1. Iya atuhana kuyoya?

YEHOVA “apwa Kalunga ou ayoya.” (Yelemiya 10:10) Ikiye atutengele nakutuhana kuyoya. Mbimbiliya yamba ngwayo: “Ove yove watangile vyuma vyosena, kaha mwomwo mukiko mwaya muchima wove, shikaho vyapwileko kaha nawa wavitangile.” (Kusoloka 4:11) Eyo, Yehova asakile tuyoyenga. Ngocho kuyoya chapwa hiwana wakufuma kuli ikiye. —Tanga Samu 36:9.

2. Vyuma muka twatela kulinga numba tufukile mukuyoya?

² Yehova eji kutuhananga vyuma vyakufwana nge vyakulya nameya mangana tutwaleho lika kuyoya. (Vilinga 17:28) Kaha nawa asaka tulivwise kuwaha kuyoya. (Vilinga 14:15-17) Shikaho hakusaka tufukile mukuyoya, twatela kukavangiza jishimbi jaKalunga.—Isaya 48:17, 18.

3. Vyuma muka alingile Yehova omu Kena ajihile Avele?

³ Mbimbiliya yatunangula ngwayo Yehova amona kuyoya chetu nachechi chavakwetu kupwa chachilemu. Chakutalilaho, omu Kena mwanaAlama naEve apihililile chikuma nasongo yenyi Avele, Yehova amuhuhumwine ngwenyi kanda mwapihililako. Oloze Kena kevwililileko. Apihililile chikuma ‘nakuveta songo yenyi Avele nakumujiha.’ (Kuputuka 4:3-8) Yehova azangamishile Kena mwomwo yakujiha songo yenyi. (Kuputuka 4:9-11) Shikaho, chijindo namuchima wamatoto vyapwa vyavipi mwomwo vinahase kutulingisa tupwenga navilinga vyaulyanyi naukenya. Mutu wavilinga kana keshi kukayoya haya myaka yosenako. (Tanga  WaYowano 1, 3:15.) Hakusaka twivwise Yehova kuwaha, twatela kuzanga vatu vosena.—WaYowano 1, 3:11, 12.

4. Lushimbi lumwe luze Kalunga ahanyine vaIsalele lwatunangula vyuma muka kutalisa kukuyoya?

⁴ Kahomu mwahichile myaka yayivulu, Yehova asolwele nge amona kuyoya kupwa chachilemu hakuhana Mose Jishimbi Likumi. Lushimbi lumwe lwambile ngwalwo: “Kanda mukajiha mutuko.” (Lushimbi lwamuchivali 5:17) Vatu vaze vajihilenga vakwavo chakusakula kumichima yavo, navakiko vavajihilenga.

5. Uno Kalunga amona ngachilihi kufumisa lijimo?

⁵ Uno Kalunga amona ngachilihi kufumisa lijimo? Yehova amona nakuyoya chamwana uze achili mujimo kupwa chachilemu. Kweseka naJishimbi ahanyine vaIsalele, ambile ngwenyi nge mutu mwalemeka pwevo uze ali nalijimo, kaha uze mwana ali mujimo himwafwa, mutu kana vatela kumujiha. (Tanga Kulovoka 21:22, 23; Samu 127:3.) Echi chatunangula nge kufumisa lijimo chapwa chakuhenga.—Tala Chinyikilo chakusongo 28.

6, 7. Natusolola ngachilihi kuli Yehova ngwetu twamona kuyoya kupwa chachilemu?

⁶ Natusolola ngachilihi kuli Yehova ngwetu twamona kuyoya chetu nachechi chavakwetu kupwa chachilemu? Katwatela kulinga vyuma vize navihaka kuyoya chetu nachechi chavakwetu mupondeko. Ngocho katwatela kunwa lyamba, chipwe makanya eka, chipwe maundu akupendesa mwomwo vinahase kutwenyeka nakutujiha.

⁷ Kalunga ikiye atuhana kuyoya namujimba, ngocho twatela kuzachisa vyuma kana mujila yize asaka. Twatela kulama kanawa mijimba yetu. Nge katweshi kulinga ngochoko, kaha natupwa vamajilo kumeso aKalunga. (Wavaka-Loma 6:19; 12:1; Wavaka-Kolinde 2, 7:1) Nge natumona kuyoya kupwa chamokomoko, kaha katweshi kuhasa kuzachila Yehova uze atuhanyine kuyoyako. Numba tuhu chapwa chachikalu  kwecha jitato jajipi, oloze Yehova mwatukafwa nge natuzata nangolo mwomwo yakumona kuyoya kupwa chachilemu.

8. Vyuma muka twatela kulinga mangana tuzeneke kuhaka kuyoya chetu nachechi chavakwetu muponde?

⁸ Tunalinangula ngwetu kuyoya chapwa hiwana waulemu. Yehova atufwelela ngwenyi natuzata nangolo mangana tuzeneke kuhaka kuyoya chetu nachechi chavakwetu muponde. Twatela kulinga ngocho hakutambukisa minyau, namutukutuku, navyuma vyeka. Katwatela nawa kwazana mukuhema chaponde chipwe chaulyanyiko. (Samu 11:5) Kaha nawa twatela kuwahisanga kanawa hajizuvo jetu mangana tulikinge kujiponde. Yehova alwezele vaIsalele ngwenyi: “Omu namukatunga jizuvo jenu, katungenu navipato hamilungu yajizuvo kuchina namukalinehela mulonga wamanyinga nge hanaholoka mutu.”—Lushimbi lwamuchivali 22:8.

9. Twatela kumona ngachilihi kuyoya chatunyama?

⁹ Yehova asaka nawa tumonenga kuyoya chatunyama kupwa chachilemu. Atwitavisa tujihenga tunyama mangana tulyenga nakuwanako uvwalo. Kaha atwitavisa nawa kujiha kanyama nge mwalemeka vatu. (Kuputuka 3:21; 9:3; Kulovoka 21:28) Oloze katwatela kuyanjisa tunyama chipwe kuvajihila chisekeko.—Vishimo 12:10.

10. Twatachikiza ngachilihi ngwetu manyinga emanyinako kuyoya?

¹⁰ Manyinga apwa ajila kuli Yehova mwomwo emanyinako kuyoya. Omu Kena ajihile songo yenyi Avele, Yehova amulwezele ngwenyi: “Manyinga asongo yove ali nakuteta kuli ami hamavu.” (Kuputuka 4:10) Manyinga aAvele emanyinyineko kuyoya chenyi, ngocho Yehova azangamishile Kena hakujiha Avele. Omu lyakumine Livaji lize lyejile mumakumbi aNowa, Yehova ahanjikile cheka ngwenyi manyinga emanyinako kuyoya. Yehova ahanyine Nowa navana venyi lisesa lyakujiha tunyama nakulya. Ambile ngwenyi: “Tunyama vakutambuka vakuyoya vosena, navapwanga kulya chenu. Ngunamihanevo ngana muze ngwamihanyine vyuma vituta vyakusoka hamavu.” Oloze Yehova avakanyishile kulya chuma  chimwe. Ambile ngwenyi: “Oloze kamwatela kulya nyama namwono wayo hamweko, akiko manyinga ayo.”—Kuputuka 1:29; 9:3, 4.

11. Lushimbi muka lwakutalisa kumanyinga luze Kalunga ahanyine vaIsalele?

¹¹ Omu mwahichile myaka kafwe 800 kufuma haze Yehova akanyishile Nowa kulya manyinga, alwezele cheka vatu jenyi ngwenyi: “Kachi nge mutu umwe hali vaIsalele chipwe mwiza uze ali nakutwama muli enu mwaya nakuzomba, kaha himwakwata kanyama chipwe kajila uze veji kulyanga, ahichise manyinga ayauze kanyama chipwe uze kajila nakuwashikila mavu.” Ambile cheka ngwenyi: ‘Kanda namulya manyingako.’ (VyavaLevi 17:13, 14) Echi chasolola nge Yehova asakile vatu jenyi vamonenga manyinga kupwa ajila. Vatelelele kulya kaha nyama keshi manyingako. Nge vanajihi kanyama, vatelelele kuhichisa manyinga enyi hamavu.

12. Uno vaka-Kulishitu vamona ngachilihi manyinga?

¹² Omu mwahichile myaka kufuma hakufwa chaYesu, vaposetolo navakulwane vamuchikungulwilo chavaka-Kulishitu muYelusalema, valiwanyine mangana vashimutwile haJishimbi jimwe jize vahanyine vaIsalele jize vatelelele kukavangiza navaka-Kulishitu. (Tanga Vilinga 15:28, 29; 21:25.) Yehova avakafwile vatachikize ngwavo amwenenga lika manyinga kupwa amalemu, ngocho navakiko vatelelele kuwamona kupwa ajila. Vaka-Kulishitu vakulivanga kavatelelele kulya chipwe kunwa manyinga chipwe kulya nyama yize kavahichishile kanawa manyingako. Mwomwo kulinga ngocho chineseka hamwe nakulemesa makombelo chipwe kulinga ujila. Kufuma vene haze, vaka-Kulishitu vamuchano kavalilenga chipwe kunwa manyingako. Nyi ngachilihi makumbi ano? Yehova asaka nayetu tumonenga manyinga kupwa ajila.

13. Mwomwo ika vaka-Kulishitu veji kukanyinanga kuvahaka manyinga?

¹³ Uno echi chalumbununa nge vaka-Kulishitu vatela kukana kuvahaka manyinga tahi? Eyo. Yehova atukanyisa  kulya chipwe kunwa manyinga. Chakutalilaho, nge ndotolo nakukanyisa kunwa wala, kutala unahase kuhaka wala mundongo nakulituvayo nyi? Nduma. Chochimwe nawa, lushimbi luze lwakanyisa kulya chipwe kunwa manyinga lwalumbununa nge katwatela kwitavila kutuhaka manyingako.—Tala Chinyikilo chakusongo 29.

14, 15. Vaka-Kulishitu vamona ngachilihi kuyoya? Uno vanahase kuhokola jishimbi jaKalunga hakufwila kaha kulwila myono yavo tahi? Lumbununa.

¹⁴ Nyi ngachilihi nge ndotolo mwatulweza ngwenyi natufwa nge kaveshi kutuhaka manyingako? Mutu himutu atela kusakula ivene kukavangiza lushimbi lwaKalunga lwakutalisa kumanyinga chipwe chiku. Etu vaka-Kulishitu twamona kuyoya kupwa wana waulemu wakufuma kuli Kalunga, ngocho tunahase kuzachisa jijila jeka jakutukilamo mangana tutwaleho lika kuyoya. Oloze katweshi kuhasa kwitavila vatuhake manyingako.

¹⁵ Numba tuhu twafwila kupwa vakulikangula kumujimba, oloze katweshi kuhasa kwitavila vatuhake manyingako mwomwo kuyoya chapwa chachilemu kuli Kalunga. Kwononoka Yehova chapwa chachilemu chikuma kuhambakana kuhokola jishimbi jenyi hakufwila kaha kulwila myono yetu. Yesu ambile ngwenyi: “Weshowo mwasaka kulwila mwono wenyi mwakaujimbalisa, oloze weshowo mwajimbalisa mwono wenyi mwomwo yayami mwakauwana.” (Mateu 16:25) Twatela kwononoka Yehova mwomwo yakumuzanga kaha nawa atachikiza vyuma navitunganyalisa. Ngocho twatela kumona kuyoya kupwa chachilemu kaha nawa chajila ngana muze achimona ikiye.—WavaHepeleu 11:6.

16. Mwomwo ika vaka-Kulishitu vakushishika veji kwononokelanga Kalunga?

¹⁶ Vaka-Kulishitu vakushishika vafwila kukavangiza lushimbi lwaKalunga lwakutalisa kumanyinga. Kaveshi kulya chipwe  kunwa manyinga chipwe kuvahakawo hakuvokako. * Oloze veji kwitavilanga jijila jeka jakuvokilamo mangana valwile myono yavo. Vafwelela ngwavo Tengi uze atengele kuyoya namanyinga atachikiza vyuma navivanganyalisa. Kutala unetavila ngwove Kalunga atachikiza vyuma navikunganyalisa tahi?

17. Yehova etavishile vaIsalele vazachise manyinga mujila muka?

¹⁷ Yehova alwezele vaIsalele muJishimbi jize ahanyine Mose ngwenyi: “Mwono wachuma chakuyoya watwama mumanyinga, kaha ami ngunamihanewo halijiko lyakulumbila mangana mulilingile chakufwika hashili, mwomwo manyinga akiko eji kulinganga chakufwika hashili.” (VyavaLevi 17:11) Omu vaIsalele valingilenga shili, vahanyinenga Yehova chimuna wakuvatula mangana avakonekele jishili javo. Kaha valwezelenga kapilishitu ahingunwine manyinga amwe achimuna kana halijiko lyakulumbila lize lyapwile hatembele. Eyi yikiko kaha jila yize Yehova etavishile vaIsalele vazachishilemo manyinga.

18. Uno ndando yakusokola yaYesu yatusokolwela jila muka?

¹⁸ Omu Yesu ejile hano hamavu, afumishileko lushimbi lwakuhana vimuna vakuvatula hakuhana kuyoya chenyi chipwe ngwetu manyinga enyi mangana vatukonekele jishili jetu. (Mateu 20:28; WavaHepeleu 10:1) Kuyoya chaYesu chapwa chachilemu chikuma mwomwo omu vamusangwile nakuya mwilu, Yehova asokolwelele vatu vosena jila yakuwanyinamo kuyoya chahaya myaka yosena.—Yowano 3:16; WavaHepeleu 9:11, 12; WaPetulu 1, 1:18, 19.

19. Vyuma muka twatela kulinga numba ‘tutome kumanyinga avatu vosena’?

 ¹⁹ Twasakwilila chikuma Yehova hakutuhana kuyoya. Shikaho twatela kulwezako vakwetu ngwetu nge navafwelela Yesu, kaha navakayoya haya myaka yosena. Hakuwana nge twavazanga chikuma, ngocho twatela kuzata nangolo mangana tuvalweze mwakuwanyina kuyoya kana. (Ezekele 3:17-21) Nge natulinga ngocho, kaha natupwa vakukasunuka kuhanjika mazu ahanjikile kaposetolo Paulu ngwenyi: “Ngunatomo lyehi kumanyinga avatu vosena, mwomwo kangwalitwaminyine kumilweza mwosena mwaya kujina chaKalungako.” (Vilinga 20:26, 27) Eyo, kulweza vakwetu vyaYehova nomwo amona kuyoya nachisolola nge twamona kuyoya namanyinga kupwa vyavilemu chikuma.