KAPETULU 8
Wangana waKalunga Chuma Muka?
1. Uno kulomba muka chize chaya fuma natushimutwila?
VATU vavavulu vatachikiza kulomba chize chaya fuma vavuluka ngwavo, Kulomba chaMwata. Yesu azachishile kulomba kanechi mangana anangule tumbaji twenyi mwakulombela. Vyuma muka alombele? Kaha mwomwo ika kulomba kana chapwila chachilemu kuli etu makumbi ano?
2. Vyuma muka vitatu vize Yesu atunangula tulombenga?
2 Yesu ambile ngwenyi: “Shikaho enu mwatela kulomba ngwenu: ‘Ove Setu uli mwilu, lijina lyove lipwenga lyajila. Wangana wove wizenga. Mwaya muchima wove mulingiwe mwilu, nahamavu nawa.’” (Tanga Mateu 6:9-13.) Mwomwo ika Yesu atunangwila tulombenga evi vyuma vitatu?—Tala Chinyikilo chakusongo 20.
3. Vyuma muka twatela kutachikiza haWangana waKalunga?
3 Tunalinangula lyehi ngwetu lijina lyaKalunga ikiye Yehova. Kaha nawa tunashimutwila lyehi vyuma ajinyine Kalunga hakutenga vatu namavu. Uno Yesu atalikishile mulihi omu ambile ngwenyi: “Wangana wove wizenga”? Natulinangula omwo walumbunukila Wangana waKalunga, novyo naukalinga, nomwo naukalingisa lijina lyaKalunga kupwa lyajila.
WANGANA WAKALUNGA CHUMA MUKA?
4. Wangana waKalunga chuma muka, kaha iya apwa Mwangana waWangana kana?
4 Yehova atunga fulumende mwilu, kaha atongola Yesu kupwa Mwangana wakuyula fulumende kana. Mbimbiliya yavuluka fulumende kaneyi ngwayo Wangana waKalunga. Yesu apwa “Mwangana wavamyangana ava vali nakuyula, kaha nawa Mwata wavamyata ava vali nakuyula.” (WaChimoteu 1, 6:15) Atwama nangolo kuhambakana vaka-kuyula vahamavu vosena kaha nawa akwechi ngolo jakulinga vyuma vyamwaza kuhambakana vatu kana.
5. Uno Wangana waKalunga naukayulila kulihi? Kaha naukayula ika?
5 Yesu ayile mwilu omu mwahichile makumbi 40 kufuma hakusanguka chenyi. Kutwala muze, Yehova amutongwele kupwa Mwangana waWangana wenyi. (Vilinga 2:33) Fulumende yaKalunga nayikayula hamavu hosena, oloze nayikayulila mwilu. (Kusoloka 11:15) Shikaho Mbimbiliya yavulukila Wangana waKalunga ngwayo ‘Wangana wamwilu.’—WaChimoteu 2, 4:18.
6, 7. Vyuma muka vyalingisa Yesu kupwa Mwangana wamwenemwene kuhambakana vamyangana vahamavu vosena?
6 Mbimbiliya yavuluka ngwayo Yesu ahambakana vamyangana vavatu vosena mwomwo “ikiye uka wenyi kaha ahona kufwa.” (WaChimoteu 1, 6:16) Vaka-kuyula vahamavu vosena veji kufwanga, oloze Yesu keshi kukafwako. Ngocho vyuma vyamwaza vyosena mwakatulingila navikapwako haya myaka yosena.
7 Upolofweto wamuMbimbiliya wavuluka ngwawo Yesu mwakapwa Mwangana wakwoloka, muka-kutetela. Wamba ngwawo: “Shipilitu yaYehova nayikapwa hali ikiye, kaha mwakapwa wamangana, wakunangakana, mwakapwa muka-kulweza mangana, mwakapwa wangolo, mwakapwa wachinyingi, kaha mwakamwivwanga Yehova woma. Kumwivwa Yehova woma mwakachivwanga kuwaha. Keshi kukasopesa vatu havyuma mwakamona namesoko, chipwe kuhanjikila vatu kweseka nomu mwakevwa namatwitwi enyiko. Mwakayulanga mwakwoloka vihande vyavaka-kukalikiza.” (Isaya 11:2-4) Kutala musaka kupwa namwangana wamuyachou nyi?
8. Twatachikiza ngachilihi ngwetu Yesu keshi kukayula uka wenyiko?
8 Kalunga asakula vatu vamwe vakayule hamwe naYesu mufulumende yamwilu. Chakutalilaho, kaposetolo Paulu alwezele Chimoteu ngwenyi: “Kachi nge natukakachilanga lika, kaha natukayulanga nenyi hamwe nakupwa tuvamyangana.” (WaChimoteu 2, 2:12) Uno vatu vangahi navakapwa vamyangana nakuyula hamwe naYesu?
9. Vatu vangahi navakayula hamwe naYesu? Kaha Kalunga aputukile kuvasakula shimbu muka?
9 Nge muze twalinangulanga muKapetulu 7, kaposetolo Yowano vamumwenesele Mwangana Yesu ali mwilu hamwe navamyangana veka 144,000. Uno ava 144,000 vapwa veya? Yowano ahanjikile ngwenyi “vapwile nalijina [lyaYesu] nalijina lyaIse lyakusoneka hajiholo javo.” Ambile nawa ngwenyi: “Ava vakiko vaze veji kukavangizanga Mwanamukoko [kulumbununa, Yesu] kweshokwo mwaya. Vavalanjile muli vatu.” (Tanga Kusoloka 14:1, 4.) Eyo, ava 144,000 vapwa vaka-Kulishitu vakushishika vaze Kalunga asakula mangana ‘vakapwe vamyangana hamwe naYesu nakuyula mavu.’ Veji kusangukanga nakuya mwilu nge vanafu. (Kusoloka 5:10) Kufuma vene kumakumbi avaposetolo, Yehova napunga nakusakula vaka-Kulishitu vakushishika mangana vapwenga halizavu lyavava vamyangana 144,000.
10. Mwomwo ika chapwila chamwaza Yehova kutongola Yesu navaze 144,000 vakayulenga vatu?
10 Yehova atuzakama, shikaho asakula vatu mangana vakayule hamwe naYesu. Yesu mwakatuyula kanawa mwomwo atutachikiza kanawa. Ejiva omwo vapwa vatu naukalu veji kumonanga. Paulu ambile ngwenyi Yesu eji ‘kutwivwilanga keke mukuhehela chetu,’ kaha nawa ‘vamweseka lyehi mwosena ngana mwayetu.’ (WavaHepeleu 4:15; 5:8) Vaze 144,000 navakiko vatachikiza kanawa omwo vapwa vatu. Vanavijinga misongo nakulipika natutenga twavo. Ngocho twafwelela ngwetu Yesu navaze 144,000 navakevwishisa kanawa omu tweji kwivwanga naukalu tweji kuhitangamo.
WANGANA WAKALUNGA NAUKALINGA VYUMA MUKA?
11. Mwomwo ika Yesu anangwilile tumbaji twenyi valombenga ngwavo mwaya muchima waKalunga mulingiwe mwilu?
11 Yesu anangwile tumbaji twenyi valombenga ngwavo mwaya muchima waKalunga mulingiwe mwilu. Mwomwo ika? Mukapetulu 3 twalinangwile omwo Satana Liyavolo alikangile kuli Yehova. Kaha Yehova echele Satana navangelo vakuhona kushishika chipwe ngwetu vandemone vatwame mwilu hatando yimwe. Ngocho vangelo vamwe mwilu kavalingilenga mwaya muchima waKalungako. Mukapetulu 10 natulinangula vyavivulu hali Satana navandemone.
12. Vyuma muka vyavilemu vivali vavuluka hali Kusoloka 12:10?
12 Mbimbiliya yalumbununa ngwayo omu Yesu vamutongwele kupwa Mwangana waWangana waKalunga, alwile jita naSatana. (Tanga Kusoloka 12:7-10.) Mukanda waKusoloka 12:10 wavuluka vyuma vyavilemu vivali vyasolokele. Chakulivanga, Yesu Kulishitu aputukile kuyula Wangana waKalunga. Kaha chamuchivali, Satana vamumbilile hamavu. Nganomu natulinangula, vyuma kana vyasolokele lyehi kunyima.
13. Vyuma muka vyasolokele hakundandumuna Satana mwilu?
13 Mbimbiliya yavuluka kuwaha vevwile vangelo vakushishika omu Satana navandemone jenyi vavandandumwine mwilu. Yamba ngwayo: “Enu melu nayenu mwatwamamo, wahililenunga.” (Kusoloka 12:12) Mwilu muli jino kuunda nakulinunga mwomwo vosena vatwamamo vali nakulinga mwaya muchima waKalunga.
Ukalu unavulilako hamavu kufuma vene haze Satana navandemone jenyi vavandandumwine mwilu. Kalinwomu Kalunga afumiseko ukalu wosena
14. Vyuma muka vili nakusoloka hamavu kufuma halwola vandandumwine Satana mwilu?
14 Oloze hano hamavu kuyoya kacheshi kanawako. Vatu vali nakumona vihuli ‘mwomwo Liyavolo eza,’ kaha “ali namatoto amanene, mwomwo natachikiza ngwenyi ali kaha nakashimbu kakandende.” (Kusoloka 12:12) Satana ali namatoto amanene mwomwo vamundandumuna mwilu kaha nawa natachikiza ngwenyi kalinwomu vamunongese. Ngocho ali nakuzata nangolo mangana anehe lamba hamavu hosena.
15. Vyuma muka ajinyine Kalunga hakutenga mavu?
15 Vyuma ajinyine Kalunga hakutenga mavu kavyalumukako. Noholyapwa asaka ngwenyi vatu vakukupuka vakatwame haya myaka yosena mupalachise hamavu. (Samu 37:29) Uno Wangana waKalunga naukatesamo ngachilihi chuma kanechi?
16, 17. Mukanda waNdanyele 2:44 watulweza ika haWangana waKalunga?
16 Upolofweto wahali Ndanyele 2:44 wamba ngwawo: “Hamakumbi avamyangana vaze, Kalunga wamwilu mwakahakako wangana uze kaveshi kukanongesako. Wangana kana kaveshi kukauhana kuvatu vekako. Naukachika mawangana osena awa nakuwanongesa, kaha ukiko naukapwangako haya myaka yosena.” Uno upolofweto kana watunangula vyuma muka kutalisa kuWangana waKalunga?
17 Chatete, watulweza nge Wangana waKalunga waputukile kuyula “hamakumbi avamyangana vaze.” Echi chalumbununa nge jifulumende jahamavu jinapungako kufuma vene halwola luze Wangana waKalunga waputukile kuyula. Chamuchivali, watulweza nge Wangana waKalunga naukapwako haya myaka yosena, kaha kaveshi kukaushisa kufulumende yekako. Chamuchitatu, ou Wangana naukalwa jita najifulumende jahamavu. Kaha naukafungulula jifulumende josena nakupwa fulumende yimwe kaha yize nayikayulanga hamavu hosena. Ngocho vatu navakalivwisa kuwaha kuvayula kufulumende kaneyi yamwaza chikuma.
18. Jita yamakumishilo yize Wangana waKalunga naukalwa najifulumende jahano hamavu vayivuluka ngwavo ika?
18 Uno Wangana waKalunga naukaputuka ngachilihi kuyula hamavu hosena? Shimbu kanda jita yamakumishilo vavuluka ngwavo Alamangetone yiputuke, vandemone navakahungumwisa ‘vamyangana vahamavu hosena, mangana vakavakungulwile hamwe kujita yahalikumbi lyalinene lyaKalunga Wangolo Josena.’ Eyo, jifulumende javatu najikalwa jita naWangana waKalunga.—Kusoloka 16:14, 16; tala Chinyikilo chakusongo 10.
19, 20. Mwomwo ika tuli nakusakila Wangana waKalunga uyule hamavu?
19 Mwomwo ika tuli nakusakila Wangana waKalunga? Mwomwo yavyuma vino vitatu. Chatete, twapwa tuvaka-shili, ngocho tweji kuvizanga nakufwa. Oloze Mbimbiliya yatulweza ngwayo, muchiyulo chaWangana waKalunga natukayoya haya myaka yosena. Mukanda waYowano 3:16 watulweza ngwawo: “Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.”
20 Chuma chamuchivali chatulingisa tusake Wangana waKalunga shina mwomwo tuli nakutwama navatu vavilinga vyavipi. Vatu vavavulu veji kuhanjikanga makuli, nakumbembejeka vakwavo, nakulinga vyuma vyavipi. Etu katweshi nangolo jakufumisako vatu kanako. Oloze Kalunga mwakavafumisako. Eyo, vatu vaze veji kulinganga vyuma vyavipi navakavanongesa hajita yaAlamangetone. (Tanga Samu 37:10.) Chuma chamuchitatu chatulingisa tusake Wangana waKalunga shina mwomwo jifulumende javatu japwa jakuzeya, jaukenya kaha nawa javilinga vyamaswekeza. Kajasaka kukafwa vatu vononoke Kalungako. Mbimbiliya yahanjika ngwayo “mutu nashinyinyika mukwavo mutu mangana amuyanjise.”—Muka-kwambulula 8:9.
21. Uno Wangana waKalunga naukalingisa ngachilihi mwaya muchima waKalunga mukalingiwe hano hamavu?
21 Omu nayikakuma jita yaAlamangetone, Wangana waKalunga naukalingisa mwaya muchima waKalunga mukalingiwe hano hamavu. Chakutalilaho, Wangana kana naukafumisako Satana navandemone jenyi. (Kusoloka 20:1-3) Kutwala muze, vatu kaveshi kukaviza chipwe kufwako. Ndando yakusokola nayikalingisa vatu vakushishika vakatwame muPalachise haya myaka yosena. (Kusoloka 22:1-3) Wangana waKalunga naukalingisa lijina lyaKalunga kupwa lyajila. Uno echi chalumbununa ika? Chalumbununa nge omu fulumende yaKalunga nayikayula hamavu, vatu vosena navakavumbikanga lijina lyaYehova.—Tala Chinyikilo chakusongo 21.
MWAKA UKA VATONGWELE YESU KUPWA MWANGANA?
22. Twatachikiza ngachilihi ngwetu Yesu kavamutongwele kupwa Mwangana omu apwile hano hamavu chipwe hahaze vene asangukile?
22 Yesu anangwile tumbaji twenyi valombenga ngwavo: “Wangana wove wizenga.” Echi chasolwele nge kulutwe fulumende yaKalunga nayikeza. Yehova avangilile kutunga fulumende nakutongola Yesu kupwa Mwangana. Kutala Yesu vamutongwele kupwa Mwangana hahaze vene ayile mwilu nyi? Nduma, avandaminyine. Omu alingile Yesu hanasanguka lyehi, Petulu naPaulu vashindakanyine hachishina kana omu vahanjikile haupolofweto watwama hali Samu 110:1 uze wavuluka vyaYesu. Muupolofweto kana Yehova ambile ngwenyi: “Twamanga kulivoko lyami lyachilyo palanga nomu nangukahaka vaka-kole jove kupwa chitwamo chakulyata mahinji ove.” (Vilinga 2:32-35; WavaHepeleu 10:12, 13) Uno Yesu avandaminyine palanga nakulwola muka numba Yehova amutongole kupwa Mwangana?
Wangana waKalunga naukalingisa mwaya muchima waKalunga mukalingiwe hano hamavu
23. (a) Mwaka uka Yesu aputukile kuyula Wangana waKalunga? (b) Natulinangula ika mukapetulu nakavangizaho?
23 Hamyaka yayivulu yahichilemo kunyima shimbu kanda 1914, lizavu lyavaka-Kulishitu vamuchano lyatachikijile ngwalyo mwaka wa 1914 naukapwa mwaka wakulipwila chikuma kweseka naupolofweto wamuMbimbiliya. Vyuma vinasolokanga mukaye kufuma mu 1914 vyasolola nge ava vaka-Kulishitu vahanjikile muchano. Mumwaka kana mukiko Yesu aputukile kuyula Wangana waKalunga. (Samu 110:2) Kufumaho Satana vamumbilile hano hamavu, kaha nasale “kaha nakashimbu kakandende.” (Kusoloka 12:12) Mukapetulu nakavangizaho natulinangula vyuma vikwavo vize vyasolola nge tuli nakuyoyela mumakumbi akukuminyina. Natulinangula nawa nge Wangana waKalunga kalinwaha ulingise mwaya muchima waKalunga mulingiwe hano hamavu.—Tala Chinyikilo chakusongo 22.
