1, 2. Mwomwo ika watela kumona kulomba kupwa wana waulemu, kaha ika watela kutachikijila vyuma yahanjika Mbimbiliya hachihande kana?

YEHOVA “ou atengele melu namavu” eji kumonanga vaka-mafuchi osena kupwa nge limata lyameya lize linasotoka mumbekete. (Samu 115:15; Isaya 40:15) Numba tuhu etu vatu twapwa tuvavandende chikuma, oloze mukanda waSamu 145:18, 19 wamba ngwawo: “Yehova atwama hakamwihi navosena vaze veji kumusanyikanga, navosena vaze veji kumusanyikanga mwamuchano. Vaze vamwivwa woma eji kuvahananga vyuma vasaka, eji kwivwanga tuwelele twavo, kaha eji kuvapulululanga.” Chikupu vene, twatokwa chikuma hakuwana nge Yehova uze apwa Tengi wangolo josena asaka apandame kuli etu nakwivwilila kukulomba chetu. Eyo, kulomba chapwa chachilemu chikuma kaha nawa chapwa wana uze Yehova atuhana mutu himutu.

² Oloze Yehova mwevwilila kukulomba chetu kuvanga kaha nge natumulomba mujila yize etavisa. Uno tunahase kulinga ngachilihi ngocho? Tutale vyuma yahanjika Mbimbiliya kutalisa kukulomba.

3. Mwomwo ika watela kulombela kuli Yehova?

³ Yehova asaka ulombenga kuli ikiye. Uno twatachikiza ngachilihi? (Tanga Wavaka-Fwilipi 4:6, 7.) Achishinganyeke hamazu ali muchisoneka kana. Chikupu vene, Kalunga uze apwa Muka-kuyula vyuma vyakutenga vyosena akuzakama chikuma kaha nawa asaka umulwezenga vili kumuchima wove naukalu wove.

4. Kulombanga kuli Yehova lwola lwosena nachizamisa ngachilihi usepa wove naikiye?

 ⁴ Kulomba cheji kutukafwanga tupwenga nausepa wakukola naYehova. Nge vasepa namutu navashimutwilanga vyuma vili kumichima yavo naukalu wavo lwola lwosena, kaha usepa wavo naukola chikuma. Omu mukiko chapwa nge natulomba kuli Yehova. Nakulweze kuhichila muMbimbiliya mwaya vishinganyeka vyenyi navyuma mwakalinga kulutwe. Unahase kumulweza vyuma vili kumuchima wove hakulombanga kuli ikiye lwola lwosena. Nge naulinga ngocho, kaha usepa wove naYehova nauzama chikuma.—WaYakova 4:8.

5. Uno twatachikiza ngachilihi ngwetu Yehova keshi kwivwilila kukulomba chosenako?

⁵ Kutala Yehova eji kwivwililanga kukulomba chosena tahi? Nduma. Yehova alwezele vaIsalele mumakumbi akapolofweto Isaya ngwenyi: “Numba tuhu namulomba mapapa kakavulu, kangweshi kumivwililako. Mwomwo mavoko  enu anazale namanyinga.” (Isaya 1:15) Shikaho nge katwazangamineko, tunahase kulinga vyuma vize navitusosolola kuli Yehova nakumulingisa azeneke kwivwilila kukulomba chetu.

6. Mwomwo ika kupwa nalufwelelo chapwila chachilemu? Unahase kusolola ngachilihi ngwove watwama nalufwelelo?

⁶ Kachi nge natusaka Yehova evwilile kukulomba chetu, kaha twatela kumufwelela. (Mako 11:24) Kaposetolo Paulu asonekele ngwenyi: “Chakuzeneka lufwelelo, chachikalu kumwivwisa Kalunga kuwaha, mwomwo weshowo mwapandama kuli Kalunga, atela kwitavila ngwenyi kwatwama, kaha nawa ngwenyi ikiye apwa muka-kufweta vaze vali nakumutondatonda chikuma.” (WavaHepeleu 11:6) Oloze katwatela kuhanjika hakanwa kaha ngwetu twafwelela Yehovako. Twatela kusolola lufwelelo kana hakumwononokanga hakumbi hakumbi.—Tanga WaYakova 2:26.

7. (a) Mwomwo ika twatela kulombela kuli Yehova mujila yakulinyisa kaha nawa mukavumbi? (b) Tunahase kusolola ngachilihi ngwetu tuli nakulomba kufuma kumuchima wetu?

⁷ Twatela kulombanga kuli Yehova mujila yakulinyisa kaha nawa mukavumbi. Mwomwo ika? Chakutalilaho, nge tuli nakuhanjika namwangana chipwe natwamina walifuchi, tweji kulinganga ngocho mukavumbi. Nyi ngachilihi Yehova uze apwa Kalunga Wangolo Josena, kutala katwatela kuhanjika nenyi mujila yakulinyisa kaha nawa mukavumbiko nyi? (Kuputuka 17:1; Samu 138:6) Twatela nawa kulombanga kuli Yehova kufuma kumuchima wetu, keshi kuhilukila hilukila mazu wowamweko.—Mateu 6:7, 8.

8. Kachi nge tunalombo vyuma vimwe kuli Kalunga, kaha twatela kulinga vyuma muka?

⁸ Kachi nge tunalombo vyuma vimwe kuli Kalunga, kaha twatela nawa kuzata nangolo tulinge kweseka nomu tunalombo. Chakutalilaho, nge tunamulombo atuhane vyuma vyasakiwa mukuyoya, katwatela kulyechelela kaha ngwetu mwatuhana vyuma kana chakuzeneka kukilikitako. Twatela kuzata nangolo nakwitavila kala milimo yize tunahase kuzata. (Mateu 6:11; Wavaka-Tesolonyika 2, 3:10) Kaha nawa nge tunalombo  Yehova atukafwe twechenga kulinga vyuma vyavipi, kaha twatela kulihenda kukala vyuma vize vinahase kutwingisa mucheseko. (Wavaka-Kolose 3:5) Tushimutwile jino vihula vimwe vyakupandama kukulomba.

9. Twatela kulomba kuli iya? Mukanda waYowano 14:6 watunangula vyuma muka kutalisa kukulomba?

⁹ Twatela kulomba kuli iya? Yesu anangwile vaka-kumukavangiza valombenga kuli ‘Setu ali mwilu.’ (Mateu 6:9) Ambile nawa ngwenyi: “Ami yami jila, yami muchano, yami kuyoya. Mutu naumwe wauchi mweza kuli Tata kuvanga ahichile muli ami.” (Yowano 14:6) Ngocho twatela kulomba kaha kuli Yehova kuhichila muli Yesu. Uno kulomba kuhichila muli Yesu chalumbunukila mulihi? Hakusaka Yehova akumbulule kulomba chetu, twatela kumona mulimo wakulipwila uze ahana Yesu kupwa waulemu. Nganomu twalinangwile, Yesu ejile hano hamavu mangana atusokole kushili nakukufwa. (Yowano 3:16; Wavaka-Loma 5:12) Yehova atongola nawa Yesu kupwa Kapilishitu Wakulitulaho kaha nawa Muka-kusopesa.—Yowano 5:22; WavaHepeleu 6:20.

10. Uno twatela kaha kufukama, chipwe kutwama, chipwe kwimana hakulomba tahi? Lumbununa.

¹⁰ Uno twatela kaha kufukama, chipwe kutwama, chipwe kwimana hakulomba tahi? Nduma. Yehova katulweza ngwenyi kuvanga tufukame, chipwe tutwame, chipwe twimane hakulombako. Mbimbiliya yanangula ngwayo tunahase kulomba kuli Yehova mukala jila yize nayisolola kavumbi. (Mijimbu 1, 17:16; Nehemiya 8:6; Ndanyele 6:10; Mako 11:25) Kupwa namuchima wamwaza hakulomba kuli Yehova chikiko chuma chachilemu chikuma. Tunahase kulomba nalizu lyakutambakana chipwe uholela kweshokwo tuli kaha nawa kala lwola. Kahomu natulomba kuli Yehova, twatela kufwelela ngwetu mwevwa kulomba chetu numba nge vatu kaveshi nakutwivwako.—Nehemiya 2:1-6.

11. Vyuma muka tunahase kulomba kuli Yehova?

 ¹¹ Vyuma muka twatela kulomba? Tunahase kulomba kala vyuma vize etavisa Yehova. Mbimbiliya yamba ngwayo: “Vyeshovyo natumulomba kweseka namwaya muchima wenyi, mwatwivwa.” (WaYowano 1, 5:14) Uno tunahase kulomba vyuma vyamukuyoya chetu vize tuli nakusaka tahi? Eyo. Kulomba kuli Yehova chatela kupwa nge muze tweji kuhanjikanga nasepa lyetu. Tunahase kulweza Yehova vyuma vyosena vili mumichima yetu. (Samu 62:8) Tunahase kumulomba atuhane shipilitu yenyi yajila mangana yitukafwe tulingenga vyuma vyakwoloka. (Luka 11:13) Tunahase nawa kumulomba atuhane mangana akutukafwa tusakule kanawa vyakulinga, nakutuhana ngolo jakutukafwa tumike nge tuli muukalu. (WaYakova 1:5) Twatela kulomba nawa kuli Yehova atukonekele jishili jetu. (Wavaka-Efwesu 1:3, 7) Twatela nawa kulombelangako vatu veka, kuhakilako navaka-tanga yetu navandumbwetu muchikungulwilo.—Vilinga 12:5; Wavaka-Kolose 4:12.

12. Vyuma muka vyavilemu chikuma twatela kuvuluka mukulomba chetu?

¹² Vyuma muka vyavilemu chikuma twatela kuvuluka mukulomba chetu? Twatela kuvuluka vyuma vyakupandama kuli Yehova navyuma ajina. Twatela kumusakwilila kufuma kumuchima wetu havyuma vyosena atulingila. (Mijimbu 1, 29:10-13) Omwo Yesu apwile hano hamavu, anangwile tumbaji twenyi valombenga mujila kaneyi. (Tanga Mateu 6:9-13.) Ambile ngwenyi twatela chatete kulombelako lijina lyaKalunga lipwenga lyajila, kulumbununa nge valimone kupwa lyajila. Atulwezele nawa tulombenga Wangana waKalunga wizenga namwaya muchima waYehova mulingiwe hamavu hosena. Hakukumisa kuvuluka vyuma kanevi vyavilemu, tunahase jino kulomba vyuma vyamukuyoya chetu. Nge natuvuluka chatete vyuma vyakupandama kuli Yehova navize ajina, kaha natusolola hatoma vyuma twamona kupwa vyavilemu mukuyoya chetu.

13. Uno kulomba chetu chatela kusuhwa ngachilihi?

 ¹³ Uno kulomba chetu chatela kusuhwa ngachilihi? Mbimbiliya kayahanjikahoko. Kulomba chetu chinahase kupwa chachihi chipwe chachisuku kweseka navyuma tuli nakulomba. Chakutalilaho, tunahase kulomba mukavatu hakulya vyakulya, oloze tunahase kusuhwisa kulomba chetu nge tuli nakusakwilila Yehova chipwe kumulweza ukalu wetu. (Samwele 1, 1:12, 15) Katwatela kusuhwisa kulomba chetu hakusaka kaha kwivwisa vatu kuwaha ngana muze valingilenga  vatu mumakumbi aYesuko. (Luka 20:46, 47) Yehova keshi kwivwila kuwaha kulomba kanako. Chuma chachilemu asaka shina kulomba chakufuma kumuchima wetu.

14. Uno twatela kulombanga mapapa kangahi, kahechi nachitunangula ika hali Yehova?

¹⁴ Uno twatela kulombanga mapapa kangahi? Yehova atulweza tulombenga kuli ikiye lwola lwosena. Mbimbiliya yamba ngwayo twatela ‘kulombanga lika,’ ‘nakulombanga naluzema,’ ‘nakulombanga shimbu yosena.’ (Mateu 26:41; Wavaka-Loma 12:12; Wavaka-Tesolonyika 1, 5:17) Yehova eji kwivwililanga kukulomba chetu lwola lwosena. Twatela kumusakwililanga hakumbi hakumbi hazangi yenyi nahamuchima wenyi wakuhana. Twatela nawa kumulomba atutwaminyine, nakutukafwa, nakutuvendejeka. Kachi nge twamona kulomba kuli Yehova kupwa chachilemu chikuma, kaha natulombanga kuli ikiye lwola lwosena.

15. Mwomwo ika twatela kwambila ngwetu “amene” hakukumisa kulomba?

 ¹⁵ Mwomwo ika twatela kwambila ngwetu “amene” hakukumisa kulomba? Lizu lyakwamba ngwavo “amene” lyalumbununa “mukiko vene,” chipwe ngwetu “chipwenga vene ngocho.” Yapwa hijila yakusolwelamo ngwetu vyuma tunalombo vyamuchano. (Samu 41:13) Mbimbiliya yatulweza nawa ngwayo chapwa chamwaza kuhanjikila mwishi chipwe helu ngwetu “amene” hakukumisa kulomba chalikungumbuwa mangana tusolole nge tunetavila vyuma vanavuluka mukulomba.—Mijimbu 1, 16:36; Wavaka-Kolinde 1, 14:16.

16. Uno chikupu Yehova eji kukumbululanga kulomba chetu tahi? Lumbununa.

¹⁶ Uno chikupu Yehova eji kukumbululanga kulomba chetu tahi? Eyo. Mbimbiliya yamuvuluka ngwayo apwa “muka-kwivwilila kukulomba.” (Samu 65:2) Yehova eji kwivwililanga kukulomba chamakombakaji namakombakaji avatu nakuchikumbulula, kaha eji kulinganga ngocho mujijila jakulisezaseza.

17. Yehova eji kukumbululanga ngachilihi kulomba chetu kuzachisa vangelo navangamba jenyi hano hamavu?

¹⁷ Yehova eji kukumbululanga kulomba chetu kuzachisa vangelo navangamba jenyi hano hamavu. (WavaHepeleu 1:13, 14) Kuli vyakutalilaho vyavivulu vyavatu vaze valombele kuli Kalunga avakafwe vevwishise Mbimbiliya, kaha nakushimbula chiku, vavatambukilile kuli Vinjiho jaYehova. Mbimbiliya yasolola ngwayo vangelo navakiko veji kwazananga mumulimo wakuvilika ‘mujimbu wamwaza’ hamavu hosena. (Tanga Kusoloka 14:6.) Kaha nawa etu vavavulu lwola lumwe twalombele kuli Yehova haukalu umwe wamukuyoya, kaha akumbulwile kulomba chetu hakuzachisa vandumbwetu vaka-Kulishitu vaze vatukafwile haukalu kana.—Vishimo 12:25; WaYakova 2:16.

18. Yehova eji kuzachisanga ngachilihi shipilitu yenyi yajila naMbimbiliya hakukumbulula kulomba chetu?

 ¹⁸ Yehova eji kuzachisanga nawa shipilitu yenyi yajila hakukumbulula kulomba chetu. Nahase kutuhana shipilitu yenyi yajila yitutwaminyine nakutuhana ngolo nge natumulomba atukafwe tumike muvyeseko. (Wavaka-Kolinde 2, 4:7) Eji kuzachisanga nawa Mbimbiliya hakukumbulula kulomba chetu nakutukafwa tusakule kanawa vyakulinga. Ngocho nge natutanganga Mbimbiliya, kaha natuwana visoneka vize navitukafwa. Yehova nahase kuzachisa nawa vandumbwetu hakukunguluka omu navakumbulula vishina vize navitukafwa muukalu wetu chipwe kuzachisa mukulwane muchikungulwilo atukafwe hakushimutwila nayetu chishina chimwe chamuMbimbiliya.—Wavaka-Ngalesha 6:1.

19. Chuma muka chinahase kusolola nge Yehova kakumbulwile kulomba chetuko?

¹⁹ Oloze lwola lumwe tunahase kulihulisa ngwetu, ‘Mwomwo ika Yehova nashimbwila kukumbulula kulomba chami?’ Anuka ngwove Yehova atachikiza lwola lwakukumbulula kulomba chetu najila yakulingilamo ngocho. Atachikiza vyuma vyasakiwa kuli etu. Ngocho lwola lumwe twatela kutwalaho lika kulomba mangana tusolole nge vyuma tuli nakulomba vyamuchano kaha nawa twamufwelela chikupu. (Luka 11:5-10) Lwola lumwe Yehova eji kukumbululanga kulomba chetu mujila yeka yize katweshi nakushinganyekako. Chakutalilaho, tunahase kumulomba haukalu umwe tuli nakumona. Oloze muchishishisa chakufumisako ukalu kana, nahase kutuhana kaha ngolo tumike.—Tanga Wavaka-Fwilipi 4:13.

20. Mwomwo ika twatela kulombelanga kuli Yehova lwola lwosena?

²⁰ Chikupu vene, kulomba kuli Yehova chapwa chachilemu chikuma. Twatela kufwelela ngwetu mwatwivwilila. (Samu 145:18) Shikaho nge natulombanga kuli Yehova lwola lwosena kufuma kumuchima wetu, kaha usepa wetu naikiye naupwa wakukola.