KAPETULU 15
Jila Yakwoloka Yakulemeselamo Kalunga
1. Iya atela kutulweza jila yakwoloka yakulemeselamo Kalunga?
MAUKA akwitava amavulu eji kwambanga ngwawo eji kunangulanga vyuma vyamuchano hali Kalunga. Oloze omu keshi mukikoko, mwomwo eji kunangulanga vyuma vyakulihandununa hali Kalunga nomwo twatela kumulemeselamo. Uno tunahase kutachikiza ngachilihi jila yakwoloka yakulemeselamo Kalunga? Yehova ikiye kaha atela kutulweza jila yakwoloka yakumulemeselamo.
2. Unahase kutachikiza ngachilihi jila yakwoloka yakulemeselamo Kalunga?
2 Yehova atuhana Mbimbiliya mangana tulinangule jila yakwoloka yakumulemeselamo. Shikaho nge mulinangula Mbimbiliya, kaha Yehova mwakukafwa unganyale kuvyuma anangula mwomwo akuzakama chikuma.—Isaya 48:17.
3. Kalunga asaka tulinge vyuma muka?
3 Vatu vamwe veji kwambanga ngwavo Kalunga eji kwitavilanga mauka akwitava osena, oloze omu keshi mukiko atunangula Yesuko. Ambile ngwenyi: “Keshi nge vosena vaze vali nakwamba kuli ami ngwavo, ‘Ove Mwata, Ove Mwata,’ navakengila muWangana wameluko, shina vaze kaha vali nakulinga mwaya muchima waTata.” Ngocho twatela kulinangula mwaya muchima waKalunga nakulingamo. Echi chapwa chachilemu mwomwo Yesu afwanyishile vaka-kuhona kwononoka Kalunga kuvihwanga, “vaka-kulinga upapwoki.”—Mateu 7:21-23.
4. Vyuma muka ahanjikile Yesu kutalisa kukulinga mwaya muchima waKalunga?
4 Yesu atulwezele chimweza ngwenyi natumonanga ukalu hakulinga mwaya muchima waKalunga. Ambile ngwenyi: “Ingililenu kuchikolo chachindende, mwomwo chikolo chachinene najila yakuhweka vili nakutwala kukunonga, kaha vaze vali nakuyamo vanapu vavavulu. Oloze chikolo chachindende najila yakupalakanya vili nakutwala kukuyoya, kaha ava vali nakuyiwana vanapu vavandende kaha.” (Mateu 7:13, 14) Jila yakupalakanya chipwe ngwetu jila yakwoloka yakulemeselamo Kalunga yeji kutwalanga kukuyoya chahaya myaka yosena. Kaha jila yakuhweka chipwe ngwetu jila yakuhenga yakulemeselamo Kalunga yeji kutwalanga kukufwa. Oloze Yehova kasaka mutu naumwe akafweko. Ngocho eji kuhananga vatu lwola mangana valinangule vyaikiye.—WaPetulu 2, 3:9.
JILA YAKWOLOKA YAKULEMESELAMO KALUNGA
5. Uno unahase kutachikiza ngachilihi vatu vaze veji kulemesanga Kalunga mujila yakwoloka?
5 Yesu ambile ngwenyi vatu vaze veji kulemesanga Kalunga mujila yakwoloka tunahase kuvatachikiza. Tunahase kulinga ngocho hakukekesa vyuma vafwelela navilinga vyavo. Yesu ambile ngwenyi: “Kumihako yavo kukiko vene namuvatachikijila kanawa.” Kaha ambile nawa ngwenyi: “Mutondo wamwaza weji kwimanga mihako yamwenemwene.” (Mateu 7:16, 17) Echi kacheshi nakulumbununa nge vatu vaze veji kulemesanga Kalunga vapwa vakukupukako. Oloze vangamba jaKalunga vafwila kulinga vyuma vyakwoloka lwola lwosena. Tukekese jino vyuma navitukafwa tutachikize vatu vaze veji kulemesanga Kalunga mujila yakwoloka.
6, 7. Mwomwo ika kunangula chamuchano chapendamina haMbimbiliya? Vyuma muka natulinangula kuchakutalilaho chaYesu?
6 Kunangula chetu chatela kupendamina haMbimbiliya. Mbimbiliya yamba ngwayo: “Visoneka vyosena vavihwima kuli Kalunga, kaha vinawahila kunangula, nakuhanjikila, nakwolola vyuma, nakuzangamisa mukwoloka, mangana mutu waKalunga apwenga wakutamo mwosena, wakulizanga lyehi mwosena kuzata milimo yamwaza yosena.” (WaChimoteu 2, 3:16, 17) Kaposetolo Paulu asonekelele vaka-Kulishitu ngwenyi: “Omu mwatambwile mazu aKalunga aze mwevwile kuli etu, kamwawetavilile nge himazu avatuko, oloze nge himazu aKalunga, nganomu vene apwa.” (Wavaka-Tesolonyika 1, 2:13) Kunangula chamuchano chapendamina haMazu aKalunga Mbimbiliya, keshi hachinyingi chavatu, nahavisemwa chipwe havyuma vyekako.
7 Vyuma vyosena anangwilenga Yesu vyapendaminyinenga haMazu aKalunga. (Tanga Yowano 17:17.) Kakavulu azachishilenga Visoneka. (Mateu 4:4, 7, 10) Ngocho vangamba jaKalunga vamuchano veji kukavangizanga chakutalilaho chaYesu, kaha vyuma vyosena veji kunangulanga vyapendamina haMbimbiliya.
8. Vyuma muka atunangula Yesu kutalisa kukulemesa Yehova?
8 Twatela kulemesa kaha Yehova. Mukanda waSamu 83:18 wamba ngwawo: “Ove ukwechi lijina lyove yove Yehova, yove kaha uka wove wapwa uWakulitulaho Chikuma hamavu hosena.” Yesu asakile vatu vatachikize kanawa Kalunga wamuchano, ngocho avanangwilenga vatachikize lijina lyaKalunga. (Tanga Yowano 17:6.) Yesu ambile ngwenyi: “Lemesanga Yehova Kalunga kove, ikiye kaha watela kuzachilanga mulimo wajila.” (Mateu 4:10) Ngocho, etu vangamba jaKalunga tweji kulondezezanga chakutalilaho chaYesu. Tweji kulemesanga kaha Yehova, nakuzachisa lijina lyenyi, nakunangula vatu vatachikize lijina kana navyuma mwakatulingila kulutwe.
9, 10. Tweji kusolwelanga ngachilihi vatu zangi?
9 Twatela kusolwelanga vatu zangi yamwenemwene. Yesu alwezele tumbaji twenyi valizangenga navakwavo. (Tanga Yowano 13:35.) Kuzanga vakwetu cheji kutulingisanga tulinunge navandumbwetu chamokomoko nokwo twafuma, namuyachi wetu, numba tupwa tuvihutu chipwe tuvaka-luheto. (Wavaka-Kolose 3:14) Shikaho, katweshi kulwa jijita nakujiha vatuko. Mbimbiliya yamba ngwayo: “Vana vaKalunga navana vaLiyavolo vavamwena aha: Weshowo keshi kulinga mwakwolokako nauze azeneka kuzanga ndumbwenyi kavapwa vakuli Kalungako.” Yamba nawa ngwayo: “Tulizangenga navakwetu, keshi ngana mwaKenako uze apwile wakuli uze wakuhuka, kaha ajihile ndumbwenyi.”—WaYowano 1, 3:10-12; 4:20, 21.
10 Tweji kuzachisanga lwola lwetu, nangolo jetu, navyuma vyetu mangana tukafwe vakwetu nakulikolezeza. (WavaHepeleu 10:24, 25) Kaha nawa tweji ‘kulinganga vyuma vyamwaza kuli vosena.’—Wavaka-Ngalesha 6:10.
11. Mwomwo ika twatela kwononokela Yesu?
11 Twatela kwononoka Yesu mwomwo ulwilo wapendamina hali ikiye. Mbimbiliya yamba ngwayo: “Ulwilo kaweshi muli mutu wekako, mwomwo kakweshi lijina lyeka hano hamavu lize vanahane muli vatu lize vatela kutulwila nalyoko.” (Vilinga 4:12) Mukapetulu 5, twalinangwile omwo Yehova atumine Yesu ahane kuyoya chenyi kupwa ndando yakusokola vatu vakwononoka. (Mateu 20:28) Yehova atongola Yesu kupwa Mwangana uze mwakayula hamavu. Evi vikiko Mbimbiliya yatulwezela twononokenga Yesu numba tukayoye haya myaka yosena.—Tanga Yowano 3:36.
12. Mwomwo ika katweshi kwazanyina muvihande vyamapolitikiko?
12 Katwatela kwazana muvihande vyamapolitikiko. Yesu kazanyinenga muvihande vyamapolitikiko. Omu vapwile nakumusopesa, alwezele muka-kuyula wavaLoma Pilatu ngwenyi: “Wangana wami kaweshi wamukaye kanoko.” (Tanga Yowano 18:36.) Nayetu twatela kukundwiza kaha Wangana waKalunga wamwilu ngana muze alingile Yesu. Echi chikiko chatulingisa tuzeneke kwazana muvihande vyamapolitiki kweshokwo twatwama. Chipwe ngocho, Mbimbiliya yatulweza twononokenga “kuli vaze vali nawata” kulumbununa vaka-fulumende. (Wavaka-Loma 13:1) Ngocho tweji kukavangizanga jishimbi jalifuchi twatwamamo. Oloze nge jishimbi jafulumende jinalimbalaka najishimbi jaKalunga, kaha tweji kulondezezanga vaposetolo vaze vambile ngwavo: “Twatela kwononoka Kalunga hakupwa ikiye muka-kuyula, kuhambakana vatu.”—Vilinga 5:29; Mako 12:17.
13. Vyuma muka tweji kwambululanga kutalisa kuWangana waKalunga?
13 Twafwelela ngwetu Wangana waKalunga ukiko kaha naukakumisa ukalu wosena hano hakaye. Yesu ambile ngwenyi “mujimbu wamwaza waWangana” navakawambulula mukaye kosena. (Tanga Mateu 24:14.) Kakweshi fulumende yavatu nayihasa kulinga vyuma vize naukatulingila Wangana waKalungako. (Samu 146:3) Yesu atunangula tulombenga vyaWangana waKalunga ngwenyi: “Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:10) Mbimbiliya yatulweza ngwayo Wangana waKalunga naukanongesa jifulumende javatu josena, kaha “ukiko naukapwangako haya myaka yosena.”—Ndanyele 2:44.
14. Vatu muka washinganyeka ngwove veji kulemesanga Kalunga mujila yakwoloka?
14 Hakuwana nge unalinangula jino vishina kanevi, lihulise ngwove: ‘Veya veji kunangulanga vyuma vyamuMbimbiliya? Veya veji kulwezanga vatu lijina lyaKalunga? Veya veji kusolwelanga vakwavo zangi yamwenemwene nakufwelela ngwavo Kalunga atumine Yesu kwiza nakutulwila? Veya kaveshi kwazana muvihande vyamapolitikiko? Veya veji kunangulanga ngwavo Wangana waKalunga kaha ukiko naukakumisa ukalu wavatu?’ Vinjiho jaYehova kaha vakiko veji kulinganga ngocho.—Isaya 43:10-12.
VYUMA MUKA WATELA KULINGA?
15. Hakusaka Kalunga etavile kulemesa chetu, vyuma muka twatela kulinga?
15 Katwatela kukumina kaha hakufwelela ngwetu Kalunga kwatwamako, mwomwo navandemone vafwelela ngwavo Kalunga kwatwama, oloze kavamwononokako. (WaYakova 2:19) Ngocho hakusaka Kalunga etavile kulemesa chetu, katwatela kufwelela kaha ngwetu kwatwamako, oloze twatela nawa kulinga vyuma asaka.
16. Mwomwo ika twatela kukanyina kwitava chamakuli?
16 Hakusaka Kalunga etavile kulemesa chetu, twatela nawa kukana kwitava chamakuli. Kapolofweto Isaya asonekele ngwenyi: “Lovokenumo, litomesenu.” (Isaya 52:11; Wavaka-Kolinde 2, 6:17) Ngocho twatela kulihenda kuvyuma vyapandama kukwitava chamakuli vyosena.
17, 18. Uno “Mbavilone Yayinene” yapwa ika, kaha mwomwo ika watela kwanguhwa kufumamo?
17 Uno kwitava chamakuli chapwa chika? Chapwa kala kwitava chize cheji kunangulanga vatu valemese Kalunga mujila yize yalimbalaka naMazu enyi. Mbimbiliya yavuluka kwitava chamakuli chosena kupwa “Mbavilone Yayinene.” (Kusoloka 17:5) Mwomwo ika? Omu lyakumine Livaji lyamumakumbi aNowa, kunangula chamakuli chachivulu chaputukilile munganda yaMbavilone. Kaha kunangula kana chatanjile hamavu hosena. Chakutalilaho, vatu vaze vatwaminenga muMbavilone valemeselenga tulunga vatatu. Namakumbi ano, mauka akwitava amavulu eji kunangulanga ngwawo muli Kalunga umwe mwatwama Tulunga Vatatu. Oloze Mbimbiliya yanangula hatoma ngwayo kwatwama Kalunga umwe kaha wamuchano ikiye Yehova, kaha Yesu apwa Mwanenyi. (Yowano 17:3) Vatu vamuMbavilone vafwelelele nawa ngwavo nge mutu nafu, kwatwama chuma chimwe chamumujimba wenyi cheji kutwalangaho lika kuyoya, kaha chuma kana chinahase kuyekela muhelo. Oloze omwo keshi mukikoko.—Tala Chinyikilo chakusongo 14, 17, na 18.
18 Kalunga ahanjikile chimweza ngwenyi kalinwomu anongese kwitava chamakuli chosena. (Kusoloka 18:8) Kutala unamono jino ovyo watela kwanguhwila kufuma mukwitava chamakuli tahi? Yehova Kalunga ali nakusaka ufumemo shimbu kanda vachinongese.—Kusoloka 18:4.
Nge nauzachila Yehova hamwe navatu jenyi, kaha naupwa mutanga yayinene yavatu kana yamukaye kosena
19. Yehova mwakuzakama ngachilihi nge nauputuka kumuzachila?
19 Omu naufuma mukwitava chamakuli nakuputuka kuzachila Yehova, masepa jove chipwe vausoko wove vamwe kaveshi kuhasa kwivwishisa vyuma unalingila ngochoko, kaha vanahase kukufumbukila. Oloze Yehova keshi kukusezako. Naupwa mutanga yayinene yamukaye kosena yavatu vaze veji kusolwelanga vakwavo zangi yamwenemwene. Naupwa nawa nalutalililo lwakukayoyela mukaye kakahya haya myaka yosena. (Mako 10:28-30) Pamo mukuhita chalwola, masepa jove navausoko wove vamwe vaze navakufumbukila hakukumona uli nakuzachila Yehova, vanahase kuputuka kulinangula Mbimbiliya.
20. Mwomwo ika chapwila chachilemu kulemesa Kalunga mujila yakwoloka?
20 Kalinwomu Kalunga afumiseko vilinga vyavipi vyosena nakuneha Wangana wenyi uyule hano hamavu hosena. (WaPetulu 2, 3:9, 13) Lwola kana nalukapwa lwamwaza chiyovo. Vatu vosena navakalemesanga Yehova mujila yize asaka. Ngocho chinapu chachilemu kuli ove oholyapwa kuseza kwitava chamakuli nakuputuka kulemesa Kalunga mujila yakwoloka.
