OMU weji kutanganga mapapilo amijimbu, chipwe kwivwilila kuchisaji, chipwe kutala chisaji chamivwimbimbi, weji kumonanga chipwe kwivwa mijimbu yauhwanga, najijita, navyuma vyeka vyavipi. Pamo nayove uli nakuyanda mwomwo yamisongo chipwe kufwisa mutu wazanga.

Jino lihulise ngwove:

• Uno Kalunga asaka ami natanga yami tuyoyenga ngana tahi?

• Kulihi ngunahase kuwana vyakungukafwa nguhonese ukalu wami?

• Uno kuunda chamwenemwene nachikeza kupwako tahi?

Mbimbiliya yakumbulula kanawa vihula kanevi.

• Vatu kaveshi kukaviza, chipwe kushinakaja, chipwe kufwako.—Kusoloka 21:4

• “Vaka-kumbilikita navakasambwojoka nge tupaji.”—Isaya 35:6

• “Meso atupuputa nawakatona.”—Isaya 35:5

• Vafu navakasanguka.—Yowano 5:28, 29

• Vatu kaveshi kukavizako.—Isaya 33:24

• Vatu vosena hamavu navakapwa navyakulya vyavivulu.—Samu 72:16

Unahase kushinganyeka ngwove vyuma unatange kumaputukilo amukanda uno vyapwa hivilota kaha. Oloze Kalunga ashika ngwenyi kalinwomu alinge vyuma kana hano hamavu. Kaha Mbimbiliya yalumbununa jila mwakalingilamo ngocho.

Mbimbiliya yatulweza nawa vyuma twatela kutachikiza mangana tulivwise kuwaha kuyoya oholyapwa. Achishinganyeke haukalu umwe uze unahase kukulingisa ulizakamine, wakufwana nge ukalu wajimbongo, chipwe ukalu wamutanga, chipwe kuhona kulikangula kumujimba, chipwe kufwisa mutu wazanga. Mbimbiliya yinahase kukukafwa uhonese ukalu kana kaha nawa yinahase kukuvendejeka hakukumbulula vihula vino:

• Mwomwo ika tweji kuyanjilanga?

• Uno tunahase kuhonesa ngachilihi ukalu tweji kumonanga mukuyoya?

• Kutala tunahase kupwa vakuwahilila mutanga tahi?

• Vyuma muka vyeji kusolokanga kuli etu nge tunafu?

• Uno vatu twazanga vaze vafwa natukavamona cheka nyi?

• Mwomwo ika twatela kufwelela chikupu ngwetu Kalunga mwakatesamo vyuma vyosena ashika?

 Hakuwana nge unetavila kutanga mukanda uno, ngocho chinasoloka nge uli nakusaka kutachikiza vyuma yanangula Mbimbiliya. Uno mukanda naukukafwa chikuma. Jipalangalafu jili navihula vize navikukafwa wivwishise kanawa Mbimbiliya. Vatu vavavulu veji kulivwisanga kuwaha kulinangula Mbimbiliya naVinjiho jaYehova. Tunafwelela ngwetu nayove naulivwisa kuwaha. Shikaho Kalunga akukisule omu nauputuka kutachikiza vyuma yanangula Mbimbiliya.