Uno Omu Mukiko Ajinyine Kalunga Tahi?

TANGA kala lipapilo lyamijimbu. Ivwilila kumijimbu kuchisaji chipwe hatelevijini. Kuli mijimbu yayivulu yakwivwisa woma, najijita, nauhwanga! Kaha tala jino haukalu wayove ivene. Pamo kuviza chipwe kufwisa mutu uze wazanga chinakunehela ushona. Unahase kwivwa ngana muze evwile lunga wamwaza Yopa uze ambile ngwenyi, “ngunekuta sonyi nakutala malwami.”—Yopa 10:15.

Jino lihulise ngwove:

▪ Uno omu mukiko Kalunga ajinyine kuli ami nakuli vatu vosena tahi?

▪ Kulihi nanguwana kukafwa mangana nguhonese ukalu nguli nawo?

▪ Uno tunahase kufwelela ngwetu nakukapwa kuunda hano hamavu nyi?

Mbimbiliya yakumbulula kanawa vihula kanevi.

 MBIMBILIYA YANANGULA NGWAYO KALUNGA MWAKALINGA VYUMA

KANEVI HANO HAMAVU.

“Mwahunda masoji osena kumeso avo. Kufwa kacheshi kukapwako chekako, kaha nawa kakweshi kukapwa cheka kulishonako, chipwe miteto, chipwe kukola.” —Kusoloka 21:4

‘Muka-kumbilikita mwakatumbwojoka nge kapaji.’—Isaya 35:6

‘Navakatonesa meso atupuputa.’—Isaya 35:5

 “Vosena vaze vali muvimbumbe . . . navakalovokamo.”—Yowano 5:28, 29

“Ava navakatwamako kaveshi kukambako ngwavo, Tuli nakukola.”—Isaya 33:24

“Nakukapwa kuhingunuka chajimbuto jamanona.”—Samu 72:16

 NGANYALA KUVYUMA YANANGULA MBIMBILIYA

Kanda kukana washiwashi vyuma vanavuluka hamafwo anafumuho ngwove hivyuma vyakuhumikiza kahako. Kalunga nashiki kukatesamo vyuma kanevi kaha Mbimbiliya yalumbununa omwo mwakaviteselamo.

Oloze Mbimbiliya yeji kunganyalisa mujijila jajivulu. Nayikulingisa ulivwise chikupu kuyoya chamwaza namumakumbi vene ano. Achishinganyeke haukalu uli nawo. Ukalu kana unahase kupwa wakuhona jimbongo, ukalu wamutanga, kuhona kulikangula kumujimba, chipwe kufwisa vausoko twazanga. Mbimbiliya yinahase kukukafwa mwakulipikila naukalu makumbi ano, nakukumbulula vihula vyakufwana nge:

▪ Uno tweji kuyanjilanga ika?

▪ Natulipika ngachilihi naukalu wamukuyoya?

▪ Natuhasa kupwa ngachilihi vakuwahilila mutanga?

▪ Vyuma muka vyeji kusolokanga kuli etu nge tunafu?

▪ Kutala vausoko wetu vaze vafwa natukavamona cheka nyi?

▪ Natufwelela ngachilihi ngwetu chikupu vene Kalunga mwakatesamo vyuma ashika?

 Omu unetavila kutanga mukanda uno, chinasolola nge uli nakusaka kwijiva vyuma yanangula Mbimbiliya. Mukanda uno naukukafwa chikupu. Kaha palangalafu hipalangafu yili nachihula kwishi yalipapilo. Vatu vavavulu vanalivwisanga kuwaha kuzachisa vihula navikumbulula hakushimutwila Mbimbiliya naVinjiho jaYehova. Tunafwelela ngwetu nayove naulivwisawo kuwaha. Kalunga akukisule omu naulivwisa kuwaha kulilongesa vyuma yanangula chikupu Mbimbiliya!

[Lipwata/Muvwimbimbi halifwo 7]

IJIVA KANAWA MBIMBILIYA YOVE

MUMBIMBILIYA mwatwama mikanda 66. Mikanda kana vayipangununa mutupetulu najivesi mangana chipwenga chachashi kuyiwana. Nge Visoneka vanavivuluka mumukanda uno, kaha nambala yakavanga yinemanyinako kapetulu wamukanda, nambala yinakavangizaho yinemanyinako vesi. Chakutalilaho, kuvuluka “WaChimoteu 2, 3:16” chili nakulumbununa mukanda wamuchivali waChimoteu, kapetulu 3, vesi 16.

Nawijilila kanawa Mbimbiliya hakutalanga mikanda vanenyikilako mumukanda uno. Unahase nawa kuputuka kutanga Mbimbiliya hakumbi hakumbi. Nge mutanganga tupetulu vatatu chipwe vatanu halikumbi, kaha mutanga Mbimbiliya yosena yamuundu mumwaka umwe kaha.