1-3. Chuma muka chatulingisa twivwenga nge tuli munjele, kaha Yehova mwakatusokola ngachilihi kuchuma kana?

ACHISHINGANYEKE vanakukase munjele hamulonga uze kawalingileko nakukulweza ngwavo mukafwilamo. Naumona chikupu ngwove kaweshi kukalovokamoko. Kaweshi kupwa nalutalililoko kaha nawa kaweshi kuhasa kulinga chuma numba chimweko. Jino nawivwa ngachilihi nge navakulweza ngwavo kuli mutu umwe ali nangolo jakukusokola kaha nawa nashiki ngwenyi mwalinga ngocho?

² Kufwa chatulingisa tuvosena twivwenga nge tuli munjele. Katwahasa kusokoka kukufwako. Oloze Yehova atwama nangolo jakutusokola kukufwa. Kaha atushika ngwenyi “kufwa chize chapwa muka-kole wakukuminyina, navakachifumisako.”—Wavaka-Kolinde 1, 15:26.

³ Achishinganyeke kuwaha nawivwa nge kufwa vanachifumisako! Yehova keshi kukafumisako kufwa kahako, oloze mwakasangula navatu vaze vafwa. Ocho kuwaha kana vayaya! Yehova ashika ngwenyi “vafu” navakayoya cheka. (Isaya 26:19) Echi vachivuluka muMbimbiliya ngwavo kusanguka.

4. (a) Vyuma muka vinahase kutuvendejeka nge kausoko ketu chipwe sepa lyetu nafu? (b) Masepa jaYesu vamwe vapwile veya?

⁴ Cheji kutukolanga chikuma kumuchima nakulishona nge kausoko ketu chipwe sepa lyetu nafu. Tweji kwivwanga namuvifuwa vene keke. Kaha nawa  katwatwama nangolo jakusangula mutu nge nafuko. Oloze Mbimbiliya yeji kutuvendejekanga chikuma. (Tanga Wavaka-Kolinde 2, 1:3, 4.) Tutale chakutalilaho chize chasolola nge Yehova naYesu vafwila chikuma kukasangula vatu twazanga vaze vafwa. Omu Yesu apwile hano hamavu, atambukililenga Lazalu nandumbwenyi Malita naMaliya. Vosena vatatu vapwile masepa jenyi. Mbimbiliya yamba ngwayo: “Yesu azangile Malita nandumbwenyi naLazalu.” Kaha likumbi limwe Lazalu afwile.—Yowano 11:3-5.

5, 6. (a) Yesu alingile ngachilihi omu amwene vausoko namasepa jaLazalu vali nakulishona? (b) Mwomwo ika kutachikiza omwo evwile Yesu kutalisa kukufwa cheji kutuvendejekelanga?

⁵ Yesu ayile nakuvendejeka Malita naMaliya. Omu Malita evwile ngwavo Yesu ali nakwiza, alovokele munganda nakuya nakumusesa. Evwile kuwaha hakumona Yesu, oloze amulwezele ngwenyi: “Kachi wapwanga kuno kachi ndumbwami kafwileko.” Malita ashinganyekele ngwenyi Yesu akotokelele kwiza. Kahomu Yesu amwene Maliya ali nakulishona nakulila, naikiye evwile ushona, kaha alilile. (Yowano 11:21, 33, 35) Yesu evwile chinyengo chize tweji kwivwanga nge tunafwisa mutu twazanga.

⁶ Kutachikiza ngwetu Yesu eji kwivwanga kukola kumuchima nganomu tweji kwivwanga yetu nge tunafwisa cheji kutuvendejekanga. Omu mukiko eji kwivwanga naIse. (Yowano 14:9) Yehova atwama nangolo jakufumisako kufwa haya myaka yosena, kaha kalinwomu alinge ngocho.

7, 8. Mwomwo ika Malita akanyishilile vatu kufumisa lilolwa vambanjikile kuchimbumbe chaLazalu, oloze Yesu alingile vyuma muka?

⁷ Omu Yesu ahetele kuchimbumbe kuze vafunjile Lazalu, awanyine vanambanjikako lilolwa lyalinene. Kaha  ambile ngwenyi: “Fumisenuko eli lilolwa.” Oloze Malita akanyine. Ashinganyekele ngwenyi mujimba waLazalu unapolo lyehi mwomwo watwamine muchimbumbe makumbi awana. (Yowano 11:39) Malita katachikijile vyuma mwalinga Yesu kuli ndumbwenyiko.

⁸ Yesu ambile kuli Lazalu ngwenyi: “Lovokamo!” Kaha Malita naMaliya valikomokelele hakumona vyuma vyasolokele. Vamwene ‘mutu uze apwile wakufwa nalovoka, hanga vamukashilanga kumavoko nakumahinji namahina aze vamujingile.’ (Yowano 11:43, 44) Lazalu vamusangwile, ngocho aliwanyine cheka navausoko namasepa jenyi. Valipakachile nenyi mukasamba nakuhanjika nenyi. Yesu asangwile Lazalu. Chuma kana chakomwesele vatu chikuma.

9, 10. (a) Uno iya ahanyine Yesu ngolo jakusangula vafu? (b) Mwomwo ika mijimbu yavatu vasangwile yapwila yayilemu kuli etu?

⁹ Uno Yesu asangwile vatu mungolo jenyi tahi? Nduma. Shimbu kanda Yesu asangule Lazalu, alombele, kaha Yehova amuhanyine ngolo jakusangula Lazalu. (Tanga Yowano 11:41, 42.) Lazalu keshi ikiye kaha vasangwileko. Mbimbiliya yatulweza vyamwanapwevo wamyaka yakusemuka 12 uze apwile nakuviza chikuma. Yailu alizakaminyine chikuma hali ou mwanenyi umwe kaha lyamunwe, ngocho alembelelele Yesu amuke. Shimbu apwile nakuhanjika naYesu, vatu vamwe vejile nakumulweza ngwavo: “Mwanove nafu lyehi. Nyi ikaze uli nakuyanjishila Muka-kunangula?” Oloze Yesu ambile kuli Yailu ngwenyi: “Kanda nawivwa womako, ijiva kufwelela kaha, mwanove mwahinduka.” Ngocho vayile hamwe kuzuvo yaYailu.  Omu vahetele kwakamwihi nazuvo, Yesu amwene vatu vali nakulila. Ngocho avalwezele ngwenyi: “Holenu, kanda namulilako, mwomwo kafwileko, nasavala kaha tulo.” Visemi jauze mwana atela kavatachikijile omu atalikishile Yesu hakuhanjika mazu kanako. Yesu alwezele vatu vosena valovoke, kaha ayile naise yauze mwana nanaye mukapete apwile uze mwana. Akwachile kulivoko lyauze mwana nakwamba ngwenyi: “Ove mwanapwevo, nangwamba kuli ove ngwami, ‘Katuka!’” Achishinganyeke kuwaha vevwile visemi jauze mwana omu vamumwene nakatuka nakuputuka kutambuka! Eyo, Yesu asangwile uze mwana. (Mako 5:22-24, 35-42; Luka 8:49-56) Kufuma vene halikumbi lize, vasakwilililenga Yehova havyuma avalingilile kuhichila muli Yesu. *

¹⁰ Vatu vaze asangwile Yesu vafwile cheka. Oloze mijimbu kana yapwa yayilemu mwomwo yatuhana lutalililo lwamwenemwene. Yehova afwila kukasangula vafu, kaha mwakalingamo chikupu.

11. Uno mukanda waMuka-kwambulula 9:5 watunangula vyuma muka kutalisa kuvyuma vyasolokele kuli Lazalu?

¹¹ Mbimbiliya yahanjika hatoma ngwayo “vafu kavatachikiza chuma numba chimweko.” Omu mukiko chapwile nakuli Lazalu omu afwile. (Muka-kwambulula 9:5) Ngana muze ahanjikile Yesu, Lazalu apwile kwijiva nge nasavala tulo. (Yowano 11:11) Omu apwile muchimbumbe, katachikijile “chuma numba chimweko.”

12. Twatachikiza ngachilihi ngwetu chikupu vene Lazalu asangukile?

 ¹² Vatu vavavulu valimwenenene nameso avo kapu omu Yesu asangwile Lazalu. Navaka-kole jaYesu vatachikijile ngwavo alingile chuma kanechi chakukomwesa. Lazalu apwile cheka wamutonyi, kahechi chasolwele hatoma nge asangukile. (Yowano 11:47) Vatu vavavulu vayile nakumumona, ngocho vetavilile chikupu ngwavo Yesu vamutumine kuli Kalunga. Oloze vaka-kole jaYesu vevwile kupihya, kaha vatwamine punga Yesu naLazalu mangana vavajihe.—Yowano 11:53; 12:9-11.

13. Vyuma muka navitulingisa tufwelele ngwetu Yehova mwakasangula vafu?

¹³ Yesu ambile ngwenyi “vosena vaze vali muvimbumbe” navakasanguka. (Yowano 5:28) Echi chalumbununa nge Yehova mwakasangula vatu vosena vaze vatwama muvishinganyeka vyenyi. Oloze hakusangula vatu kana, kuvanga akanuke vyuma vyosena hali vakiko. Uno mwakahasa kulinga ngocho tahi? Eyo. Mwilu mwatwama vatanganyika vavavulu, oloze Mbimbiliya yamba ngwayo Yehova avatachikiza vosena halijina halijina. (Tanga Isaya 40:26.) Hakuwana nge Yehova eji kwanukanga majina avatanganyika vosena, ngocho nahase chikupu kwanuka vyuma vyosena hali vatu vosena vaze vafwa nakuvasangula. Kaha nawa Yehova ikiye atengele vyuma vyosena, ngocho akwechi ngolo jakusangula vatu vaze vafwa.

14, 15. Mazu ahanjikile Yopa atunangula vyuma muka kutalisa kukusanguka?

¹⁴ Lunga wakushishika Yopa afwelelele ngwenyi vafu navakasanguka. Ahulishile ngwenyi: “Kachi nge mutu nafu, kutala mwakayoya cheka tahi?” Kaha ambile kuli Yehova ngwenyi: “Naukasanyika, kaha nangukakwitava.  Naukafwila milimo yamavoko ove.” Chikupu vene, Yopa atachikijile ngwenyi Yehova afwila kukasangula vafu.—Yopa 14:13-15.

¹⁵ Uno weji kwivwanga ngachilihi halutalililo lwakusanguka? Unahase kulihulisa ngwove, ‘Kutala vausoko wami namasepa jami vaze vafwa navakiko navakasanguka tahi?’ Kutachikiza ngwetu Yehova afwila chikupu kukasangula vafu cheji kutuvendejekanga. Tushimutwile jino vyuma yahanjika Mbimbiliya kutalisa kuchihela navakatwama vatu vaze navakasanguka navatu muka navakasangula.

16. Chiyoyelo muka navakapwa nacho vaze navakasanguka nakutwama hamavu?

¹⁶ Vatu vaze vasangwile kushikulu vatwaminenga cheka navausoko wavo namasepa javo hano hamavu. Kahomu mukiko nachikapwa nakuli vatu vaze navakasanguka kulutwe, oloze vakiko chiyoyelo chavo nachikawaha chikuma. Mwomwo ika? Mwomwo navakatwama hano hamavu haya myaka yosena chakuzeneka kufwa cheka. Navakatwama mukaye kaze kalihandununa nakaye tuli nakutwamamo makumbi ano. Mukaye kana kamweshi kukapwa jijita, nauhwanga, namisongoko.

17. Veya navakasanguka?

¹⁷ Veya navakasanguka? Yesu ambile ngwenyi “vosena vaze vali muvimbumbe navakevwa lizu lyenyi nakulovokamo.” (Yowano 5:28, 29) Mukanda waKusoloka 20:13 watulweza nawa ngwawo: “Kalungalwiji echele vafu vaze vapwilemo, nakufwa naFuka nawa vyechele vafu vaze vapwilemo.” Eyo, mayevuyevu avatu nawakasanguka. Kaha nawa kaposetolo Paulu ambile ngwenyi ‘vaka-kwoloka navaka-kuhenga’ navakasanguka. (Tanga Vilinga 24:15.) Uno echi chalumbununa ika?

18. Veya vatwama hali ‘vaka-kwoloka’ vaze navakasanguka?

 ¹⁸ Hali ava ‘vaka-kwoloka’ nahakapwa navangamba jaYehova vakushishika vaze vayoyele shimbu kanda Yesu ezenga hano hamavu. Vatu vakufwana nge Nowa, naApalahama, naSala, naMose, naLute, naEseta navakasanguka nakutwama hano hamavu. Unahase kutanga mijimbu yavatu kana mumukanda WavaHepeleu kapetulu 11.  Nyi ngachilihi vangamba jaYehova vakushishika vaze vali nakufwa makumbi ano? Navakiko vapwa ‘vaka-kwoloka,’ ngocho navakasanguka.

19. Veya vapwa ‘vaka-kuhenga’? Kaha Yehova mwakavahana lwola lwakukalinga ika?

¹⁹ ‘Vaka-kuhenga’ vapwa vatu vaze vafwile chakuzeneka kutachikiza Yehova. Numba tuhu vafwa, oloze Kalunga kavavulyamako. Mwakavasangula nakuvahana lwola lwakukalinangula vyaikiye nakumuzachila.

20. Mwomwo ika vatu vamwe kaveshi kukasangukilako?

²⁰ Uno echi chalumbununa nge vafu vosena navakasanguka tahi? Nduma. Yesu ambile ngwenyi vatu vamwe kaveshi kukasangukako. (Luka 12:5) Iya mwakasakula vatu vaze vatela kukasanguka navaze kavatela kukasangukako? Yehova ikiye Muka-kusopesa wakulitulaho, oloze ahana nawa Yesu ngolo ‘jakusopesa vavatonyi navafu.’ (Vilinga 10:42) Weshowo vanamono kupwa wakuhuka uze kasaka kupihilila nakwalumukako, kaveshi kukamusangulako.—Tala Chinyikilo chakusongo 19.

21, 22. (a) Mijimba muka navakasanguka nayo vaze navakaya mwilu? (b) Iya apwile watete kusanguka nakuya mwilu?

²¹ Mbimbiliya yatulweza nawa ngwayo vatu vamwe navakayoyela mwilu. Vatu vaze navakasangula nakuya mwilu, kaveshi kukasanguka namijimba yautuko. Oloze navakasanguka namijimba yakushipilitu nakukayoyela mwilu.

²² Yesu ikiye apwile watete kusanguka mujila kaneyi. (Yowano 3:13) Omu mwahichile makumbi atatu kufuma hakumujiha, Yehova amusangwile. (Samu 16:10; Vilinga 13:34, 35) Yesu kasangukile namujimba wautuko. Kaposetolo Petulu alumbunwine ngwenyi Yesu “vamujihile kumujimba, oloze vamuyoyesele kushipilitu.”  (WaPetulu 1, 3:18) Yesu vamusangwile nakupwa mutu wangolo wakushipilitu. (Wavaka-Kolinde 1, 15:3-6) Oloze Mbimbiliya yavuluka ngwayo kusanguka kana kachakuminyinyine hali ikiye kahako.

23, 24. Veya vapwa “utanga wamikoko waundende” uze avulukile Yesu, kaha vapwa vangahi?

²³ Shimbu kanda Yesu afwenga, alwezele tumbaji twenyi vakushishika ngwenyi: “Nguli nakuya nakumiwahishila chihela chenu.” (Yowano 14:2) Echi chalumbununa nge vaka-kumukavangiza vamwe navakasanguka nakutwama nenyi hamwe mwilu. Uno vangahi navakasanguka nakuya mwilu? Yesu ambile ngwenyi navakapwa vavandende kaha, chipwe ngwetu “utanga wamikoko waundende.” (Luka 12:32) Kaposetolo Yowano avulukile kuvula chavatu kana omu amwene Yesu “nemana haPili yaZeyone [yamwilu], apwile navatu 144,000.”—Kusoloka 14:1.

²⁴ Ava vaka-Kulishitu 144,000 vaputukile kusanguka lwola muka? Mbimbiliya yatulweza ngwayo vaputukile kusanguka kufuma halwola luze Kulishitu aputukile kuyula mwilu. (Wavaka-Kolinde 1, 15:23) Tuli nakuyoyela mulwola kana, kaha ava 144,000 vavavulu vasanguka lyehi nakuya mwilu. Vaze vasalaho hali ava 144,000 vaze vali nakufwa makumbi ano, veji kusangukanga hahaze vene nakuya mwilu. Oloze vatu vamuchivulu navakavasangula kulutwe nakutwama muPalachise hano hamavu.

25. Vyuma muka natulinangula mukapetulu nakavangizaho?

²⁵ Kalinwomu Yehova asokole vatu kukufwa, kaha kufwa navakachifumisako haya myaka yosena. (Tanga Isaya 25:8.) Jino milimo muka navakazata vaze navakaya mwilu? Mbimbiliya yalumbununa nge navakayula hamwe naYesu muWangana wamwilu. Natulinangula vyavivulu haWangana kana mukapetulu nakavangizaho.