1, 2. Masepa jaYehova vamwe vapwile veya?

MUTU muka wasaka kulikwata nenyi usepa? Shina mutu uze wazanga, uze unahase kulivwasana nenyi kanawa kaha nawa uze akwechi vilinga vyamwaza vize vyeji kukwivwisanga kuwaha.

² Yehova eji kusakulanga vatu vamwe kupwa masepa jenyi. Chakutalilaho, Apalahama apwile sepa lyaYehova. (Isaya 41:8; WaYakova 2:23) Yehova azangile nawa Ndavichi. Ambile ngwenyi Ndavichi apwile ‘lunga uze evwililile kuwaha kumuchima.’ (Vilinga 13:22) Kaha nawa kapolofweto Ndanyele apwile mutu ‘wamulemu chikuma’ kuli Yehova.—Ndanyele 9:23.

3. Mwomwo ika Apalahama, naNdavichi, naNdanyele vapwile masepa jaYehova?

³ Vyuma muka vyalingishile Apalahama, naNdavichi, naNdanyele vapwenga masepa jaYehova? Yehova alwezele Apalahama ngwenyi: “Unevwilila mulizu lyami.” (Kuputuka 22:18) Eyo, Yehova eji kulikatanga usepa navatu vaze veji kumwononokanga. Namuyachi wavatu unahase kulikata usepa naikiye. Yehova alwezele muyachi wavaIsalele ngwenyi: “Ivwililenunga mulizu lyami, kahami nangupwa nguKalunga kenu, kahenu nawa namupwa muvatu jami.” (Yelemiya 7:23) Shikaho, nayove watela kwononokanga Yehova numba upwenga usepa lyenyi.

4, 5. Yehova eji kukinganga ngachilihi masepa jenyi?

⁴ Mbimbiliya yamba ngwayo Yehova eji kutondatondanga jijila jakusolwelamo “ngolo jenyi jakukafwa vaze veji kumuzachilanga  namuchima wavo wosena.” (Mijimbu 2, 16:9) Afwelelesa masepa jenyi hali Samu 32:8 ngwenyi: “Nangukuhana kunangakana nakukulweza jila watela kutambukamo. Nangukulweza mangana oku nguli nakukutala.”

⁵ Kwatwama muka-kole wangolo uze asaka kutuhonesa kupwa masepa jaKalunga. Oloze Yehova asaka kutukinga. (Tanga Samu 55:22.) Etu tweji kuzachilanga Yehova namuchima wetu wosena hakupwa tumasepa jenyi. Tweji kumwononokanga numba nge tuli nakumona ukalu waunene. Kaha nawa ngana mwamuka-kwimba jisamu, nayetu twafwelela ngwetu Yehova mwatukafwa. Muka-kwimba jisamu asonekele kutalisa kuli Yehova ngwenyi: “Kaveshi kukangunyikisako mwomwo ali kulivoko lyami lyachilyo.” (Samu 16:8; 63:8) Uno Satana afwila kutuhonesa ngachilihi kupwa masepa jaKalunga?

6. Vyuma muka Satana avangijikilile vatu?

⁶ MuKapetulu 11 twalinangulanga omwo Satana afumbukilile Yehova nakumuvangijikila ngwenyi apwa muka-makuli kaha nawa kazakama vatuko mwomwo ketavishile Alama naEve valisakwile vavene vyuma vyakwoloka nevi vyakuhengako. Mukanda waYopa watunangula ngwawo Satana eji kuvangijikilanga nawa vatu vaze navasaka kupwa masepa jaKalunga. Eji kuhanjikanga ngwenyi vatu veji kuzachilanga Kalunga mwomwo yavyuma vimwe avahana, keshi nge mwomwo yakumuzangako. Satana eji kuhanjikanga nawa ngwenyi nahase kulingisa kala mutu afumbukile Kalunga. Tushimutwile vyuma natulinangula kuli Yopa nomwo Yehova amukingile.

7, 8. (a) Yehova evwile ngachilihi hakushishika chaYopa? (b) Vyuma muka ahanjikile Satana kutalisa kuli Yopa?

⁷ Yopa apwile mutu wangachilihi? Apwile mutu wavilinga vyamwaza uze apwileko myaka kafwe 3,600 kunyima. Yehova ahanjikile ngwenyi halwola kana hamavu kahapwile mutu weka wakufwana nge ikiyeko. Yopa avumbikilenga chikuma Yehova nakuhunga vyuma vyavipi. (Yopa 1:8) Eyo, Yopa apwile sepa lyaYehova wamwenemwene.

 ⁸ Satana ahanjikile ngwenyi Yopa azachililenga Kalunga mwomwo yakumulingila vyuma vyamwaza. Satana ambile kuli Yehova ngwenyi: “Uno kawamukingile nakukinga nawa zuvo yenyi navyuma vyosena ali navyoko numba? Unakisula milimo yamavoko enyi, kaha vimuna jenyi vanavulu chikuma mulifuchi. Oloze acholole livoko lyove, umutambule vyuma vyosena ali navyo, tumone numba nge keshi kukwangula hatomako.”—Yopa 1:10, 11.

9. Yehova etavishile Satana alinge vyuma muka?

⁹ Satana avangijikilile Yopa ngwenyi azachililenga Yehova mwomwo yavyuma vamuhanyine. Ambile nawa ngwenyi nahase kuhonesa Yopa kuzachila Yehova. Yehova ketavilile vyuma ahanjikile Satanako. Chipwe ngocho, amwitavishile amweseke mangana atachikize ngwenyi Yopa apwile sepa lyaKalunga mwomwo yakumuzanga.

10. Vyeseko muka Satana anehelele Yopa, kaha Yopa alingile ngachilihi?

¹⁰ Chatete, Satana evile nakujiha vimuna jaYopa vosena. Ajihile navangamba jaYopa vavavulu. Ngocho vyuma vyaYopa vyosena vyatokele. Kufumaho, Satana ajihile vana vaYopa 10 nanyamanganda. Oloze Yopa apwile lika wakushishika kuli Yehova. Mbimbiliya yamba ngwayo: “Havyuma vyosenevi, Yopa kalingile shiliko, kaha nawa kahanyine Kalunga mulongako.”—Yopa 1:12-19, 22.

11. (a) Chuma muka chikwavo alingile Satana kuli Yopa? (b) Yopa alingile ngachilihi?

¹¹ Satana kakuminyinyine aha kahako. Ambile kuli Kalunga ngwenyi: ‘Kwata havifuwa vyenyi nahanyama yenyi, tumone numba nge keshi kukwangula hatomako.’ Ngocho Satana avetele Yopa namusongo waupi chikuma. (Yopa 2:5, 7) Oloze Yopa apwile lika wakushishika kuli Yehova. Ambile ngwenyi: “Kangweshi kuseza kulonga chamiko palanga nomu nangufwa.”—Yopa 27:5.

12. Uno Yopa asolwele ngachilihi nge Satana apwile muka-makuli?

 ¹² Yopa katachikijile vyuma amuvangijikilile Satana chipwe kutachikiza ovyo apwile nakuyanjilako. Ashinganyekele ngwenyi Yehova ikiye amunehelele ukalu kana. (Yopa 6:4; 16:11-14) Chipwe ngocho, atwalileho lika kupwa wakushishika kuli Yehova. Halwola kana chasolokele jino hatoma nge Yopa kapwile nakuzachila Kalunga mwomwo yavyuma amuhanyineko, oloze apwile sepa lyaKalunga mwomwo yakumuzanga. Vyuma ahanjikile Satana vyapwile vyamakuli.

13. Vyuma muka anganyalile Yopa hakushishika chenyi?

¹³ Numba tuhu Yopa katachikijile vyuma vyapwile nakulingiwa mwiluko, oloze apwile lika wakushishika kuli Kalunga nakusolola Satana kupwa wamupi. Ngocho Yehova akiswile Yopa hakushishika chenyi.—Yopa 42:12-17.

14, 15. Vyuma muka Satana avangijikila vatu vosena, malunga namapwevo?

¹⁴ Unahase kulinangula vyuma vyavilemu kuvyuma vyasolokele kuli Yopa. Makumbi ano, Satana eji kutuvangijikilanga ngwenyi tuli nakuzachila Yehova mwomwo yavyuma eji kutuhananga. Ambile hali Yopa 2:4 ngwenyi: “Vyeshovyo ali navyo mutu mwavihana hamwono wenyi.” Shikaho Satana kavangijikilile Yopa kahako, oloze avangijikilile vatu vosena, mapwevo namalunga ngwenyi veji kuzachilanga Kalunga mwomwo yavyuma vimwe avahana. Kufuma vene halwola afwile Yopa, Satana napunga nakusaula Yehova nakuvangijikila vangamba jenyi. Chakutalilaho, mukanda waVishimo 27:11 wahanjika ngwawo: “Ove mwanami, pwako namangana, ungwivwisenga kumuchima kuwaha, mangana ngumulangulule uze eji kungutombanga.”

¹⁵ Unahase kwononoka Yehova nakupwa usepa lyenyi wakushishika mangana usolole Satana kupwa muka-makuli. Kusakula kupwa usepa lyaKalunga chapwa chachilemu chikuma numba nge kulinga ngocho nachisakiwa kwalumunako  vyuma vimwe vyavinene mukuyoya chove. Satana ahanjika ngwenyi kaweshi kuhasa kupwa uwakushishika kuli Kalunga nge uli muukaluko. Ngocho afwila kutuhungumwisa mangana tuhone kushishika kuli Kalunga. Mujijila muka?

16. (a) Satana eji kuzachisanga jijila muka hakusaka kuhungumwisa vatu vahone kuzachila Yehova? (b) Liyavolo nahase kukuhonesa ngachilihi kuzachila Yehova?

¹⁶ Satana eji kuzachisanga jijila jajivulu mangana atuhonese kupwa masepa jaKalunga. Eji kulukukanga vatu “nge ndumba wakutahwoka, nakutondatonda weshowo mwawana amulye.” (WaPetulu 1, 5:8) Ngocho kanda naulikomokelako nge masepa jove, chipwe vausoko wove, chipwe vatu veka navasaka kukukanyisa kulinangula Mbimbiliya nakulinga vyuma vyakwolokako. Halwola kanelu unahase kwivwa nge vanakulukuka. * (Yowano 15:19, 20) Satana eji kulyalumunanga nawa “kupwa kangelo kamusana.” Ngocho nahase kutuhungumwisa tulikange kuli Yehova. (Wavaka-Kolinde 2, 11:14) Jila yikwavo eji kuzachisanga Satana mangana atuhonese kuzachila Yehova shina kutulingisa tushinganyeke ngwetu katwatamo kuzachila Kalungako.—Vishimo 24:10.

17. Mwomwo ika tweji kwononokelanga Yehova?

¹⁷ Nge natwononoka Yehova, kaha natusolola nge Satana apwa muka-makuli. Vyuma muka navitukafwa twononoke Kalunga? Mbimbiliya yahanjika ngwayo: “Zangenunga Yehova Kalunga kenu namichima yenu yosena, namyono yenu yosena, nangolo jenu josena.” (Lushimbi lwamuchivali 6:5) Twononoka Yehova mwomwo twamuzanga. Nge natuzanga  chikuma Yehova, kaha natufwilanga kulinga vyuma vyosena vize mwatulweza kulinga. Kaposetolo Yowano asonekele ngwenyi: “Kuzanga Kalunga chalumbununa kulamanga jishimbi jenyi, kaha jishimbi jenyi kajapwa nge hichiteliko.”—WaYowano 1, 5:3.

18, 19. (a) Vyuma vimwe muka atulweza Yehova ngwenyi vyavipi? (b) Twatachikiza ngachilihi ngwetu Yehova keshi kutulweza tulinge vyuma vize katweshi kuhasa kulingako?

¹⁸ Vyuma muka atulweza Yehova ngwenyi vyavipi? Vyuma vimwe vanavivuluka mulipwata lyakwamba ngwavo, “ Hunga Vyuma Ahunga Yehova.” Hakavanga, unahase kushinganyeka ngwove vyuma vimwe vili mulipwata kana keshi vyavipi chikumako. Oloze omu nautanga visoneka vanenyikilako nakuhunananaho, naumona jino nganyo yatwama hakukavangiza jishimbi jaYehova. Kahechi nachikulingisa walumuneko vyuma vimwe mukuyoya chove. Numba tuhu lwola lumwe cheji kukaluhwanga kwalumunako vyuma vimwe mukuyoya, oloze  kulinga ngocho nachikukafwa upwenga usepa lyaKalunga wakushishika. Kaha naupwa uwakuunda nakuwahilila. (Isaya 48:17, 18) Uno twatachikiza ngachilihi ngwetu mutu nahase chikupu kwalumunako vyuma vimwe mukuyoya chenyi?

¹⁹ Yehova keshi kutulweza tulinge vyuma vize katweshi kuhasa kulingako. (Lushimbi lwamuchivali 30:11-14) Hakupwa Sepa lyetu wamwenemwene, atutachikiza kanawa kuhambakana nomu twalitachikijila etu vavene. Atachikiza hakumina ngolo jetu. (Samu 103:14) Kaposetolo Paulu atukolezeza ngwenyi: “Kalunga apwa wakushishika, kaha keshi kumyechelela vamyeseke kuhambakana oho hanakumina ngolo jenuko, oloze omu navimiwana vyeseko, mwamisela nawa kuulovokelo mangana muhase kumika.” (Wavaka-Kolinde 1, 10:13) Shikaho twatela kufwelela ngwetu Yehova mwatuhananga ngolo jakutukafwa tulinge vyuma vyakwoloka. Eyo, mwakuhana “ngolo jakuhambakana jize javatu” mangana jikukafwe umike muvyeseko. (Wavaka-Kolinde 2, 4:7) Paulu hakumika muvyeseko vyavivulu ambile  ngwenyi: “Ngunajikiza muvyuma vyosena kuhichila muli ou eji kunguhananga ngolo.”—Wavaka-Fwilipi 4:13.

20. Vilinga muka watela kusolola, kaha mwomwo ika?

²⁰ Nge tuli nakusaka kupwa masepa jaYehova, kaha twatela kulitwamina kulinga vyuma vize Yehova amba ngwenyi vyavipi. Oloze twatela kulinga nawa vyuma vikwavo. (Wavaka-Loma 12:9) Masepa jaKalunga vazanga vyuma vize azanga ikiye. Vyuma kana vavivuluka hali Samu 15:1-5. (Tanga.) Masepa jaYehova veji kusololanga vilinga atwama navyo ikiye vyakufwana nge “zangi, kuwahilila, kuunda, kutalilila chikoki, likoji, kuwaha, lufwelelo, kuvova, namuchima wakulikanyisa.”—Wavaka-Ngalesha 5:22, 23.

21. Vyuma muka navikukafwa upwenga navilinga vize azanga Kalunga?

²¹ Vyuma muka navikukafwa upwenga navilinga kanevi vyamwaza? Watela kulinangula vyuma azanga Yehova hakutanganga Mbimbiliya nakulinangulayo lwola lwosena. (Isaya 30:20, 21) Nge naulinga ngocho, kaha nauzanga chikuma Yehova nakufwila kumwononoka.

22. Vyuma muka naunganyala nge nawononoka Yehova?

²² Kwalumunako vyuma vimwe mukuyoya chove tunahase kuchifwanyisa kukuzula uvwalo wamwaka nakuvwala wauhya. Mbimbiliya yamba ngwayo watela ‘kuzula mutu wamwaka’ nakuvwala “mutu wamuhya.” (Wavaka-Kolose 3:9, 10) Kwalumunako vyuma vimwe mukuyoya chetu chinahase kupwa chachikalu. Oloze Yehova atufwelelesa ngwenyi mwatuhana “fweto yayinene” nge natulinga ngocho nakumwononoka. (Samu 19:11) Shikaho, ononoka Yehova mangana usolole Satana kupwa muka-makuli. Zachila Yehova mwomwo yakumuzanga keshi mwomwo yavyuma vimwe mwakakulingila kulutweko. Echi nachikukafwa upwenga usepa lyaKalunga wamwenemwene.