1-3. Vihula muka veji kuhulisanga vatu kutalisa kukufwa, kaha mauka amwe avaka-kwitava akumbulula ngachilihi?

MBIMBILIYA yatufwelelesa ngwayo “kufwa kacheshi kukapwako chekako.” (Kusoloka 21:4) Mukapetulu 5, twalinangulanga ngwetu ndando yakusokola nayikatulingisa tukayoye haya myaka yosena. Oloze oholyapwa vatu vachili lika nakufwa. (Muka-kwambulula 9:5) Ngocho twatela kulihulisa chihula chino chachilemu ngwetu, Vyuma muka vyeji kusolokanga kuli etu nge tunafu?

² Kukumbulula chihula kana chinahase kutukafwa chikumanyi nge tunafwisa mutu uze twazanga. Mwomwo tunahase kuhuhwasana nakuhulisa ngwetu: ‘Uno nayi kulihi? Ali nakutumona tahi? Kutala nahase kutukafwa nyi? Uno natukamumona cheka tahi?’

³ Mauka avaka-kwitava akumbulula vihula kanevi mujijila jakulihandununa. Amwe anangula ngwawo nge mutu wavilinga vyamwaza nafu, eji kuyanga mwilu, oloze mutu wavilinga vyavipi eji kuyekelanga mukakahya kahelo. Kaha eka ngwawo nge mutu nafu eji kwalumukanga kupwa mujimu nakutwama navausoko wenyi vaze vafwa lyehi. Akwavo nawa ngwawo, nge mutu nafu veji kumusopesanga, kaha eji kusemukanga cheka, chipwe kusanguka nakupwa cheka mutu chipwe kanyama.

4. Mauka amavulu avaka-kwitava anangula ika kutalisa kukufwa?

⁴ Numba tuhu mauka avaka-kwitava eji kunangulanga vyuma vyakulihandununa hachihande kana, oloze amavulu anangula mwomumwe ngwawo kwatwama chuma chimwe cheji kufumanga mumijimba yetu nge tunafu nakutwalaho lika kuyoya. Uno omu mukiko tahi?

5, 6. Vyuma muka vyeji kusolokanga kuli etu nge tunafu?

⁵ Yehova atachikiza vyuma vyeji kusolokanga kuli etu nge tunafu. Atulweza ngwenyi nge mutu nafu, kaha kuyoya chenyi chinakumu. Shikaho, keshi nakuyoyela kuchihela chekako, oloze vishinganyeka vyenyi namangana enyi vinanongo. * Ngocho nge tunafu, katweshi kumona, chipwe kwivwa, chipwe kushinganyekako.

⁶ Mwangana Solomone asonekele ngwenyi “vafu kavatachikiza chuma numba chimweko.” Kaveshi kuzanga chipwe kuhunga vatuko, kaha ‘muFuka kamwatwama milimo, chipwe kujina, chipwe chinyingi, chipwe manganako.’ (Tanga Muka-kwambulula 9:5, 6, 10.) Mukanda waSamu 146:4 wahanjika ngwawo nge mutu nafu, “vishinganyeka vyenyi” vyeji kunonganga.

7. Vyuma muka ahanjikile Yesu kutalisa kukufwa?

⁷ Omu sepa lyenyi Lazalu afwile, Yesu alwezele tumbaji twenyi ngwenyi: “Sepa lyetu Lazalu nasavala.” Kalumbunwine ngwenyi Lazalu ali nakunokako, oloze ambile ngwenyi: “Lazalu nafu.” (Yowano 11:11-14) Ngocho Yesu afwanyishile kufwa kukusavala tulo. Kaha kahanjikile ngwenyi Lazalu apwile mwilu chipwe navausoko wenyi vaze vafwa lyehiko. Kahanjikile nawa ngwenyi apwile nakuyekela mukakahya kahelo, chipwe kusemuka nakupwa mutu weka chipwe kanyamako. Oloze chapwile kwijiva nge Lazalu ali mutulo twatuvulu. Kwatwama visoneka vikwavo vize vyafwanyisa kufwa kukusavala tulo twatuvulu. Mbimbiliya yahanjika ngwayo omu Setefwano vamujihile, “asavalile tulo twakufwa.”  (Vilinga 7:60) Kaposetolo Paulu naikiye asonekele ngwenyi vaka-Kulishitu vamwe ‘vasavalile tulo twakufwa.’—Wavaka-Kolinde 1, 15:6.

8. Uno tunatachikiza ngachilihi ngwetu Kalunga katengele vatu ngwenyi vafwengangako?

⁸ Uno Kalunga atengele Alama naEve ngwenyi vafwenga tahi? Nduma. Avatengele mangana vayoyenga haya myaka yosena nakupwa vakulikangula. Yehova atengele vatu namuchima wakufwila kuyoya haya myaka yosena. (Muka-kwambulula 3:11) Visemi kavasaka kumona vana vavo navashinakaja nakufwako. Omu mukiko naYehova eji kwivwanga hali etu. Jino nge Kalunga atutengele ngwenyi tuyoyenga haya myaka yosena, kaha mwomwo ika tweji kufwilanga?

9. Mwomwo ika lushimbi luze Yehova ahanyine Alama naEve lwapwile lwalwashi kulukavangiza?

⁹ Yehova alwezele Alama mumilemba yaEtene ngwenyi: “Kumitondo yoseneyi yili mumilemba unahase kulyangako tuhu. Oloze kumutondo wakutachikijila kuwaha nakupihya kanda ukalyakoko, mwomwo halikumbi lize naukalyako naukafwa chakufwa.” (Kuputuka 2:9, 16, 17) Lushimbi kana kalwapwile lwalukalu kulukavangizako, kaha nawa Yehova apwile nangolo jakulweza Alama naEve vyuma vyakwoloka nevi vyakuhenga. Nge vononokele Yehova, kachi vasolwele kavumbi kuchiyulo chenyi. Kachi vasolwele nawa nge vasakwililile havyuma vyosena vize avahanyine.

10, 11. (a) Satana ahungumwishile ngachilihi Alama naEve? (b) Mwomwo ika Alama naEve kaveshi kukavakonekela havyuma valingileko?

¹⁰ Chaluvinda, Alama naEve valikangile kuli Yehova. Satana ahulishile Eve ngwenyi: “Uno Kalunga nambe chikupu ngwenyi kamwatela kulya kumitondo yoseneyi yili mumilembako nyi?” Eve amukumbulwile ngwenyi: “Tunahase kulya tuhu kumihako yamitondo yosena yili mumilemba. Oloze kumihako yamutondo uze uli mukachi kamilemba, Kalunga nambe ngwenyi, ‘Kamwatela kulyakoko, chipwe kukwatako, mokomoko namufwa.’”—Kuputuka 3:1-3.

¹¹ Kaha Satana ambile ngwenyi: “Kufwa kamweshi kufwako. Mwomwo Kalunga natachikiza ngwenyi halikumbi lize namukalyako, meso enu nawakatona, kaha namukapwanga nge Kalunga, kaha namukatachikizanga kuwaha nakupihya.” (Kuputuka 3:4-6) Satana asakile Eve afwelele ngwenyi nahase tuhu kulisakwila ivene vyuma vyakwoloka nevi vyakuhenga. Kaha amwongele nawa vyuma navisoloka kachi nge mwalikanga. Satana alwezele Eve ngwenyi kaveshi kufwako. Ngocho Eve alile kumuhako kana, kufumaho ahanyineko nalunga lyenyi. Alama naEve vatachikijile ngwavo Yehova avakanyishile kulya kumuhako kana. Ngocho kulya kumuhako kana chasolwele nge vasakwile kulikanga kulushimbi  luze lwapwile lwalwashi kukavangiza. Kaha chasolwele nawa nge kavavumbikile Sevo wamwiluko. Kaveshi kukavakonekela havyuma valingileko.

12. Mwomwo ika chapwilile chachipi chikuma Alama naEve kulikanga kuli Yehova?

¹² Ava visemi jetu valingile chuma chachipi chikuma hakusaula Tengi yavo. Uno unahase kwivwa ngachilihi nge mwanove walunga nayou wapwevo vaze unalilelela navalikanga kuli ove nakulinga vyuma vize unavakanyisa? Kutala kaweshi kwivwa kumuchima kukolako nyi?

13. Yehova alumbunwine ika hakwamba kuli Alama ngwenyi, “naukalumuka cheka kupwa lukungu”?

¹³ Omu Alama naEve valikangile kuli Yehova, vajimbalishile kuyoya chavo chahaya myaka yosena. Yehova alwezele Alama ngwenyi: “Mwomwo unapu ulukungu, kaha naukalumuka cheka kupwa lukungu.” (Tanga Kuputuka 3:19.) Echi chalumbununa nge Alama akindulukile kulukungu kuze afumine. (Kuputuka 2:7) Shikaho, Alama afwile omu alingile shili, kaha kapwileko chekako.

14. Mwomwo ika tweji kufwilanga?

¹⁴ Nge Alama naEve vononokele Kalunga, kachi noholyapwa vachili nakuyoya. Oloze valingile shili hakulikanga kuli Kalunga, kaha vafwile. Shili yapwa himusongo waupi uze twatambula kuli visemi jetu vakulivanga. Tuvosena tweji kufwanga mwomwo yashili twasemuka nayo. (Wavaka-Loma 5:12) Oloze Kalunga kajinyine ngwenyi  vatu vafwengangako. Shikaho Mbimbiliya yavulukila ngwayo kufwa chapwa “muka-kole.”—Wavaka-Kolinde 1, 15:26.

15. Kutachikiza muchano kutalisa kukufwa cheji kutulingisanga ngachilihi tupwenga vakulihehwa?

¹⁵ Kutachikiza muchano kutalisa kukufwa cheji kutukafwanga tuhone kuhungumuka nakunangula chamakuli. Mbimbiliya yatunangula nge vafu kaveshi kwivwa kukola chipwe chinyengoko. Katweshi kuhasa kuhanjika navoko, kaha navakiko nawa kaveshi kuhasa kuhanjika nayetuko. Katweshi kuhasa kuvakafwako, kaha navakiko nawa kaveshi kuhasa kutukafwako. Ngocho katwatela kuvevwa womako mwomwo kaveshi kuhasa kutulemekako. Oloze mauka avaka-kwitava amavulu anangula ngwawo vafu veji kuyanga kumwe nakuyoyelako, ngocho vanahase kuvakafwa nge navahana jimbongo vapilishitu chipwe vatwamina veka vamukwitava. Oloze kutachikiza muchano kutalisa kukufwa cheji kutukafwanga tuhone kuhungumuka nakunangula kanechi chamakuli.

16. Mauka avaka-kwitava amavulu eji kunangulanga vyuma muka vyamakuli kutalisa kuvafu?

¹⁶ Satana eji kuzachisanga kwitava chamakuli mangana atwonge tufwelele ngwetu vafu vachili lika vavatonyi. Chakutalilaho, mauka amwe avaka-kwitava eji kunangulanga ngwawo kwatwama chuma chimwe cheji kufumanga mumijimba yetu nge tunafu nakutwalaho lika kuyoya. Kutala liuka lyove lyanangula vyuma kanevi kutalisa kuvafu tahi, nyi lyanangula vyuma yahanjika Mbimbiliya? Satana eji kwonganga vatu mangana avahonese kuzachila Yehova.

17. Mwomwo ika kunangula chakuyekelesa vatu muhelo cheji kusawishilanga Yehova?

¹⁷ Vyuma veji kunangulanga vyapwa vyavipi sulumunu. Chakutalilaho, mauka amwe avaka-kwitava eji  kunangulanga ngwawo vatu vavilinga vyavipi navakavayekelesa mukakahya kahelo haya myaka yosena. Kunangula kana cheji kusawisanga Kalunga. Yehova keshi kuhasa kuyanjisa vatu mujila kaneyiko. (Tanga WaYowano 1, 4:8.) Uno nawivwa ngachilihi nge chisemi mwahaka mavoko amwanenyi hakakahya mangana amuzangamise? Mutu kana unahase kumumona kupwa wakukenyuka chikuma. Kaha kaweshi kuhasa kulikata nenyiko. Satana asaka tumonenga Yehova kupwa waukenya.

18. Mwomwo ika katwatela kwivwa woma vafuko?

¹⁸ Mauka amwe avaka-kwitava anangula ngwawo vatu veji kupwanga vajimu nge vanafu. Anangula nawa nge twatela kulemesa vajimu nakuvevwa woma mwomwo vanahase kupwa masepa jetu chipwe vaka-kole jetu. Kaha vatu vavavulu vafwelela vyuma kanevi vyamakuli. Ngocho veji kwivwanga woma vafu nakuvalemesa muchishishisa chakulemesa Yehova. Nyingilila ngwove vafu kaveshi kwivwa chipwe kutachikiza chumako, ngocho katwatela kuvevwa womako. Yehova apwa Tengi yetu kaha nawa Kalunga wamuchano, ngocho twatela kulemesanga ikiye kaha.—Kusoloka 4:11.

19. Uno kutachikiza muchano kutalisa kukufwa nachitukafwa ngachilihi?

¹⁹ Kutachikiza muchano kutalisa kukufwa nachitukafwa tuhone kuhungumuka nakunangula chamakuli. Muchano kana nautukafwa nawa twivwishise vyuma vyamwaza atushika Yehova kutalisa kukuyoya chetu chaholyapwa nechi chakulutwe.

20. Vyuma muka natulinangula mukapetulu nakavangizaho?

²⁰ Kushikulu ngamba yaKalunga Yopa ahulishile ngwenyi: “Kachi nge mutu nafu, kutala mwakayoya cheka tahi?” (Yopa 14:14) Kutala mutu uze nafu nahase kuyoya cheka nyi? Vyuma atulweza Kalunga muMbimbiliya hachihande kana vyeji kutuvendejekanga. Mukapetulu nakavangizaho natumona ovyo chapwila ngocho.