1. Mwomwo ika twatela kutachikijila vangelo?

YEHOVA asaka tutachikize tanga yenyi. Kaha vangelo vatwama mutanga yaKalunga. Vavavuluka muMbimbiliya ngwavo “vana vaKalunga.” (Yopa 38:7) Uno vangelo veji kulinganga vyuma muka? Vakafwilenga ngachilihi vatu kushikulu? Kutala nayetu makumbi ano vanahase kutukafwa tahi?—Tala Chinyikilo chakusongo 8.

2. Uno vangelo vafuma kulihi? Kaha Kalunga atengele vangelo vangahi?

² Twatela kutachikiza okwo vafuma vangelo. Mukanda Wavaka-Kolose 1:16 watulweza ngwawo omu Yehova alingile natenge lyehi Yesu, ‘atengele vyuma vyeka vyosena vyamwilu navyahamavu.’ Havyuma kanevi atengele hapwile navangelo. Uno Kalunga atengele vangelo vangahi? Mbimbiliya yahanjika ngwayo mwilu mwatwama mayongomena namayongomena avangelo.—Samu 103:20; Kusoloka 5:11.

3. Mukanda waYopa 38:4-7 watulweza ika hali vangelo?

³ Mbimbiliya yatunangula nawa ngwayo Yehova avangilile kutenga vangelo shimbu kanda atenge mavu. Uno vangelo vevwile ngachilihi hakumona mavu? Mukanda waYopa watulweza ngwawo vawahililile. Vapwile mutanga yakulinunga yize yazachililenga Yehova hamwe.—Yopa 38:4-7.

4. Twatachikiza ngachilihi ngwetu vangelo veji kwivwilanga kuwaha vatu?

⁴ Kufuma vene kushikulu, vangelo vanevwilanga kuwaha vatu navyuma ajinyine Yehova hakutenga mavu navatu. (Vishimo 8:30, 31; WaPetulu 1, 1:11, 12) Atela vevwile  kupihya omu Alama naEve valikangile. Kaha nawa atela veji kwivwanga kupihya chikuma makumbi ano hakumona vatu vavavulu vali nakulikanga kuli Yehova. Oloze vangelo veji kuwahililanga nge vanamono mutu umwe napihilila nakwalumuka nakukinduluka kuli Yehova. (Luka 15:10) Veji kwivwilanga kuwaha vatu vaze veji kuzachilanga Kalunga. Yehova eji kuvazachisanga vakafwe vangamba jenyi hano hamavu nakuvakinga. (WavaHepeleu 1:7, 14) Tutale havyakutalilaho vimwe.

5. Vangelo vakafwilenga ngachilihi vangamba jaKalunga kushikulu?

 ⁵ Shimbu kanda Yehova anongese nganda yaSotome naNgomola, atumine vangelo vavali vakafwe Lote natanga yenyi vafume mujinganda kana. (Kuputuka 19:15, 16) Kahomu mwahichile myaka yayivulu kufuma halwola kana, kapolofweto Ndanyele vamumbilile muwina wavandumba, oloze kavamulileko mwomwo ‘Kalunga atumine kangelo kenyi nakusoka kutunwa twavandumba.’ (Ndanyele 6:22) Kaha nawa omu kaposetolo Petulu vamukashile mukamenga, Yehova atumine kangelo amufumisemo. (Vilinga 12:6-11) Vangelo vakafwilenga nawa Yesu omu apwile hano hamavu. Chakutalilaho, kufuma hakumumbapachisa, “vangelo vapwile nakumuzachila.” (Mako 1:13) Kaha nawa shimbu kanda Yesu vamujihe, kangelo “amukolezezele.”—Luka 22:43.

6. (a) Twatachikiza ngachilihi ngwetu vangelo veji kukafwanga vatu jaKalunga makumbi ano? (b) Vihula muka natukumbulula?

⁶ Makumbi ano, vangelo kaveshi kusoloka kuvatuko. Oloze Kalunga achili lika nakuvazachisa vakafwe vangamba jenyi. Mbimbiliya yamba ngwayo: “Kangelo kaYehova eji kulamanga vaze vevwa Kalunga woma, kaha eji kuvapulululanga.” (Samu 34:7) Mwomwo ika twasakiwila kutukinga? Mwomwo twatwama navaka-kole vangolo vaze vasaka kutulemeka. Uno ava vaka-kole vapwa veya? Kaha vafuma kulihi? Uno vanahase kutulemeka ngachilihi? Hakusaka tukumbulule vihula kanevi, tuchikekese vyuma vyasolokele kufuma hakutenga Alama naEve.

7. Vyuma muka vanalingi vatu vavavulu hakuvonga kuli Satana?

⁷ MuKapetulu 3, twalinangwile omwo kangelo umwe alikangile kuli Kalunga nakufwila kuyula. Ou kangelo vamuvuluka muMbimbiliya ngwavo Satana Liyavolo. (Kusoloka 12:9) Satana asakile navakwavo valikange kuli Kalunga. Ngocho ongele Eve, kaha kufuma vene haze nongonga  vatu vavavulu valikange. Oloze vatu vamwe vakufwana nge Avele, naEnoke, naNowa vapwile lika vakushishika kuli Yehova.—WavaHepeleu 11:4, 5, 7.

8. (a) Vangelo vamwe vapwile ngachilihi vandemone? (b) Uno vaze vandemone vayovokele ngachilihi kuLivaji?

⁸ Mumakumbi aNowa, vangelo vamwe valikangile kuli Yehova nakuseza limbo lyavo mwilu nakwiza nakutwama mwavatu hano hamavu. Mwomwo ika? Mbimbiliya yatulweza ngwayo vasakile kumbata mapwevo. (Tanga Kuputuka 6:2.) Oloze chapwile chakuhenga vangelo kulinga chuma kana. (WaYuta 6) Ngocho vatu vavavulu hamavu halwola kana vapwile navilinga vyavipi, vyaulyanyi ngana muze vapwile vaze vangelo vakuhuka. Kaha Yehova anehele livaji hamavu hosena nakunongesa vatu vavapi. Oloze ayowele vangamba jenyi vakushishika. (Kuputuka 7:17, 23) Vaze vangelo vakuhuka vakindulukile mwilu. Kaha vavavuluka muMbimbiliya ngwavo vandemone. Vakundwijile Satana Liyavolo muka-kulikanga, kaha aputukile jino kuvayula.—Mateu 9:34.

9. (a) Vyuma muka vyasolokele kuli vandemone omu vakindulukile mwilu? (b) Vyuma muka natushimutwila?

⁹ Hakuwana nge vaze vandemone valikangile, ngocho Yehova kavetavilile vapwenga cheka mutanga yenyiko. (WaPetulu 2, 2:4) Numba tuhu vandemone kavahasa cheka kulyalumuna nakupwa vatu, oloze vachili lika “nakuhungumwisa vatu vosena hamavu.” (Kusoloka 12:9; WaYowano 1, 5:19) Tushimutwile jino hajijila jize vandemone veji kwongelangamo vatu vavavulu chipwe kuvahungumwisa.—Tanga Wavaka-Kolinde 2, 2:11.

10. Uno vandemone veji kwonganga ngachilihi vatu?

¹⁰ Vandemone veji kwonganga vatu mujijila jajivulu. Vatu veji kulivwasananga navandemone hatoma chipwe  kuhichila muli vatu veka vakufwana nge vaka-kutahisa jingombo chipwe vaka-kulinga visava. Kulivwasana navandemone chapwa kupanda. Oloze Mbimbiliya yatulweza tulihende kukala chuma chakupandama kuvandemone. (Wavaka-Ngalesha 5:19-21) Mwomwo ika? Ngana muze chinyanga eji kuzachisanga miheto mangana ozenga tunyama, navandemone nawa veji kuzachisanga tufuta mangana vozenga vatu nakuvafungulula.—Tala Chinyikilo chakusongo 26.

11. Kutaha chapwa chika, kaha mwomwo ika twatela kulihendako?

¹¹ Jila yimwe veji kuzachisanga hakwonga vatu shina kutaha jingombo. Kutaha chapwa kuzachisa ngolo javandemone hakusaka kutachikiza vyuma vize kavatachikiza vatuko. Vatu veji kuyanga nakutaha nge vanafwisa kausoko kavo, chipwe nge vali nakuviza, chipwe nge vanavevi vyuma, chipwe nge vanavasumu uloji. Vatu vavavulu vashinganyeka ngwavo kutaha jingombo kachapwa shiliko. Oloze Mbimbiliya yatulweza ngwayo Yehova akanyisa vatu jenyi kutaha jingombo.—Tanga Lushimbi lwamuchivali 18:14.

12. (a) Mwomwo ika chapwila chaponde kuhanjika navafu? (b) Mwomwo ika vangamba jaKalunga kavatela kwazana muvilika vyavandemoneko?

¹² Vandemone veji kuzachisanga jila yikwavo hakwonga vatu. Vasaka tufwelele ngwetu tunahase kuhanjika navafu, nakufwelela nawa ngwetu vatu vaze vafwa vali nakuyoyela kuchihela cheka, ngocho vanahase kuhanjika nayetu chipwe kutulemeka. Chakutalilaho, mutu uze nafwisa sepa lyenyi chipwe kausoko kenyi nahase kuya kuli muka-kutahisa uze mwamulweza ngwenyi nahase kuhanjika namutu uze nafu. Ou muka-kutahisa nahase kukunyula uze mutu hakumulweza vyuma vimwe hali uze sepa lyenyi chipwe kausoko kenyi nafu nakulondezeza lizu lyauze mutu wakufwa. (Samwele 1, 28:3-19) Vilika vyavivulu veji kulinganga nawa havipeji vyafuma hakunangula chakwamba ngwavo vafu  veji kupwanga kuchihela cheka nakutwalaho lika kuyoya. Vatu veji kulyanga nakunwa nakwimba myaso hachipeji, nakulinga viwanyino vyakwanuka likumbi afwile mutu, nakukombelela vakulu, nakuka mutu uze ali namukulu nakunyingama ufuku wosena hachipeji. Omu vaka-Kulishitu veji kukananga kwazana muvilika kana, vausoko wavo navatu vamuchitungilo veji kuvafwefululanga nakuvatukana chipwe kuvahunga. Oloze vaka-Kulishitu vatachikiza ngwavo vafu kaveshi nakuyoyela kuchihela chekako. Katweshi kuhasa kuhanjika navoko kaha nawa kaveshi kuhasa kutulemekako. (Samu 115:17) Shikaho watela kuzangama. Kanda naweseka kulivwasana navafu chipwe navandemoneko. Kaha nawa kanda kwazana muvilika vyavandemoneko.—Tanga Lushimbi lwamuchivali 18:10, 11; Isaya 8:19.

13. Vatu vavavulu vaze vevwilenga vandemone woma vanalitwamina kulinga ika?

¹³ Vandemone kaveshi kwonga kahako, oloze veji kwivwisanga nawa vatu woma. Makumbi ano, Satana navandemone jenyi vanatachikiza ngwavo vali kaha “nakashimbu kakandende,” Kalunga mwavafumisa hano hamavu, ngocho vanapihilila nakukenyuka chikuma. (Kusoloka 12:12, 17) Chipwe ngocho, vatu vavavulu vaze vevwilenga woma vandemone kushimbu yakunyima kaveshi nakuvevwa cheka womako. Vyuma muka vinavakafwe valitwamine kuvevwa woma?

14. Uno tunahase kulihenda ngachilihi kuli vandemone ngana muze valingile vaka-Kulishitu vamulikulukaji lyamyaka lyakulivanga?

¹⁴ Mbimbiliya yatulweza mwakukanyina vandemone navyuma twatela kulinga mangana tulihende kuli vakiko. Chakutalilaho, vatu vamwe munganda yaEfwesu valivwasanyinenga navandemone shimbu kanda valinangule muchano. Vyuma muka valingile numba valihende  kuvandemone? Mbimbiliya yamba ngwayo: “Vavavulu vaze valingilenga visava vanehele mikanda yavo hamwe nakuyochela kumeso avatu vosena.” (Vilinga 19:19) Vochele eyi mikanda yavo yavisava yosena mwomwo vasakile kupwa vaka-Kulishitu. Omu mukiko vatela kulinga navatu vaze navasaka kupwa vaka-Kulishitu makumbi ano. Vosena vaze vali nakusaka kuzachila Yehova vatela kumbila vyuma vyosena vyapandama kuvandemone. Vyuma kana shina mikanda, najimangazini, najivindiyo, namyaso, namapapilo akulamika hajimbango navyuma vyeka vyakuhemesa vize vyakundwiza visava navilinga vyeka vyavandemone nakuvilingisa visoloke nge vyakuhemesa kaha nawa nge kavyeshi kulemeka vatuko. Katwatela nawa kuvwala mikalo yize veji kuvwalanga vatu mangana yivakinge kuvyuma vyavipiko.—Wavaka-Kolinde 1, 10:21.

15. Vyuma muka vikwavo twatela kulinga mangana tuhonese Satana navandemone jenyi?

¹⁵ Omu mwahichile myaka kufuma haze vatu vamuEfwesu vochele mikanda yavo yavisava, kaposetolo Paulu asonekele ngwenyi vapwile lika ‘nakulipika namazavu avashipilitu vakuhuka.’ (Wavaka-Efwesu 6:12) Numba tuhu vochele mikanda yavo, oloze vandemone vapwile lika nakusaka kuvalemeka. Vyuma muka vikwavo vatelele kulinga? Paulu avalwezele ngwenyi: “Mbatenu kepwe yayinene yalufwelelo, yize namuhasa kujimisa [chipwe, kuhonesa] mivwi yakakahya yosena yayauze wakuhuka.” (Wavaka-Efwesu 6:16) Lufwelelo lwetu lunahase kutukinga ngana muze kepwe yeji kukinganga liswalale mujita. Ngocho nge natufwelela ngwetu Yehova nahase kutukinga chikupu, kaha natuhonesa Satana navandemone jenyi.—Mateu 17:20.

16. Tunahase kuzamisa ngachilihi lufwelelo lwetu muli Yehova?

¹⁶ Tunahase kuzamisa ngachilihi lufwelelo lwetu muli Yehova? Twatela kutanganga Mbimbiliya hakumbi hakumbi nakupendamina hali ikiye atukinge. Nge natufwelela  chikuma Yehova, kaha Satana navandemone jenyi kaveshi kuhasa kutulemekako.—WaYowano 1, 5:5.

17. Vyuma vyeka muka twatela kulinga mangana tulikinge kuvandemone?

¹⁷ Hakuwana nge vaka-Kulishitu vamuEfwesu vatwaminenga munganda yize yazalile navilinga vyavandemone, ngocho vyuma vyeka muka vatelele kulinga? Paulu avalwezele ngwenyi: “Lwola lwosena lombenunga.” (Wavaka-Efwesu 6:18) Vatelele kulomba kuli Yehova avakinge lwola lwosena. Nyi ngachilihi yetu? Hakuwana nge nayetu twatwama mukaye kaze kanazale navilinga vyavandemone, ngocho twatela kulomba kuli Yehova atukinge. Kaha twatela kuzachisa lijina lyenyi hakulomba. (Tanga Vishimo 18:10.) Yehova mwatukinga kuli Satana nge natutwalaho lika kulomba kuli ikiye.—Samu 145:19; Mateu 6:13.

18, 19. (a) Uno tunahase kufungulula ngachilihi Satana navandemone? (b) Chihula muka navakumbulula mukapetulu nakavangizaho?

¹⁸ Kachi nge natumbila vyuma vyosena vyapandama kuvandemone nakufwelela ngwetu Yehova mwatukinga, kaha tunahase kuhonesa Satana navandemone jenyi. Katwatela kuvevwa womako. (Tanga WaYakova 4:7, 8.) Yehova atwama nangolo chikuma kuhambakana vandemone. Mumakumbi aNowa avazangamishile, kaha kulutwe nawa mwakavanongesa. (WaYuta 6) Anuka ngwove katweshi nakulwa jita kaneyi uka wetuko. Yehova ali nakuzachisa vangelo jenyi vatukinge. (Vamyangana 2, 6:15-17) Ngocho twatela kufwelela chikupu ngwetu Yehova mwatukafwa tufungulule Satana navandemone.—WaPetulu 1, 5:6, 7; WaPetulu 2, 2:9.

¹⁹ Jino hakuwana nge Satana navandemone vali nakuneha vihuli muno mukaye, mwomwo ika Kalunga azenekela kuvanongesa noholyapwa? Chihula kana navachikumbulula mukapetulu nakavangizaho.