Uno Yesu Asemukile muKakweji waDecember Nyi?
Uno Yesu Asemukile muKakweji waDecember Nyi?
MBIMBILIYA kayavuluka kakweji asemukile Yesuko. Oloze yasolola vyuma navihasa kutukafwa tukukulule ngwetu kasemukile muDecemberko.
Achishinganyeke omu yapwilenga ngonde kana muMbetelema, muze asemukilile Yesu. Kakweji wavaYuleya waChislev (uze alitombola nakakweji waNovember/December) apwile hikakweji wachishika navula. Kaha kakweji akavangijileho apwile Tebeth (December/January). Kakweji kana apwilenga wachishika chikuma kaha lwola lumwe kwapwilenga nambundu hajipili. Tumone vyuma yatulweza Mbimbiliya hajingonde jamungalila kana.
Muka-kusoneka Mbimbiliya, Ezela asolola nge kakweji waChislev vamwijivile chikupu kupwa hikakweji wachishika navula. Ezela hanyima yakuhanjika ngwenyi vatu valikungulwilile kuYelusalema “hakakweji wamuchitanu navawana [Chislev] halikumbi lyakakweji lyakusokesa mumakumi avali,” ambulwile ngwenyi vatu vapwile “nakuchikima . . . hamingol[e].” Kweseka nangonde yakakweji kana, vatu vaze vakungulukile vambile vavene ngwavo: “Ngonde yino yamingol[e], katwahashile kwimana hawelukako.” (Ezela 10:9, 13; Yelemiya 36:22) Echi chikiko chalingishilenga tufunga vamungalila yize kuhona kupwanga haweluka namikoko javo naufuku mukakweji waDecember!
Oloze Mbimbiliya yamba ngwayo, haufuku asemukile Yesu, tufunga vapwile muchipapa nakulama mikoko javo. Muka-kusoneka Mbimbiliya, Luka, amba ngwenyi halwola luze tufunga vapwilenga “nakutwama kuchipapa nakulama mikoko javo naufuku” kwakamwihi naMbetelema. (Luka 2:8-12) Unamono omu vanambe ngwavo tufunga vapwilenga nakutwama kuchipapa, keshi nge kuya kaha namusana nakutambukako. Vapwilenga namikoko javo muchipapa naufuku. Kutala tufunga vanahase kuya nakutwama muchipapa mungonde eyi yavula nachishika, mukakweji waDecember muMbetelema nyi? Nduma. Shikaho, vyuma vyasolokele mukakweji asemukile Yesu vyasolola nge Yesu kasemukile muDecemberko. *
Mazu aKalunga atulweza lwola afwile Yesu, oloze kawalumbununa kanawa likumbi asemukileko. Echi nachitwanukisa mazu aMwangana Solomone akwamba ngwenyi: “Lijina lyamwenemwene linawahe kuhambakana maji amwaza, kaha likumbi lyakufwa linawahe kuhambakana likumbi lyakusemuka.” (Muka-kwambulula 7:1) Ngocho, kacheshi chaungejiko kwijiva ngwetu Mbimbiliya yalumbununa vyuma vyavivulu hamulimo waYesu nakufwa chenyi, oloze yahanjika vyavindende kaha halwola asemukile.
[Kwinyikila chamwishi]
^ par. 5 Hakusaka kwijiva vihande vyavivulu, tala mukanda waUkupelulula Ukufuma Mu Malembo hamafwo 45-9, vasoneka kuli Vinjiho jaYehova.
[Muvwimbimbi halifwo 221]
Omu Yesu asemukile, tufunga namikoko javo vapwile muchipapa naufuku
Pamo Nauzanga Nawa
VIHULA VEJI KWIHULANGA KUSWAKUMWE
Mwomwo Ika Vinjiho jaYehova Veji Kukanyinanga Kwazana muChilika chaKulisimasi?
Vatu vavavulu veji kwazananga muchilika chaKulisimasi numba tuhu vatachikiza okwo chafuma. Fwilenu kutachikiza vyuma vyalingisa Vinjiho jaYehova vakane kwazana muchilika kana.
