Kapetulu 10

Vyuma Veji Kulinganga Vangelo naVandemone Kuli Etu

Kutala vangelo veji kukafwanga vatu tahi?

Nyi vashipilitu vavapi vanahungumwisanga ngachilihi vatu?

Uno twatela kwivwa woma vashipilitu vavapi nyi?

1. Mwomwo ika twatela kulinangwila vyavangelo?

KUTACHIKIZA kanawa mutu chasaka nawa kwijiva omu vapwa vaka-tanga yenyi. Chochimwe nawa, kutachikiza Yehova Kalunga chasaka kwijiva kanawa natanga yenyi yamwilu yavangelo. Mbimbiliya yavuluka vangelo ngwayo vapwa “vana vaKalunga.” (Yopa 38:7) Uno vangelo vatwama namulimo muka muvyuma ajina kutesamo Kalunga? Kutala vanalinginga vyuma vimwe mukuyoya chavatu tahi? Uno vangelo vanahase kukukafwa mukuyoya chove nyi? Nge mukiko, kaha vanahase kukukafwa ngachilihi?

2. Uno vangelo vafuma kulihi, kaha vapwa vangahi?

² Mbimbiliya yahanjika hali vangelo mapapa kakavulu. Tukekese jino havisoneka vimwe mangana tulinangule vyavivulu hali vangelo. Uno vangelo vafuma kulihi? Mukanda Wavaka-Kolose 1:16 ngwawo: “Muli ikiye [Yesu Kulishitu] mukiko vene vavitengelele vyuma vyosena, navize vyamumelu, navyevi vyahamavu.” Ngocho, vangelo vosena vavatengele kuli Yehova Kalunga kuhichila muli Mwanenyi watwatwa. Uno kwatwama vangelo vangahi? Mbimbiliya yasolola ngwayo Kalunga atengele vihita navihita vyavangelo, kaha vosena nawa vakwechi ngolo.—Samu 103:20. *

3. Mukanda waYopa 38:4-7 watulweza ika hali vangelo?

 ³ Mazu aKalunga, Mbimbiliya, atulweza ngwawo omu valile chihela chamavu ‘vana vaKalunga vosena valikuwile.’ (Yopa 38:4-7) Ngachize, vangelo kuvapwile shimbu kanda vatenge vatu namavu. Awa mazu amuMbimbiliya asolola nawa nge vangelo veji kwivwanga kuwaha mwomwo amba ngwawo vangelo ‘vatwile jingunda.’ Unamono nawa nge ‘vana vaKalunga vosena’ vawahililile hamwe. Halwola kana luze, vangelo vosena vapwile tanga yakulinunga yazachililenga Yehova Kalunga hamwe.

VANGELO VEJI KUKAFWANGA VATU NAKUVAKINGA

4. Mbimbiliya yasolola ngachilihi nge vangelo vakushishika vevwila kuwaha vatu?

⁴ Putu vene halwola luze vangelo vakushishika vamwene Kalunga mwatenga vatu vatete, vangelo kana vanapunga nakwivwila kuwaha vatu navyuma ajina kukatesamo Kalunga. (Vishimo 8:30, 31; WaPetulu 1, 1:11, 12) Oloze mukuhita chalwola, vangelo vamwene jino omu vatu vavavulu vaputukile kwecha kuzachila Tengi yavo wazangi. Chuma kanechi chevwishile vangelo vakushishika kupihya. Oloze, ‘vangelo veji kuwahililanga’ nge navamona numba vene mutu umwe kaha mwakinduluka cheka kuli Yehova. (Luka 15:10) Hakuwana nge vangelo vazanga chikuma vatu vaze veji kuzachilanga Kalunga, Yehova navazachisanga chikuma vakolezeze nakukinga vangamba jenyi vakushishika vahamavu. (WavaHepeleu 1:7, 14) Achitale havyakutalilaho vino.

5. Vatu muka vasoneka muMbimbiliya vaze vakafwile kuli vangelo?

⁵ Vangelo vavali vakafwile lunga wakwoloka Lote navana venyi vamapwevo hakuvafumisa mujinganda jajipi jaSotome naNgomola jize venyekele. (Kuputuka 19:15, 16) Omu hahichile nawa myaka yayivulu, kapolofweto Ndanyele vamumbilile muwina wavandumba, oloze ayovokele nakwamba jino ngwenyi: “Kalunga kami natumu kangelo kenyi, nasoko kutunwa twavandumba.” (Ndanyele 6:22) Mulikulukaji lyamyaka lyakulivanga C.E., kangelo ayowele kaposetolo Petulu muzuvo yaufunge. (Vilinga 12:6-11) Vangelo vakafwile nawa Yesu  kukuputuka chamulimo wenyi wahamavu. (Mako 1:13) Yesu omu apwile kwakamwihi nakufwa, kangelo ejile kuli ikiye ‘nakumuzamikisa.’ (Luka 22:43) Chuma kana chamuvendejekele Yesu halwola luze lwalulemu chikuma mukuyoya chenyi.

6. (a) Vangelo veji kukinganga ngachilihi vatu jaKalunga makumbi ano? (b) Vihula muka jino vize twatela kukekesa?

⁶ Makumbi ano, vangelo kaveshi nakusolokanga kuvatu jaKalunga hano hamavuko. Numba tuhu vangelo jaKalunga vangolo kaveshi kuvamona kuvatuko, oloze vachili lika nakukinga vatu jaKalunga, chikumanyi kuponde yakushipilitu. Mbimbiliya ngwayo: “Kangelo kaYehova eji kutunganga chilombo chenyi kuli vaze vamwivwa woma jingulwishi ndo, nakuvayovola.” (Samu 34:7) Mwomwo ika mazu kana atela kutuvendejeka? Mwomwo kuli vashipilitu vavapi vaze vali nakusaka kutwenyeka. Uno ava vashipilitu vavapi vapwa veya? Kaha vafuma kulihi? Uno vali nakusaka kutulemeka ngachilihi? Hakukumbulula vihula kanevi, tuchikekese mukavatu vyuma vyasolokele hakavanga mukuyoya chavatu.

VATU VAKUSHIPILITU VAZE VAPWA VAKA-KOLE JETU

7. Satana ahungumwishile vatu vangahi kufuma kuli Kalunga?

⁷ MuKapetulu 3 mumukanda uno twalinangwile nge, kangelo umwe asakile kuyulanga vakwavo, ngocho chamulingishile afumbukile Kalunga. Ou kangelo vejile nakumuvuluka jino ngwavo Satana Liyavolo. (Kusoloka 12:9) Mumyaka kafwe 1,600 yahichilemo kufuma haze Satana ongelele Eve, Satana ahungumwishile kafwe vatu vosena nakuvafumisa kuli Kalunga, kusezaho kaha vatu vavandende vakushishika vakufwana nge Avele, Enoke, naNowa.—WavaHepeleu 11:4, 5, 7.

8. (a) Uno vangelo vamwe vejile nakupwa ngachilihi vandemone? (b) Vandemone valingile ika numba vayovoke Livaji lyamumakumbi aNowa?

⁸ Mumakumbi aNowa, vangelo vamwe valikangile kuli Yehova. Vasele tanga yaKalunga yamwilu nakwiza hano hamavu nakulyalumuna kupwa vatu. Mwomwo ika? Hali Kuputuka 6:2 tweji kutangaho ngwavo: “Vana vaKalunga hivamwene vana vavatu vamapwevo ngwavo, vanawahe, kaha vambachile mapwevo vosena  vaze vasakwile.” Oloze Yehova Kalunga kechelele vilinga vyavangelo kana navize vyavatu vahungumwishile vitwaleho likako. Anehele livaji kumavu kwosena nakufumisaho vatu vavapi vosena nakuyovola kaha vangamba jenyi vakushishika. (Kuputuka 7:17, 23) Ngocho, vaze vangelo vakulikanga, chipwe ngwetu vandemone, vasele mijimba yavo yautu nakukinduluka mwilu mwavatu vakushipilitu. Vakundwijile chikupu Liyavolo uze apwa “mwangana wavandemone.”—Mateu 9:34.

9. (a) Vyuma muka vyasolokele kuli vandemone omu vakindulukile mwilu? (b) Natukekesa vyuma muka kutalisa kuvandemone?

⁹ Vangelo vakulikanga vaze vakindulukile mwilu, natwamina yavo Satana, kavapwile cheka mutanga yaKalunga yavangeloko.  (WaPetulu 2, 2:4) Numba tuhu ava vandemone kavahasa cheka kulyalumuna mumijimba yautuko, oloze vachili lika nakuhungumwisa vatu. Satana veji kumukafwa kuli ava vandemone ‘hakuhungumwisa vaka-mavu vosena.’ (Kusoloka 12:9; WaYowano 1, 5:19) Mujila muka? Kakavulu, vandemone veji kuzachisanga jijila jize jakuhungumwishilamo vatu. (Wavaka-Kolinde 2, 2:11) Tukekese jino hajijila jimwe eji.

OMU VANDEMONE VEJI KUHUNGUMUNANGA VATU

10. Uno kupanda chapwa chika?

¹⁰ Vandemone veji kuzachisanga kupanda mangana vahungumwise vatu. Kupanda chapwa kulivwasana navandemone hakuhanjika navo vavene numba kuhichila muli muka-kutaha. Mbimbiliya yakanyisa kupanda kaha yatuhuhumuna tulihende kukala vyuma vyapandama kukupanda. (Wavaka-Ngalesha 5:19-21) Vandemone veji kuzachisanga kupanda ngana muze muka-kuta vaishi eji kuzachisanga ndulo. Muka-kuta vaishi eji kuzachisanga miyachi yandulo yakulihandununa mangana akwate vaishi vakulisezaseza. Ngocho, navashipilitu vavapi nawa veji kuzachisanga miyachi yakupanda yakulihandununa mangana vahungumwise vatu vavavulu.

11. Kutaha chapwa chika, kaha mwomwo ika twatela kulihendako?

¹¹ Kutaha chapwa hindulo imwe veji kuzachisanga vandemone. Uno kutaha chapwa chika? Chapwa kusaka kwijiva vyuma vyakumakumbi akulutwe mokomoko kutachikiza vyuma vize kavejiva kuvatuko. Miyachi yakutaha yimwe shina yize yakutaha kuzachisa vatanganyika, nangombo yachivanjilo, nakuzachisa mifunda yamumavoko, nakulumbununa vilota, nakuya nakutaha kuvimbanda nakuli vaka-mahamba. Numba tuhu vatu vavavulu vamona ngwavo kutaha kacheshi kuneha pondeko, oloze Mbimbiliya yasolola nge vaka-kutaha veji kuzachilanga hamwe navandemone. Chakutalilaho, mukanda waVilinga 16:16-18 wavuluka “shipilitu wakutahisa” uze alingishile mwanapwevo umwe kupwa ‘muka-kutaha.’ Oloze ngolo jenyi jakutaha jakumine omu vamufumishile uze ndemone.

12. Mwomwo ika kuhanjika navafu chapwila chaponde?

 ¹² Vandemone veji kuhungumwisanga nawa vatu hakuvakolezeza vayenga nakwihula vafu. Vatu vaze veji kulishonanga hakufwisa mutu vazanga, kakavulu veji kupwanga navishinganyeka vyakuhenga havafu. Muka-kutaha nahase kuvalweza vyuma vimwe chipwe kuhanjika ngana muze ahanjikilenga mutu uze nafu. Echi cheji kulingisanga vatu vavavulu vetavile ngwavo vafu vavatonyi kaha ngwavo kuhanjika navo nachivakafwa vahone kupwa naushona. Oloze ‘kuvendejeka’ chamuyachou chapwa chamakuli, kaha nawa cheji kuneha ponde. Mwomwo ika? Mwomwo vandemone vanahase kulondezeza lizu lyamufu nakulweza muka-kutaha vyuma vimwe hali uze mufu. (Samwele 1, 28:3-19) MuKapetulu 6 twalinangwile nawa ngwetu vafu kavayoyako. (Samu 115:17) Ngocho, weshowo mwapwa “muka-kwihula vafu” vamuhungumwisa kuli vashipilitu vavapi kaha ali nakulinga vyuma vyalimbalaka namwaya muchima waKalunga. (Lushimbi lwamuchivali 18:10, 11; Isaya 8:19) Shikaho, watela kuzangama nakulihenda kumuheto kanou vali nakuzachisa vandemone.

13. Vyuma muka vanalingi vatu vamwe vaze vevwilenga vandemone woma?

 ¹³ Vashipilitu vavapi kaveshi kuhungumwisa kaha vatuko, oloze veji kuvevwisanga woma nawa. Makumbi ano, Satana navandemone jenyi vanejiva ngwavo vanasale “nakashimbu kakandende kaha” mangana vavakase, ngocho vanakulyana jino chikuma. (Kusoloka 12:12, 17) Chipwe ngocho, vatu vavavulu vaze vevwilenga woma vashipilitu vavapi vecha jino kuvevwa woma. Uno vatu kana valingile ngachilihi? Jino mutu atela kulinga vyuma muka nge achili lika nakulingisa muvilinga vyakupandama kukupanda?

MWAKUKANYINA VASHIPILITU VAVAPI

14. Uno natuhasa kulihenda ngachilihi kuvashipilitu vavapi, ngana muze valingile vaka-Kulishitu vamulikulukaji lyamyaka lyakulivanga vamuEfwesu?

¹⁴ Mbimbiliya yatulweza mwakukanyina vashipilitu vavapi, namwakulingila numba twechenga kulivwasananga navo. Achitale hachakutalilaho chavaka-Kulishitu vamulikulukaji lyamyaka lyakulivanga vamunganda yaEfwesu. Vatu vamwe vapwile vaka-kupanda shimbu kanda vapwenga vaka-Kulishitu. Uno vyuma muka valingile hakusaka kwecha kupanda? Mbimbiliya ngwayo: “Vavavulu vaze valingilenga tufuta twavo twakupanda vakungulwilile yize mikanda yavo hamwe, vayiwemesele kumeso avatu vosena.” (Vilinga 19:19) Vaka-Kulishitu vavahya vaze vochele mikanda yavo yatufuta twakupanda, vahana chakutalilaho kuli vaze navasaka kukana vashipilitu vavapi makumbi ano. Vatu vaze navasaka kuzachila Yehova vatela kwecha kala vyuma vyapandama kukupanda. Vyuma kana shina mikanda, namivwimbimbi yahavisaji, namapapilo akulamika hajimbango, namyaso navyeka vyangachize vize vyakundwiza kupanda nakuchilingisa chisoloke kupwa chamwaza. Vatela kulihenda nakumikalo chipwe vyuma vyeka vize veji kuvwalanga vatu vyakulikinga kuvandemone.—Wavaka-Kolinde 1, 10:21.

15. Vyuma muka twatela kulinga mangana tukane vashipilitu vavapi?

¹⁵ Omu hahichile myaka kufuma haze vaka-Kulishitu  vamuEfwesu vochele mikanda yavo yatufuta twakupanda, kaposetolo Paulu avasonekelele ngwenyi: ‘Tuli nakulipika navashipilitu vakuhuka.’ (Wavaka-Efwesu 6:12) Vandemone kavalitwaminyine kulipika navatuko. Oloze vatwalileho lika kulipika navatu mangana kachi vavafungulule. Jino vyuma muka vatelele kulinga vaze vaka-Kulishitu? Paulu ambile ngwenyi: “Muvyuma vyosena mbatenu lukepwe lwakufwelela, namuhasa kujimisa matongo ayauze wamupi [Satana] akakahya osena.” (Wavaka-Efwesu 6:16) Nge lukepwe lwetu lwakufwelela nalupwa lwakukola, kaha natupwa chikuma nangolo jakukana vashipilitu vavapi.—Mateu 17:20.

16. Uno tunahase kuzamisa ngachilihi lufwelelo lwetu?

¹⁶ Uno tunahase kuzamisa ngachilihi lufwelelo lwetu? Tunahase kuluzamisa hakulinangula Mbimbiliya. Jimbango jazuvo jeji kupwanga jakukola mbe nge vanajitungila nawa hachihela chakukola. Chochimwe nawa, nge natupwa nachinyingi chakwoloka chaMazu aKalunga, Mbimbiliya, kaha nachitulingisa tupwenga nalufwelelo lwakukola. Nge natutanganga nakulinangulanga Mbimbiliya hakumbi hakumbi kaha lufwelelo lwetu naluzama. Lufwelelo kana nalutukinga kungolo javashipilitu vavapi, ngana mwajimbango jazuvo jakukola.—WaYowano 1, 5:5.

17. Vyuma muka twatela kulinga numba tuhase kukana vashipilitu vavapi?

¹⁷ Vyuma vyeka muka vatelele kulinga vaze vaka-Kulishitu vakuEfwesu? Vaze vaka-Kulishitu vasakiwile kuvakinga mwomwo vatwaminenga munganda mwazalile navilinga vyavandemone. Ngocho, Paulu avalwezele ngwenyi: “Lombenunga makumbi osena nakulomba chosena nakulembelela chosena muli shipilitu.” (Wavaka-Efwesu 6:18) Hakuwana nge nayetu twatwama mukaye mwazala navilinga vyavandemone, twatela kulombanga kuli Yehova atukinge tuhase kukana vashipilitu vavapi. Kaha hakulomba twatela kuzachisanga lijina lyaYehova. (Vishimo 18:10) Twatela kulombanga kuli Kalunga ‘atuyovole kuli uze wamupi,’ Satana Liyavolo. (Mateu 6:13) Ngocho  Yehova mwakumbulula kulomba chetu chakufuma kumuchima.—Samu 145:19.

18, 19. (a) Mwomwo ika twatela kufwelela ngwetu tunahase kulwa jita nakufungulula vashipilitu vavapi? (b) Chihula muka navakumbulula mukapetulu nakavangizaho?

¹⁸ Vashipilitu vavapi vanahase kutulemeka, oloze nge natumwimanyina Liyavolo nakupandama kuli Kalunga hakulinga mwaya muchima Wenyi, kaha katweshi kuvevwa womako. (WaYakova 4:7, 8) Ngolo javashipilitu vavapi japwa jakukuminamo. Mumakumbi aNowa vavazangamishile, kaha kulutwe nawa navakavasopesa. (WaYuta 6) Watela kwijiva ngwove, etu vali nakutukinga kuli vangelo jaYehova vangolo. (Vamyangana 2, 6:15-17) Vangelo kana veji kwivwanga kuwaha hakutumona tuli nakukana vashipilitu vavapi. Echi chili kwijiva nge vangelo vakushishika vali nakutukuwilila tujikize. Shikaho tupandamenu kuli Yehova natanga yenyi yavangelo vakushishika. Kaha nawa tulihendenunga kukala miyachi yakupanda nakukavangizanga punga yamuMazu aKalunga. (WaPetulu 1, 5:6, 7; WaPetulu 2, 2:9) Nge natulinga ngocho, kaha natuhasa kulwa jita navashipilitu vavapi nakuvafungulula.

¹⁹ Uno Kalunga netavishila ika vashipilitu vavapi navyuma vyavipi vize vili nakuyanjisanga vatu? Chihula kana navachikumbulula mukapetulu nakavangizaho.

[Kwinyikila chamwishi]

VYUMA YANANGULA MBIMBILIYA

▪ Vangelo vakushishika veji kukafwanga vaze veji kuzachilanga Yehova.—WavaHepeleu 1:7, 14.

▪ Satana navandemone jenyi vali nakuhungumwisa vatu nakuvafumisa kuli Kalunga.—Kusoloka 12:9.

▪ Nge naulinga mwaya muchima waKalunga nakwimanyina Liyavolo, kaha mwakuchina.—WaYakova 4:7, 8.

[Vihula vyaChilongesa]

 [Lipwata/Mivwimbimbi halifwo 102]

MWAKUKANYINA VASHIPILITU VAVAPI

▪ Mbila kala vyuma vyapandama kukupanda

▪ Linangulenga Mbimbiliya

▪ Lombanga kuli Kalunga

[Muvwimbimbi halifwo 99]

“Kalunga kami natumu kangelo kenyi, nasoko mutunwa twavandumba.”—Ndanyele 6:22

[Mivwimbimbi halifwo 101]

Vandemone veji kuzachisanga jijila jajivulu mangana vahungumwise vatu