Twafwelela ngwetu nayenu mweji kwivwanga kuwaha kutambula mujimbu wamwaza. Oloze kuli mujimbu wamwaza chikuma uze mwatela kwivwa enu natanga yenu.

Mujimbu kanou wamwaza watwama muMbimbiliya. Kushikulu, Tengi wamelu namavu, Yehova Kalunga, alwezele vatu vasoneke Mbimbiliya. Mumukanda uno, natushimutwila hamikanda yiwana yamuMbimbiliya yize yatwama namujimbu wamwaza twatela kwivwa tuvosena. Mikanda kaneyi yiwana yatwama namajina avatu vaze Kalunga ahwiminyine vayisoneke. Mikanda kana shina Mateu, naMako, naLuka naYowano.

Vatu vavavulu vayivuluka ngwavo Mikanda yaMujimbu Wamwaza. Kaha nawa yahanjika hamujimbu wamwaza wakuvuluka Yesu. Mikanda kaneyi yasolola nge Kalunga mwakalwila vatu kuhichila muli Yesu, kaha ikiye hakupwa Mwangana waWangana waKalunga wamwilu, mwakakisula vatu vosena vaze vafwelela muli ikiye.—Mako 10:17, 30; 13:13.

Pamo munahase kuhuhwasana ovyo Kalunga ahwiminyinyine vatu vawana vasoneke mujimbu wakuyoya chaYesu nakunangula chenyi.

Hakusoneka vyuma ahanjikile Yesu navize alingile mumikanda yiwana yakulihandununa chikwechi nganyo yayinene chikuma. Chakutalilaho, achishinganyekenu malunga vawana vanemana kuli muka-kunangula uze aya fuma. Kulutwe lwamuka-kunangula kunemana lunga muka-kutambula mitelo. Kaha kuchilyo chenyi kunemana lunga uze apwa chimbuke. Kaha kuchimoswe kunemana lunga muka-kuta vaishi, kaha nawa hisepa lyayou muka-kunangula. Hanyima yenyi hanemana lunga wamuchiwana ou ali nakutala vyuma vili nakusoloka, oku nawa ikiye kanyike hali ava malunga vosena. Malunga vosenava vawana hivatu vakushishika, kaha mutu himutu ali noho nahake muchima wenyi. Nge mutu himutu mwasoneka mujimbu wavyuma nahanjika muka-kunangula navize nalingi, kaha mijimbu kaneyi nayilihandununa muvyuma mwashindakanya mutu himutu. Nge natuhunanana hamijimbu yosena yiwana, nakwivwishisa jijila jakulisezaseza vanayisonekelamo, kaha natutachikiza kanawa vyuma ahanjikile nakulinga uze muka-kunangula. Echi chakutalilaho chinasolola omu tunahase kunganyala kumijimbu kaneyi yiwana yakulihandununa yakuyoya chaMuka-kunangula Wamunene, Yesu.

Muchakutalilaho tunavuluka, muka-kutambula mitelo mwasaka evwise kuwaha vatu vakuchisemwa  chavaYuleya. Ngocho, mwasoneka vyuma nahanjika muka-kunangula nakulinga, mujila yize nayikafwa vaYuleya. Chimbuke nawa mwavuluka omu muka-kunangula okilenga vaka-kuviza navitonji, ngocho vyuma vimwe vize asonekanga muka-kutambula mitelo, ikiye keshi kuvisonekako chipwe mwavisoneka mujila yeka. Kaha sepa lyamuka-kunangula mwashindakanya havilinga vyenyi nomu eji kwivwanga. Uze kanyike nawa mwasoneka mujimbu wenyi mukavatu, mujila yayashi. Chipwe ngocho, mujimbu wamutu himutu unapu wakwoloka. Chakutalilaho kanechi chinasolola omu mijimbu yosena yiwana yakuvuluka kuyoya chaYesu yinahase kutukafwa twivwishise kanawa milimo yenyi, nakunangula chenyi namuchima wenyi.

Chapwa chakwoloka vatu kuhanjika ngwavo ‘Mujimbu Wamwaza Asonekele Mateu’ chipwe ‘Mujimbu Wamwaza Asonekele Yowano.’ Mwomwo mutu himutu, asonekele “mujimbu wamwaza waYesu Kulishitu.” (Mako 1:1) Chipwe ngocho, kwatwama kaha mujimbu wamwaza umwe wakuvuluka Yesu uze vatusonekela mumikanda yiwana.

Vatu vavavulu vaze valinangula Mazu aKalunga vanakekesanga mijimbu yatwama mumukanda waMateu, naMako, naLuka naYowano nakuwana oho yalihandunwina noho yalitombwela. Kafwe mumwaka wa 170 C.E., muka-kusoneka wamuSulya, Tatian esekele kulinga vene ngocho. Awanyine nge mikanda kaneyi yiwana yapwa yakwoloka, kaha nawa vayihwima kuli Kalunga. Ngocho asonekele mukanda vavuluka ngwavo Diatessaron uze watwama namijimbu yakuyoya chaYesu namilimo azachilenga.

Ou mukanda wakwamba ngwavo Yesu Ikiye Jila, Ikiye Muchano, Ikiye Kuyoya naukiko vanausoneka mujila yoyimwe, oloze jila kana yakwoloka chikuma. Makumbi ano tunevwishisa kanawa mwalumbunukila upolofweto waYesu wauvulu navifwanyisa azachishile. Vyuma kanevi vyasolola omu vyalumbunukila vyuma ahanjikile Yesu navize alingile, nomu vyasolokele kweseka nomu vyalikavangijilile. Vaka-kuvumbwojola vyuma vyakushikulu vanahanjika havyuma vimwe vize vyalitombola navyuma vize vashinganyekele navaka-kusoneka mikanda kaneyi. Chipwe ngocho, etu vatu katwatachikiza munona munona omu vyalikavangijilile vyuma vimweko. Oloze mukanda uno waYesu Ikiye Jila, Ikiye Muchano, Ikiye Kuyoya unasolola mijimbu kana mujila yakulonga.

Omu namulivwisa kuwaha kutanga mukanda uno, esekenu kushinganyeka hamujimbu waulemu vanamisonekela enu natanga yenu. Anukenu ngwenu, Yesu Kulishitu alwezele kaposetolo Tomase ngwenyi: “Ami yami jila, yami muchano, yami kuyoya. Mutu naumwe wauchi mweza kuli Tata kuvanga ahichile muli ami.”—Yowano 14:6.

Mukanda uno waYesu Ikiye Jila, Ikiye Muchano, Ikiye Kuyoya naumikafwa mutachikize kanawa ovyo Yesu apwila chikupu “jila.” Tunahase kuhanjika naYehova Kalunga mukulomba kuhichila kaha muli ikiye. Kaha nawa vatuwanyishile naKalunga kuhichila muli Yesu. (Yowano 16:23; Wavaka-Loma 5:8) Ngocho tunahase kupwa nausoko wamwaza naKalunga kuhichila kaha muli ikiye.

Yesu ikiye nawa “muchano.” Ahanjikilenga muchano nakutwama kweseka namuchano mujila yakwoloka. Ateselemo upolofweto wauvulu wamuMbimbiliya uze wapwile “‘eyo’ kuhichila muli ikiye.” (Wavaka-Kolinde 2, 1:20; Yowano 1:14) Upolofweto kana weji kutukafwanga tumone mulimo wenyi waunene muvyuma ajina Kalunga.—Kusoloka 19:10.

Kaha nawa Yesu Kulishitu ikiye “kuyoya.” Yesu ahanyine ndando yakusokola hakusuula kuyoya chenyi chakukupuka mwosena namanyinga enyi. Echi chatukafwa tupwenga ‘nakuyoya chamwenemwene,’ chikiko “kuyoya chahaya myaka yosena.” (WaChimoteu 1, 6:12, 19; Wavaka-Efwesu 1:7; WaYowano 1, 1:7) Kulutwe Yesu mwakasolola nawa nge ikiye “kuyoya” hakusangula vatu vavavulu vaze vafwa nakuvahana lutalililo lwakuyoyela muPalachise haya myaka yosena.—Yowano 5:28, 29.

Shikaho, tuvosena twatela kusakwilila mulimo atwama nawo Yesu muvyuma ajina Kalunga. Tunafwelela ngwetu namulivwisa kuwaha kulinangula vyavivulu hali Yesu uze ‘apwa jila, apwa muchano, apwa kuyoya.’