwa muka-kwonga. Yesu asolwele ngwenyi mutu wakukupuka mwosena uze akwechi ngolo jakulisakwila vyuma, nahase kupwa lika wakulonga kumeso aKalunga numba tuhu navamushinyinyika kuli Liyavolo. Yehova atela evwile kuwaha hakushishika chaMwanenyi uze azanga chikuma!—Vishimo 27:11.

13. Uno ndando yakusokola vayifwetele ngachilihi?

¹³ Uno ndando yakusokola vayifwetele ngachilihi? Halikumbi lyavaYuleya lyaNyisane 14, 33 C.E., Kalunga echele Mwanenyi wakukupuka mwosena vamujihe. Ngocho Yesu echele kuyoya chenyi chakukupuka mwosena “kamwe kaha kunahu.” (WavaHepeleu 10:10) Halikumbi lyamuchitatu kufuma hakufwa chaYesu, Yehova amusangwilile kukuyoya chakushipilitu. Yesu hakuya mwilu ahanyine kuyoya chenyi chautu chakukupuka mwosena kuli Kalunga kupwa ndando yakusokola vana vaAlama. (WavaHepeleu 9:24) Yehova etavilile kuyoya chaYesu kupwa ndando yize yasakiwile kukusokola vatu kushili nakukufwa.—Wavaka-Loma 3:23, 24.

 VYUMA NAUNGANYALA HANDANDO YAKUSOKOLA

14, 15. Vyuma muka twatela kulinga numbanyi ‘vatukonekele milonga yetu yashili’?

¹⁴ Numba tuhu twapwa tuvaka-shili, oloze tunahase kunganyala chikuma handando yakusokola. Tushimutwile jino havyuma tunahase kunganyala oholyapwa nakulutwe hawana kanou waulemu atuhana Kalunga.

¹⁵ Kukonekela milonga yashili. Cheji kutukaluhwilanga chikuma kulinga vyuma vyamwaza mwomwo yashili twaswana. Tuvosena tweji kuvulumunanga muhanjikiso yetu chipwe muvilinga vyetu. Oloze vanahase “kutukonekela milonga yetu yashili” kuhichila mundando yakusokola yaYesu. (Wavaka-Kolose 1:13, 14) Olozenyi, twatela chikupu kupihilila nakwalumuka numba vatukonekele milonga yetu. Kaha twatela nawa kulinyisa nakumulembelela Yehova atukonekele shili yetu hakufwelela mundando yakusokola yaMwanenyi.—WaYowano 1, 1:8, 9.

16. Chuma muka cheji kutulingisanga tulemese Kalunga nachivezu chitoma, kaha mwomwo ika chivezu kana chapwila chachilemu?

¹⁶ Chivezu chitoma kumeso aKalunga. Kuvulumuna mulonga chinahase kutuhombesa nakutulingisa tulivwe kupwa tuvamokomoko. Numba tuhu twapwa tuvaka-shili, oloze Yehova eji kutulingisa tumulemesenga nachivezu chitoma hakutukonekela kuhichila mundando yakusokola. (WavaHepeleu 9:13, 14) Echi chatulingisa tupwenga vakukasunuka hakuhanjika naYehova. Ngachize tunahase kumulomba kala lwola tunasake. (WavaHepeleu 4:14-16) Kulama chivezu chitoma cheji kutulingisanga tupwenga vakuunda, tuvaka-kulilemesa, nakupwa nawa vakuwahilila.

17. Vyuma muka vyamwaza natukatambula mwomwo yakutufwila kuli Yesu?

¹⁷ Lutalililo lwakuyoya chahaya myaka yosena mupalachise hano hamavu. Mukanda wavaka-Loma 6:23 wamba ngwawo: “Fweto yashili kufwa.” Vesi yoyimwe yatwalaho lika ngwayo: “Oloze wana waKalunga walikoji chikiko vene kuyoya chahaya myaka yosena muli Kulishitu Yesu Mwata wetu.” MuKapetulu 3 mumukanda uno twashimutwilile vyuma vyamwaza  vize navikapwa muPalachise yahano hamavu. (Kusoloka 21:3, 4) Vyuma vyosena vize twashimutwilile, hohamwe vene nakuyoya chakulikangula chahaya myaka yosena, navikapwako mwomwo yakutufwila kuli Yesu. Twatela chikupu kusolola nge twasakwilila hawana wandando yakutusokola numba tukamone vyuma kanevi.

MUSOLOLA NGACHILIHI NGWOVE WASAKWILILA HANDANDO KANEYI?

18. Mwomwo ika twatela kusakwilila Yehova hakutuhana ndando yakusokola?

¹⁸ Mwomwo ika twatela kusakwilila chikuma Yehova handando yakusokola? Wana weji kupwanga waulemu chikumanyi nge mutu uze nauhane nenyekelaho lwola, chipwe jingolo, chipwe jimbongo jenyi. Shikaho tweji kwivwanga kuwaha nge tunejiva ngwetu mutu natuhane wana atuzanga chikuma. Ndando yakusokola hiwana waulemu chikuma hamawana osena mwomwo Kalunga alisuwile mwamunene numba atuhanewo. Mukanda waYowano 3:16 wamba ngwawo: “Mukiko vene mwavazangilile Kalunga vaka-mavu, kuvahanyina Mwanenyi umwe kaha lyamunwe.” Shikaho, ndando yakusokola yasolola zangi yayinene atwama nayo Yehova hali etu. Yasolola nawa zangi atwama nayo Yesu hakwecha kuyoya chenyi hali etu. (Yowano 15:13) Wana wandando yakusokola watela  kutulingisa twijive chikupu ngwetu Yehova naMwanenyi vatuzanga tuvosena mutu himutu.—Wavaka-Ngalesha 2:20.

19, 20. Mujijila muka muhasa kusolola ngwove wasakwilila Kalunga hawana atuhana wandando yakusokola?

¹⁹ Uno nausolola ngachilihi ngwove wamusakwilila Kalunga hawana atuhana wandando yakusokola? Chatete, mutachikize kanawa ou Muka-kuhana Wamunene, Yehova. (Yowano 17:3) Kulinangula Mbimbiliya kuzachisa mukanda uno nachikukafwa umwijive. Omu mutwalaho lika nakutachikiza chikuma Yehova, nauputuka jino kumuzanga nawa chikuma. Kaha zangi kana nayikulingisa umwivwisenga kuwaha.—WaYowano 1, 5:3.

²⁰ Solola ngwove wetavila ndando yakusokola yaYesu. Yesu ivene ambile ngwenyi: “Ou mwamwitavila MwanaKalunga ali nakuyoya chahaya myaka yosena.” (Yowano 3:36) Uno natuhasa kusolola ngachilihi ngwetu twetavila muli Yesu? Kwitava kana katwatela kulinga chakuhanjika kaha hakanwako. Mwomwo mukanda WaYakova 2:26 ngwawo: “Kwitava chakuzeneka vilinga nawa muchapwa nawa chakufwa.” Enga, kwitava chamuchano veji kuchisololanga “[na]vilinga.” Jila imwe natuhasa kusolwelamo ngwetu twetavila muli Yesu shina yakufwila kumukavangizanga ikiye, keshi nge muvyuma tweji kuhanjikanga kahako, oloze namuvyuma tweji kulinganga nawa.—Yowano 13:15.

21, 22. (a) Mwomwo ika twatela kupwilanga kuchilika chaKulya chaMwata chaChingoloshi chamwaka himwaka? (b) Vyuma muka navalumbununa muKapetulu 6 na 7?

²¹ Pwakonga kuchilika chakwanuka Kulya chaMwata chaChingoloshi chamwaka himwaka. Hachingoloshi chaNyisane 14, 33 C.E., Yesu alingile chilika chakulipwila chize vavuluka muMbimbiliya ngwavo ‘kulya chaMwata.’ (Wavaka-Kolinde 1, 11:20; Mateu 26:26-28) Chilika kanechi vachivuluka nawa ngwavo Kwanuka Kufwa chaKulishitu. Yesu alingile chilika kanechi mangana akafwe vaposetolo jenyi navaka-Kulishitu vamuchano vosena vejive ngwavo kuhichila mukufwa chenyi mwamutu wakukupuka mwosena, ahanyine mwono wenyi, chipwe ngwetu kuyoya chenyi kupwa hindando yakusokola. Yesu ahanjikile hachilika kanechi ngwenyi: “Kalingalingenunga ngana  mukangwanukilengaho Ami.” (Luka 22:19) Kupwanga kuchilika chaKwanuka Kufwa chaMwata cheji kutwanukisanga zangi yayinene asolwele Yehova naYesu hakutuhana ndando yakusokola. Natuhasa kusolola ngwetu twasakwilila handando yakusokola hakupwanga kuchilika chaKwanuka Kufwa chaYesu mwaka himwaka. *

²² Eyi ndando yakusokola atuhana Yehova yapwa chikupu hiwana wamwaza chiyovo. (Wavaka-Kolinde 2, 9:14, 15) Ou wana kana unahase kunganyalisa navafu. Ngachize, Tupetulu 6 na 7 navalumbununa omwo vafu vanahase kunganyala kuwana kanou.

[Kwinyikila chamwishi]

VYUMA YANANGULA MBIMBILIYA

▪ Ndando yakusokola yikiko azachisa Yehova asokole vatu kushili nakukufwa. —Wavaka-Efwesu 1:7.

▪ Yehova atuhanyine ndando yakusokola hakutuma Mwanenyi umwe kaha lyamunwe kwiza hano hamavu nakutufwila. —WaYowano 1, 4:9, 10.

▪ Ndando yakusokola yikiko yalingisa numba vatukonekele milonga yetu yashili, nakutukafwa tupwenga nachivezu chitoma, nalutalililo lwakukayoya haya myaka yosena.—WaYowano 1, 1:8, 9.

▪ Tweji kusololanga ngwetu twasakwilila handando yakusokola hakutachikiza kanawa Yehova, nakusolola ngwetu twetavila ndando kaneyi atuhana Yesu, nakupwanga kuchilika chaKulya chaMwata chaChingoloshi. —Yowano 3:16.

[Vihula vyaChilongesa]

 [Muvwimbimbi halifwo 52]

Yehova atuhanyine Mwanenyi umwe kaha lyamunwe kupwa ndando yakutusokola

[Muvwimbimbi halifwo 54]

Kwijiva vyavivulu hali Yehova hijila yimwe musolwelamo ngwove wasakwilila hawana wenyi wandando yakusokola