KAPETULU 4
Yesu Kulishitu Ikiye Iya?
1, 2. (a) Uno kutachikiza lijina lyamutu uze aya fuma chalumbununa nge wamutachikiza mwosena tahi? Lumbununa. (b) Vyuma muka vafwelela vatu hali Yesu?
MUKAYE mwatwama vatu vavavulu vaze vaya fuma. Pamo watachikizako lijina lyamutu umwe uze aya fuma. Oloze kutachikiza kaha lijina lyamutu kana kachalumbununa nge wamutachikiza mwosenako. Eyo, kachalumbununa nge watachikiza kanawa chiyoyelo chenyi navilinga vyenyiko.
2 Pamo wevwaho lyehi mutu vavuluka ngwavo Yesu Kulishitu, numba tuhu munahichi myaka kafwe 2,000 kufuma halwola apwile hano hamavu. Oloze vatu vavavulu kavatachikiza kanawa Yesuko. Vamwe vamba ngwavo apwile mutu wamwaza, veka ngwavo apwile kapolofweto. Kaha vakwavo nawa ngwavo Yesu apwa Kalunga. Uno yove washinganyeka muka?—Tala Chinyikilo chakusongo 12.
3. Mwomwo ika watela kutachikijila Yehova Kalunga naYesu Kulishitu?
3 Watela chikupu kutachikiza kanawa Yesu. Mwomwo ika? Mbimbiliya yatulweza ngwayo: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.” (Yowano 17:3) Eyo, nge nautachikiza vyuma vyamuchano hali Yehova naYesu, kaha naukayoya haya myaka yosena mupalachise hamavu. (Yowano 14:6) Kaha nawa, kutachikiza Yesu nachikukafwa mukuyoya mwomwo atusela chakutalilaho chamwaza chamwakutwamina navakwetu nakuzachila navo hamwe. (Yowano 13:34, 35) Mukapetulu 1, twalinangulanga vyuma vyamuchano twatela kutachikiza hali Kalunga. Ngocho, mukapetulu uno natulinangula vyuma yanangula Mbimbiliya hali Yesu Kulishitu.
TUNAWANE MESHIYA!
4. Mazu akwamba ngwavo “Meshiya” “[na]Kulishitu” alumbununa ika?
4 Shimbu kanda Yesu asemuke, Yehova ashikile muMbimbiliya ngwenyi mwakatuma Meshiya, chipwe ngwetu Kulishitu. Lizu “Meshiya” lyafuma kulizu lyachiHepeleu, kaha lizu “Kulishitu” lyafuma kulizu lyachiHelase. Jivulukiso kana jalumbununa nge Kalunga asakula Meshiya uze vashikile nakumuhana chihela chakulipwila. Meshiya mwakalingisa jishiko jaKalunga josena jikatesemo. Noholili unahase kunganyala kuvyuma alingile Yesu omu apwile hano hamavu. Oloze shimbu kanda Yesu achisemuke, vatu vavavulu vahuhwasanyinenga nakulihulisa ngwavo, ‘Iya mwakapwa Meshiya?’
5. Uno tumbaji twaYesu vatachikijile ngwavo Yesu ikiye apwile Meshiya nyi?
5 Tumbaji twaYesu vatachikijile chikupu ngwavo Yesu ikiye Meshiya uze vashikile. (Yowano 1:41) Chakutalilaho, Shimona Petulu alwezele Yesu ngwenyi: “Ove yove Kulishitu.” (Mateu 16:16) Uno tunahase kutachikiza ngachilihi ngwetu Yesu ikiye vene Meshiya?
6. Yehova nakafwe ngachilihi vatu vamichima yamwaza vatachikize Meshiya?
6 Kushikulu shimbu kanda Yesu asemuke, vapolofweto jaKalunga vasonekele mijimbu yayivulu yakukafwa vatu vatachikize Meshiya. Uno mijimbu kana yavakafwile ngachilihi? Chakutalilaho, achishinganyeke vanakutumu kuya kuchitulilo chajisacha mangana ukatambule mutu uze kawatachikizako. Nge navakulweza omu asoloka mutu kana, kaha nachipwa chachashi kumuwana. Chochimwe nawa, Yehova azachishile vapolofweto jenyi vatulweze vyuma mwakalinga Meshiya novyo mwakahitamo. Kutesamo chaupolofweto kana cheji kukafwanga vatu vamichima yamwaza vatachikize ngwavo Yesu ikiye Meshiya.
7. Upolofweto muka uvali wasolola Yesu kupwa Meshiya?
7 Tuchitale haupolofweto uno uvali. Watete, Mika apolofwetele myaka 700 shimbu kanda Yesu asemuke ngwenyi, Meshiya mwakasemukila munganda yayindende yaMbetelema. (Mika 5:2) Munganda kana mukiko vene asemukilile Yesu. (Mateu 2:1, 3-9) Wamuchivali, Ndanyele apolofwetele ngwenyi Meshiya mwakasoloka mu 29 C.E. (Ndanyele 9:25) Upolofweto kanou naweka wauvulu wasolola Yesu kupwa Meshiya uze vashikile.—Tala Chinyikilo chakusongo 13.
Yesu apwile Meshiya, chipwe ngwetu Kulishitu omu vamumbapachishile
8, 9. Vyuma muka vyasolokele omu vambapachishile Yesu, vize vyamusolola kupwa Meshiya?
8 Yehova asolola Yesu kupwa Meshiya. Kalunga afwelelesele kuhana Yowano Muka-kumbapachisa chinjikizo chakutachikijilaho Meshiya. Yowano amwene chinjikizo kana omu Yesu ayile kuli ikiye mangana amumbapachise muKalwiji Yotau mumwaka wa 29 C.E. Mbimbiliya yavuluka vyuma vyasolokele ngwayo: “Omu Yesu vamumbapachishile, hahaze vene afumine mumeya, kaha mwilu mwasokolokele. Jino Yowano amwene shipilitu yaKalunga nayifuma mwilu nge liyembe nakuwila hali ikiye. Mwilu mwafumine nawa lizu ngwavo: ‘Ou ikiye Mwanami, ou ngwazanga, ou ngwevwila kuwaha.’” (Mateu 3:16, 17) Omu Yowano amwene liyembe nakwivwa lizu nalifuma mwilu, atachikijile chikupu ngwenyi Yesu apwile Meshiya. (Yowano 1:32-34) Halikumbi vene lize, Yesu apwile Meshiya omu Yehova ahingunwinyine shipilitu hali ikiye. Vamutongwele kuli Kalunga kupwa Twamina kaha nawa Mwangana.—Isaya 55:4.
9 Upolofweto wamuMbimbiliya, namazu ahanjikile Yehova, nachinjikizo chasolokele hakumbapachisa Yesu vyasolola Yesu kupwa Meshiya. Uno Yesu afumine kulihi, kaha apwile mutu wakufwana ngachilihi? Tutale omwo yahanjika Mbimbiliya hachihande kana.
YESU AFUMINE KULIHI?
10. Mbimbiliya yanangula vyuma muka hakuyoya chaYesu shimbu kanda ezenga hano hamavu?
10 Mbimbiliya yanangula ngwayo Yesu apwile mwilu shimbu kanda ezenga hano hamavu. Kapolofweto Mika ahanjikile hali Meshiya ngwenyi “kuyoya chenyi chaputukile kushikulu.” (Mika 5:2) Yesu ivene ahanjikilenga kakavulu ngwenyi apwile mwilu shimbu kanda ezenga hamavu nakusemuka kupwa mutu. (Tanga Yowano 3:13; 6:38, 62; 17:4, 5.) Kaha nawa apwile nausoko wakulipwila naYehova omu apwile mwilu.
11. Mwomwo ika Yesu vamuzangila chikuma kuli Yehova?
11 Yesu vamuzanga chikuma kuli Yehova. Mwomwo ika? Mwomwo ikiye apwile wakulivanga kutenga shimbu kanda atenge vyuma vyosena. Echi chikiko chalingisa Yesu vamuvuluke ngwavo “twatwa kuvyuma vyakutenga vyosena.” * (Wavaka-Kolose 1:15) Kaha nawa Yesu vamuzanga kuli Yehova mwomwo ikiye kaha vatengele kuli Yehova ivene. Evi vikiko vamuvulukila ngwavo “Mwanenyi umwe kaha wakulipwila.” (Yowano 3:16) Ikiye kaha nawa vazachishile kuli Kalunga hakutenga vyuma vyeka vyosena. (Wavaka-Kolose 1:16) Yesu ikiye kaha vavuluka ngwavo “Lizu,” mwomwo Yehova amuzachishile ahane vangelo navatu mijimbu najindongi.—Yowano 1:14.
12. Twatachikiza ngachilihi ngwetu Yesu naKalunga kavapwa mutu umweko?
12 Vatu vamwe vafwelela ngwavo Yesu naKalunga vapwa mutu umwe. Oloze omu keshi mukiko yanangula Mbimbiliyako. Mbimbiliya yanangula ngwayo Yesu valingile wakutenga, kulumbununa nge atwama namaputukilo. Oloze Yehova uze atengele vyuma vyosena katwama namaputukiloko. (Samu 90:2) Yesu hakupwa MwanaKalunga, kasakile kulyesekesa hamwe naIse numba chachindendeko. Mbimbiliya yanangula hatoma ngwayo Ise ahambakana Mwanenyi. (Tanga Yowano 14:28; Wavaka-Kolinde 1, 11:3.) Yehova kaha ikiye apwa “Kalunga Wangolo Josena.” (Kuputuka 17:1) Ahambakana vosena, kaha atwama nangolo jakulitulaho mwilu nahamavu.—Tala Chinyikilo chakusongo 14.
13. Mwomwo ika Mbimbiliya yavulukila ngwayo Yesu “apwa chifwanyisa chaKalunga uze vazeneka kumona”?
13 Yehova naMwanenyi Yesu vazachililenga hamwe hamyaka yayivulu shimbu kanda vatenge melu namavu. Pundu vene valizangile chikuma. (Yowano 3:35; 14:31) Yesu alondezezele vilinga vyaIse. Evi vikiko vyalingisa Mbimbiliya yimuvuluke ngwayo “apwa chifwanyisa chaKalunga uze vazeneka kumona.”—Wavaka-Kolose 1:15.
14. Uno MwanaYehova uze azanga chikuma asemukile ngachilihi kupwa mutu?
14 Ou MwanaYehova azanga chikuma, alisuwile kufuma mwilu nakwiza nakusemuka kupwa mutu hano hamavu. Uno chuma kana chapwile ngachilihi? Yehova alingile chuma chakukomwesa hakunungulula kuyoya chaMwanenyi kufuma mwilu nakuchihaka mujimo lyaMaliya, uze apwile kanda achilisavaleho lyehi nalunga. Shikaho, Yesu kapwile naise hano hamavuko. Kaha Maliya asemene mwana wakukupuka, nakumuluka ngwenyi Yesu.—Luka 1:30-35.
YESU APWILE MUTU WAKUFWANA NGACHILIHI?
15. Unahase ngachilihi kutachikiza kanawa Yehova?
15 Unahase kulinangula vyavivulu hali Yesu, nachiyoyelo chenyi, navilinga vyenyi hakutanga mukanda waMateu, naMako, naLuka, naYowano. Mikanda kaneyi yamuMbimbiliya vayivuluka ngwavo Mikanda yaMujimbu Wamwaza. Hakuwana nge Yesu alifwana naIse, ngocho vyuma nautanga mumikanda kana navikukafwa utachikize kanawa Yehova. Shikaho Yesu ahanjikilile ngwenyi: “Weshowo nangumono ami namono naTata nawa.”—Yowano 14:9.
16. Vyuma muka anangwilenga Yesu? Kaha vyuma kana vyafumine kulihi?
16 Vatu vavavulu vavulukilenga Yesu ngwavo “Muka-kunangula.” (Yowano 1:38; 13:13) Vyuma vyavilemu chikuma anangwile shina “mujimbu wamwaza waWangana.” Uno ou Wangana wapwa chuma muka? Wapwa fulumende yaKalunga yize nayikayula hano hamavu hosena nakulingila vatu vakwononoka vyuma vyamwaza. (Mateu 4:23) Vyuma anangwilenga Yesu vyafumine kuli Yehova. Ambile ngwenyi: “Vyuma ngweji kunangulanga kavyapwa vyamiko, oloze vyapwa vyayauze angutumine.” (Yowano 7:16) Yesu atachikijile ngwenyi Yehova asaka vatu vevwenga mujimbu wamwaza wakuvuluka ngwavo Wangana waKalunga naukayula hamavu.
17. Yesu anangwililenga kulihi? Kaha mwomwo ika akilikichile chikuma kunangula vatu?
17 Uno Yesu anangwililenga kulihi? Anangwililenga kweshokwo awanyinenga vatu kwakufwana nge mujinganda, namumembo, nakuvilanjilo, nakuvihela vyakulemesela Kalunga. Yesu kavandaminyinenga vatu vezenga kuli ikiyeko, oloze ikiye avakatukililenga. (Mako 6:56; Luka 19:5, 6) Akilikichile chikuma nakuzachisa lwola lwenyi kuya nakunangula vatu. Mwomwo ika? Mwomwo atachikijile ngwenyi Kalunga amuhanyine mulimo kana auzate kaha nawa afwililile kwononoka Ise lwola lwosena. (Yowano 8:28, 29) Yesu ambulwililenga nawa vatu mujimbu mwomwo avevwilililenga keke. (Tanga Mateu 9:35, 36.) Atachikijile ngwenyi vatwamina vamukwitava kavapwile nakunangula vyuma vyamuchano hali Kalunga naWangana wenyiko. Ngocho asakile vatu vavavulu vevwanga mujimbu wamwaza.
18. Vilinga muka vyaYesu vize vinakwivwisa kuwaha chikuma?
18 Yesu azangile chikuma vatu nakuvazakama. Kaha nawa apwile wamwashi kuhanjikisa, walikoji. Navanyike vasakilenga kupwa naikiye. (Mako 10:13-16) Yesu alingililenga vatu vyuma vyamwaza lwola lwosena, kaha ahungile vilinga vyamaswekeza navilinga vyakuhengesa chiyulo. (Mateu 21:12, 13) Halwola kana, mapwevo kavapwile nalisesa lyakulinga vyuma vanasakeko kaha nawa kavavavumbikilengako. Oloze Yesu avamwenenga kupwa vavalemu nakuvavumbika lwola lwosena. (Yowano 4:9, 27) Yesu apwile nawa wakulinyisa chikuma. Chakutalilaho, lwola lumwe asanyishile tumbaji twenyi kumahinji. Mulimo kana vauzachilenga kuli vangamba.—Yowano 13:2-5, 12-17.
Yesu ambulwilenga mujimbu kweshokwo awanyinenga vatu
19. Chakutalilaho muka chasolola nge Yesu atachikijile vyuma vasakilenga vatu nakufwila kuvakafwa?
19 Yesu atachikijile vyuma vasakilenga vatu, ngocho afwililile kuvakafwa. Asolwelenga muchima kana hakuzachisa ngolo jaKalunga hakuka vaveji mujila yakukomwesa. (Mateu 14:14) Chakutalilaho, muka-mbumba umwe ejile kuli Yesu nakwamba kuli ikiye ngwenyi: “Kachi nge unasake, unahase kungutomesa.” Yesu evwilile uze lunga keke mwomwo apwile nakuyanda nakwivwa kukola, kaha afwililile kumukafwa. Ngocho olwele livoko lyenyi nakukwata uze lunga nakwamba ngwenyi: “Ngunasake vene. Toma.” Kaha yize mbumba yamufumine. (Mako 1:40-42) Achishinganyeke omu evwile uze lunga kumuchima.
APWILENGA LIKA WAKUSHISHIKA KULI ISE
20, 21. Yesu atuhana ngachilihi chakutalilaho chamwaza chakwononoka kuli Kalunga?
20 Yesu atuhana chakutalilaho chamwaza chakwononoka kuli Kalunga. Numba tuhu amwene vihuli vyavivulu nakumwimanyina nakole, oloze atwalileho lika kupwa wakushishika kuli Ise. Chakutalilaho, Yesu kalingile shiliko omu vamwesekele kuli Satana. (Mateu 4:1-11) Vausoko wenyi vamwe kavafwelelele ngwavo apwile Meshiyako, kaha vamwambile ngwavo “nazaluka.” Oloze ikiye atwalileho lika kuzata milimo yaKalunga. (Mako 3:21) Omu vaka-kole jenyi vapwile nakumuyanjisa, kalingile sambanjingako. Oloze atwalileho lika kupwa wakushishika kuli Kalunga.—WaPetulu 1, 2:21-23.
21 Numba tuhu Yesu vamuyanjishile nakumujiha mujila yayipi, oloze atwalileho lika kupwa wakushishika kuli Yehova. (Tanga Wavaka-Fwilipi 2:8.) Achishinganyeke vyuma ahichilemo halikumbi lize afwile. Vamukashile, nakumuvangijikila kuli vinjiho vamakuli ngwavo nasaula Kalunga, nakumuhana mulonga kuli vaka-kuyula vavapi, nakumutoleka kuvatu, nakumuyanjisa kuli maswalale, nakumupapalila hachitondo. Kahomu apwile kwakamwihi nakufwa, ahanjikile ngwenyi: “Vyuma vyosena vinatesamo jino.” (Yowano 19:30) Oloze omu mwahichile makumbi atatu kufuma hakufwa chenyi, Yehova amusangwile nakumuhana mujimba wakushipilitu. (WaPetulu 1, 3:18) Kahomu mwahichile vyalumingo vyavindende, akindulukile mwilu ‘nakutwama kulivoko lyachilyo lyaKalunga’ nakuvandamina Kalunga amutongole kupwa Mwangana.—WavaHepeleu 10:12, 13.
22. Kushishika chaYesu kuli Ise chatulingisa tupwenga nalutalililo muka?
22 Kushishika chaYesu kuli Ise chikiko chatulingisa tupwenga nalutalililo lwakukayoya haya myaka yosena mupalachise hano hamavu ngana muze Yehova ajinyine. Mukapetulu nakavangizaho, natushimutwila omwo kufwa chaYesu chatukafwa tukayoye haya myaka yosena.
^ par. 11 Yehova vamuvuluka ngwavo Setu mwomwo ikiye Tengi. (Isaya 64:8) Yesu vamuvuluka ngwavo MwanaKalunga mwomwo vamutengele kuli Yehova. Vangelo naAlama vavavuluka navakiko ngwavo vana vaKalunga.—Yopa 1:6; Luka 3:38.
