KAPETULU 3
Vyuma Muka Ajinyine Kalunga Hakutenga Vatu?
1. Vyuma muka ajinyine Kalunga hakutenga vatu?
KALUNGA ajinyine vyuma vyamwaza hakutenga vatu. Atengele valunga napwevo vatete, Alama naEve mangana vatwamenga mumilemba yamwaza. Ajinyine ngwenyi vakaseme vana, nakulingisa hamavu hosena kupwa palachise, nakulama nawa tunyama.—Kuputuka 1:28; 2:8, 9, 15; tala Chinyikilo chakusongo 6.
2. (a) Twatachikiza ngachilihi ngwetu Kalunga mwakalinga vyuma ajinyine? (b) Vatu muka asaka Kalunga vatwamenga hamavu, kaha asaka vatwamengaho myaka yingahi?
2 Uno unashinganyeka ngwove kulutwe natukatwama mupalachise tahi? Yehova atulweza ngwenyi: “Ngunachijinyi lyehi, kaha nangukachilinga.” (Isaya 46:9-11; 55:11) Chikupu vene, Kalunga mwakalinga vyuma ajinyine, kaha kakweshi chuma chimwe nachikamuhonesako. Yehova ahanjika ngwenyi ‘katengele mavu chawanako,’ oloze awatengele hapwenga vyuma vimwe. (Isaya 45:18) Asaka hatwamenga vatu. Uno vatu muka asaka Kalunga vatwamenga hamavu, kaha asaka vatwamengaho myaka yingahi? Mbimbiliya yamba ngwayo: “Vaka-kwoloka [chipwe vaka-kwononoka] navakaheta mavu, kaha navakatwamangaho haya myaka yosena.”—Samu 37:29; Kusoloka 21:3, 4.
3. Chihula muka unahase kuhulisa kutalisa kukuviza nakufwa?
3 Makumbi ano, vatu veji kuvizanga nakufwa, kaha kuvihela vyavivulu nawa vatu veji kulizungisanga nakulijiha. Oloze Kalunga kajinyine ngwenyi vyuma kana visolokengako. Jino vyuma kana vyeza ngachilihi, kaha mwomwo ika? Mbimbiliya yikiko kaha yalumbununa vyuma vyasolokele.
MUKA-KOLE WAKALUNGA
4, 5. (a) Iya ahanjikile naEve kuhichila muli linoka mumilemba yaEtene? (b) Uno mutu wakashishi eji kupwanga ngachilihi mwiji?
4 Mbimbiliya yatulweza ngwayo Kalunga atwama namuka-kole “uze vavuluka ngwavo Liyavolo kaha nawa Satana.” Satana azachishile linoka hakuhanjika naEve mumilemba yaEtene. (Kusoloka 12:9; Kuputuka 3:1) Ngocho Eve afwelelele ngwenyi linoka yikiye apwile nakuhanjika.—Tala Chinyikilo chakusongo 7.
5 Uno Kalunga ikiye atengele Satana Liyavolo tahi? Nduma. Kangelo umwe ikiye alumukile nakupwa Liyavolo. Ou Kangelo apwilenga mwilu omu Kalunga apwile nakuwahisa mavu mangana hatwame Alama naEve. (Yopa 38:4, 7) Uno chapwile ngachilihi ngocho? Uno mutu wakashishi eji kupwanga ngachilihi mwiji? Mutu kana kasemukile nawijiko. Oloze eji kuputukanga kufwila vyuma vize kavyapwa vyenyiko. Eji kutwalaho lika kushinganyeka vyuma kana nakufwila kuvimbata. Kutwala muze, himweva vyuma kana nakupwa jino mwiji.—Tanga WaYakova 1:13-15; tala Chinyikilo chakusongo 8.
6. Uno kangelo umwe apwile ngachilihi muka-kole waKalunga?
6 Omu mukiko chapwile nakuli ou kangelo. Omu Yehova atengele Alama naEve, avalwezele vaseme vana ‘nakuzalisa hamavu.’ (Kuputuka 1:27, 28) Pamo ou kangelo ashinganyekele ngwenyi, ‘Vatu vosena vatelanga kulemesa yami muchishishisa chakulemesa Yehova.’ Ngocho kushinganyeka chikuma havyuma kana chamulingishile afwile vyuma vyambala vyaYehova. Asakile vatu valemesenga ikiye. Kutwala muze, ongele Eve nakumuhungumwisa. (Tanga Kuputuka 3:1-5.) Kaha apwile jino Satana Liyavolo uze apwa muka-kole waKalunga.
7. (a) Mwomwo ika Alama naEve vafwililile? (b) Mwomwo ika tweji kushinakajiwilanga nakufwa?
7 Alama naEve valikangile kuli Kalunga hakulya kumutondo uze vavakanyishile. (Kuputuka 2:17; 3:6) Ngocho valingile shili, kaha kutwala muze vafwile ngana muze avalwezele Yehova. (Kuputuka 3:17-19) Vana vaAlama naEve navakiko vapwile nashili, ngocho vafwile. (Tanga Wavaka-Loma 5:12.) Tutale chakutalilaho chize nachitukafwa tutachikize ovyo vyalingishile vana vaAlama naEve vapwenga nashili. Achishinganyeke nge nawocha mbolo hachikango chize chinambokama. Yize mbolo nawocha nayikiko nayipwa yakumbokama. Chochimwe nawa, omu Alama alikangile kuli Kalunga apwile muka-shili. Kaha hakuwana nge twapwa tuvana vaAlama, tuvosena twapwa tuvaka-shili chipwe ngwetu twatambula lipenga kuli ikiye. Shikaho tweji kulingilanga shili nakushinakajiwa nakufwa.—Wavaka-Loma 3:23; tala Chinyikilo chakusongo 9.
8, 9. (a) Satana asakile Alama naEve vafwelele vyuma muka? (b) Mwomwo ika Yehova azenekelele kujiha vaze vaka-kulikanga hahaze vene?
8 Satana aputukile kulikanga kuli Yehova omu ahungumwishile Alama naEve valikange kuli Kalunga. Satana asakile Alama naEve vafwelele ngwavo Yehova apwa muka-kwonga kaha nawa muka-kuyula wamupi uze avaminyine vyuma vyamwaza. Ambile ngwenyi vatu kavatela kupendamina hali Kalunga avalweze vyakulingako. Ambile nawa ngwenyi Alama naEve vapwile nalisesa lyakulisakwila vavene vyuma vyamwaza navyevi vyavipi. Yehova alingile ngachilihi hakumuvangijikila vyuma kana? Kachi ajihile vaze vaka-kulikanga hahaze vene. Oloze kulinga chuma kana kachi kachasolwele Satana kupwa muka-kwongako.
9 Yehova kajihile vaze vaka-kulikanga hahaze veneko. Oloze etavishile vatu valiyule vavene hatando yimwe. Echi chakafwa vatu vatachikize chikupu ngwavo Satana apwa muka-kwonga. Chavakafwa nawa vejive ngwavo Yehova atachikiza kanawa vyuma vyamwaza vyasakiwa kuvatu. Natukalinangula vyavivulu muKapetulu 11. Jino chuma valingile vaAlama naEve wachimona ngachilihi? Kutala valingile mwakwoloka hakwitavila Satana nakulikanga kuli Kalunga tahi? Yehova ahanyine Alama naEve vyuma vyosena vyasakiwile mukuyoya chavo. Avahanyine kuyoya chakukupuka, namilemba yamwaza, namilimo yamwaza. Oloze Satana kavalingililile chuma chamwaza numba chimweko. Uno nge wapwile yove, kachi walingile ngachilihi?
10. Lisesa muka twatwama nalyo tuvosena?
10 Makumbi ano, tuvosena tukwechi lisesa lyakulisakwila kwononoka Yehova kupwa Muka-kutuyula nakusolola Satana kupwa muka-kwonga chipwe kusakula Satana kupwa muka-kutuyula. Kaha kuyoya chetu chapendamina havyuma natusakula. (Samu 73:28; tanga Vishimo 27:11.) Muno mukaye muli vatu vavandende kaha vaze vasaka kwononoka Kalunga. Kaha Kalunga keshi ikiye ali nakuyula kano kayeko. Jino kachi nge Kalunga keshi ikiye ali nakuyula kano kayeko, kaha iya ali nakukayula?
IYA ALI NAKUYULA KANO KAYE?
Nge aze mawangana akaye osena kawapwile aSatanako, kutala kachi alwezele Yesu ngwenyi mwamuhanawo?
11, 12. (a) Vyuma muka natulinangula hamawangana aze Satana asakile kuhana Yesu? (b) Visoneka muka vyasolola nge Satana ikiye ali nakuyula kano kaye?
11 Yesu atachikijile chikupu ou eji kuyulanga kano kaye. Likumbi limwe Satana alwekesele Yesu “mawangana osena akaye naupahu wawo.” Kufumaho afwelelesele Yesu ngwenyi: “Nangukuhana vyosena evi nge naungufukamina nakulifukula kuli ami.” (Mateu 4:8, 9; Luka 4:5, 6) Lihulise ngwove, ‘Nge aze mawangana kawapwile aSatanako, kutala kachi alwezele Yesu ngwenyi mwamuhanawo?’ Nduma. Chikupu vene jifulumende jahamavu josena japwa jaSatana.
12 Unahase kuhulisa ngwove: ‘Satana nahase kupwa ngachilihi muka-kuyula kano kaye okunyi Yehova Kalunga Wangolo Josena ikiye atengele vyuma vyosena?’ (Kusoloka 4:11) Eyo, Kalunga ikiye vene atengele vyuma vyosena. Oloze Yesu ahanjikile hatoma ngwenyi Satana ikiye “muka-kuyula kano kaye.” (Yowano 12:31; 14:30; 16:11) Kaposetolo Paulu avulukile Satana Liyavolo ngwenyi ikiye “kalunga wakatwamino kamyaka yino.” (Wavaka-Kolinde 2, 4:3, 4) Kaposetolo Yowano nawa asonekele ngwenyi “kaye kosena katwama mumavoko ayauze wakuhuka.”—WaYowano 1, 5:19.
JILA NAVAKANONGESELAMO KAYE KASATANA
13. Mwomwo ika tuli nakusakila kaye kakahya?
13 Kano kaye kali nakupihilako lika. Kanazale najijita, navilinga vyamaswekeza, navaka-kulyonga, naulyanyi. Vatu kaveshi kuhasa kukumisa ukalu kanako numba vazata nangolo ngachilihi. Oloze Yehova kalinwomu anongese kano kaye kakapi hajita yenyi yaAlamangetone, nakuneha jino kaye kakahya kakwoloka.—Kusoloka 16:14-16; tala Chinyikilo chakusongo 10.
14. Kalunga atongola iya kupwa Mwangana waWangana wenyi? Kaha Mbimbiliya yahanjikile vyuma muka kutalisa kuli Yesu?
14 Yehova Kalunga atongola Yesu Kulishitu kupwa Mwangana waWangana wenyi chipwe ngwetu fulumende yenyi yamwilu. Mbimbiliya yahanjikile chimweza ngwayo Yesu mwakayula ‘mwaMwata waKuunda,’ kaha wangana wenyi kaweshi kukakumako. (Isaya 9:6, 7) Yesu anangwile vaka-kumukavangiza valombenga vyawangana kana ngwavo: “Wangana wove wizenga. Mwaya muchima wove mulingiwe mwilu, nahamavu nawa.” (Mateu 6:10) Mukapetulu 8, natukalinangula omu Wangana waKalunga naukashisa jifulumende josena jahamavu. (Tanga Ndanyele 2:44.) Kahou Wangana waKalunga naukaneha jino palachise hano hamavu.—Tala Chinyikilo chakusongo 11.
KAYE KAKAHYA KALI HAKAMWIHI
15. Uno ‘mavu amahya’ alumbununa ika?
15 Mbimbiliya yatufwelelesa ngwayo: “Kuli melu amahya namavu amahya aze tuli nakutalilila,” kaha “namukapwanga kwoloka.” (WaPetulu 2, 3:13; Isaya 65:17) Shimbu jimwe, Mbimbiliya yazachisa lizu ‘mavu’ kulumbununa vatu vatwama hamavu. (Kuputuka 11:1) Ngocho, ‘mavu amahya’ akwoloka atalisa kuvatu vaze akisula Kalunga vaze veji kumwononokanga.
16. Wana muka waulemu uze Kalunga mwakahana vaze navakatwama mukaye kenyi kakahya, kaha vyuma muka twatela kulinga numba tukatambule wana kana?
16 Yesu ashikile ngwenyi vatu vosena vaze navakatwama mukaye kakahya navakatambula “kuyoya chahaya myaka yosena.” (Mako 10:30) Vyuma muka twatela kulinga numba tukatambule wana kana? Tunakulombo utange chisoneka chaYowano 3:16 naYowano 17:3, mangana uwane vyuma twatela kulinga. Tuchitale jino vyuma yahanjika Mbimbiliya kutalisa kuchiyoyelo nachikapwa muPalachise.
17, 18. Twatachikiza ngachilihi ngwetu vatu navakatwama mukuunda hamavu nakupwa vakukingiwa?
17 Vilinga vyavipi, najijita, nauhwanga, naulyanyi navikakuma. Hamavu kaheshi kukapwa cheka vaka-kuhukako. (Samu 37:10, 11) Kalunga mwakakumisa “jijita hamavu hosena.” (Samu 46:9; Isaya 2:4) Nahakapwa kaha vatu vaze vazanga Kalunga nakumwononoka. Nahakapwa kuunda haya myaka yosena.—Samu 72:7.
18 Vatu jaYehova navakapwa vakukingiwa. Kushikulu omu vaIsalele vononokelenga Kalunga, vatwaminenga chakuzeneka kwivwa woma mwomwo Kalunga avakingilenga. (VyavaLevi 25:18, 19) Ngocho muPalachise katweshi kukevwa woma mutu chipwe chuma numba chimweko. Natukapwa vakukingiwa lwola lwosena.—Tanga Isaya 32:18; Mika 4:4.
19. Twejiva ngachilihi ngwetu vyakulya navikalisala mukaye kakahya kaKalunga?
19 Vyakulya navikalisala. Mbimbiliya yamba ngwayo: “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.” (Samu 72:16) Yehova ‘Kalunga ketu mwakatukisula,’ kaha ‘mavu nawakema jimbuto.’—Samu 67:6.
20. Twatachikiza ngachilihi ngwetu mavu nawakapwa palachise?
20 Mavu nawakapwa palachise. Vatu navakatunga jizuvo jamwaza nakutumba milemba. (Tanga Isaya 65:21-24; Kusoloka 11:18.) Hamavu hosena nahakapwa hamwaza ngana muze yapwile milemba yaEtene. Yehova mwakatuhananga vyuma vyosena vize twasaka. Mbimbiliya yahanjika hali ikiye ngwayo: “Weji kukamununanga mulivoko lyove, nakwikuchisa vyuma vyakuyoya vyosena.”—Samu 145:16.
21. Twejiva ngachilihi ngwetu vatu natunyama navakatwamanga hamwe mukuunda?
21 Vatu natunyama navakatwamanga hamwe mukuunda. Tunyama kaveshi kukalemeka vatuko. Kaha vana vavandende kaveshi kukevwa woma tunyama vaze veji kulemekanga vatu makumbi anoko.—Tanga Isaya 11:6-9; 65:25.
22. Yesu mwakalinga vyuma muka kuli vaze vali nakuviza?
22 Vatu kaveshi kukavizako. Omu Yesu apwile hano hamavu, okilenga vaveji vavavulu. (Mateu 9:35; Mako 1:40-42; Yowano 5:5-9) Hakupwa ikiye Mwangana waWangana waKalunga, mwakahindula vatu vosena kumisongo yavo. Kaha kakweshi kukapwa mutu mwakamba ngwenyi: “Nguli nakukola.”—Isaya 33:24; 35:5, 6.
23. Kalunga mwakalinga vyuma muka kuli vaze vafwa?
23 Vafu navakayoya cheka. Kalunga ashika ngwenyi mwakasangula mayevuyevu avatu vaze vafwa. Mbimbiliya yamba ngwayo: “Nakukapwa kusanguka chavaka-kwoloka navaka-kuhenga.”—Tanga Yowano 5:28, 29; Vilinga 24:15.
24. Uli nakwivwa ngachilihi hachihande kanechi chakukatwama muPalachise?
24 Tuvosena tukwechi lisesa lyakusakula kulinangula vyaYehova nakumuzachila, chipwe kulilingila vyeshovyo tunasake. Nge natusakula kuzachila Yehova, kaha natukatambula vyuma vyamwaza chikuma kulutwe. Omu lunga umwe alwezele Yesu akamwanuke nge nafu, Yesu amushikile ngwenyi: “Naukapwa nayami muPalachise.” (Luka 23:43) Ngocho tulinangule jino vyuma vyavivulu hali Yesu Kulishitu nomwo mwakatesamo vyuma atushika Kalunga.
