Yesu Kulishitu—hiMeshiya Uze Vashikile

YEHOVA KALUNGA hakusaka kutukafwa tumwijive Meshiya, ahwiminyinyine vapolofweto vavavulu vamuMbimbiliya vasoneke vyakusemuka, namulimo, nakufwa chayou Mulwilo vashikile. Upolofweto wosenou wamuMbimbiliya wateselemo muli Yesu Kulishitu.  Upolofweto kana wapwa wakwoloka kaha nawa wakujiminyina. Hakusaka twivwishise kanawa, tukekese upolofweto uze wahanjikile chimweza vyakusemuka chaMeshiya nalwola lwaunyike wenyi.

 Kapolofweto Isaya ahanjikile chimweza ngwenyi Meshiya mwakafuma kuchisaka chaMwangana Ndavichi. (Isaya 9:7) Chikupu vene, Yesu asemukilile muchisaka chaNdavichi.—Mateu 1:1, 6-17.

Mika, kapolofweto mukwavo waKalunga ahanjikile chimweza ngwenyi ou mwana mwakeza kapwa mwata kaha nawa ngwenyi mwakasemukila “[mu]Mbetelema Efwalata.” (Mika 5:2) Halwola asemukile Yesu, muIsalele mwapwile jinganda jivali vavulukilenga ngwavo Mbetelema. Nganda imwe yapwilile kungalila yakunote kwakamwihi nanganda yaNazaleta, kaha yikwavo yapwilile kwakamwihi naYelusalema muYuta. Mbetelema yapwile kwakamwihi naYelusalema vayivulukilenga ngwavo Efwalata. Yesu asemukilile munganda vene eyi, ngana muze wavulukile upolofweto!—Mateu 2:1.

Upolofweto ukwavo wamuMbimbiliya wahanjikile chimweza ngwawo MwanaKalunga navakamusanyika ‘kufuma muEjipitu.’ Yesu vamutwalile kuEjipitu omu apwile kanyike. Kaha vamukindulwishile hanyima yakufwa chaHelote, ngocho ou upolofweto wateselemo.—Hozeya 11:1; Mateu 2:15.

 Halipwata lili halifwo 200, visoneka vananoneka mwishi yamutwe wakwamba ngwavo “Upolofweto” vili namijimbu yakuvuluka Meshiya. Shikaho, esekesa visoneka evi navize vananoneka mwishi yamutwe wakwamba ngwavo “Kutesamo.” Kulinga ngocho nachizamisa lufwelelo lwove mumuchano wamuMazu aKalunga.

Omu naukekesa visoneka kanevi, ijiva ngwove upolofweto umwe vausonekele myaka yayivulu kunyima shimbu kanda Yesu asemuke. Yesu ambile ngwenyi: “Vyuma vyosenevi vasoneka kuJishimbi jaMose nakumikanda yavapolofweto nakuJisamu, vyuma vyakunguvulukAmi, ngwami, kuvanga visoloke.” (Luka 24:44) Upolofweto kana wateselemo chikupu, nganomu unalimwena muMbimbiliya yove!

[Chati halifwo 200]

 UPOLOFWETO

WAKUVULUKA MESHIYA

CHUMA CHASOLOKELE UPOLOFWETO KUTESAMO

Kusemukila kumuyachi waYuta Kuputuka 49:10 Luka 3:23-33

Kusemukila kuli mwanapwevo

kanda achilimone nalunga Isaya 7:14 Mateu 1:18-25

Kufuma kuchisaka chaMwangana

Ndavichi Isaya 9:7 Mateu 1:1, 6-17

Yehova mwamuvuluka kupwa

Mwanenyi Samu 2:7 Mateu 3:17

Kuhona kumwitavila Isaya 53:1 Yowano 12:37, 38

Kwingila muYelusalema hamwana

chimbulu Zekaliya 9:9 Mateu 21:1-9

Kumusolola kuli sepa lyenyi Samu 41:9 Yowano 13:18, 21-30

Kumulandulula najimbongo

japalata 30 Zekaliya 11:12 Mateu 26:14-16

Kuhola kumeso

avaka-kumuvangijikila Isaya 53:7 Mateu 27:11-14

Kutahisa vitaho hauvwalo

wenyi Samu 22:18 Mateu 27:35

Kumusaula oku ali hachitondo Samu 22:7, 8 Mateu 27:39-43

Vifuhwa vyenyi kuhona kuhokoka Samu 34:20 Yowano 19:33, 36

Kumufunda hamwe navaka-luheto Isaya 53:9 Mateu 27:57-60

Kumusangula shimbu kanda apole Samu 16:10 Vilinga 2:24, 27

Kumuzezwila kulivoko lyaKalunga

lyachilyo Samu 110:1 Vilinga 7:56