1, 2. Yehova asaka vatu vatwame ngachilihi mujitanga?

YEHOVA KALUNGA ikiye ahakileko ulo wakulivanga. Mbimbiliya yatulweza ngwayo Kalunga atengele pwevo wakulivanga, kaha ‘amunehele kuli lunga.’ Alama awahililile chikuma nakwamba ngwenyi: “Ou napu jino chifuwa chakuvifuwa vyami, nyama yakunyama yami.” (Kuputuka 2:22, 23) Echi chasolola nge Yehova asaka vatu vaze valimbata vapwenga vakuwahilila.

² Chaluvinda, vatu vavavulu kavapwa vakuwahilila mujitanga javoko. Oloze muMbimbiliya mwatwama jindongi jajivulu jize najikafwa vatu vosena mutanga vapwenga vakuwahilila nakutwama mukuunda.—Luka 11:28.

3, 4. (a) Uno lunga atela kutwama ngachilihi napuwenyi? (b) Mwomwo ika chapwila chachilemu valunga napwevo kulikonekelanga?

³ Mbimbiliya yamba ngwayo lunga atela kuvumbika puwenyi nakumuzanga. (Tanga Wavaka-Efwesu 5:25-29.) Lunga atela kuzanga puwenyi lwola lwosena. Atela nawa kumukinga, nakumuzakama, kaha katela kumuveta nakumuyanjisako.

⁴ Jino vyuma muka atela kulinga lunga nge puwenyi eji kulimbenjanga lika? Malunga vavalweza ngwavo: “Zangenunga lika mapwevo jenu, kanda namuvakwachilanga chikuma matotoko.” (Wavaka-Kolose 3:19) Enu malunga,  mwatela kutachikiza ngwenu nayenu mweji kulimbenjanga. Ngocho nge muli nakusaka Kalunga amikonekelenga, kaha nayenu mwatela kukonekelanga mapwevo jenu. (Mateu 6:12, 14, 15) Nge valunga napwevo navapwa namuchima wakulikonekelanga, kaha navapwa vakuwahilila muulo wavo.

5. Mwomwo ika lunga atela kuvumbikila puwenyi?

⁵ Yehova asaka malunga vavumbikenga mapwevo javo. Lunga atela kuhaka muchima kuvyuma vyasakiwa kuli puwenyi mwomwo echi chapwa chachilemu chikuma. Nge lunga mwayanjisanga puwenyi, kaha Yehova keshi kwivwilila kukulomba chenyiko. (WaPetulu 1, 3:7) Vatu amona Yehova kupwa vavalemu shina vaze vamuzanga. Kaha kazanga chikuma malunga kuhambakana mapwevoko.

6. Uno mazu akwamba ngwavo lunga napwevo vapwa “mujimba umwe kaha” alumbunukila mulihi?

⁶ Yesu ambile ngwenyi valunga napwevo valimbata “kaveshi cheka vavaliko, oloze mujimba umwe kaha.” (Mateu 19:6) Ngocho lunga chipwe pwevo atela kupwa wakushishika kuli muka-mahyenyi lwola lwosena. (Vishimo 5:15-21; WavaHepeleu 13:4) Vatela kulihananga vyuma vyatela kulihana muulo. (Wavaka-Kolinde 1, 7:3-5) Lunga atela kwanuka ngwenyi “kakweshi mutu ahunga mujimba wenyiko, oloze eji kuulisanga nakuuzakamanga.” Ngocho atela kuzanga puwenyi nakumuzakama. Mapwevo vasaka chikuma malunga javo vavasolwelenga likoji nakuvazanga.—Wavaka-Efwesu 5:29.

7. Mwomwo ika tanga yasakiwila mutwe watanga?

⁷ Tanga hitanga yasakiwa mutwe watanga uze mwatwaminyina vaka-tanga mangana vosena valinunge nakuzachila hamwe. Mukanda Wavaka-Kolinde 1, 11:3 wahanjika  ngwawo: “Mutwe walunga hilunga apwa Kulishitu, kaha mutwe wapwevo apwa lunga, kaha mutwe waKulishitu apwa Kalunga.”

8. Uno pwevo nahase kusolola ngachilihi ngwenyi alemesa chikuma lunga lyenyi?

⁸ Lunga hilunga eji kulimbenjanga. Oloze nge pwevo mwakundwiza vyuma nakase lunga lyenyi nakuzachila nenyi hamwe, kaha vatu vosena mutanga navanganyala. (WaPetulu 1, 3:1-6) Mbimbiliya yamba ngwayo: “Pwevo atela kupwa nakalemesa chikuma kuli lunga lyenyi.” (Wavaka-Efwesu 5:33) Nyi ngachilihi nge lunga lyenyi kafwelela vyuma vyamukwitava afwelela ikiyeko? Chochimwe, atela kulemesa chikuma lunga lyenyi. Mbimbiliya yamba ngwayo: “Nayenu mapwevo nawa, liluulenunga kuli malunga jenu, mangana chipwe nge vamwe kaveshi kwononoka kumazuko, muhase kuvakoka chakuzeneka mazu hakumona twamiso yamwaza yayenu mapwevo javo, mwomwo yakumona twamiso yenu yamwaza nakalemesa kenu kakanene.” (WaPetulu 1, 3:1, 2) Nge pwevo mwasolola chakutalilaho chamwaza, kaha lunga lyenyi mwavumbika vyuma afwelela.

9. (a) Vyuma muka atela kulinga pwevo nge kasakile vyuma nashinganyeka lunga lyenyiko? (b) Mukanda WaChituse 2:4, 5 walweza mapwevo valingenga vyuma muka?

 ⁹ Vyuma muka atela kulinga pwevo nge kasakile vyuma nashinganyeka lunga lyenyiko? Atela kuhanjika vyuma nasake mukalemesa. Chakutalilaho, Sala ahanjikile vyuma vize vyevwishile Apalahama kupihya, oloze Yehova alwezele Apalahama ngwenyi: “Mwivwilile.” (Kuputuka 21:9-12) Kakavulu vyuma mwakasa lunga muka-Kulishitu kavyeshi kulimbalaka naMbimbiliyako, ngocho puwenyi atela kumukundwiza. (Vilinga 5:29; Wavaka-Efwesu 5:24) Pwevo wamwenemwene eji kuzakamanga tanga yenyi. (Tanga WaChituse 2:4, 5.) Kahomu lunga navana navamona milimo ali nakukilikita mwomwo yakuvazakama, navamuzanga nakumuvumbika chikuma.—Vishimo 31:10, 28.

10. Mbimbiliya yahanjika vyuma muka kutalisa kukulihandununa nakulilukulula?

¹⁰ Lwola lumwe vaze valimbata vasaka kulahila kulihandununa chipwe kulilukulula nge vali muukalu. Oloze Mbimbiliya yahanjika ngwayo “pwevo kanda ahandunuka kuli lunga lyenyiko” kaha nawa “lunga katela kuseza pwevo lyenyiko.” (Wavaka-Kolinde 1, 7:10, 11) Kwatwama vyuma vimwe vyavinene vyeji kulingisanga valunga napwevo valihandunune. Chipwe ngocho, vatela kuhunananaho kanawa. Nyi ngachilihi kulilukulula? Mbimbiliya yahanjika ngwayo lunga napwevo vanahase kulilukulula kuvanga kaha nge umwe nalingi ujila.—Mateu 19:9.

11. Uno vana vasakiwa vyuma muka?

¹¹ Enu visemi, pwenunga nalwola lwaluvulu lwakushimutwilanga navana venu. Vana vasaka vapwenganga nayenu visemi javo, kaha nawa vasakiwa kuvanangula vyaYehova.—Lushimbi lwamuchivali 6:4-9.

12. Vyuma muka vatela kulinga visemi hakusaka vakinge vana vavo?

 ¹² Kaye kaSatana kali nakupihilako lika, ngocho vatu vamwe vanahase kulemeka vana vetu chipwe vene kuvapika. Visemi vamwe veji kwivwanga nganganyi kushimutwila navana vavo chihande kana. Oloze vatela kulweza vana vavo vazangame nakuvanangula mwakulihendela kuvatu kana. Enu visemi, kingenunga vana venu. *—WaPetulu 1, 5:8.

13. Uno visemi vatela kunangula ngachilihi vana vavo?

 ¹³ Visemi vatwama namulimo wakunangula vana vavo vapwenga navilinga vyamwaza. Uno munahase kunangula ngachilihi vana venu? Vana vasakiwa kuvolola, oloze kamwatela kulinga ngocho mujila yaukenya chipwe yautenuko. (Yelemiya 30:11) Shikaho kanda kuzangamisanga vana venu nge muli namatotoko. Kanda namuhanjikanga mazu akuvalemeka nge ‘poko yamukwaleko.’ (Vishimo 12:18) Oloze vanangulenunga mujila yize nayivakafwa vatachikize ovyo vatela kupwila vakwononoka.—Wavaka-Efwesu 6:4; WavaHepeleu 12:9-11; talenu Chinyikilo chakusongo 30.

14, 15. Mwomwo ika vana vatela kwononokela visemi javo?

¹⁴ Yesu ononokelenga Ise namulwola lwalukalu. (Luka 22:42; Yowano 8:28, 29) Ngocho Yehova asaka navana vononokenga visemi javo.—Wavaka-Efwesu 6:1-3.

¹⁵ Enu vana, numba nge shimbu jimwe nachimikaluhwila kwononoka visemi jenu, oloze tachikizenu ngwenu nge namwononoka, kaha Yehova navisemi jenu navawahilila. *—Vishimo 1:8; 6:20; 23:22-25.

16. (a) Satana eji kuhungumwisanga ngachilihi vanyike valinge vyuma vyavipi? (b) Mwomwo ika chapwila chachilemu kulikata navatu vaze vazanga Yehova?

¹⁶ Liyavolo nahase kuzachisa masepa jenu navakwenu veka vamishinjile mulinge vyuma vyavipi. Atachikiza ngwenyi cheseko kana chapwa chachikalu kuchihonesa. Chakutalilaho, Njina mwanaYakova alikachile navatu vaze kavazangile Yehovako. Echi chamunehelele ukalu hohamwe navaka-tanga yenyi. (Kuputuka 34:1, 2) Shikaho masepa vaze kavazanga Yehovako vanahase kumizondola  mulinge vyuma ahunga Yehova vize naviminehela ukalu nakwivwisa kupihya vaka-tanga yenu naKalunga. (Vishimo 17:21, 25) Ngocho chapwa chachilemu kulikata navatu vaze vazanga Yehova.—Wavaka-Kolinde 1, 15:33.

17. Vyuma muka atela kulinga mutu himutu mutanga?

¹⁷ Nge vatu mutanga navakavangizanga jindongi jaKalunga, kaha navalihenda kuukalu wauvulu. Ngocho nge wambata, kaha zanganga puwove nakumuzakama. Nge wasomboka, kaha vumbikanga lunga lyove nakuliluula kuli ikiye, nakulondezeza chakutalilaho chapwevo uze vahanjika hali Vishimo 31:10-31. Nge wapwa uchisemi, kaha nangulanga vana vove vazange Yehova. (Vishimo 22:6) Nge wapwa uchisemi walunga, kaha twaminyinanga vaka-tanga yove “mujila yamwenemwene.” (WaChimoteu 1, 3:4, 5; 5:8) Kaha enu vana nawa ononokenunga visemi jenu. (Wavaka-Kolose 3:20) Tachikizenu ngwenu mutu himutu mutanga nahase kulimbenja, ngocho pwenunga vakulinyisa nakulikonekelanga. Eyo, muMbimbiliya mwatwama jindongi jize najikafwa mutu himutu mutanga.