1, 2. Vatu veji kuhulisanga vihula havyuma muka?

VANYIKE veji kuhulisanga vihula vyavivulu. Unahase kuvalumbunwina vyuma vimwe, oloze navakuhulisa ngwavo, ‘Mwomwo ika?’ Omu nauvakumbulula, vanahase kuhulisa cheka ngwavo, ‘Kahaze mwomwo ika?’

² Tuvosena tweji kuhulisanga vihula numba tupwa tuvanyike chipwe tuvakulwane. Tunahase kuhulisa havyakulya twatela kulya, chipwe havyuma twatela kuvwala chipwe kulanda. Tunahase nawa kuhulisa vihula vyavilemu kutalisa kukuyoya chipwe kuvyuma navikasoloka kulutwe. Oloze tunahase kulitwamina kutondatonda muvakumbulwila vihula kanevi, nge tunahono kuwana kukumbulula chamwenemwene.

3. Mwomwo ika vatu vavavulu vashinganyekela ngwavo kaveshi kuhasa kuwana muvakumbulwila vihula vyavo vyavilemuko?

³ Uno Mbimbiliya yakumbulula vihula vyavilemu tweji kuhulisanga tahi? Vatu vamwe vashinganyeka vene ngocho, oloze vamona nawa ngwavo vyuma yakumbulula Mbimbiliya vyapwa vyavikalu chikuma kuvivwishisa. Vashinganyeka nawa ngwavo vihula kana vatela kuvikumbulula kaha kuli vaka-kunangula vamukwitava chipwe vapilishitu. Veka veji kwivwanga sonyi kwitavila ngwavo kavatachikiza muvakumbulwila vihula kanako. Nyi yove washinganyeka muka?

4, 5. Vihula vimwe muka vyavilemu unahase kuhulisa? Kaha mwomwo ika watela kutondatonda muvakumbulwila vihula kana?

⁴ Pamo uli nakusaka utachikize muvakumbulwila vihula vyakufwana nge vino: Uno ngweji kuyoyelanga ika? Vyuma muka navikasoloka kuli yami nge ngunafu? Kalunga apwa ngachilihi? Yesu, Muka-kunangula uze aya fuma, ambile ngwenyi: “Lombenunga lika, kaha navakamihana. Tondenunga lika, kaha namukawana. Ngongomwezenunga lika,  kaha navakamisokolwela.” (Mateu 7:7) Ngocho kanda naulitwamina kutondatonda muvakumbulwila kanawa vihula kaneviko.

⁵ Kachi nge ‘nautondanga lika,’ kaha nauwana muvakumbulwila vihula vyove muMbimbiliya. (Vishimo 2:1-5) Vyuma vakumbulula muMbimbiliya kavyapwa vyavikalu kuvivwishisako. Vyuma naulinangula navikulingisa usuuluke mukuyoya chove oholyapwa nakupwa nalutalililo. Tuvangile kushimutwila hachihula chize chayanjisa vatu vavavulu.

6. Mwomwo ika vatu vamwe vashinganyekela ngwavo Kalunga kavazakamako?

⁶ Vatu vavavulu vashinganyeka ngwavo Kalunga katuzakamako. Vashinganyeka ngwavo nge Kalunga atuzakama chikupu, kachi kaye kakapwa nganomu kaliko. Mukaye munazale jijita, navijindo, naukalu. Kaha nawa vatu veji kuvizanga, nakuyanda, nakufwa. Ngocho vamwe veji kwambanga ngwavo, ‘Nge Kalunga atuzakama chikupu, kaha mwomwo ika etavishila kuyanda chitwaleho lika?’

7. (a) Vaka-kunangula vamukwitava vanalingisa ngachilihi vatu vashinganyeke ngwavo Kalunga apwa waukenya? (b) Mwomwo ika twatela kufwelela ngwetu Kalunga keshi ikiye eji kunehanga vyuma vyavipiko?

⁷ Shimbu jimwe, vaka-kunangula vamukwitava vakiko vali nakulingisa vatu vashinganyeke ngwavo Kalunga apwa waukenya. Nge kunasoloka vyuma vimwe vyavipi, vatwamina kana veji kwambanga ngwavo, Kalunga ikiye najinyi ngwenyi vyuma kana visoloke. Veji kumuvangijikilanga hakuhanjika ngocho. Oloze Mbimbiliya yanangula ngwayo Kalunga keshi ikiye eji kunehanga upiko. Mukanda WaYakova 1:13 watulweza ngwawo Kalunga keshi kweseka mutu navyuma vyavipiko. Wamba ngwawo: “Nge mutu ali mucheseko, kanda amba ngwenyi: ‘Vali nakungweseka kuli Kalungako.’ Mwomwo Kalunga kaveshi kumweseka navyuma vyavipiko, kaha  ikiye nawa keshi kweseka mutu naumweko.” Echi chinalumbununa nge numba tuhu Kalunga etavisa vyuma vyavipi visoloke, oloze keshi ikiye eji kuvinehangako. (Tanga Yopa 34:10-12.) Tutale hachakutalilaho.

8, 9. Mwomwo ika nachipwila chakuhenga kuhana Kalunga mulonga haukalu tweji kumonanga? Hana chakutalilaho.

⁸ Achishinganyeke hali mukweze walunga uze ali nakutwama navisemi jenyi hembo. Ise amuzanga chikuma, kaha nawa amunangula mwakusakwila kanawa vyuma vyakulinga mukuyoya. Kutwala muze, uze mukweze himwalikanga kuli ise nakufuma hembo. Jino nge uze mukweze mwalinga vyuma vyavipi kuze nayi nakuputuka kumona ukalu, kutala unahase kuhana chisemi chenyi mulonga mwomwo yakumwitavisa afume hembo tahi? Nduma. (Luka 15:11-13) Chochimwe nawa, Kalunga kakanyishile vatu omu vasakwile vavene kulikanga kuli ikiye nakulinga vyuma vyavipiko. Shikaho nge kunasoloka vyuma vyavipi, twatela kwanuka ngwetu keshi Kalunga navineheko. Nachipwa chakuhenga kuhana Kalunga mulonga.

⁹ Kuli vyuma vimwe vyavilemu vyalingisa Kalunga etavise vyuma vyavipi visolokenga. Naulinangula ovyo yahanjika Mbimbiliya havyuma kana muKapetulu 11. Oloze tachikiza ngwove Kalunga atuzanga, kaha nawa keshi ikiye ali nakuneha ukalu tuli nakumonako. Ikiye kaha nahase kukumisa ukalu kana.—Isaya 33:2.

10. Mwomwo ika twatela kufwelela ngwetu Kalunga mwakawahisa vyuma vyosena vize vanenyeka vatu vavapi?

¹⁰ Kalunga apwa wajila. (Isaya 6:3) Vyuma vyosena eji kulinganga vyapwa vitoma kaha nawa vyamwaza, ngocho tunahase kumufwelela. Oloze vatu kavapwa ngochoko, mwomwo lwola lumwe veji kulinganga vyuma vyavipi. Navatu vamwaza vaze vali nakuyula, kaveshi kuhasa kuwahisa vyuma vyosena veji kwenyekanga vatu vavapiko. Kakweshi umwe ali nangolo ngana jize atwama najo Kalungako. Ngocho mwakawahisa  vyuma vyosena vize vanenyeka vatu vavapi. Mwakafumisako upi wosena haya myaka yosena.—Tanga Samu 37:9-11.

11. Kalunga eji kwivwanga ngachilihi hakumona uli nakuyanda?

¹¹ Uno Kalunga eji kwivwanga ngachilihi hakumona vyuma vyavipi vili nakusoloka mukaye namukuyoya chove? Mbimbiliya yanangula ngwayo Kalunga “azanga chiyulo.” (Samu 37:28) Ngocho, eji kumonanga vyuma vyakwoloka navyevi vyakuhenga. Eji kwivwanga kupihya hakumona vatu vali nakuyanda. Mbimbiliya yamba ngwayo kushikulu Kalunga “alinyengele mumuchima wenyi” omu amwene vilinga vyavipi vinavulu chikuma hakaye. (Kuputuka 6:5, 6) Kalunga kalumukako. (Malaki 3:6) Mbimbiliya yamba ngwayo Kalunga akuzakama chikupu.—Tanga WaPetulu 1, 5:7.

12, 13. (a) Mwomwo ika tweji kusolwelanga zangi nakuzakama vakwetu, kaha tweji kwivwanga ngachilihi hakumona kuyanda chili mukaye? (b) Mwomwo ika twatela kufwelela ngwetu Kalunga mwakafumisako kuyanda navilinga vyakuhenga vyosena?

¹² Mbimbiliya yahanjika nawa ngwayo Kalunga atutengele muchifwanyisa chenyi. (Kuputuka 1:26) Echi chalumbununa nge atutengele navilinga vyamwaza ngana vize atwama navyo ikiye. Ngocho kachi nge weji kwivwanga kupihya hakumona vatu vakuzeneka mulonga vali nakuyanda, kaha tachikiza ngwove Kalunganyi eji kwivwanga kupihya chikuma. Uno twatachikiza ngachilihi?

¹³ Mbimbiliya yatunangula ngwayo “Kalunga ikiye zangi.” (WaYowano 1, 4:8) Eji kulinganga vyuma vyosena muzangi. Tweji kusolonga zangi mwomwo Kalunga apwa wazangi. Achishinganyeke hachishina chino: Kachi nge wapwanga nangolo jakufumisa kuyanda navilinga vyavipi muno mukaye, kachi kawalingilemoko nyi? Chikupu vene kachi unalingimo mwomwo wazanga vatu. Nyi ngachilihi Kalunga? Hakuwana nge atwama nangolo kaha nawa atuzanga, ngocho  mwakafumisako kuyanda navilinga vyakuhenga vyosena. Shikaho tachikiza ngwove vyuma vyosena atushika Kalunga vize vanavuluka kumaputukilo amukanda uno navikatesamo. Hakusaka ufwelele vyuma kana, watela kutachikiza kanawa Kalunga.

14. Kalunga lijina lyenyi ikiye iya, kaha twatachikiza ngachilihi ngwetu twatela kulizachisa?

¹⁴ Nge uli nakusaka kulikwata usepa namutu, chuma muka chatete naumulweza? Naumulweza lijina lyove. Uno Kalunga akwechi lijina tahi? Mukwitava chachivulu veji kwambanga ngwavo lijina lyenyi ikiye Kalunga chipwe Mwata. Oloze awa keshi himajinako. Japwa kaha jivulukiso, nganomu tweji kwambanga ngwetu “mwangana” chipwe “twamina walifuchi.” Kalunga atulweza ngwenyi lijina lyenyi ikiye Yehova. Mukanda waSamu 83:18 wamba ngwawo: “Vatu vatachikize ngwavo, ove ukwechi lijina lyove yove Yehova, yove kaha uka wove wapwa uWakulitulaho Chikuma hamavu hosena.” Vaka-kusoneka Mbimbiliya vazachishile lijina lyaKalunga mapapa kakavulu. Ngocho Yehova ali nakusaka utachikize lijina lyenyi nakulizachisanga. Kaha nakulweze lijina lyenyi mangana upwenga usepa lyenyi.

15. Lijina lyakwamba ngwavo Yehova lyalumbununa ika?

¹⁵ Lijina lyaKalunga, Yehova, likwechi ulumbunwiso waunene.  Lyalumbununa nge nahase kutesamo vyeshovyo mwashika, nakulinga vyuma vyosena najinyi. Kakweshi vimwe navimuhonesako. Yehova ikiye kaha akwechi lijina kana. *

16, 17. Lumbununa vulukiso yakwamba ngwavo (a) “Wangolo Josena”? (b) “Mwangana wahaya myaka yosena”? (c) “Tengi”?

¹⁶ Mukanda waSamu 83:18 uze twatanganga kunyima wavulukanga hali Yehova ngwawo: “Yove kaha uka wove wapwa  uWakulitulaho Chikuma.” Kaha nawa mukanda waKusoloka 15:3 wamba ngwawo: “Ove Yehova Kalunga Wangolo Josena, vilinga vyove vyapwa vyavinene vyakukomwesa. Ove Mwangana wahaya myaka yosena, jijila jove japwa jakwoloka jamuchano.” Uno vulukiso yakwamba ngwavo “Wangolo Josena” yalumbununa ika? Yalumbununa nge Yehova apwa wangolo chikuma kuhambakana vatu vosena. Kaha vulukiso yakwamba ngwavo “Mwangana wahaya myaka yosena” yalumbununa nge Kalunga napungako myaka yosena. Mukanda waSamu 90:2 wahanjika nge Kalunga afuma kumyaka yosena nakuya kumyaka yosena. Chuma kana chapwa chakukomwesa chikuma.

¹⁷ Yehova ikiye kaha apwa Tengi. Mukanda waKusoloka 4:11 wamba ngwawo: “Yehova Kalunga ketu, ove watamo kutambula upahu nakavumbi nangolo, mwomwo ove yove watangile vyuma vyosena, kaha mwomwo mukiko mwaya muchima wove, shikaho vyapwileko kaha nawa wavitangile.”  Yehova ikiye atengele vyuma vyosena vyakufwana nge vangelo, navatanganyika, namihako, navaishi.

18. Mwomwo ika vatu vamwe veji kushinganyekelanga ngwavo kaveshi kuhasa kupwa sepa lyaKalungako? Oloze Mbimbiliya yahanjika vyuma muka?

¹⁸ Vatu vamwe veji kwivwanga woma hakutanga vilinga vyakukomwesa atwama navyo Yehova, kaha veji kulihulisanga ngwavo, ‘Kalunga nahase kunguzakama ngachilihi okunyi apwa wangolo, wamulemu chikuma kaha nawa atwama kwakusuku?’ Uno Kalunga asaka tushinganyekenga ngocho tahi? Nduma, mwomwo asaka apandame kuli etu. Mbimbiliya yahanjika ngwayo “kapwa kwakusuku nayetu tuvosena mutu himutuko.” (Vilinga 17:27) Kalunga asaka upandame kuli ikiye, kaha akufwelelesa ngwenyi ‘mwapandama kuli ove.’—WaYakova 4:8.

19. (a) Unahase kupwa ngachilihi usepa lyaKalunga? (b) Vilinga muka vyaYehova wasaka chikuma?

¹⁹ Uno unahase kupwa ngachilihi usepa lyaKalunga? Yesu ambile ngwenyi: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.” (Yowano 17:3) Twalaho lika kulinangula mangana utachikize Yehova naYesu. Nge naulinga ngocho, kaha naukayoya haya myaka yosena. Chakutalilaho, tunalinangula lyehi nge “Kalunga ikiye zangi.” (WaYowano 1, 4:16) Oloze atwama nawa navilinga vyeka vyamwaza. Mbimbiliya yatulweza ngwayo Yehova apwa “wakeke nakutetela, wakushipwokela kukwata utenu, wazangi yakwilila, wamuchano.” (Kulovoka 34:6) Apwa ‘wamwaza, kaha eji kukonekelanga.’ (Samu 86:5) Apwa muka-kutalilila vatu chikoki, wakushishika. (WaPetulu 2, 3:9; WavaHepeleu 10:23) Omu nautanga Mbimbiliya naulinangula vilinga vyaYehova vikwavo vyamwaza.

20-22. (a) Uno tunahase kupandama ngachilihi kuli Kalunga uze katwamonako? (b) Vyuma muka watela kulinga nge vatu navakukanyisa kulinangula Mbimbiliya?

 ²⁰ Uno unahase kupandama ngachilihi kuli Kalunga uze kawamonako? (Yowano 1:18; 4:24; WaChimoteu 1, 1:17) Nge nautanga vyaYehova muMbimbiliya, kaha naumutachikiza kanawa kupwa himutu nahenyi. (Samu 27:4; Wavaka-Loma 1:20) Kahomu naulinangula vyavivulu hali ikiye, naumuzanga chikuma nakupandama jino kuli ikiye.

²¹ Nautachikiza ngwove Yehova apwa Setu. (Mateu 6:9) Ikiye atuhana kuyoya, kaha asaka tuyoyenga kanawa, ngana muze chisemi wazangi asaka vana venyi vayoyenga kanawa. (Samu 36:9) Mbimbiliya yanangula ngwayo unahase kupwa usepa lyaYehova. (WaYakova 2:23) Echi chapwa hikutokwa chikupu. Yehova uze atengele vyuma vyosena ali nakusaka upwenga usepa lyenyi.

²² Vatu vamwe vanahase kukukanyisa kulinangula Mbimbiliya. Vanahase kulizakamina ngwavo nawalumuna kwitava chove. Oloze kanda nawitavisa vatu vakuhonese kupwa usepa lyaYehovako, mwomwo apwa sepa wamwenemwene.

23, 24. (a) Mwomwo ika watela kuhulishilanga vihula? (b) Chihande muka natushimutwila mukapetulu nakavangizaho?

²³ Omu naulinangula Mbimbiliya, kunahase kupwa vyuma vimwe vize kaweshi kwivwishisako. Shikaho kanda nawivwa sonyi kuhulisa vihulako. Yesu ambile ngwenyi twatela kupwa vakulinyisa ngana mwavana vavandende. (Mateu 18:2-4) Vanyike veji kuhulisanga vihula vyavivulu. Kalunga ali nakusaka uwane muvakumbulwila vihula vyove. Ngocho kekesa kanawa vyuma uli nakulinangula muMbimbiliya mangana umone nge vyamuchano.—Tanga Vilinga 17:11.

²⁴ Jila yamwaza yakutachikijilamo Yehova shina kulinangula Mbimbiliya. Mukapetulu nakavangizaho natulinangula ovyo Mbimbiliya yalihandunwina namikanda yeka.