KAPETULU 11
Mwomwo Ika Kuyanda Chinavulila Ngana?
1, 2. Vatu vavavulu veji kuhulisanga vihula muka?
LWOLA lumwe tweji kwivwanga mijimbu ngwavo kuchihela chimwe kunahuhu nyamanganda nakwenyeka membo amavulu, chipwe ngwavo lunga umwe nalozo vatu vapwanga muchachi, kaha vamwe vanalemana, veka vanafu kapatapata. Tweji kwivwanga nawa mijimbu ngwavo pwevo umwe nafu namusongo wakasa nakuseza vana.
2 Nge ukalu wangana unasoloka, vatu vavavulu veji kuhulisanga ngwavo, “Mwomwo ika unasolokela?” Vavavulu veji kuhulisanga ngwavo, Mwomwo ika mukaye munazalila chijindo nakuyanda? Kutala walihulisaho lyehi vihula vyangana tahi?
3, 4. (a) Hambakuke ahulishile vihula muka? (b) Uno Yehova amukumbulwile ngachilihi?
3 Mbimbiliya yatulweza ngwayo navatu vakushikulu vaze vafwelelele chikuma Kalunga vahulishilenga vihula vyangana. Chakutalilaho, kapolofweto Hambakuke ahulishile Yehova ngwenyi: “Ikaze weji kungulingishilanga ngutale vyuma vyavipi? Ikaze weji kwitavishilanga luyanjisa? Ikaze nguli nakumwena lwenyeka naulyanyi? Mwomwo ika vikokojola najindombo vinavulila ngana?”—Hambakuke 1:3.
4 Mukanda waHambakuke 2:2, 3 watulweza omu Kalunga akumbulwile vihula vyaHambakuke nakumufwelelesa ngwenyi mwakakumisa ukalu kana. Yehova azanga chikuma vatu. Mbimbiliya yahanjika ngwayo: “Amizakama.” (WaPetulu 1, 5:7) Kalunga ahunga chikuma kuyanda kuhambakana nomu twachihunga yetu. (Isaya 55:8, 9) Ngocho tushimutwile chihula chakwamba ngwavo, Mwomwo ika kuyanda chinavulila ngana mukaye?
MWOMWO IKA KUYANDA CHINAVULILA NGANA?
5. Vaka-kunangula vamukwitava vavavulu veji kuhanjikanga ika kutalisa kukuyanda? Oloze Mbimbiliya yanangula vyuma muka?
5 Kakavulu vapashita, navapilishitu, navaka-kunangula veka vamukwitava veji kwambanga ngwavo Kalunga ikiye ajina ngwenyi vatu vayandenga. Vamwe veji kwambanga ngwavo ukalu navyuma vyeka vyosena vize vyeji kusolokelanga vatu vavitongola kuli Kalunga, kaha katweshi kuhasa kwivwishisa ovyo eji kulingilanga ngochoko. Veka veji kwambanga ngwavo vatu, kuhakilako vene navanyike vavandende veji kufwanga mangana vayenga nakutwama naKalunga mwilu. Oloze omu keshi mukikoko. Yehova keshi ikiye eji kunehanga vyuma vyavipiko. Mbimbiliya yamba ngwayo: “Nachipwa chakuhenga kuli Kalunga wamuchano kulinga vyuma vyavipi, chipwe ou Wangolo Josena kulinga vyuma vyakuhenga.”—Yopa 34:10.
6. Mwomwo ika vatu vavavulu veji kuhanyinanga Kalunga mulonga hakuyanda chili mukaye?
6 Vatu vavavulu veji kuhananga Kalunga mulonga hakuyanda chili mukaye mwomwo vashinganyeka ngwavo ikiye ali nakuyula kano kaye. Oloze muKapetulu 3, twalinangwile ngwetu Satana Liyavolo ikiye ali nakuyula kano kaye.
7, 8. Mwomwo ika kuyanda chinavulila mukaye?
7 Mbimbiliya yatulweza ngwayo “kaye kosena katwama mumavoko ayauze wakuhuka.” (WaYowano 1, 5:19) Satana uze ali nakuyula kano kaye apwa waukenya. Ali “nakuhungumwisa vatu vosena hamavu.” (Kusoloka 12:9) Kaha vatu vavavulu veji kulondezezanga vilinga vyenyi vyavipi. Echi chikiko chalingisa kaye kazale namakuli, nachijindo, naukenya.
8 Kuli vyuma vikwavo vyalingisa mukaye mupwenga kuyanda. Omu Alama naEve valikangile, vatambwishileko vana vavo shili. Kaha shili yeji kulingisanga vatu vayanjise vakwavo nakulimona kupwa vavalemu shimbu yosena kuhambakana vakwavo. Ngocho veji kuzunganga, nakulwa jita, nakuyanjisa vakwavo. (Muka-kwambulula 4:1; 8:9) Kaha nawa shimbu jimwe vatu veji kuyandanga mwomwo yalwola “navyuma vyakwiza mukukasumuna.” (Muka-kwambulula 9:11) Jiponde navyuma vyeka vyavipi vinahase kusolokela vatu mwomwo yakupwa kuchihela kuze nakusolokela vyuma kana.
9. Mwomwo ika twatela kufwelela ngwetu Yehova akwechi chuma chachilemu etavishila kuyanda chitwaleho lika?
9 Yehova keshi ikiye eji kunehanga kuyandako. Ngocho keshi ikiye eji kunehanga jijita, nauhwanga naluyanjisako. Kaha nawa keshi ikiye eji kunehanga mindenda, nanyamanganda, namavaji mangana vinehe ukalu kuvatuko. Oloze unahase kulihulisa ngwove, ‘Kachi nge Yehova apwa wangolo josena mwilu nahamavu, kaha mwomwo ika eji kwechelelanga ukalu kana usoloke?’ Hakuwana nge twatachikiza ngwetu Kalunga atuzanga chikuma, ngocho kwatwama chuma chimwe chachilemu etavishila kuyanda chitwaleho lika.—WaYowano 1, 4:8.
OVYO KALUNGA ETAVISHILA KUYANDA
10. Uno Satana afumbukilile ngachilihi Yehova?
10 Liyavolo ahungumwishile Alama naEve mumilemba yaEtene. Avangijikilile Kalunga ngwenyi apwa Muka-kuyula wamupi. Ambile ngwenyi Kalunga aswekelele Alama naEve vyuma vimwe vyamwaza. Satana asakile Alama naEve vafwelele ngwavo ikiye nahase kuvayula kanawa kuhambakana Yehova, ngocho kavatelele kupendamina hali Kalungako.—Kuputuka 3:2-5; tala Chinyikilo chakusongo 27.
11. Chihula muka twatela kukumbulula?
11 Alama naEve valikangile kuli Yehova. Vashinganyekele ngwavo vapwile nalisesa lyakulisakwila vavene vyuma vyakwoloka nevi vyakuhenga. Vyuma muka atelele kulinga Yehova mangana asolole nge ava vaka-kulikanga vapihishile, oloze ikiye atachikiza vyuma vize navitunganyalisa?
12, 13. (a) Mwomwo ika Yehova azenekele kujiha vaze vaka-kulikanga hahaze vene? (b) Mwomwo ika Yehova etavishilile Satana ayule kano kaye nakwitavisa nawa vatu valiyule vavene?
12 Yehova kajihile Alama naEve hahaze veneko, oloze avechele vaseme vana. Asakile vana vavo vakalisakwile vavene muka-kuvayula. Yehova ajinyine ngwenyi hamavu hazale navatu vakukupuka, kaha asakile vyuma kana vikatesemo numba tuhu Liyavolo afwililile kumuhonesa.—Kuputuka 1:28; Isaya 55:10, 11.
13 Mayongomena avangelo apwile nakulimwena nameso avo kapu omu Satana afumbukilile Yehova. (Yopa 38:7; Ndanyele 7:10) Ngocho Yehova ahanyine lwola Satana mangana asolole numba nge vyuma ahanjikile vyapwile vyamuchano nyi chiku. Kaha nawa ahanyine vatu lwola vatunge jifulumende javo jize navatwaminyina kuli Satana mangana vamone numba nge vanahase kuliyula kanawa chakuzeneka kuvakafwa kuli Kalunga nyi chiku.
14. Vyuma muka vinasoloka hatoma mwomwo yakwitavisa vatu valiyule vavene?
14 Vatu vaneseka kuliyula vavene hamyaka yayivulu, oloze vanahono. Echi chinasolola hatoma nge Satana apwa muka-makuli. Chikupu vene, vatu vatela kupendamina hali Kalunga. Kapolofweto Yelemiya ahanjikile mwakwoloka hakwamba ngwenyi: “Ove Yehova, ngunatachikiza ngwami mutu katwama nangolo jakusakula jila yenyiko. Mutu katwama nangolo jakulitwaminyina iveneko.”—Yelemiya 10:23.
MWOMWO IKA YEHOVA NETAVISHILA KUYANDA HATANDO YAYISUKU NGANA?
15, 16. (a) Mwomwo ika Yehova netavishila kuyanda hatando yayisuku ngana? (b) Mwomwo ika Yehova nazenekela kukumisa ukalu ali nakuneha Satana?
15 Mwomwo ika Yehova netavishila kuyanda hatando yayisuku ngana? Mwomwo ika nazenekela kukumisa vyuma vyavipi? Munahichi tando yayisuku mangana vatu vamone ngwavo Satana nahono kuyula kanawa. Vatu vanesejeka kutunga jifulumende jakulisezaseza, oloze jinahono kuyula kanawa. Numba tuhu vatu vanazovoloka muvyuma vyasayasi namukutunga makina, oloze vilinga vyakuhengesa chiyulo, nauhutu, nauhwanga, najijita vili nakuvulilako chikuma kuhambakana shimbu yakunyima. Chikupu vene, etu vatu katweshi kuhasa kuliyula etu vavene chakuhona kututwaminyina kuli Kalungako.
16 Yehova kakumishile ukalu uze ali nakuneha Satanako kuchina mwakundwiza chiyulo chaSatana. Kaha nawa nge mwalinga ngocho, vatu navafwelela ngwavo vanahase kuliyula kanawa. Oloze echi chinapu kulyonga. Yehova keshi kuhasa kukundwiza chuma kanako mwomwo keshi kwongako.—WavaHepeleu 6:18.
17, 18. Yehova mwakalinga vyuma muka haukalu wosena uze aneha Satana?
17 Kutala Yehova nahase kuwahisa cheka vyuma vyosena vize vinalyenyeka mwomwo yakulikanga chaSatana navatu tahi? Eyo, mwomwo kuli Kalunga vyuma vyosena vyapwa vyavyashi. Yehova atachikiza lwola luze mwakapayisa Satana havyuma amuvangijikilile. Kufumaho mwakalingisa mavu kupwa palachise ngana muze ajinyine hakavanga. Kaha vosena vaze “vali muvimbumbe” navakasanguka. (Yowano 5:28, 29) Vatu kaveshi kukaviza chipwe kufwako. Yesu mwakakumisa ukalu wosena uze aneha Satana. Yehova mwakazachisa Yesu ‘akenyeke milimo yaLiyavolo.’ (WaYowano 1, 3:8) Yehova alinga kanawa hakututalilila chikoki halwola luno mangana tumutachikize nakumusakula ikiye kupwa Muka-kutuyula. (Tanga WaPetulu 2, 3:9, 10.) Eji kutukafwanga tumike nge tuli muukalu.—Yowano 4:23; tanga Wavaka-Kolinde 1, 10:13.
18 Yehova keshi kutushinjila tumusakule kupwa Muka-kutuyulako. Ahana vatu lisesa lyakulisakwila vyuma vyakulinga. Tushimutwile jino hanganyo yatwama hakupwa nalisesa kana.
NAUZACHISA NGACHILIHI LISESA VAKUHANA LYAKULISAKWILA VYUMA VYAKULINGA?
19. Wana muka wamwaza atuhana Yehova? Kaha mwomwo ika twatela kusakwilila Kalunga hawana kana?
19 Lisesa atuhana Yehova lyakulisakwila vyuma vyakulinga lyatulingisa tulihandunune chikuma natunyama. Tunyama veji kulinganga vyuma chakuhona kushinganyeka, oloze etu vatu tweji kusakulanga jila yakuyoyelamo nakusakula kuzachila Yehova chipwe chiku. (Vishimo 30:24) Kaha nawa katwapwa ngana mwamakina aze vatunga mangana azate kaha milimo yize vawatungilako. Etu tukwechi lisesa lyakulisakwila etu vavene omwo tuli nakusaka kupwa, namasepa vakulikata navo navyuma natusaka kulinga mukuyoya chetu. Chikupu vene, Yehova asaka tulivwise kuwaha kuyoya.
20, 21. Chuma muka chachilemu watela kusakula kulinga oholyapwa?
20 Yehova asaka tumuzange. (Mateu 22:37, 38) Apwa nge chisemi uze mwevwa kuwaha hakwivwa mwanenyi mwahanjika mazu akufuma kumuchima wenyi ngwenyi “Ngwakuzanga,” keshi nge mwomwo yakumushinjilako. Yehova atuhana lisesa lyakusakula kumuzachila chipwe nduma. Satana, naAlama, naEve vasakwile vavene kukana Yehova. Nyi yove nauzachisa ngachilihi lisesa lyove lyakulisakwila vyuma vyakulinga?
21 Zachisa kanawa eli lisesa hakuzachila Yehova. Kuli vatu vavavulu vaze vanasakula kwivwisa Yehova kuwaha nakukana Satana. (Vishimo 27:11) Vyuma muka watela kulinga oholyapwa mangana ukapwe mukaye kakahya omu Kalunga mwakafumisako kuyanda chosena? Kapetulu nakavangizaho mwakumbulula chihula kana.
