1, 2. (a) Vyuma muka vyeji kulingisanga wana mutambula upwenga waulemu? (b) Mwomwo ika ndando yakusokola yapwila hiwana waulemu chikuma atuhana Kalunga?

WANA muka waulemu watambulaho lyehi mukuyoya chove? Wana kawatela kupwa wandando yayinene numbanyi upwenga waulemuko. Wana weji kupwanga waulemu nge naukwivwisa kuwaha nakukukafwa mukuyoya chove.

² Hamawana osena atuhana Kalunga, hali umwe kaha uze wapwa wakulipwila. Wana kana wapwa waulemu chikuma. Mukapetulu uno natulinangula omwo Yehova atumine Mwanenyi Yesu Kulishitu kwiza nakutufwila mangana tukayoye haya myaka yosena. (Tanga Mateu 20:28.) Yehova atusolwelele zangi yayinene chikuma hakututumina Yesu hano hamavu kupwa ndando yakutusokola.

3. Mwomwo ika vatu veji kufwilanga?

³ Ndando yakusokola yapwa jila yize Yehova azachisa mangana asokole vatu kushili nakukufwa. (Wavaka-Efwesu 1:7) Hakusaka twivwishise ovyo ndando yakusokola yasakiwilile, twatela kuvangila kutachikiza vyuma vyasolokele kushikulu mumilemba yaEtene. Visemi jetu vakulivanga, vaAlama naEve valingile shili, ngocho vafwile. Nayetu tweji kufwanga mwomwo twaswanyine shili kuli Alama naEve.—Tala Chinyikilo chakusongo 9.

4. Uno Alama apwile iya, kaha kuyoya chenyi chapwile ngachilihi?

 ⁴ Omu Yehova atengele Alama, amuhanyine chuma chamwaza chikuma. Chuma kana shina kuyoya chakukupuka. Apwile namujimba navishinganyeka vyakukupuka. Katelele kuviza, chipwe kushinakajiwa, chipwe kufwako. Hakuwana nge Alama vamutengele kuli Yehova, ngocho Kalunga apwile ise. (Luka 3:38) Yehova ahanjikilenga nenyi lwola lwosena. Amulumbunwinyine kanawa vyuma atelele kulinga nakumuhana milimo yamwaza yakumusuulwisa.—Kuputuka 1:28-30; 2:16, 17.

5. Mbimbiliya yatalikisa mulihi hakwamba ngwayo Alama vamutengele “muchifwanyisa” chaKalunga?

⁵ Alama vamutengele “muchifwanyisa” chaKalunga. (Kuputuka 1:27) Apwile navilinga atwama navyo Yehova vyakufwana nge zangi, namangana, nachiyulo, nangolo. Amuhanyine nawa lisesa lyakulisakwila vyakulinga. Alama kapwile nge likina lize lyeji kuzatanga kaha milimo yize valitungilako. Oloze Kalunga amutengele nalisesa lyakulisakwila ivene kulinga vyuma vyakwoloka chipwe vyakuhenga. Nge Alama ononokele Kalunga, kachi ayoyele haya myaka yosena muPalachise.

6. Vyuma muka ajimbalishile Alama omu alikangile kuli Kalunga? Kahechi chanehele ukalu muka hali yetu?

⁶ Omu Alama alikangile kuli Kalunga, vamutongwelele kufwa nakujimbalisa vyuma vyavinene chikuma. Ajimbalishile usepa wakulipwila apwile nawo naYehova, nakuyoya chenyi chakukupuka, naPalachise. (Kuputuka 3:17-19) Alama naEve valikangile kuli Kalunga chakusakula kumichima yavo, ngocho kavapwile nalutalililo lwakuyoyako. Mwomwo yachuma kanechi alingile Alama, “shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.” (Wavaka-Loma 5:12) Omu Alama alingile shili, ‘alilanjishile’ ivene hohamwe nayetu  muundungo washili nakufwa. (Wavaka-Loma 7:14) Kutala etu natukasokoka kushili nakukufwa tahi? Eyo.

7, 8. Uno ndando yakusokola yapwa chuma muka?

⁷ Uno ndando yakusokola yapwa chuma muka? Ndando yakusokola yalumbunukila muvali. Chatete, yapwa ndando navafweta hakusaka kusokola chuma chipwe kuchikindulwisa. Chamuchivali, yapwa ndando yize nayifwika handando yachuma chimwe.

⁸ Kakweshi mutu mwahasa kufweta ndando yakutusokola kuukalu waunene atunehelele Alama omu alingile shili yize yaneha kufwako. Oloze Yehova awahishile jila yakutusokwelamo kushili nakukufwa. Tushimutwile jino omwo yazata ndando yakusokola nomwo yinahase kutunganyalisa.

9. Ndando muka yakusokola yize yasakiwile?

⁹ Etu vatu katweshi kuhasa kufweta ndando yakukindulwisa kuyoya chakukupuka chize ajimbalishile Alamako. Mwomwo ika? Mwomwo tuvosena katwakupukako. (Samu 49:7, 8) Ndando yakusokola yize yasakiwile shina kuyoya chamutu wakukupuka. Shikaho vayivulukila ngwavo “ndando yakulitombola yakusokola.” (WaChimoteu 1, 2:6) Ndando kana yatelele kulitombola nakuyoya chize ajimbalishile Alama.

10. Yehova awahishile ngachilihi ndando yakusokola?

¹⁰ Yehova awahishile ngachilihi ndando yakusokola? Atumine Mwanenyi Yesu uze azanga chikuma kwiza hano hamavu. Ou Mwanenyi ikiye apwile watete kutenga shimbu kanda atenge vyuma vyosena. (WaYowano 1, 4:9, 10) Yesu alisuwile kufuma mwilu nakuseza Ise nakwiza hano hamavu. (Wavaka-Fwilipi 2:7) Yehova anungulwile Yesu uze apwile wakukupuka, wakuzeneka shili kufuma mwilu nakusemukila hano hamavu.—Luka 1:35.

11. Uno mutu umwe nahase ngachilihi kupwa ndando yakusokola vatu vosena?

 ¹¹ Omu Alama alikangile kuli Yehova, ajimbalishile kuyoya chakukupuka chavatu vosena. Uno kwapwile mutu weka ahashile kusokola vana vaAlama vosena kushili nakukufwa tahi? Eyo. (Tanga Wavaka-Loma 5:19.) Yesu uze kapwile nashiliko, ahanyine kuyoya chenyi chakukupuka kupwa ndando yakusokola. (Wavaka-Kolinde 1, 15:45) Echi kuyoya chenyi chakukupuka nachikasokola vana vaAlama kushili nakukufwa.—Wavaka-Kolinde 1, 15:21, 22.

12. Mwomwo ika Yesu ayanjilile?

¹² Mbimbiliya yavuluka vihuli amwene Yesu shimbu kanda afwenga. Vamuvetele vikote, nakumupapalila hachitondo chakuyanjishila, nakumujiha mwamupi. (Yowano 19:1, 16-18, 30) Mwomwo ika Yesu ayanjilile ngana? Mwomwo Satana ambile ngwenyi vatu kaveshi kuhasa kutwalaho lika kupwa vakushishika kuli Kalunga nge vali muvyeseko vyavineneko. Yesu asolwele hatoma nge mutu wakukupuka nahase kutwalaho lika kupwa wakushishika kuli Kalunga numba tuhu mwamona vihuli vyavinene. Tunafwelela chikupu ngwetu Yehova evwile kuwaha hakumona omu Yesu ashishikile.—Vishimo 27:11; tala Chinyikilo chakusongo 15.

13. Uno ndando yakusokola vayifwetele ngachilihi?

¹³ Uno ndando yakusokola vayifwetele ngachilihi? Yesu ahanyine Ise kuyoya chenyi. Halikumbi lyaNyisane 14, 33 C.E., kweseka nakalenda yavaYuleya, Yehova etavishile Yesu vamujihe kuli vaka-kole jenyi. (WavaHepeleu 10:10) Omu mwahichile makumbi atatu, Yehova asangwile Yesu kupwa mutu wakushipilitu. Kahomu Yesu ayile kuli Ise mwilu, ahanyine kuyoya chenyi chakukupuka kuli Yehova kupwa ndando yakusokola. (WavaHepeleu 9:24) Hakuwana nge ndando kana vayifweta lyehi, ngocho vatusokola kushili nakukufwa.—Tanga Wavaka-Loma 3:23, 24.

14, 15. Vyuma muka twatela kulinga numba vatukonekele jishili jetu?

¹⁴ Twaputuka lyehi kunganyala kuwana kanou waunene atuhana Kalunga. Tushimutwile jino vyuma tweji kunganyalanga kuwana kana oholyapwa navize natukanganyala kulutwe.

¹⁵ Navatukonekela jishili jetu. Chapwa chachikalu kulinga vyuma vyakwoloka lwola lwosena. Mwomwo tuvosena tweji kulimbenjanga muhanjikiso namuvyuma tweji kulinganga. (Wavaka-Kolose 1:13, 14) Vyuma muka twatela kulinga numba vatukonekele? Twatela kupihilila nakwalumuka nakulembelela Yehova atukonekele havyuma vyavipi tunalingi. Nge natulinga ngocho, kaha twatela kufwelela ngwetu Kalunga mwatukonekela jishili jetu.—WaYowano 1, 1:8, 9.

16. Chuma muka nachitukafwa tupwenga nachivezu chamwaza?

¹⁶ Natupwa nachivezu chamwaza. Nge tunalingi vyuma vyavipi, chivezu chetu chinahase kutuyanjisa nakushinganyeka ngwetu Kalunga keshi kutukonekelako. Oloze echi kanda nachituzeyesako. Nge natulembelela Yehova atukonekele, kaha twatela kufwelela ngwetu mwatwivwilila nakutukonekela. (WavaHepeleu 9:13, 14) Yehova asaka tumulwezenga ukalu wetu nakuhehela chetu. (WavaHepeleu 4:14-16) Nge natulinga ngocho, kaha natutwama mukuunda naikiye.

17. Vyuma muka vyamwaza natukatambula mwomwo yakutufwila kuli Yesu?

¹⁷ Natupwa nalutalililo lwakukayoya haya myaka yosena. Mbimbiliya yamba ngwayo: “Fweto yashili kufwa, oloze wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.” (Wavaka-Loma 6:23) Kufwa chaYesu nachikatulingisa tukayoye haya myaka yosena nakupwa vakulikangula. (Kusoloka 21:3, 4) Vyuma muka twatela kulinga numba tukalivwise kuwaha vyuma kanevi?

18. Twatachikiza ngachilihi ngwetu Yehova atuzanga?

¹⁸ Achishinganyeke kuwaha weji kwivwanga nge mutu umwe nakuhane wana waulemu. Ndando yakusokola yapwa wana waulemu chikuma hamawana osena atuhana Yehova, ngocho twatela kumusakwilila chikuma hawana kana. Mukanda waYowano 3:16 wamba ngwawo: “Kalunga azangile chikuma kaye ngocho ahanyine Mwanenyi umwe kaha wakulipwila.” Chikupu vene, Yehova atuzanga chikuma hakutuhana Mwanenyi Yesu uze azanga chikuma. Kaha twatachikiza nawa ngwetu Yesu atuzanga mwomwo alisuwile kwiza nakutufwila. (Yowano 15:13) Shikaho wana wandando yakusokola watela kukulingisa ufwelele ngwove Yehova naYesu vakuzanga chikuma.—Wavaka-Ngalesha 2:20.

19, 20. (a) Unahase kupwa ngachilihi usepa lyaYehova? (b) Unahase kusolola ngachilihi ngwove wafwelela ndando yakusokola yaYesu?

¹⁹ Hakuwana nge unatachikiza jino ngwove Kalunga atuzanga chikuma, unahase kupwa ngachilihi usepa lyenyi? Chapwa chachikalu kuzanga mutu uze kawatachikizako. Oloze mukanda waYowano 17:3 wahanjika nge tunahase kutachikiza Yehova. Omu nautwalaho lika kumutachikiza, nauputuka kumuzanga chikuma, nakufwila kumwivwisa kuwaha, nakupwa usepa lyenyi. Ngocho twalaho lika kulinangula Mbimbiliya mangana utachikize Yehova.—WaYowano 1, 5:3.

²⁰ Fwelela ndando yakusokola yaYesu. Mbimbiliya yamba ngwayo “ou mwafwelela Mwana ali nakuyoya chahaya myaka yosena.” (Yowano 3:36) Uno kufwelela Yesu chalumbununa ika? Chalumbununa kulinga vyuma vize Yesu atulweza tulingenga. (Yowano 13:15) Lufwelelo kana katwatela kulinga lwakuhanjika kaha hakanwako. Twatela kusolola muvilinga vyetu ngwetu twafwelela ndando yakusokola.  Mukanda WaYakova 2:26 wahanjika ngwawo: ‘Lufwelelo lwakuzeneka vilinga lunapu lwakufwa.’

21, 22. (a) Mwomwo ika twatela kupwilanga kuchilika chaKwanuka Kufwa chaKulishitu mwaka himwaka? (b) Vyuma muka natushimutwila muKapetulu 6 na 7?

²¹ Pwakonga kuchilika chaKwanuka Kufwa chaKulishitu. Shimbu kanda Yesu afwenga, atulwezele ngwenyi tulingenga chilika chakwanuka kufwa chenyi. Echi chilika vachivuluka ngwavo ‘Kulya chaMwata chaChingoloshi,’ kaha tweji kuchilinganga mwaka himwaka. (Wavaka-Kolinde 1, 11:20; Mateu 26:26-28) Yesu asaka twanukenga ngwetu ahanyine kuyoya chenyi chakukupuka kupwa ndando yakutusokola. Ahanjikile vyachilika kanechi ngwenyi: “Lingenunga lika ngocho mungwanukilengaho ami.” (Tanga Luka 22:19.) Ngocho kupwanga kuchilika chaKwanuka Kufwa chaMwata nachikukafwa wanukenga kulema chandando yakusokola nazangi yayinene atusolwelele Yehova naYesu.—Tala Chinyikilo chakusongo 16.

²² Ndando yakusokola yapwa wana waunene chikuma vatuhana. (Wavaka-Kolinde 2, 9:14, 15) Wana kana naukanganyalisa navatu vavavulu vaze vafwa. Mukapetulu 6 na 7 natushimutwila omwo vafu navakanganyala kuwana kana.